Hezekeli 38:1-23
38 Livi laJehova laphindze lefika kimi latsi:
2 “Ndvodzana yemuntfu, buka* ngakuGogi waseveni lakaMagogi,+ losikhulu lesiyinhloko* sakaMesheki nesakaThubali,+ bese uyaphrofetha ngalokumelene naye.+
3 Tsani: ‘INkhosi Lephakeme Jehova itsi: “Ngimelene nawe Gogi, wena sikhulu lesiyinhloko* sakaMesheki nesakaThubali.
4 Ngitakugucula, ngifake emahhuka emihlatsini yakho,+ bese ngikukhiphela ngephandle nalo lonkhe libutfo lakho,+ emahhashi akho, nebagibeli bemahhashi akho, bonkhe bagcoke kahle, ngikhiphe nelibutfo lelikhulu lelihlome ngemahawu lamakhulu nalamancane,* futsi lonkhe liphetse tinkemba;
5 iPheresiya, iTopiya kanye nePhuthi+ ikanye nabo, bonkhe bahlome ngebutjoki futsi bafake tigcoko tekutivikela;
6 bakanye neGomeri nalo lonkhe libutfo layo, kanye nendlu yaThogama+ lechamuka etindzaweni letikhashane letisenyakatfo, kanye nalo lonkhe libutfo layo—tive letinyenti tikanye nawe.+
7 “‘“Tilungiselele wena kanye nalo lonkhe libutfo lakho lelibutsene kanye nawe, futsi wena utawuba yindvuna* yalo.
8 “‘“Utawubitwa ngemuva kwemalanga lamanyenti. Encenyeni yekugcina yeminyaka wena utawuhlasela live bantfu balo lababuyisiwe ngemuva kwakuhlaselwa ngenkemba, futsi babutsiswa ndzawonye basuka etiveni letinyenti baletfwa etintsabeni taka-Israyeli, lebetisele tingenalutfo. Bantfu bakulelive babuyisiwe basuka etiveni, futsi bonkhe bahlala ngekulondzeka.+
9 Wena utawuta utomelana nabo kuhle kwesiphepho, futsi utawusibekela lelive njengemafu, wena kanye nawo onkhe emabutfo akho netive letinyenti letikanye nawe.”’
10 “Naku lokushiwo yiNkhosi Lephakeme Jehova: ‘Ngalelolanga utawufikelwa yimicabango enhlitiyweni yakho, futsi utawakha licebo lelibi.
11 Utawutsi: “Ngitawuhlasela live lelingakavikeleki.*+ Ngitawufike ngimelane nalabo labahleti ngekulondzeka, labangaphazamiseki, bonkhe bahlala etindzaweni letite lubondza lwekuvikela, nemishudo kanye nemagede.”
12 Inhloso yakho kutawuba kutitsatsela tintfo letinyenti, nekuhlasela tindzawo lebetisele tingenalutfo+ nyalo lesetihlala bantfu kanye nalesive lesibuyiswe etiveni,+ lesandzise umcebo waso kanye netintfo,+ leso lesihlala emkhatsini wemhlaba.
13 “‘ISheba+ neDedani,+ batsengisi baseThashishi+ kanye nalo lonkhe libutfo layo,* batawutsi kuwe: “Uhlasela lelive kuze utitsatsele tintfo letinyenti yini? Uhlanganise libutfo lakho kuze utsatse lisiliva neligolide yini, utsatse umcebo nemphahla, kanye netintfo takulelive?”’
14 “Ngako ndvodzana yemuntfu, phrofetha kuGogi utsi: ‘Naku lokushiwo yiNkhosi Lephakeme Jehova: “Angeke ubone yini ngalelilanga bantfu bami labangema-Israyeli bahleti ngekulondzeka?+
15 Utawufika usuka endzaweni yakho, usuka etindzaweni letikhashane kakhulu tasenyakatfo,+ wena kanye netive letinyenti, tonkhe titawube tigibele emahhashi, kutawube kusicumbi lesikhulu, lokulibutfo lelikhulu.+
16 Wena utawufika umelane nebantfu bami ema-Israyeli njengemafu lasibekele live. Awu Gogi, encenyeni yekugcina yemalanga, ngitakuletsa umelane nelive lami,+ kuze tive titewungati nangitingcwelisa ngawe, embikwemehlo ato.”’+
17 “Naku lokushiwo yiNkhosi Lephakeme Jehova: ‘Awusuye yini lona lengakhuluma ngaye etikhatsini letendlulile ngisebentisa tinceku tami letibaphrofethi baka-Israyeli? Taphrofetha ngawe iminyaka leminyenti kutsi utawuletfwa umelane nema-Israyeli.’
18 “INkhosi Lephakeme Jehova itsi: ‘Ngalelolanga, lokulilanga Gogi layohlasela ngalo live laka-Israyeli, intfukutselo yami lenkhulu itawuphakama.+
19 Ngitawukhuluma ngenshisekelo yami nangelulaka lwami loluvutsako; futsi ngalelolanga kutawuba nekutamatama lokukhulu kwemhlaba eveni laka-Israyeli.
20 Ngenca yami tinhlanti taselwandle, tinyoni telizulu, tilwane tesiganga, nato tonkhe tilwane letihamba ngesisu, kanye nabo bonkhe bantfu labasemhlabeni kutawuchachateliswa kwesaba, futsi tintsaba titawujikijelwa phansi.+ Emagcuma atakuwa futsi tindvonga titawuwela phansi emhlabatsini.’
21 “INkhosi Lephakeme Jehova itsi: ‘Ngitawubita inkemba imelane naye kuto tonkhe tintsaba tami, futsi batawulwa bodvwa.+
22 Ngitawuletsa sehlulelo lesimelene naye,* lesihambisana nesifo lesibulalako+ nekucitfwa kwengati; futsi ngitawunisa imvula lenkhulu nesangcotfo,+ nemlilo+ kanye nesibabule+ etikwakhe nasetikwelibutfo lakhe nasetikwato tonkhe tive letikanye naye.+
23 Nakanjani ngitawutenta ngibe mkhulu futsi ngitingcwelise ngiphindze ngitente ngatiwe embikwemehlo etive letinyenti; futsi titawukwati kutsi mine nginguJehova.’
Imibhalo lengentansi
^ Nobe “indvuna lenkhulu.”
^ NgesiHebheru kutsi, “buso bakho abumelane.”
^ Nobe “indvuna lenkhulu.”
^ Lamahawu bekavame kuphatfwa ngemasotja lasebentisa butjoki.
^ NgesiHebheru kutsi, “ngugadzi.”
^ Nobe “live lelisebaleni.”
^ Nobe “emabhubesi lasemancane lanemdlonga.”
^ Nobe “Ngitatiletsa esehlulelweni kanye naye.”
