Kulandzisa KwaJohane 12:1-50
12 Nasekusele emalanga lasitfupha kutsi kube liPhasika, Jesu wefika eBhetani, indzawo lebekavuse Lazaro+ kuyo.
2 Bamentela kudla kwakusihlwa, futsi Mata bekabaphakela,+ kodvwa Lazaro bekasemkhatsini walabo lebebahleti naJesu etafuleni.
3 Mariya watsatsa emafutsa lanemakha, inadi sibili, bekadule kakhulu futsi bekangaba yihhafu yelitha,* wawatsela etinyaweni taJesu wase utesula ngetinwele takhe. Indlu yonkhe yagcwala liphunga lalamafutsa lanemakha.+
4 Kodvwa Judasi Skariyothi,+ lomunye webafundzi bakhe, loyo lobekatamtsengisa, watsi:
5 “Kungani lamafutsa lanemakha angakatsengiswa ngabodenariyo* labangu-300, bese kutsi leyo mali iphiwa labeswele?”
6 Loko bekangakusho ngobe bekakhatsalela labeswele, kodvwa ngobe bekalisela. Nguye lobekaphatsa libhokisi lemali futsi bekavame kweba imali lekulo.
7 Ngako Jesu watsi: “Myekeleni lomfati achubeke enta loku, alungiselele lilanga lekungcwatjwa kwami.+
8 Ngobe bantfu labeswele nihlale ninabo,+ kodvwa mine ngeke ngihlale nginani.”+
9 Kusenjalo, sicumbi semaJuda seva kutsi ulapho, ngako seta, hhayi ngobe sifuna kubona Jesu kuphela kodvwa besifuna nekubona Lazaro, loyo lebekamvuse ekufeni.+
10 Ngako baphristi labakhulu benta licebo lekubulala naLazaro,
11 ngobe emaJuda lamanyenti bekatsi nakaya kulendzawo futsi abona loko lokwenteke kuLazaro, bese ayakholwa kuJesu.+
12 Ngakusasa, sicumbi sebantfu lebesiye emkhosini seva kutsi Jesu uta eJerusalema.
13 Ngako satsatsa emagala elusundvu, sase siyamhlangabeta simemeta sitsi: “Sicela umsindzise! Ubusisiwe loyo lota ngelibito laJehova,*+ futsi loyiNkhosi yaka-Israyeli!”+
14 Jesu watfola litfole lembongolo waligibela,+ njengobe kubhaliwe kutsi:
15 “Ungesabi Siyoni.* Ngobe inkhosi yakho iyeta igibele litfole lembongolo.”+
16 Bafundzi bakhe bacale bangaticondzi letintfo, kodvwa ngesikhatsi Jesu sekakhatinyulisiwe,+ bakhumbula kutsi letintfo betibhaliwe ngaye, nekutsi betenteke kuye.+
17 Ngako lesicumbi lebesikhona ngesikhatsi Jesu abita Lazaro ethuneni+ futsi amvusa kulabafile, sachubeka sifakaza ngaye.+
18 Ngiko nesicumbi sebantfu seta satomhlangabeta, ngobe besesivile ngalesimangaliso lebekasentile.
19 Ngenca yaloko baFarisi bakhuluma bodvwa batsi: “Niyabona yini kutsi ngeke sifike ndzawo. Ngobe bonkhe bantfu* sebayamlandzela.”+
20 Kulabantfu lebebaye emkhosini, bekukhona nemaGriki.
21 Ngako aya kuFiliphu+ lobekawaseBhethsayida yaseGalile, atsi kuye: “Mnumzane, sicela kubona Jesu.”
22 Filiphu wahamba wayotjela Andreya. Ngako bobabili baya kuJesu bamtjela ngaloko.
23 Kodvwa Jesu watsi kubo: “Sesifikile sikhatsi sekutsi iNdvodzana yemuntfu ikhatinyuliswe.+
24 Ngicinisile, ngicinisile ngitsi kini: Ngaphandle kwekutsi inhlanyelo yakolo iwele emhlabatsini bese iyafa, ihlala iyinhlanyelo yinye; kodvwa nayifa,+ itsela titselo letinyenti.
25 Lotsandza kuphila kwakhe utawulahlekelwa ngiko, kodvwa loyo lotondza kuphila kwakhe+ kulelive, utakulondvolota kuze atfole kuphila lokuphakadze.+
26 Nobe ngubani lofuna kuba yinceku yami kufanele angilandzele, futsi lapho ngikhona khona, nenceku yami itawuba khona.+ Nangabe umuntfu afuna kuba yinceku yami, Babe utambusisa.
