Tihlabelelo 71:1-24
71 Awu Jehova, ngikhosele kuwe.
Shengatsi ngingete ngahlazeka.+
2 Ngisindzise futsi ungikhulule, ngobe wena ulungile.
Sondzeta indlebe yakho kimi* futsi ungisindzise.+
3 Bani lidvwala leliphephileLengingahlale ngiya kulo.
Ngisindzise,Ngobe wena ulidvwala lami nendzawo yami levikelekile.+
4 Awu Nkulunkulu wami, ngikhulule esandleni salomubi,+Ungikhulule esandleni salongicindzetelako.
5 Ngobe wena Nkhosi Lephakeme Jehova, ulitsemba lami;Kusukela ngisesemusha bengetsembele kuwe.+
6 Ngetsembela kuwe kusukela ngitalwa;Nguwe lowangikhipha esiswini samake.+
Kungako ngihlale ngikudvumisa.
7 Bantfu labanyenti bayamangala nababona tintfo letenteke kimi,Ngobe wena uyindzawo yami yekukhosela levikelekile.
8 Umlomo wami uhlale ukudvumisa;+Ngikhuluma ngebuhle bakho onkhe malanga.
9 Ungangilahli nasengigugile;+Ungangishiyi nasengiphelelwa ngemandla.+
10 Titsa tami tingikhuluma kabi,Nalabo labafuna kungibulala bahlangene ngami,+
11 Batsi: “Nkulunkulu umshiyile.
Asimgijimiseni futsi simbambe, ngobe kute lotamsindzisa.”+
12 Awu Nkulunkulu, ungabi khashane nami.
Phutfuma ungisite Nkulunkulu wami.+
13 Shengatsi labo labamelene namiBangahlazeka futsi bashabalale.+
Shengatsi labo labafuna ngehlelwe yinhlekeleleBangadliwa ngemahloni futsi bajabhe.+
14 Kodvwa mine ngitawuchubeka ngilindzele wena;Ngitakudvumisa kakhulu kunakucala.
15 Umlomo wami utawukhuluma ngekulunga kwakho,+Onkhe malanga utawukhuluma ngetintfo lotentile kuze usisindzise,Nanobe titinyenti kakhulu kutsi ngingatibala.+
16 Ngitawuhamba ngikhuluma ngemisebenti yakho lemikhulu,Awu Nkhosi Lephakeme Jehova;Kulunga kwakho kuphela lengitawukhuluma ngako.
17 Awu Nkulunkulu, wena ungifundzise kusukela ngisesemusha,+Futsi nanyalo ngisayimemetela imisebenti yakho lemihle.+
18 Awu Nkulunkulu, ungangilahli ngisho nobe sengigugile futsi senginetimvu enhloko,+Khona ngitawutjela situkulwane lesitako ngemandla akho,Futsi ngitjele tonkhe titukulwane letiseta ngebukhulu bakho.+
19 Awu Nkulunkulu, kulunga kwakho kukhulu kakhulu;+Wente tintfo letinkhulu;Ngubani nje lofana nawe Nkulunkulu?+
20 Ngisho nobe ungente ngacindzeteleka kakhulu futsi ngehlelwa tinhlekelele,+Phindze unginikete emandla;Ngikhiphe ekujuleni kwemhlaba.+
21 Shengatsi ungangenta ngiphindze ngihlonipheke,Ungivikele futsi ungidvudvute.
22 Ngitawubese ngiyakudvumisa ngetinsimbi temculo letinetintsamboNgobe wena Nkulunkulu wami wetsembekile.+
Ngitawuhlabela ngikudvumise ngelihabhu,Wena Longcwele waka-Israyeli.
23 Ngitawumemeta ngijabulile nangihlabela ngikudvumisa,+Ngobe wena ungisindzisile.+
24 Ngitawukhuluma* ngekulunga kwakho onkhe malanga,+Ngobe batawudliwa ngemahloni futsi bahlazeke labo labafuna ngehlelwe yinhlekelele.+
