Kulandzisa KwaLukha 18:1-43
18 Jesu wase ubatjela umfanekiso mayelana nekutsi kubaluleke ngani kutsi bathantaze ngaso sonkhe sikhatsi futsi bangayekeli,+
2 watsi: “Edolobheni lelitsite bekunemehluleli lobekangamesabi Nkulunkulu, angabahloniphi nebantfu.
3 Kulelodolobha bekunemfelokati, futsi bekahlale aya kulomehluleli afike atsi: ‘Ngicela ungisite kuze yehlulelwe kahle indzaba yami naloyo longimangalele.’
4 Kwaphela sikhatsi lesidze lomehluleli angavumi, kodvwa ekugcineni wakhuluma enhlitiyweni yakhe watsi: ‘Nanobe ngingamesabi Nkulunkulu futsi ngingahloniphi muntfu,
5 kepha ngenca yekutsi lomfelokati solo uyangibelesela, ngitamsita ehlulelwe kahle kuze angatophindze ete lapha atongidzina ngekusolo angicela.’”*+
6 INkhosi yatsi: “Nivile yini kutsi lomehluleli watsini, nanobe bekangakalungi?
7 Pho-ke, Nkulunkulu ngeke yini abentele lokulungile labakhetsiwe bakhe, labakhala kuye busuku nemini,+ ngesikhatsi lesifanako abe ababeketelela?+
8 Ngiyanitjela ngitsi: Utawubentela lokulungile ngekushesha. Kodvwa-ke, nayifika iNdvodzana yemuntfu, itakutfola yini kukholwa lokunjengaloku* emhlabeni?”
9 Wabese usho nangu umfanekiso kulabanye lebebatibona balungile futsi bababukela phansi labanye bantfu, watsi:
10 “Emadvodza lamabili aya ethempelini ayothantaza, lenye beyingumFarisi kantsi lelenye beyingumtselisi.
11 LomFarisi wasukuma wathantaza, watsi: ‘Awu Nkulunkulu, ngiyabonga kutsi angifanani nalabanye bantfu—tigebengu, labangakalungi, tiphingi, ngisho nanangu umtselisi.
12 Ngizila kudla kabili ngeliviki; futsi nginikela kwelishumi kwato tonkhe tintfo lengititfolako.’+
13 Lomtselisi yena bekeme khashane, futsi akazange abhekise ngisho nebuso bakhe ezulwini, kodvwa bekasolo akhombisa kutisola atsi: ‘Awu Nkulunkulu, ngihawukele* mine soni.’+
14 Ngiyanitjela ngitsi: Lendvodza yaya ekhaya layo futsi Nkulunkulu wayitsatsa njengalelunge kakhulu kwendlula lomFarisi.+ Ngobe wonkhe umuntfu lotiphakamisako utawutfotjiswa, kodvwa loyo lotitfobako utawuphakanyiswa.”+
15 Ngako bantfu baletsa tinswane kuye kute atibusise, kodvwa nabakubona loku, bafundzi bakhe babekhuta.+
16 Kepha Jesu watsi atiletfwe letinswane, futsi watsi: “Bayekeleni bantfwana bete kimi; ningabavimbi, ngobe uMbuso waNkulunkulu webantfu labafana nabo.+
17 Ngicinisile ngitsi kini: Nobe ngubani longawemukeli uMbuso waNkulunkulu njengemntfwana, ngeke angene kuwo.”+
18 Lomunye umbusi wambuta watsi: “Mfundzisi Lomuhle, yini lokufanele ngiyente kute ngitfole kuphila lokuphakadze?”+
19 Jesu watsi kuye: “Ungibitelani ngekutsi ngimuhle? Kute umuntfu lomuhle ngaphandle kwaNkulunkulu.+
20 Angitsi uyayati imitsetfo letsi: ‘Ungaphingi;+ ungabulali;+ ungebi;+ ungafakazi emanga;+ hlonipha babe wakho namake wakho.’”+
