2 Tikhronike 28:1-27
28 Ahazi+ bekaneminyaka lengu-20 budzala nakaba yinkhosi futsi wabusa iminyaka lengu-16 eJerusalema. Akazange ente lokuhle emehlweni aJehova, akazange amlingise khokho wakhe Davide.+
2 Kunaloko, wahamba ngendlela yemakhosi aka-Israyeli,+ futsi waze wenta netithico tensimbi*+ taboBhali.
3 Ngetulu kwaloko, wenta iminikelo yekushiswa eSigodzini Sendvodzana yaHinomu,* washisa emadvodzana akhe emlilweni+ alandzela imikhuba leyenyanyekako yaletinye tive,+ leto Jehova bekaticoshile kuma-Israyeli.
4 Wachubeka enta imihlatjelo yekushiswa etindzaweni letiphakeme,+ ngaleyo ndlela intfutfu yalemihlatjelo beyenyukela kubonkulunkulu bakhe, wayenta nasemagcumeni kanye nangephansi kwato tonkhe tihlahla letinkhulu.+
5 Ngako Jehova Nkulunkulu wakhe wamnikela esandleni senkhosi yaseSiriya+ kangangekutsi bamncoba, batfumba bantfu bakhe labanyenti futsi bahamba nabo babayisa eDamaseko.+ Waphindze wanikelwa esandleni senkhosi yaka-Israyeli leyabulala bantfu bakhe labanyenti.
6 Phekha+ indvodzana yaRemaliya wabulala emadvodza lanesibindzi langu-120 000 ngelilanga linye kaJuda, ngobe emaJuda bekashiye Jehova Nkulunkulu wabokhokho bawo.+
7 Zikhri lisotja lelilichawe lesive saka-Efrayimu, wabulala Maseya indvodzana yenkhosi kanye na-Azrikamu lobekayindvuna yesigodlo na-Elkhana lobekalandzela inkhosi ngesikhundla.
8 Ngetulu kwaloko, ema-Israyeli atfumba bomnakabo labangu-200 000, lokufaka ekhatsi bafati, emadvodzana nemadvodzakati; aphindze atitsatsela tintfo letinyenti ahamba nato aya eSamariya.+
9 Umphrofethi waJehova lokutsiwa ngu-Odedi bekakanye nabo. Bekahamba embili kulelibutfo lebelichamuka eSamariya atsi: “Loku kwenteke ngenca yekutsi Jehova Nkulunkulu wabokhokho benu bekawatfukutselele emaJuda waze wawanikela esandleni senu+ futsi niwabulele ngesibhuku lesikhulu lesize sefika emazulwini.
10 Nyalo nihlele kwenta bantfu bakaJuda nebaseJerusalema tinceku netincekukati tenu.+ Ngetulu kwaloko, nite yini licala embikwaJehova Nkulunkulu wenu?
11 Ngicela ningilalele futsi nibabuyisele emuva bantfu lenibatfumbile lenabatsatsa kubomnakenu ngobe intfukutselo yaJehova itanivutsela.”
12 Ngenca yaloko, letinye tindvuna taka-Efrayimu, bo-Azariya indvodzana yaJehohanani, Bherekhiya indvodzana yaMeshilemothi, Jehizkiya indvodzana yaShalumi kanye na-Amasa indvodzana yaHadilayi, bakhuluma nalabo lebebabuya emphini,
13 batsi kubo: “Labantfu labatfunjiwe ningabaletsi lapha ngobe loko kutasenta sibe nelicala kuJehova. Loko lenicabanga kukwenta kutakwengeta tono lesinato kuphindze kusente sibe nelicala ngobe licala letfu selivele likhulu futsi intfukutselo yaNkulunkulu imelene nema-Israyeli.”