27 Ngicindzeteleke kakhulu,+ ngingatsini nje? Babe, ngisindzise kulesikhatsi.*+ Kodvwa loku kufanele kwenteke ngobe ngetela kona.
28 Babe, khatimulisa libito lakho.” Ngemuva kwaloko kwevakala livi+ livela ezulwini litsi: “Ngilikhatimulisile, futsi ngitawuphindze ngilikhatimulise.”+
29 Ngesikhatsi sicumbi lebesime lapho siva lelivi, sacabanga kutsi kudvuma litulu. Labanye bona batsi: “Ingilosi ikhulume naye.”
30 Jesu watsi: “Lelivi alikevakali ngenca yami, kodvwa livakale ngenca yenu.
31 Nyalo sesikhatsi sekutsi lelive lehlulelwe, futsi umbusi walo+ utawucoshwa.+
32 Nasengilengisiwe,+ ngitawudvonsela tonkhe tinhlobo tebantfu kimi.”
33 Loku wakusho kuze avete indlela lebekatawufa ngayo.+
34 Ngako sicumbi sebantfu satsi kuye: “Seva eMtsetfweni kutsi Khristu utawuhlala kuze kube phakadze;+ kodvwa kwentiwa yini kutsi utsi iNdvodzana yemuntfu itawulengiswa?+ Ingubani yona leNdvodzana yemuntfu?”
35 Jesu wase utsi kubo: “Kukhanya kutawuba nani sikhashana. Ngako nibohamba nakusekhona kukhanya, kuze bumnyama bunganimbonyi; lohamba ebumnyameni akaboni kutsi uyaphi.+
36 Kukholweni kukhanya nanisenako, kuze nitowuba ngemadvodzana ekukhanya.”+
Jesu washo letintfo wase uyahamba futsi wabhaca.
37 Nanobe bekente timangaliso letinyenti embikwabo, abazange bamkholwe,
38 khona kutogcwaliseka emavi emphrofethi Isaya latsi: “Jehova,* ngubani lokholwe nguloko lakuve kitsi?*+ Bobani lababone emandla* aJehova?”*+
39 Intfo leyabenta bangakholwa, nguleyo Isaya layisho nakatsi:
40 “Emehlo abo uwente angaboni, wenta netinhlitiyo tabo taba lukhuni, kuze bangaboni ngemehlo abo, netinhlitiyo tabo tingacondzi futsi bangagucuki, bese-ke mine ngiyabaphilisa.”+
41 Isaya washo letintfo ngobe bekayibonile inkhatimulo yaJesu, wase ukhuluma ngaye.+
42 Labanyenti kubo, lokufaka ekhatsi nebabusi, bakholwa kuye,+ kodvwa ngenca yekutsi bebesaba baFarisi bebangakuvumi loko, kuze bangacoshwa esinagogeni;+
43 ngobe bebatsandza kudvunyiswa bantfu kwengca kudvunyiswa nguNkulunkulu.+
44 Jesu waphakamisa livi watsi: “Loyo lokholwa ngimi akakholwa kimi kuphela, kodvwa ukholwa naloyo longitfumile;+
45 loyo longibonako ubona naLoyo lowangitfuma.+
46 Ngite njengekukhanya eveni,+ kuze kutsi nobe ngubani lokholwa ngimi angahlali ebumnyameni.+
47 Nobe ngubani lova emavi ami kodvwa angawalaleli, angimehluleli; ngobe angiketeli kutowehlulela live kodvwa ngitele kutolisindzisa.+
48 Nobe ngubani longanginaki futsi angawalaleli emavi ami, unalotsite lotamehlulela. Livi lengilikhulumile ngilo lelitamehlulela ngelilanga lekugcina.
49 Ngobe angikakhulumi lokusuka kimi, kodvwa Babe longitfumile nguye longitjele kutsi ngikhulume ini.+
50 Ngiyati nekutsi umtsetfo wakhe uholela ekuphileni lokuphakadze.+ Ngako tintfo lengitikhulumako ngitisho njengobe Babe angitjelile.”+
Imibhalo lengentansi
^ NgesiGriki kutsi, “liphawundi.” Lokusho liphawundi lemaRoma, lelingaba ngemagremu langu-327. Fundza Sandzisanchazo B14.
^ Fundza Sandzisanchazo B14.
^ Fundza Sandzisanchazo A5.
^ NgesiGriki kutsi, “ndvodzakati yaseSiyoni.”
^ NgesiGriki kutsi, “umhlaba.”
^ NgesiGriki kutsi, “kuleli-awa.”
^ NgesiGriki kutsi, “umkhono.”
^ Fundza Sandzisanchazo A5.
^ Nobe “ngumbiko wetfu.”
^ Fundza Sandzisanchazo A5.