21 Lomuntfu watsi kuye: “Tonkhe letintfo ngitigcinile kusukela ngisemncane.”
22 Ngemuva kwaloko Jesu watsi kuye: “Yinye intfo lesele: Hamba utsengise konkhe lonako, futsi uphe labeswele, nawenta njalo utawuba nemcebo ezulwini. Ngemuva kwaloko ubobese uyeta uyangilandzela.”+
23 Nakeva loku, lomuntfu weva buhlungu lobukhulu ngobe bekanjinge kakhulu.+
24 Jesu wambuka wase utsi: “Kutawuba matima kakhulu ngalabo labanemali kutsi bangene eMbusweni waNkulunkulu!+
25 Kumelula kutsi likamela lingene embotjeni yenyalitsi yekutfunga kunekutsi umuntfu lonjingile angene eMbusweni waNkulunkulu.”+
26 Labo labeva loku batsi: “Ngubani-ke lotawusindziswa?”+
27 Yena watsi: “Tintfo letibonakala tingeke tenteke emehlweni emuntfu, tingenteka kuNkulunkulu.”+
28 Kodvwa Phetro watsi: “Nkhosi, sishiye tintfo tetfu sakulandzela.”+
29 Jesu watsi kubo: “Ngicinisile ngitsi kini: Wonkhe umuntfu loshiye indlu, umfati, bomnakabo, batali, nobe bantfwana ngenca yeMbuso waNkulunkulu,+
30 utawutfola loku sekuphindvwe kanyenti kulesikhatsi sanyalo bese kutsi esikhatsini lesitako* atfole kuphila lokuphakadze.”+
31 Wabitela eceleni baphostoli bakhe labangu-12, watsi kubo: “Nyalo senyukela eJerusalema, futsi tonkhe tintfo letabhalwa baphrofethi mayelana neNdvodzana yemuntfu titawugcwaliseka.*+
32 Itawunikelwa kubantfu betive,+ bahlekise ngayo,+ bayiphatse kabi, futsi bayikhafulele.+
33 Nasebayishaye kakhulu batayibulala,+ kutsi ngelilanga lesitsatfu ivuswe.”+
34 Kodvwa-ke, abazange bacondze kutsi letintfo lebekatisho betichaza kutsini, ngobe lamavi bekafihlekile kubo, futsi abazange bawacondze.
35 Watsi Jesu nakasondzela eJerikho, bekunendvodza lebeyingaboni emehlweni lebeyihleti eceleni kwemgwaco icela.+
36 Ngesikhatsi iva kutsi kwendlula sicumbi sebantfu, yabuta kutsi kwentekani.
37 Bayitjela batsi: “Kwendlula Jesu waseNazaretha!”
38 Ngako yamemeta yatsi: “Jesu, Ndvodzana yaDavide, ngihawukele!”
39 Labo lebebasembili bayekhuta batsi ayibindze, kodvwa yona yachubeka imemeta kakhulu itsi: “Ndvodzana yaDavide, ngihawukele!”
40 Ngako Jesu wema, wase utsi ayiletfwe lendvodza. Yatsi nayifika wayibuta watsi:
41 “Ufuna ngikwenteleni?” Yona yatsi: “Nkhosi, mane ungente ngiphindze ngibone.”
42 Ngako Jesu watsi kuyo: “Phindze ubone; kukholwa kwakho kukuphilisile.”+
43 Ngekushesha lendvodza yaphindze yabona futsi yacala kumlandzela,+ ikhatimulisa Nkulunkulu. Ngesikhatsi bantfu bakubona loku, bonkhe badvumisa Nkulunkulu.+
Imibhalo lengentansi
^ Nobe “atongibelesela kuze kufike ekugcineni.”
^ NgesiGriki kutsi, “lokukholwa.”
^ Nobe “ngentele umusa.”
^ Fundza Tinchazelo Temagama.
^ Nobe “titawufezeka.”
