Kulandzisa KwaLukha 20:1-47
20 Kwatsi ngalelinye lilanga afundzisa bantfu ethempelini futsi amemetela tindzaba letimnandzi, kweta baphristi labakhulu, tati temtsetfo nemadvodza lamadzala,
2 batsi kuye: “Sitjele kutsi letintfo utenta ngaliphi ligunya, futsi ngubani lokunike leligunya.”+
3 Wabaphendvula watsi: “Nami ngitanibuta umbuto, ngicela ningiphendvule:
4 Johane bekalitsetsephi ligunya lekubhabhatisa, bekalitsetse ezulwini yini nobe kubantfu?”
5 Ngako babese bakhuluma bodvwa batsi: “Nasitsi: ‘Ezulwini,’ utawutsi: ‘Animkholwanga ngani-ke?’
6 Kodvwa nasitsi: ‘Kubantfu,’ bonkhe labantfu batasigcoba ngematje ngobe bakholelwa kutsi Johane bekangumphrofethi.”+
7 Ngako batsi abati kutsi bekalitsetsephi leligunya.
8 Jesu wase utsi kubo: “Nami-ke ngeke nginitjele kutsi ngilitsatsaphi ligunya lekwenta letintfo.”
9 Wase utjela labantfu umfanekiso, watsi: “Umuntfu lotsite walima insimu yemagilebisi,+ wase uyicashisela balimi, ngemuva kwaloko wahamba sikhatsi lesidze waya eveni lelikhashane.+
10 Nasekufike sikhatsi sekuvuna, watfumela sisebenti sakhe kulabalimi kutsi siyolandza titselo talensimu. Kodvwa labalimi basishaya lesisebenti, ngemuva kwaloko basijikisa silengisa tandla.+
11 Lomuntfu waphindze watfumela lesinye sisebenti. Naso basishaya, bahlekisa ngaso* futsi basijikisa singakaphatsi lutfo.
12 Watfumela nesesitsatfu; naleso basilimata base basikhiphela ngephandle.
13 Ngemuva kwaloko, lomnikati walensimu watsi: ‘Sengitawenta njani-ke nyalo? Ngitawutfumela indvodzana yami letsandzekako.+ Mhlawumbe yona batayihlonipha.’
14 Kodvwa labalimi batsi nabayibona, bakhuluma bodvwa batsi: ‘Lena ngiyo indlalifa. Asiyibulaleni kuze sitfole lifa layo.’
15 Ngako bayihudvulela ngephandle kwalensimu bayibulala.+ Umnikati walensimu utabentani-ke labalimi?
16 Utawufika ababulale, bese lensimu yakhe uyiniketa labanye.”
Nabeva loku, labantfu batsi: “Loku akungenteki kitsi!”
17 Kodvwa wababuka emehlweni wase utsi: “Asho kutsini lamavi labhaliwe latsi: ‘Litje lelaliwe bakhi seligucuke laba litje leliyinhloko’?*+
18 Wonkhe umuntfu lowela etikwalelitje utawufihlika.+ Naloyo leliwela kuye litamsila.”
19 Tati temtsetfo kanye nebaphristi labakhulu bebafuna kumbamba ngaso leso sikhatsi, kodvwa besaba lesicumbi sebantfu, ngobe bebabona kutsi ngalomfanekiso usho bona.+
20 Ngemuva kwekumbukisisa, bacasha emadvodza ngasense kutsi aye kuye, ente shengatsi atimisele kumlalela kuze bamgibe ngaloko lakushoko+ bese bamnikela etiphatsimandleni nakumbusi.
21 Ngako lamadvodza ambuta atsi: “Mfundzisi, siyakwati kutsi ukhuluma liciniso nekutsi ufundzisa liciniso, futsi awukhetsi, kodvwa ufundzisa indlela yaNkulunkulu ngeliciniso:
22 Kuvumelekile* yini kutsi sikhiphe umtselo kuKhesari?”
23 Kodvwa wabubona bucili bawo, ngako watsi kuwo:
24 “Aseningikhombise denariyo.* Sabani lesitfombe nalelibito lelilapha?” Wona atsi kuye: “KwaKhesari.”
