Kulandzisa KwaMatewu 21:1-46
21 Batsi nasebasondzela eJerusalema, befika eBhethifage, eNtsabeni Yemincumo, futsi Jesu watfuma bafundzi lababili,+
2 watsi kubo: “Hambani niye kulela dolobha, nitawutsi nanifika khona nikhandze imbongolo ikhungwe nelitfole layo; nibotikhumula nite nato lapha.
3 Nakunemuntfu losho lokutsite kini, nibotsi kuye: ‘INkhosi iyatidzinga.’ Lomuntfu utawubese uninika tona ngekushesha.”
4 Loku kwenteka kute kugcwaliseke loko lokwashiwo ngumphrofethi nakatsi:
5 “Tjelani iSiyoni* nitsi: ‘Inkhosi yakho iyeta kuwe+ futsi inemoya lophansi,*+ igibele imbongolo, yebo litfole lembongolo.’”+
6 Ngako labafundzi bahamba benta loko Jesu lebekabatjele kona.+
7 Bayiletsa lembongolo nelitfole layo, futsi bafundzi bakhe bagaca tingubo tabo tangetulu etikwato, Jesu wase ugibela kulelitfole.+
8 Labanyenti balabantfu batsatsa tingubo tabo tangetulu batendlala emgwacweni,+ kantsi labanye bakha emacembe etihlahla, bawabeka khona lapho emgwacweni.
9 Ngetulu kwaloko, sicumbi lebesimlandzela nalebesihamba embikwakhe besimemeta sitsi: “Siyacela, sindzisa iNdvodzana yaDavide!+ Ubusisiwe loyo lota ngelibito laJehova!*+ Sicela umsindzise, wena losezulwini!”+
10 Ngako watsi nakangena eJerusalema, kwanyakatela lonkhe lidolobha, bantfu batsi: “Ngubani lona?”
11 Lesicumbi sebantfu satsi: “Lona nguJesu umphrofethi+ lovela eNazaretha yaseGalile!”
12 Jesu wangena ethempelini wacosha bonkhe lebebatsenga nalebebatsengisa, waketula nematafula alabo lebebashintja timali kanye netitulo talabo lebebatsengisa ematuba.+
13 Wase utsi kubo: “Kubhaliwe kutsi: ‘Indlu yami kutawutsiwa yindlu yemthantazo,’+ kodvwa nine niyenta indlu yetigebengu.”+
14 Kwabese kufika bantfu labangaboni emehlweni nalabachutako, futsi wabelapha.
15 Baphristi labakhulu netati temtsetfo batfukutsela ngesikhatsi babona letimangaliso lebekatenta, nanabeva labafana lebebamemeta ethempelini batsi: “Siyacela, sindzisa iNdvodzana yaDavide!”+
16 Base batsi kuye: “Uyeva yini kutsi batsini?” Jesu watsi kubo: “Yebo ngiyeva. Anizange niwafundze yini lamavi latsi: ‘Wena wente kutsi bantfwana netinswane bakudvumise’?”+
17 Wase uyabashiya, wahamba kulelidolobha waya eBhetani futsi wafike walala khona.+
18 Ekuseni kakhulu nasekabuyela edolobheni, wativa alambile.+
19 Wabona sihlahla semkhiwa eceleni kwendlela futsi waya kuso, kodvwa akazange atfole lutfo ngaphandle kwemacembe nje kuphela.+ Watsi kuso: “Akungabe kusavela sitselo kuwe kuze kube phakadze.”+ Lesihlahla sabuna ngaso leso sikhatsi.
20 Nabakubona loku, bafundzi bakhe bamangala, batsi: “Kwentiwe yini kutsi lesihlahla semkhiwa sivele sibune?”+
21 Jesu wabaphendvula watsi: “Ngicinisile ngitsi kini: Nangabe ninekukholwa futsi ningangabati, ngeke nigcine ngekwenta loku lengikwente kulesihlahla semkhiwa, kodvwa ngisho ningatsi kulentsaba: ‘Suka lapha ujikeke elwandle,’ kutawuvele kube njalo.+
22 Tonkhe tintfo lenitithantazelako, nitawutitfola naninekukholwa.”+
23 Nasekangenile ethempelini, kwefika baphristi labakhulu nemadvodza lamadzala ngesikhatsi asafundzisa, batsi kuye: “Letintfo utenta ngaliphi ligunya, futsi ngubani lokunike leligunya?”+
24 Jesu wabaphendvula watsi: “Nami ngitanibuta intfo yinye. Nangabe ningitjela, nami ngitanitjela kutsi ngilitsatsaphi ligunya lekwenta letintfo:
25 Johane abelitsetsephi ligunya lekubhabhatisa? Abelitsetse ezulwini yini nobe kubantfu?” Base bacala kukhuluma bodvwa batsi: “Nasitsi: ‘Ezulwini,’ utawutsi: ‘Animkholwanga ngani-ke?’+
