Sembulo Lesembulelwa Johane 10:1-11
10 Ngaphindze ngabona lenye ingilosi lenemandla yehla ivela ezulwini yembetse lifu, etikwenhloko yayo bekunemushi wenkosazana, buso bayo bebunjengelilanga,+ imilente* yayo beyifana netinsika temlilo,
2 nasesandleni sayo bekunemculu lomncane lobewuvuliwe. Yabeka lunyawo lwayo lwangesekudla etikwelwandle, kodvwa lunyawo lwayo lwangesencele yalubeka etikwemhlaba,
3 futsi yamemeta ngelivi lelikhulu lelinjengekubhodla kwelibhubesi.+ Ngesikhatsi imemeta, kwevakala emavi ekudvuma kwelitulu lokungu-7.+
4 Ngesikhatsi lokudvuma kwelitulu lokungu-7 kukhuluma, besengilungele kubhala, kodvwa ngeva livi lelivela ezulwini+ litsi: “Tivale tintfo letikhulunywe ngulokudvuma kwelitulu lokungu-7, ungatibhali phansi.”
5 Lengilosi lengayibona ime etikwelwandle nasetikwemhlaba yaphakamisela sandla sayo sangesekudla ezulwini,
6 yafunga ngaLoyo lophila phakadze naphakadze,+ lowadala lizulu netintfo letikulo, umhlaba netintfo letikuwo, kanye nelwandle netintfo letikulo,+ yatsi: “Ngeke kusephuta.
7 Kodvwa kutawutsi ngemalanga lapho ingilosi yesi-7+ seyitawushaya licilongo layo,+ imfihlo lengcwele+ yaNkulunkulu, letindzaba letimnandzi latimemetela etincekwini takhe baphrofethi,+ itawupheleliswa.”
8 Ngaphindze ngeva lelivi lelivela ezulwini+ litsi kimi: “Hamba utsatse lomculu lovulekile losesandleni salengilosi leme etikwelwandle nasetikwemhlaba.”+
9 Ngako ngaya kulengilosi ngatsi ayinginike lomculu lomncane. Yona yatsi kimi: “Wutsatse uwudle,+ utawubaba esiswini sakho, kodvwa emlonyeni wakho utawunongotela njengeluju.”
10 Ngawutsatsa lomculu lomncane esandleni salengilosi, ngawudla,+ futsi emlonyeni wami wanongotela njengeluju,+ kodvwa nasengiwudlile wababa esiswini sami.
11 Ngeva emavi latsi: “Kufanele uphindze uphrofethe mayelana nebantfu, tive, tilwimi kanye nemakhosi lamanyenti.”
Imibhalo lengentansi
^ NgesiGriki kutsi, “tinyawo.”