14 Ngako lamasotja lahlomile aniketa letindvuna kanye nalo lonkhe libandla letintfo lebekatitsatsele tona nalabantfu lebebatfunjiwe.+
15 Ngemuva kwaloko, emadvodza lebekabitwe ngemagama asukuma atsatsa labantfu lebebatfunjiwe ase abaniketa timphahla bonkhe lebebangcunu. Letimphahla atitsatsa kuletintfo lebekatitsatsele tona emphini. Ngako lamadvodza abagcokisa ase abaniketa tincabule, kudla, kwekunatsa nemafutsa ekugcobisa. Ngetulu kwaloko, labo labesebaphelelwe ngemandla abagibelisa etimbongolweni abamikisa kubomnakabo eJerikho, lidolobha letihlahla telusundvu. Ngemuva kwaloko, lamadvodza abuyela eSamariya.
16 Ngaleso sikhatsi, iNkhosi Ahazi yacela lusito emakhosini ase-Asiriya.+
17 Sive saka-Edomu saphindze sahlasela sive sakaJuda futsi satfumba bantfu bakhona.
18 EmaFilisti+ aphindze ahlasela emadolobha aseShefela+ kanye neNegebhu yakaJuda futsi ancobe iBhethi-shemeshi,+ i-Ayaloni,+ iGederothi, iSokho nemadolobha labomakhelwane, iThimna+ nemadolobha labomakhelwane kanye neGimzo nemadolobha labomakhelwane; emaFilisti abese ahlala lapho.
19 Jehova wasitfobisa sive sakaJuda ngenca yeNkhosi Ahazi yaka-Israyeli ngobe yabangela kutsi emaJuda atentele matsandza lokwabangela kutsi angetsembeki kuJehova.
20 INkhosi Thiglathi-phileseri+ yase-Asiriya yagcine ifikile yatomelana naye yambangela kucindzeteleka+ esikhundleni sekutsi imsite.
21 Ngobe Ahazi bekatsetse tintfo endlini yaJehova nasendlini* yenkhosi,+ nasetindlini tetindvuna watipha inkhosi yase-Asiriya; kodvwa akuzange kumsite ngalutfo loko.
22 Ngesikhatsi isecindzetelekile, iNkhosi Ahazi ayizange yetsembeke kuJehova.
23 Yacala kwenta imihlatjelo kubonkulunkulu baseDamaseko+ lebebayincobile+ futsi yatsi: “Ngobe bonkulunkulu bemakhosi aseSiriya balusito kuwo, ngitakwenta imihlatjelo kubo kuze nami bangisite.”+ Labonkulunkulu babangela kutsi yena kanye nawo onkhe ema-Israyeli bancotjwe.
24 Ngetulu kwaloko, Ahazi wabutsisa ndzawonye titja lebetisendlini yaNkulunkulu weliciniso; wabese uyatiphihlita letitja tendlu yaNkulunkulu weliciniso taba ticucu,+ wavala iminyango yendlu yaJehova+ futsi watakhela ema-al’thare kulo lonkhe laseJerusalema.
25 Kuwo onkhe emadolobha akaJuda, wakha tindzawo letiphakeme tekwentela labanye bonkulunkulu imihlatjelo yekushiswa+ futsi watfukutselisa Jehova Nkulunkulu wabokhokho bakhe.
26 Lomunye umlandvo wakhe, konkhe lakwenta kusukela ekucaleni kuze kube sekugcineni, kubhaliwe eNcwadzini Yemakhosi akaJuda newaka-Israyeli.+
27 Ahazi wabese uyafa futsi wangcwatjwa lapho kwangcwatjwa khona bokhokho bakhe edolobheni laseJerusalema ngobe abazange bamyise etindzaweni tekungcwabela emakhosi aka-Israyeli.+ Indvodzana yakhe Hezekiya yaba yinkhosi esikhundleni sakhe.
Imibhalo lengentansi
^ Nobe “tithico letincibilikisiwe.”
^ Fundza Tinchazelo Temagama, ubuke ligama lelitsi “IGehena.”
^ Nobe “esigodlweni.”
