Amose 5:1-27
5 “Awu nine bendlu yaka-Israyeli, lalelani nali livi lengilikhulumako lelimelene nani lelifana nengoma yekulila:
2 ‘Israyeli loyintfombi ntfo uwile;Akasakhoni kuphindze avuke.
Ulahlwe endzaweni yakhe emhlabatsini;Kute longamphakamisa.’
3 “INkhosi Lephakeme Jehova itsi:
‘Lidolobha lelitfumele emasotja langu-1 000 emphini litawusala nalangu-100;Nelidolobha lelitfumele emasotja langu-100 emphini litawusala nalangu-10 endlu yaka-Israyeli.’+
4 “Ngobe naku lokushiwo nguJehova endlini yaka-Israyeli:
‘Ngifuneni futsi nitawuchubeka niphila.+
5 Ningafuni iBetheli,+Ningayi eGilgali+ futsi ningendluleli eBherisheba,+Ngobe bantfu baseGilgali batawutfunjwa,+NeBetheli itawugcine ingasasilutfo.*
6 Funani Jehova nitochubeka niphila,+Kuze angavutsi njengemlilo endlini yaJosefa,Ashise neBetheli, kube bete lowucimako.
7 Umtsetfo niyawugucula ufane nesihlahla lesibabako,Nikushiyile kulunga emhlabeni.+
8 Loyo lowenta libutfo letinkhanyeti lokutsiwa yiKhimahi* nalokutsiwa yiKhesili,*+Loyo loshintja litfunti lelikhulu libe kukhanya,Loyo logucula imini ibe mnyama njengasebusuku,+Loyo lobita emanti aselwandleLoyo lowabita kuze awatsele emhlabeni,+Libito lakhe nguJehova.
9 Yena utawubanga kutsi bantfu labangemachawe babhujiswe,Aletse imbhubhiso etindzaweni letibiyelwe.
10 Niyabenyanya behluleli labasola bantfu labente emaphutsa esangweni lelidolobha,Futsi niyabenyanya labo labakhuluma liciniso.+
11 Ngobe nikhiphisa labaphuyile umtselo wemhlaba ngenkhaniFutsi nitsatsa lokutinhlavu kwabo kube tetfulo,+Angeke nihlale etindlini tematje labatiwe lenitakhele tona.+
Angeke nilinatse liwayini lelivela emasimini emagilebisi elikhetselo leniwahlanyele.+
12 Ngobe ngiyati kutsi nivukele* kangakiNekutsi tono tenu tinkhulu kangakanani,Bantfu labalungile niyabahlukumeta,Niyadizelwa,Anibehluleli ngekulunga esangweni lelidolobha bantfu labaphuyile.+
13 Ngako-ke labo labanekucondza batawubindza ngaleso sikhatsi,Ngobe kutawube kusikhatsi senhlekelele.+
14 Funani lokuhle hhayi lokubi+Kuze nichubeke niphila.+
Ngako Jehova Nkulunkulu wemabutfo utawuba nani,Njengobe nisho njalo nani.+
15 Tondzani lokubi nitsandze lokuhle,+Esangweni lelidolobha akwehlulelwe ngekulunga.+
Kungenteka kutsi Jehova Nkulunkulu wemabutfoAbentele umusa labasele bendlu yaJosefa.’+
16 “Ngako naku lokushiwo nguJehova Nkulunkulu wemabutfo, Jehova utsi:
‘Kutawuba nekulila etindzaweni tawonkhe wonkhe,Nakuto tonkhe titaladi batawutsi, “Maye, maye!”
Batawubita balimi kuze balileBabite nebantfu labacashelwe kulila kutsi batolila.’
17 ‘Kutawulilwa kuwo onkhe emasimu emagilebisi;+Ngobe ngitawendlula emkhatsini wenu,’ kusho Jehova.
18 ‘Maye kulabo labalangatelela lilanga laJehova!+
Litawusho kutsini-ke lilanga laJehova kini?+
Litawusho bumnyama hhayi kukhanya.+
19 Litawufanana nemuntfu lobalekela libhubesi kodvwa ahlangabetwe libhele,Futsi atsi nakangena endlini yakhe, asime ngesandla elubondzeni, bese ulunywa yinyoka.
20 Lilanga laJehova angeke yini libe bumnyama, lingabi kukhanya;Angeke yini libe bumnyama lobukhulu hhayi kukhanya?
21 Ngiyayenyanya imikhosi yenu futsi iyangicansula,+Angijabuli ngeliphunga lelimnandzi lemihlatjelo yenu leniyenta naninemibutsano lenesizotsa.
22 Ngisho nome ngabe nenta iminikelo neminikelo yekushiswa,Angeke ingijabulise;+Futsi angeke ngiyemukele imihlatjelo yenu yekuthula leniyenta ngetilwane letikhuluphele.+
23 Aseningicolele ngemsindvo wetingoma tenu;Angifuni kuva umculo wenu wetinsimbi letinetintsambo.+
24 Umtsetfo awugelete njengemanti,+Nekulunga akugelete njengemfula logeleta siphelane.
25 Nangiletsela imihlatjelo neminikelo yiniKuleminyaka lengu-40 ehlane, nine bantfu baka-Israyeli?+
26 Nyalo kutawudzingeka kutsi netfwale Sakhuthi inkhosi yenu naKhewani* nihambe nabo,Lokutithico tenu, nkulunkulu wenu loyinkhanyenti lenatentela yena,
27 Futsi ngitanitfumela ekutfunjweni ngale kweDamaseko,’+ kusho loyo libito lakhe lokunguJehova Nkulunkulu wemabutfo.”+
Imibhalo lengentansi
^ Kungaphindze kubekwe ngekutsi, “itawuba yindzawo legcwele bubi.”
^ Kungenteka kusho sicumbi setinkhanyeti lokutsiwa yi-Orion.
^ Kungenteka kusho tinkhanyeti lokutsiwa yi-Pleiades letisekhatsi esicunjini setinkhanyeti lokutsiwa yi-Taurus.
^ Nobe “emacala.”
^ Kungenteka labonkulunkulu lababili babhekisela ku-planet lebitwa ngekutsi yi-Saturn, lebebayente nkulunkulu wabo.