25 Wawaphendvula watsi: “Ngako-ke, nikani Khesari lokukwakhe,+ kodvwa ninike Nkulunkulu lokukwakhe.”+
26 Lamadvodza ehluleka kumgiba ngenkhulumo yakhe embikwebantfu, kodvwa amangala nakeva imphendvulo yakhe, ase ayabindza.
27 Nanobe kunjalo, kwefika labanye baSadusi, bona lebebatsi labafile ngeke bavuswe,+ bambuta,+
28 batsi: “Mfundzisi, Mosi wabhala watsi: ‘Nangabe indvodza ifa futsi ishiya umfati wayo kodvwa ibe ite bantfwana, umnakabo kufanele angene lomfati, kuze atewutalela umufi bantfwana.’+
29 Manje-ke bekunetelamani letingu-7, futsi wekucala watsatsa umfati wase uyafa ete bantfwana.
30 Ngako lowesibili wamtsatsa lomfati kodvwa naye wafa.
31 Kwenteka lokufanako nakuwesitsatfu. Bonkhe bongu-7 bamtsatsa lomfati kodvwa bafa bete bantfwana.
32 Ekugcineni, lomfati naye wafa.
33 Manje-ke nasekuvuswa labafile, lomfati utawuba wabani? Ngobe ube ngumfati wabo bonkhe.”
34 Jesu watsi kubo: “Bantfu balesikhatsi* bayashada futsi bayendza,
35 kodvwa labo labafanelwe kutfola kuphila esikhatsini lesitako kanye nekuvuswa ekufeni, ngeke bashade nome bendze.+
36 Ecinisweni, ngeke basafa, ngobe batawube sebafana netingilosi, futsi sebabantfwana baNkulunkulu, ngenca yekutsi batawube sebavusiwe ekufeni.
37 Endzabeni yesihlahla lesivutsako, ngisho naMosi waveta kutsi labafile batawuvuswa, ngesikhatsi abita Jehova* ngekutsi ‘nguNkulunkulu wa-Abrahama, wa-Isaka newaJakobe.’+
38 Yena unguNkulunkulu walabaphilako, hhayi walabafile, ngobe ngekwembono wakhe bonkhe bayaphila.”*+
39 Letinye tati temtsetfo tamphendvula tatsi: “Mfundzisi, ukhulume kahle.”
40 Besebesaba kumbuta lomunye umbuto.
41 Wase uyababuta utsi: “Kungani labanye batsi Khristu uyindvodzana yaDavide?+
42 Ngobe encwadzini yeTihlabelelo yena Davide utsi: ‘Jehova* watsi eNkhosini yami: “Hlala ngesekudla sami
43 kuze kube ngulapho titsa takho ngitibeka ngephansi kwetinyawo takho.”’+
44 Nangabe Davide ambita ngekutsi yiNkhosi, kungenteka njani-ke kutsi abe yindvodzana yakhe?”
45 Ngesikhatsi bonkhe bantfu basalalele, watsi kubafundzi bakhe:
46 “Caphelani tati temtsetfo letitsandza kuhamba tigcoke tingubo letindze, naletitsandza kubingelelwa etimakethe nekuhlala etihlalweni letingembili* emasinagogeni, futsi letifuna tindzawo letincono emadzilini.+
47 Titsatsa tindlu* tebafelokati, futsi tenta imithantazo lemidze kuze tibonwe bantfu.* Ngako titawujeziswa kamatima.”*
Imibhalo lengentansi
^ Nobe “basihlaza.”
^ NgesiGriki kutsi, “leliyinhloko lelisekoneni.”
^ Nobe “Kukahle.”
^ Fundza Sandzisanchazo B14.
^ Fundza Tinchazelo Temagama.
^ Fundza Sandzisanchazo A5.
^ Nobe “kuye bonkhe bayaphila.”
^ Fundza Sandzisanchazo A5.
^ Nobe “letincono.”
^ Nobe “tintfo.”
^ Nobe “tibukise.”
^ Nobe “kabuhlungu.”
