Imisebenti Yebaphostoli 11:1-30
11 Baphostoli nebazalwane lebebaseJudiya beva kutsi nebantfu betive balemukele livi laNkulunkulu.
2 Ngako Phetro watsi nakefika eJerusalema, labo lebebasekela kusoka+ baphikisana naye,
3 batsi: “Wena uye ekhaya lebantfu labangakasoki, futsi wadla nabo.”
4 Phetro wabatjela ngako konkhe lebekwentekile, watsi:
5 “Bengisedolobheni laseJopha ngithantaza, ngase ngibona umbono. Ngabona intfo* lefana nendvwangu lenkhulu yelineni, yehla ezulwini ngemakona ayo lamane, yehlela kimi.+
6 Nangibukisisa kuyo, ngabona tilwane letinetinyawo letine, tilwane tesiganga, tilwane letihumako, netinyoni.
7 Ngeva nelivi litsi kimi: ‘Phetro, sukuma uhlabe futsi udle!’
8 Kodvwa ngatsi: ‘Cha Nkhosi angeke, ngobe angikaze sengiyidle intfo lengcolile nobe lengakahlanteki.’
9 Lelivi lebelivela ezulwini lakhuluma kwesibili latsi: ‘Loko Nkulunkulu lakuhlantile ungakubiti ngekutsi kungcolile.’
10 Laphindze levakala nekwesitsatfu, futsi konkhe kwabese kwenyuselwa ezulwini.
11 Ngaleso sikhatsi, bekunemadvodza lamatsatfu lebekeme kulendlu lebesikuyo, futsi bekatfunywe kimi esuka eKhesariya.+
12 Ngako umoya waNkulunkulu wangitjela kutsi ngingangabati, kodvwa ngihambe nalamadvodza. Labazalwane labasitfupha nabo bahamba nami saya endlini yalendvodza.
13 “Yasitjela ngekutsi ibone ingilosi ime endlini yayo itsi: ‘Tfuma emadvodza eJopha kutsi ayobita Simoni lokutsiwa nguPhetro,+
14 yena utakutjela loko lokudzingekako kuze wena nayo yonkhe indlu yakho nisindziswe.’
15 Nangicala kukhuluma, umoya longcwele wehlela kubo njengobe nje wehlela nakitsi ekucaleni.+
16 Ngabese ngikhumbula loko lobekuvamise kushiwo yiNkhosi, nayitsi: ‘Johane bekabhabhatisa ngemanti,+ kodvwa nine nitawubhajatiswa ngemoya longcwele.’+
17 Ngako nangabe Nkulunkulu abaphe sipho lesifana naleso lasipha sona natsi lesikholwe yiNkhosi Jesu Khristu, bengingubani-ke mine kutsi ngingavimba Nkulunkulu?”*+
18 Ngesikhatsi beva loku bayekela kumphikisa,* base bakhatimulisa Nkulunkulu batsi: “Nembala Nkulunkulu unike nebantfu betive litfuba lekuphendvuka kuze nabo batfole kuphila.”+
19 Labo lebebahlakatekile+ ngenca yekuhlushwa lobekubangelwe nguloko lokwenteka kuStefano, bahamba baze befika eFenisiya, eSiphrosi nase-Antiyokhi, bakhuluma ngelivi laNkulunkulu kumaJuda kuphela.+
20 Kodvwa e-Antiyokhi, labanye balabo lebebasuka eSiphrosi naseSirene bakhuluma nebantfu lebebakhuluma siGriki, bamemetela tindzaba letimnandzi mayelana neNkhosi Jesu.
21 Jehova* wachubeka abasekela, futsi bantfu labanyenti baba ngemakholwa, baphendvukela eNkhosini.+
22 Letindzaba tefika kubazalwane basebandleni lebeliseJerusalema, futsi batfuma Bhanabasi+ kutsi aye e-Antiyokhi.
23 Nakefika futsi abona indlela Nkulunkulu labentela ngayo umusa lomkhulu, wajabula, wabakhutsata bonkhe kutsi bachubeke balalela iNkhosi ngenhlitiyo yonkhe.+
24 Bhanabasi bekayindvodza lelungile, agcwele umoya longcwele futsi anekukholwa lokucinile. Bantfu labanyenti bakholwa yiNkhosi.+
25 Ngako wesuka waya eThasusi, ayofunisisa Sawula.+
26 Nasekamtfolile, waya naye e-Antiyokhi. Umnyaka wonkhe bebahlangana nalabafundzi ebandleni futsi bafundzisa incumbi yebantfu. Kulapha e-Antiyokhi lapho ngekucondziswa nguNkulunkulu, bafundzi babitwa kwekucala ngekutsi ngemaKhristu.+
27 Kulawo malanga, kwefika baphrofethi+ e-Antiyokhi besuka eJerusalema.
28 Lomunye wabo lobekutsiwa ngu-Agabusi,+ wasukuma achutjwa ngumoya waNkulunkulu, wabatjela ngendlala lebeyitawufika emhlabeni wonkhe,+ futsi lendlala yefika ngesikhatsi saKlawudiyusi.
29 Ngako bafundzi bavumelana ngekutsi nguloyo naloyo akatfumele loko langakukhona+ kuze kusitwe+ bazalwane baseJudiya,
30 futsi bakwenta loko, batfumela letintfo kulabadzala, basebentisa boBhanabasi naSawula.+
Imibhalo lengentansi
^ NgesiGriki kutsi, “sitja.”
^ Nobe “ngingema endleleni yaNkulunkulu?”
^ NgesiGriki kutsi, “babindza.”
^ Fundza Sandzisanchazo A5.