26 Kodvwa nasitsi: ‘Kubantfu,’ siyasesaba lesicumbi ngobe sitsatsa Johane njengemphrofethi.”
27 Ngako bamphendvula batsi: “Asati.” Jesu wase utsi kubo: “Nami-ke ngeke nginitjele kutsi ngilitsatsaphi ligunya lekwenta letintfo.
28 “Nicabangani? Lomunye umuntfu abenebantfwana lababili. Waya kulona wekucala watsi: ‘Mntfwanami, hamba uyewusebenta ensimini yami yemagilebisi lamuhla.’
29 Lomntfwana watsi kuye: ‘Ngeke ngiye.’ Kodvwa ngemuva kwaloko watisola wase uyaya.
30 Waya nakulowesibili wafike washo lokufanako. Yena wamphendvula watsi: ‘Ngitakuya Babe,’ kodvwa akazange aye.
31 Ngubani kulaba lababili lowente loko lobekufunwa ngubabe wakhe?” Batsi kuye: “Ngulona wekucala.” Jesu wase utsi: “Ngicinisile ngitsi kini: Batselisi netingwadla bangena embili kunani eMbusweni waNkulunkulu.
32 Ngobe Johane weta kini wanikhombisa indlela yekulunga kodvwa anizange nimkholwe. Nobe kunjalo, batselisi netingwadla bamkholwa,+ kepha ngisho nome nakubona loko, anizange nitisole futsi anizange nimkholwe.
33 “Nangu lomunye umfanekiso: Bekukhona umuntfu lowalima insimu yemagilebisi,+ wayibiyela, wagubha litje lekuhlutela liwayini, waphindze wakha nembhoshongo,+ futsi wayicashisela balimi wase uyahamba uya eveni lelikhashane.+
34 Nasekufika sikhatsi sekuvuna, watfumela tisebenti kutsi tiye kulabalimi tiyewulandza titselo takhe.
35 Kodvwa labalimi batibamba letisebenti, lesinye basishaya, lesinye basibulala, kantsi lesinye basigcoba ngematje.+
36 Waphindze watfumela letinye tisebenti letinyenti kunaleti tekucala, kodvwa benta lokufanako nakuto.+
37 Ekugcineni watfumela indvodzana yakhe, watsi: ‘Batayihlonipha lendvodzana yami.’
38 Kodvwa labalimi batsi nabayibona, bakhuluma bodvwa batsi: ‘Lena ngiyo indlalifa;+ wotani sitoyibulala kuze sitfole lifa layo!’
39 Bayibamba bayihudvulela ngephandle kwalensimu, bayibulala.+
40 Ngako-ke nasekabuya lomnikati walensimu utawubentani labalimi?”
41 Batsi kuye: “Njengobe bababi, utawubabulala ngesihluku* futsi lensimu yakhe utayicashisela labanye balimi labatamnika titselo nasekufika sikhatsi sato.”
42 Jesu wase utsi kubo: “Anizange nifundze yini emiBhalweni kutsi: ‘Litje lelaliwe bakhi seligucuke laba litje leliyinhloko.*+ Lelitje livela kuJehova,* futsi liyasikhanga’?+
43 Kungako ngitsi kini: UMbuso waNkulunkulu utawutsatfwa kini unikwe sive lesitsela titselo letifanele.
44 Umuntfu lowela etikwalelitje utawufihlika,+ naloyo leliwela kuye litamsila.”+
45 Baphristi labakhulu nebaFarisi batsi nabeva lemifanekiso babona kutsi usho bona.+
46 Nanobe bebafuna kumbamba,* kepha besaba lesicumbi sebantfu ngobe besimtsatsa njengemphrofethi.+
Imibhalo lengentansi
^ NgesiGriki kutsi, “indvodzakati yaseSiyoni.”
^ Nobe “imnene.”
^ Fundza Sandzisanchazo A5.
^ Nobe “ngesibhuku.”
^ NgesiGriki kutsi, “leliyinhloko lelisekoneni.”
^ Fundza Sandzisanchazo A5.
^ Nobe “kumbopha.”
