Jobe 1:1-22
1 Bekunendvodza lebeyihlala eveni lase-Uzi, libito layo kunguJobe.*+ Beyicotfo futsi yetsembekile,*+ yesaba Nkulunkulu, ikubalekela nalokubi.+
2 Beyinemadvodzana langu-7 nemadvodzakati lamatsatfu.
3 Beyifuye timvu letingu-7 000, emakamela langu-3 000, tinkhomo letingu-1 000* netimbongolo* letingu-500, futsi beyinetisebenti letinyenti kakhulu. Ngako beyingumuntfu lomkhulu kakhulu kunabo bonkhe bantfu baseMphumalanga.
4 Emadvodzana aJobe bekenta emadzili ngemalanga labekiwe, nguleyo naleyo beyiba neligema lekutsi ilentele endlini yayo. Abemema bodzadzewabo labatsatfu kute batewudla nawo futsi banatse nawo.
5 Besitsi singendlula lesikhatsi semadzili, Jobe abite bantfwabakhe kute abahlambulule. Bekabese uvuka ekuseni kakhulu, anikele imihlatjelo yekushiswa+ yabo bonkhe, ngobe bekatsi: “Mhlawumbe bantfwabami bonile futsi bacalekise Nkulunkulu etinhlitiyweni tabo.” Nguloko-ke Jobe labekwenta ngaso sonkhe sikhatsi.+
6 Kwefika lilanga lekutsi tingilosi*+ tite embikwaJehova+ futsi time etindzaweni tato, naSathane+ wangena nato.+
7 Jehova wase ubuta Sathane watsi: “Ubuyaphi?” Sathane waphendvula Jehova watsi: “Bengehla ngenyuka emhlabeni futsi ngibukabuka kuwo.”+
8 Jehova watsi kuSathane: “Umbonile yini Jobe* inceku yami? Kute umuntfu lofana naye emhlabeni. Ucotfo futsi wetsembekile,*+ uyangesaba, uyakubalekela nalokubi.”
9 Ngako Sathane waphendvula Jehova watsi: “Kube kute lomnika kona Jobe, bekatawuchubeka yini akwesaba?+
10 Awukamvikeli yini+ yena nemndeni wakhe kanye nako konkhe lanako? Uwubusisile umsebenti wakhe,+ kantsi nemfuyo yakhe seyandze kakhulu.
11 Kodvwa asewelule sandla sakho, uhlasele konkhe lanako, ubone kutsi angeke yini akwetfuke nje umbukile.”*
12 Ngemuva kwaloko Jehova watsi kuSathane: “Konkhe lanako kusesandleni sakho.* Kuphela nje ungamtsintsi!” Ngako Sathane wesuka embikwaJehova.*+
13 Ngalelinye lilanga ngesikhatsi emadvodzana nemadvodzakati aJobe adla futsi anatsa liwayini endlini yemnakabo lomdzala,+
14 sisebenti saJobe sefika kuye satsi: “Tinkhomo betilima futsi timbongolo betidla eceleni kwato
15 kwase kufika bantfu baseSeba basihlasela futsi batitsatsa, babese babulala tisebenti takho ngenkemba. Ngimi kuphela losindzile, ngako ngite kutekubikela.”
16 Ngesikhatsi lesisebenti sisakhuluma, kwefika lesinye satsi: “Kwehle umlilo lovela kuNkulunkulu* ezulwini washisa timvu netisebenti takho futsi waticotfula! Ngimi kuphela losindzile, ngako ngite kutekubikela.”
17 Satsi sisakhuluma lesisebenti, kwefika lesinye satsi: “EmaKhaledi+ akhe emacembu lamatsatfu, ahlasela emakamela futsi awatsatsa, abese abulala tisebenti takho ngenkemba. Ngimi kuphela losindzile, ngako ngite kutekubikela.”
18 Satsi sisakhuluma, kwefika nalesinye satsi: “Emadvodzana nemadvodzakati akho bekadla futsi anatsa liwayini endlini yemnakabo lomdzala.
19 Kutsite kungakalindzeleki kwefika umoya lomkhulu lochamuka ehlane, wabhidlita lendlu yawela etikwebantfwabakho futsi bafa. Ngimi kuphela losindzile, ngako ngite kutekubikela.”
20 Watsi Jobe nakeva loku wasukuma, wadzabula ingubo yakhe futsi wahhula tinwele takhe enhloko; wabese uyaguca futsi wakhotsama,
21 watsi:
“Ngaphuma ngingenalutfo esiswini samake,Futsi ngitawubuyela ngingenalutfo.+
Jehova uphile,+ Jehova utsatsile.
Alichubeke lidvunyiswa libito laJehova.”
22 Kuko konkhe loku, Jobe akazange one nobe asole Nkulunkulu atsi wente lokubi.
Imibhalo lengentansi
^ Kungenteka lisho kutsi “Umuntfu Lowenyanywako.”
^ Nobe “Beyingasoleki futsi imsulwa.”
^ NgesiHebheru kutsi, “tipani letingu-500 tetinkhomo.”
^ NgesiHebheru kutsi, “netimbongolo letinsikati.”
^ NgesiHebheru kutsi, “emadvodzana aNkulunkulu angene.”
^ NgesiHebheru kutsi, “Inhlitiyo yakho uyibekile yini kuJobe?”
^ Nobe “Akasoleki futsi umsulwa.”
^ NgesiHebheru kutsi, “ebusweni bakho.”
^ Nobe “ngikubeka ngaphansi kwakho.”
^ NgesiHebheru kutsi, “ebusweni baNkulunkulu.”
^ Kungaphindze kubekwe ngekutsi, “Kwehle umbane.”
