Imisebenti Yebaphostoli 14:1-28
14 E-Ikhoniyumi, boPawula naBhanabasi bangena esinagogeni lemaJuda, futsi indlela labakhuluma ngayo yenta kutsi emaJuda nemaGriki lamanyenti abe ngemakholwa.
2 Kodvwa emaJuda langazange akholwe afaka umoya lomubi kubantfu betive kuze bavukele bazalwane.+
3 Ngenca yaloko boPawula naBhanabasi bahlala sikhatsi lesidze lapho, futsi Jehova* wabanika sibindzi sekukhuluma. Wabanika emandla ekwenta tibonakaliso netimangaliso kuze afakazele loko lebebakusho, lokungumlayeto lomayelana nemusa wakhe lomkhulu.+
4 Bantfu labanyenti kulelodolobha behlukana ekhatsi, labanye baba ngakumaJuda kantsi labanye baba ngakubaphostoli.
5 Ngesikhatsi bantfu betive, emaJuda nebabusi bawo bafuna kubahlupha nekubagcoba ngematje,+
6 labaphostoli beva ngaloko, babese bayabaleka baya emadolobheni aseLikhawoniya, eListra, eDebe, nasetindzaweni letibomakhelwane.+
7 Nabefika lapho bachubeka nekumemetela tindzaba letimnandzi.
8 EListra bekunendvodza lebeyihleti phansi, beyitelwe ikhubatekile futsi ingakhoni kuhamba.
9 Lendvodza beyilalele njengobe Pawula akhuluma. Watsi nakayibukisisa wabona kutsi iyakholwa kutsi ingaphila,+
10 ngako watsi kuyo: “Sukuma ume ngetinyawo.” Lendvodza yagcuma yase icala kuhamba.+
11 Ngesikhatsi sicumbi sebantfu sibona loko Pawula lebekakwentile, samemeta ngelulwimi lwesiLikhawoniya, satsi: “Bonkulunkulu sebanjengebantfu futsi sebehlele kitsi!”+
12 Babese babita Bhanabasi ngekutsi nguZeyusi, Pawula bambita ngekutsi nguHemesi, ngobe nguye lobekakhuluma.
13 Ekungeneni kwalelidolobha bekunelithempeli laZeyusi, ngako umphristi wakhe waletsa tinkunzi nemihlobiso yetimbali egedeni, futsi lomphristi kanye nesicumbi sebantfu bebafuna kwenta imihlatjelo.
14 Ngesikhatsi umphostoli Bhanabasi nemphostoli Pawula beva ngaloku, badzabula tingubo tabo bagijima baya kulabantfu, bamemeta batsi:
15 “Madvodza, nikwentelani loku? Natsi simane nje sibantfu njengani futsi sinebutsakatsaka lobufana nebenu.+ Simemetela tindzaba letimnandzi kini, kuze nishiye letintfo letingenamsebenti bese nikhonta Nkulunkulu lophilako, lowadala lizulu, umhlaba, lwandle, nato tonkhe tintfo letikuko.+
16 Esikhatsini lesendlulile, wativumela tonkhe tive kutsi tichubeke tenta letikutsandzako,+
17 kodvwa ngekunentela lokuhle, wativeta kini kutsi ungubani.+ Wanehlisela imvula ezulwini, waniletsela netikhatsi tenala,+ waninika nekudla lokunyenti futsi wagcwalisa tinhlitiyo tenu ngenjabulo.”+
18 Nangetulu kwekusho konkhe loku, kwaba matima ngaBhanabasi naPawula kuvimbela labantfu kutsi bangawenti umhlatjelo.
19 Kweta emaJuda lesuka e-Antiyokhi nase-Ikhoniyumi afike agcugcutela lesicumbi sebantfu,+ sase sigcoba Pawula ngematje, futsi samhudvulela ngephandle kwelidolobha, sicabanga kutsi sewufile.+
20 Kodvwa ngesikhatsi bafundzi bamtungeletile, wavuka wase ubuyela edolobheni. Ngakusasa wesuka naBhanabasi baya eDebe.+
21 Nasebatimemetele tindzaba letimnandzi kulelodolobha, futsi sebasite labanyenti kutsi babe bafundzi, babuyela eListra, e-Ikhoniyumi, nase-Antiyokhi.
22 Nabefika lapho, bacinisa bafundzi,+ babakhutsata kutsi babe nekukholwa lokucinile, batsi: “Kufanele sendlule ekuhluphekeni lokunyenti ngaphambi kwekutsi singene eMbusweni waNkulunkulu.”+
23 Ngetulu kwaloko, babeka emadvodza lamadzala kulelo nalelo bandla.+ Bathantaza futsi bazila kudla,+ ngaleyondlela babaletsa kuJehova,* ngobe nguye lebebakholwe kuye.
24 Ngemuva kwaloko bahamba badzabula ePhisidiya baze befika ePhamfiliya,+
25 batsi nasebakhulumile ngelivi laNkulunkulu ePhega, behlela e-Athaliya.
26 BoBhanabasi naPawula besuka lapho bagibela umkhumbi baya e-Antiyokhi, lapho bazalwane bebathantazele kutsi Nkulunkulu abakhombise umusa wakhe lomkhulu kuze bakhone kwenta lomsebenti lebesebawucedzile.+
27 Nasebafikile futsi sebahlanganise libandla ndzawonye, balicocela ngato tonkhe letintfo Nkulunkulu lebekatentile asebentisa bona, nekutsi besekavulele bantfu betive umnyango wekutsi bakholwe.+
28 Ngako bahlala nebafundzi sikhatsi lesidze.
