Kubase-Efesu 6:1-24
6 Bantfwana, lalelani batali benu+ ngekuvumelana nentsandvo yaNkulunkulu, ngobe loku kulungile.
2 “Hlonipha babe wakho namake wakho,”+ lona-ke ngumyalo wekucala lonesetsembiso lesitsi:
3 “Kuze kukuhambele kahle,* futsi uphile sikhatsi lesidze emhlabeni.”
4 Nine bobabe, ningabacansuli bantfwana benu,+ kodvwa chubekani nibakhulisa ngekubayala+ nangesicondziso* saJehova.*+
5 Tigcili, lalelani labo labaniphetse emhlabeni,+ nibalalele ngekwesaba, ngenhlonipho nangenhlitiyo yonkhe, kube shengatsi nilalela Khristu,
6 ningakwenti kuphela nanibukiwe kuze nje nijabulise bantfu,*+ kodvwa nikwente ngenca yekutsi nitigcili taKhristu letenta intsandvo yaNkulunkulu ngemphefumulo* wonkhe.+
7 Sebentani ninemoya lomuhle, kube shengatsi nentela Jehova*+ hhayi bantfu,
8 ngobe niyati kutsi nobe yini lenhle umuntfu layentako, Jehova* utawuphindze amnike yona,+ ngisho nobe asigcili nobe akhululekile.
9 Nani nine leniphetse, chubekani nibaphatsa ngendlela lefanako, niyekele kubasongela, ngobe niyati kutsi iNkhosi yenu neyabo isemazulwini,+ futsi ayikhetsi.
10 Kwekugcina, chubekani nitfola emandla+ eNkhosini ngoba yona inemandla lamakhulu.
11 Gcokani tonkhe tembatfo temphi+ letivela kuNkulunkulu, kuze nitokhona kucina futsi nimelane nemachinga* aDeveli;
12 ngobe siyalwa,*+ kodvwa asilwi nengati nenyama, kepha silwa nabohulumende, nalabo labanemagunya, nebabusi balelive lebumnyama, kanye nemabutfo emimoya lemibi+ etindzaweni tasezulwini.
13 Ngaleso sizatfu, gcokani tonkhe tembatfo temphi letivela kuNkulunkulu,+ kuze nitokhona kulwa ngelilanga lelibi, bese kutsi nasenicedze konkhe, nikwati kuma nicine.
14 Ngako-ke manini nicine, liciniso liboshwe elukhalo lwenu njengelibhande,+ futsi nifake sivikelo sesifuba lesikulunga,+
15 netinyawo tenu tigcokiswe kuze tilungele kumemetela tindzaba letimnandzi tekuthula.+
16 Kuto tonkhe timo, tsatsani sihlangu lesikhulu lesikukholwa,+ lenitawucima ngaso tonkhe tikhali* letivutsako talomubi.+
17 Tsatsani nesigcoko sekutivikela lesiyinsindziso,+ nitsatse nenkemba yemoya, lokulivi laNkulunkulu,+
18 futsi nichubeke nithantaza+ njalo ngemoya nisebentise tonkhe tinhlobo temthantazo netekuncusa.+ Ngako-ke hlalani niphapheme ngaso sonkhe sikhatsi, nincusela bonkhe labangcwele.
19 Nami nibongithantazela, kuze kutsi nangivula umlomo wami ngikhulume ngesibindzi mayelana nemfihlo lengcwele yetindzaba letimnandzi,+
20 lengilincusa+ lato lelisetinketaneni, futsi ngitimemetele ngesibindzi njengobe kufanele ngente.
21 Thikhikhusi+ umzalwane lotsandzekako futsi loyinceku yeNkhosi leyetsembekile utanitjela konkhe kuze nati ngami nekutsi nginjani emphilweni.+
22 Ngimtfumela kini kuze anatise kutsi sinjani, futsi anidvudvute.
23 Shengatsi bazalwane bangaba nekuthula, nelutsandvo kanye nekukholwa lokuvela kuNkulunkulu longuBabe, naseNkhosini Jesu Khristu.
24 Umusa lomkhulu waNkulunkulu awube nabo bonkhe labanelutsandvo lolungapheli ngeNkhosi yetfu Jesu Khristu.
Imibhalo lengentansi
^ Nobe “uphumelele.”
^ Nobe “imfundziso.” NgesiGriki kutsi, “kufaka ingcondvo.”
^ Fundza Sandzisanchazo A5.
^ Fundza Tinchazelo Temagama, ubuke ligama lelitsi “Umphefumulo.”
^ NgesiGriki kutsi, “ningakwenti ngekutsenga emehlo njengalabajabulisa bantfu.”
^ Fundza Sandzisanchazo A5.
^ Fundza Sandzisanchazo A5.
^ Nobe “bucili.”
^ NgesiGriki kutsi, “sibambene ngetihlutfu.”
^ Nobe “imicibisholo.”
