Kulandzisa KwaMakho 5:1-43
5 Babese bayefika ngesheya kwelwandle, endzaweni yemaGerasa.+
2 Watsi Jesu nakehla esikebheni, indvodza lebeyinelidimoni yeta kuye isuka emathuneni.
3 Beseyihlala khona, futsi kuze kube nguleso sikhatsi bonkhe bantfu bebehluleka ngisho nekuyibopha ngetinketane.
4 Beyivame kuboshwa ngetintsambo nangetinketane, kodvwa beyitincamula letinketane futsi naletintsambo beyitidzabula, kangangekutsi besekute namunye umuntfu lobekanemandla ekuyibamba.
5 Busuku nemini, beyihlale imemeta emathuneni nasetintsabeni, itisike nangematje.
6 Kodvwa yatsi nje nayibona Jesu achamuka, yagijima yafike yaguca embikwakhe.+
7 Ngemuva kwaloko yamemeta ngelivi lelikhulu yatsi: “Ufunani lapha Jesu, Ndvodzana yaNkulunkulu Losetikwako Konkhe? Ngicela ufunge Nkulunkulu kutsi ngeke ungihluphe.”+
8 Jesu abesolo atsi kulelidimoni: “Phuma kulendvodza.”+
9 Wase uyayibuta utsi: “Ungubani libito lakho?” Yamphendvula yatsi: “NginguSibanyenti, ngobe silibutfo.”
10 Ngako beyisolo imncenga kutsi angawacoshi lamadimoni kulelo live.+
11 Bekukhona umhlambi lomkhulu wetingulube+ lobewudla entsabeni.+
12 Ngako lamadimoni amncenga atsi: “Sitfumele kutsi siyongena kuletingulube.”
13 Jesu wawavumela. Ngako lamadimoni aphuma ayongena kuletingulube. Lomhlambi wetingulube letingaba ngu-2 000 wagijima wacondza eweni, wafike wagcumukela elwandle, wamita.
14 Belusi balomhlambi babaleka baya edolobheni nasemaphandleni bayobika, futsi bantfu beta batobona loko lobekwentekile.+
15 Befika kuJesu, babona lendvodza ihleti igcokile, seyiphilile nasengcondvweni, ngobe lamadimoni besekaphumile. Ngenca yaloko besaba kakhulu.
16 Labo lebebatibonele ngewabo babacocela ngalobekwenteke kulendvodza nakuletingulube.
17 Labantfu babese bancenga Jesu kutsi ahambe kulendzawo yabo.+
18 Njengobe Jesu agibela sikebhe, lendvodza yacela kuhamba naye.+
19 Kodvwa akazange avume, kunaloko watsi: “Hamba uye ekhaya kubantfu bakini, ubabikele ngako konkhe Jehova* lakwentele kona kanye nemusa lakwentele wona.”
20 Ngako lendvodza yahamba, yamemetela eDekhapholi* ngato tonkhe tintfo Jesu lebekayentele tona, futsi bonkhe bantfu bamangala.
21 Jesu waphindze wawelela ngesheya ngesikebhe. Sicumbi lesikhulu sebantfu sabutsana kuye, futsi yena bekaseceleni kwelwandle.+
22 Kweta lenye indvodza lebeyengamele lisinagoge, libito layo kunguJayiru, futsi yatsi nayimbona yeta kuye yafike yaguca embikwakhe.+
23 Beyisolo imncenga itsi: “Indvodzakati yami lencane igula kamatima.* Ngicela uhambe nami ufike uyibeke tandla+ kute ibe ncono futsi iphile.”
24 Ngako wahamba nayo. Sicumbi lesikhulu sebantfu samlandzela, futsi besimminyetela.
25 Bekukhona umfati lebesekuphele iminyaka lengu-12+ anesifo sekopha.+
26 Besekahambe bodokotela labanyenti, futsi loko bekumcindzetela kakhulu.* Besekasebentise konkhe labenako kodvwa angasitakali, kunaloko kugula bekuya embili.
27 Nakeva ngaJesu, weta wafike wahamba ngemuva kwesicumbi sebantfu, futsi watsintsa ingubo yaJesu yangetulu,+
28 ngobe abesolo atsi: “Nangingamane nje ngitsintse tingubo takhe tangetulu, ngitawuphila.”+
29 Lokopha kwavele kwaphela ngaleso sikhatsi, futsi weva emtimbeni wakhe kutsi welaphekile kulokugula.
30 Ngekushesha, Jesu weva kutsi emandla+ bekaphumile kuye, ngako wagucuka futsi wacalata ngakulesicumbi sebantfu watsi: “Ngubani lotsintse tingubo tami tangetulu?”+
31 Kodvwa bafundzi bakhe bamphendvula batsi: “Uyabona kutsi bantfu bakuminyetele, kodvwa utsi: ‘Ngubani longitsintsile?’”
32 Jesu wachubeka acalata kute abone kutsi ngubani lowente loku.
33 Lomfati wetfuka futsi wesaba, ngobe bekati kutsi kwentekeni kuye. Ngako weta kuJesu wafike waguca embikwakhe, wase umtjela lonkhe liciniso.
34 Jesu watsi kuye: “Ndvodzakati, kukholwa kwakho kukuphilisile. Hamba ngekuthula,+ ngobe sewuphilile ekuguleni kwakho.”+
35 Utsite asakhuluma, kweta lamanye emadvodza lebekasuka emtini walendvodza lebeyengamele lisinagoge, afike atsi: “Indvodzakati yakho seyifile. Ungabe usamhlupha uMfundzisi.”+
36 Jesu wakuva loko lebebakusho futsi watsi kulendvodza: “Ungesabi, kodvwa bani nekukholwa.”+
37 Jesu akazange avumele muntfu kutsi abalandzele ngaphandle kwaPhetro, Jakobe kanye naJohane umnakabo Jakobe.+
38 Ngako befika endlini yalendvodza, futsi Jesu wabona siphitsiphitsi lebesilapho nebantfu lebebakhala futsi balila kakhulu.+
39 Nasekangenile, Jesu watsi kubo: “Sani lesiphitsiphitsi, futsi nikhalelani? Lomntfwana akakafi, kodvwa ulele.”+
40 Nabeva loku bamhleka bulima. Kodvwa ngemuva kwekubakhiphela ngephandle, watsatsa batali balomntfwana nalabafundzi lebekete nabo, wangena lapho bekunalomntfwana khona.
41 Wafike wabamba sandla salomntfwana, watsi kuye: “Thalitha khumi,” lokusho kutsi: “Ntfombatana, ngitsi kuwe: ‘Vuka!’”+
42 Ngekushesha, lentfombatana yavuka yacala kuhamba. (Beyineminyaka lengu-12 budzala.) Ngaso leso sikhatsi batali balomntfwana bajabula kakhulu.
43 Kodvwa Jesu wabecwayisa* kutsi bangatjeli muntfu ngaloku,+ futsi watsi abaphe lomntfwana kudla.
Imibhalo lengentansi
^ Fundza Sandzisanchazo A5.
^ Nobe “eSifundzeni Semadolobha Langu-10.”
^ Nobe “igulela kufa.”
^ Nobe “bekumbangela tinhlungu letinyenti.”
^ Nobe “wabayalisisa.”
