Sembulo Lesembulelwa Johane 2:1-29
2 “Bhalela ingilosi+ yelibandla lase-Efesu+ utsi: Nati tintfo latishoko loyo lonetinkhanyeti letingu-7 esandleni sakhe sangesekudla, lohamba emkhatsini wetintsi tetibane letingu-7 teligolide:+
2 ‘Ngiyatati tento takho, ngiyakwati kukhandleka nekucinisela kwakho, kutsi awubabeketeleli bantfu lababi, nekutsi ubahlolisisile labo labatsi babaphostoli+ babe bangasibo futsi watfola kutsi babacambimanga.
3 Uyacinisela uphindze ubeketele ngenca yeligama lami,+ futsi awukapheli nemandla.+
4 Kodvwa naku lokungangijabulisi ngawe, kutsi sewute lutsandvo lobewunalo ekucaleni.
5 “‘Ngako-ke khumbula kutsi uwe kuphi, uphendvuke,+ futsi wente tintfo lebewutenta ekucaleni. Nawungaphendvuki,+ ngitawufika ngisuse lutsi lwakho lwesibane+ endzaweni yalo.
6 Kepha-ke, naku lokuhle ngawe, kutsi uyatitondza tento telihlelo laNikholawu+ lengititondzako.
7 Lonendlebe akeve loko umoya lokushoko emabandleni:+ Loncobako+ ngitamvumela kutsi adle esihlahleni sekuphila+ lesisepharadisi laNkulunkulu.’
8 “Ingilosi yelibandla laseSmuna yona yibhalele utsi: Nati tintfo latishoko ‘loyo longuWekucala neWekugcina,’+ lowafa waphindze wavuka:+
9 ‘Ngiyalwati lusizi kanye nekweswela kwakho, nanobe kunjalo unjingile+—ngiyabati nalabo labakuhlambalatako futsi labatibita ngekutsi bangemaJuda kodvwa ecinisweni babe bangasiwo, kepha balisinagoge laSathane.+
10 Ungakwesabi kuhlupheka losetawubhekana nako.+ Develi utawuchubeka afaka labanye benu emajele kuze nilingwe ngalokugcwele, futsi nihlupheke emalanga langu-10. Hlala wetsembekile kuze kube sekufeni, mine ngitakunika umchele wekuphila.+
11 Lonendlebe akeve+ loko umoya lokushoko emabandleni: Loncobako+ ngeke aze akubone kufa kwesibili.’+
12 “Ingilosi yelibandla lasePhegamu yona yibhalele utsi: Nati tintfo latishoko loyo lonenkemba lekhaliphako, lendze, futsi lesika nhlangotsi totimbili:+
13 ‘Ngiyati kutsi uhlala kuphi, uhlala lapho kunesihlalo sebukhosi saSathane khona; kodvwa uyachubeka ubambelele egameni lami,+ awuzange ukuphike kukholwa lonako kimi+ ngisho nangemalanga a-Antipasi, longufakazi wami lowetsembekile,+ lowabulawa+ embikwenu, lapho kuhlala khona Sathane.
14 “‘Kodvwa-ke, kunetintfo letimbalwa letingangijabulisi ngawe, kutsi lapho kuwe kunebantfu labalalela imfundziso yaBhalamu,+ lowafundzisa Bhalaki+ kutsi awabekele lugibe emadvodzana aka-Israyeli, kuze adle tintfo letinikelelwe tithico, futsi agwadle.*+
15 Kuphindze kube nalabo labalalela imfundziso yelihlelo laNikholawu.+
16 Ngako-ke phendvuka. Nawungenti njalo, mine ngitawuta kuwe ngekushesha, futsi ngilwe nabo ngenkemba lendze lesemlonyeni wami.+
17 “‘Lonendlebe akeve loko umoya lokushoko emabandleni:+ Loncobako+ ngitamnika lenye yemana lefihliwe,+ ngimnike nelitje lelimhlophe, futsi kulelitje kubhalwe libito lelisha lokute umuntfu lolatiko ngaphandle kwaloyo lonikwa lona.’
18 “Ingilosi yelibandla laseThiyathira+ yona yibhalele utsi: Nati tintfo letishiwo yiNdvodzana yaNkulunkulu, lenemehlo lanjengelilangabi lelikhulu lemlilo,+ netinyawo letinjengelitfusi lelicwebetelako:+
19 ‘Ngiyatati tento takho, lutsandvo, kukholwa, umsebenti, nekucinisela kwakho, nekutsi tintfo lotenta nyalo tiyatendlula leto lobewutenta ekucaleni.
20 “‘Kodvwa-ke naku lokungangijabulisi ngawe, kutsi uyambeketelela lomfati lokutsiwa nguJezebeli,+ lotibita ngekutsi ungumphrofethikati, futsi lodukisa tinceku tami aphindze atifundzise kugwadla*+ kanye nekudla tintfo letinikelelwe tithico.
21 Ngamnika sikhatsi sekutsi aphendvuke, kodvwa akafuni kuphendvuka kulobugwadla* bakhe.
22 Sekusedvute kutsi ngimbangele kugula lokukhulu, nekutsi labo labaphinga naye ngibaletsele kuhlupheka lokukhulu, ngaphandle-ke nangabe batawuphendvuka etentweni takhe.
23 Nebantfwana bakhe ngitababulala ngesifo lesingumshayabhuce, kuze onkhe emabandla atowati kutsi mine ngihlola imicabango lejulile* kanye netinhlitiyo, nekutsi ngitawubuyisela umuntfu ngamunye kuye ngaloko lakwentile.+
24 “‘Kodvwa-ke, kini nine labanye labaseThiyathira, nine nonkhe leningazange niyilandzele lemfundziso, naleningazange nitati letintfo letibitwa ngekutsi “tintfo letijulile letivela kuSathane,”+ ngitsi: Kute lomunye umtfwalo lenginetfwesa wona.
25 Kuphela nje bambelelani kuloko leninako ngize ngifike.+
26 Loncobako nalolingisa loko lengikwentako kuze kube sekupheleni ngitamnika ligunya etikwetive,+
27 futsi utawelusa bantfu ngentfonga yensimbi+ kuze batophihlika babe ticucu njengesitja selubumba, njengobe nje nami ngemukele leligunya kuBabe.
28 Ngitamnika nenkhanyeti yekusa.+
29 Lonendlebe akeve loko umoya lokushoko emabandleni.’
Imibhalo lengentansi
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Nobe “imiva lejulile.” NgesiGriki kutsi, “tinso.”
