Tihlabelelo 38:1-22
Ingoma yaDavide lokufanele ibe sikhumbuto.*
38 Awu Jehova, ungangekhuti ube utfukutsele,Nobe ungeluleke ngelulaka.+
2 Ngobe imicibisholo yakho ingihlabe yangena,Nesandla sakho singicindzetele.+
3 Umtimba wami wonkhe uyagula* ngobe wena ungitfukutselele.
Sono sami singenta ngingabi nekuthula.*+
4 Ngobe tono tami tiyangengama;+Angisakhoni kutetfwala, setifana nemtfwalo lowesindzako.
5 Emanceba ami sekayanuka futsi ayancincaNgenca yebulima bami.
6 Ngicindzetelekile futsi ngidvumateke kakhulu;Lilanga lonkhe ngiva buhlungu.
7 Ngiyasha ngekhatsi kimi;*Umtimba wami wonkhe uyagula.+
8 Ngidvubutekile futsi ngephukile emoyeni;Inhlitiyo yami legcwele lusizi ingenta ngikhale kabuhlungu.*
9 Awu Jehova, wena utati tonkhe tifiso tami,Futsi kububula kwami akukafihleki kuwe.
10 Inhlitiyo yami ishayela etulu, emandla ami asaphelile,Angisaboni nasemehlweni.*+
11 Bangani bami nabomakhelwane bami sebayangibalekela ngenca yemanceba ami,Futsi bantfu lengibejwayele sebayatehlukanisa nami.
12 Bantfu labafuna kungibulala bangibekela tingibe;Labo labafuna kungilimata bakhuluma kabi ngami;+Lilanga lonkhe bakha emacebo ekukhohlisa.
13 Kodvwa njengemuntfu longeva etindlebeni, bengingabalaleli;+Nanjengemuntfu longakhoni kukhuluma, bengingawuvuli umlomo wami.+
14 Sengifanana nemuntfu longeva etindlebeni,Nalongakhoni kukhuluma ativikele.
15 Awu Jehova, mine ngalindzela wena,+Futsi wena Jehova Nkulunkulu wami+ wangiphendvula.
16 Ngobe ngitsite: “Shengatsi bangete bajabula ngekuhlupheka kwamiNobe bangichoshele nangishelela.”
17 Besekusele kancane kutsi ngiwe,Bengihlale ngiva buhlungu.+
18 Ngalivuma liphutsa lami;+Sono lebengisentile besingikhatsata.+
19 Kodvwa titsa tami tinemdlandla* futsi tinemandla,*Sebanyenti labangitondzela lite.
20 Lokuhle lengikwentile bakubuyisela ngalokubi;Bebamelana nami nangifuna kwenta lokuhle.
21 Awu Jehova, ungangilahli.
Awu Nkulunkulu, ungahlali ukhashane nami.+
22 Awu Jehova msindzisi wami,Phutfuma utongisita.+
Imibhalo lengentansi
^ Nobe “lesikhumbuto.”
^ NgesiHebheru kutsi, “Sekute lapho ngiphile khona enyameni yami.”
^ NgesiHebheru kutsi, “senta ematsambo ami angabi nekuthula.”
^ NgesiHebheru kutsi, “Lukhalo lwami luyavutsa.”
^ Nobe “ngicume.”
^ NgesiHebheru kutsi, “Kukhanya kwemehlo ami akusakhanyi.”
^ NgesiHebheru kutsi, “tiyaphila.”
^ Kungaphindze kubekwe ngekutsi, “Kodvwa titsa tami letingitondzela lite setinyenti.”
