Sembulo Lesembulelwa Johane 9:1-21
9 Ingilosi yesihlanu nayo yashaya licilongo layo.+ Ngabona inkhanyeti leyawela emhlabeni isuka ezulwini, yanikwa sikhiya semgodzi longenamkhawulo.+
2 Yavula lomgodzi, kwaphuma intfutfu lenjengeyemlilo lomkhulu. Lilanga kanye nemoya kwaba mnyama+ ngenca yalentfutfu leyaphuma kuwo.
3 Kulentfutfu kwaphuma sikhonyane sehlela etikwemhlaba;+ sanikwa emandla lafanana newabofecela basemhlabeni.
4 Satjelwa kutsi singakulimati lokumila emhlabeni, nanobe ngutiphi titjalo letiluhlata, nanobe ngusiphi sihlahla, kodvwa silimate kuphela bantfu labete luphawu lwaNkulunkulu emabuntini abo.+
5 Lesikhonyane savunyelwa kutsi sibahluphe tinyanga letisihlanu kodvwa singababulali, futsi lokuhlushwa kwabo bekufana nebuhlungu umuntfu labuvako nakasutelwa ngufecela.+
6 Ngalawo malanga, bantfu bayawukufuna kufa kodvwa ngeke baze bakutfole, batawufisa kutsi bafe kodvwa kufa kutababalekela.
7 Lesikhonyane besinjengemahhashi lalungiselwe imphi;+ etinhloko taso bekunalokutsite lokunjengemichele yeligolide, nebuso baso bebunjengebuso bebantfu,
8 kodvwa tinwele taso betinjengetinwele tebantfu labasikati. Ematinyo aso bekanjengewemabhubesi;+
9 besifake tivikelo tesifuba letinjengetivikelo tesifuba tensimbi. Umsindvo wetimphiko taso bewunjengemsindvo wetinkalishi letidvonswa ngemahhashi lagijimela emphini.+
10 Besiphindze sibe nemisila lenetindvonsi njengabofecela; imisila yaso beyinemandla ekulimata labantfu tinyanga letisihlanu.+
11 Lesikhonyane sinenkhosi, lokuyingilosi yemgodzi longenamkhawulo.+ NgesiHebheru ibitwa ngekutsi ngu-Abhadoni,* kodvwa ngesiGriki ibitwa ngekutsi ngu-Apholiyoni.*
12 Sewendlulile maye wekucala. Emvakwaletintfo kuseta bomaye lababili.+
13 Ingilosi yesitfupha+ nayo yashaya licilongo layo.+ Ngeva livi lelivela etimphondvweni teli-al’thare leliligolide+ lelisembikwaNkulunkulu,
14 likhuluma nalengilosi yesitfupha lebeyinelicilongo litsi: “Chacha letingilosi letine letiboshwe emfuleni lomkhulu iYufrathe.”+
15 Letingilosi letine letilungiselwe li-awa, lilanga, inyanga, nemnyaka, tachachwa kuze tibulale incenye yesitsatfu yebantfu.
16 Ngeva linani lelibutfo lalabagibele emahhashi, bebangu-200 000 000.*
17 Kulombono ngulena indlela lengawabona angiyo lamahhashi nalabo lebebagibele kuwo: Lalabawagibele bebafake tivikelo tesifuba letinalokubovu njengemlilo, lokuluhlata njengesibhakabhaka, nalokumtfubi, futsi tinhloko talamahhashi betinjengetinhloko temabhubesi,+ emlonyeni wawo bekuphuma umlilo, intfutfu kanye nesibabule.
18 Incenye yesitsatfu yebantfu yabulawa nguletinhlupho letintsatfu, lokungumlilo, intfutfu kanye nesibabule lebesiphuma emilonyeni yawo.
19 Emandla alamahhashi asemilonyeni nasemisileni yawo; ngobe imisila yawo injengetinyoka futsi inetinhloko, ngiyo lalimata ngayo.
20 Kodvwa bonkhe bantfu labangazange babulawe nguletinhlupho abaphendvukanga emisebentini yabo; abazange bayekele kukhonta emadimoni netithico teligolide, telisiliva, telitfusi, telitje netelugodvo, lokutintfo letingaboni, letingeva naletingahambi.+
21 Abaphendvukanga etonweni tabo, letifaka ekhatsi kubulala, kusebentelana nemimoya, kugwadla* nekweba.
Imibhalo lengentansi
^ Lokusho kutsi “Umbhubhisi.”
^ Lokusho kutsi “Imbhubhiso.”
^ Nobe “bebangu-20 000 lophindvwe kangu-10 000.”
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
