Incwadzi Yekucala YeTikhronike 22:1-19
22 Davide wabese utsi: “Nayi indzawo yendlu yaJehova Nkulunkulu weliciniso, nali futsi neli-al’thare lemnikelo wekushiswa wema-Israyeli.”+
2 Davide wakhipha nemyalo wekutsi kuhlanganiswe bantfu bekuhamba+ labebaseveni laka-Israyeli, wase ubanika umsebenti wekujuba ematje bese bawalungisa kahle kute kwakhiwe ngawo indlu yaNkulunkulu weliciniso.+
3 Davide waphindze walungiselela insimbi lenyenti kakhulu yekwakha tipikili teminyango yemagede, neyekwakha tintfo tekuhlanganisa, waphindze walungiselela nelitfusi lelinyenti kangangekutsi belingakaleki,+
4 walungiselela netingodvo temsedari+ lebetingeke tibalwe, ngobe bantfu baseSidoni+ nebaseThire+ baletsela Davide tingodvo temsedari letinyenti.
5 Davide watsi: “Indvodzana yami Solomoni iseyincane futsi isengakafundzi lutfo lolunyenti.+ Lendlu letawakhelwa Jehova kufanele ibe yinhle kakhulu+ kuze tidvumo tayo kanye nebuhle+ bayo kwatiwe emaveni onkhe.+ Ngako indvodzana yami ngitayentela emalungiselelo.” Davide watilungisa kanjalo letintfo tekwakha taba tinyenti, asengakafi.
6 Ngetulu kwaloko, wabita indvodzana yakhe Solomoni, wase uyinika umyalo wekutsi yakhe indlu yaJehova Nkulunkulu wema-Israyeli.
7 Davide wakhuluma nendvodzana yakhe Solomoni watsi: “Bekusifiso sami kwakha indlu letawubitwa ngelibito laJehova Nkulunkulu wami.+
8 Kodvwa Jehova wakhuluma nami watsi, ‘Ucitse ingati lenyenti kakhulu futsi ulwe timphi letinkhulu. Angeke uyakhe indlu letawubitwa ngelibito lami+ ngobe ucitse ingati lenyenti emhlabeni, embikwemehlo ami.
9 Utawutala indvodzana+ letawuba yindvodza yekuthula* futsi ngitawubangela kutsi ingaphazanyiswa titsa tayo letibomakhelwane+ ngobe libito layo kutawuba nguSolomoni*+ futsi ngitawubangela kutsi kube nekuthula ka-Israyeli ngetikhatsi tekubusa kwayo.+
10 Ngiyo letakwakha indlu letawubitwa ngelibito lami.+ Itawuba yindvodzana yami futsi mine ngitawuba ngubabe wayo.+ Ngitasicinisa phakadze sihlalo sayo sebukhosi ka-Israyeli.’+
11 “Shengatsi Jehova angaba nawe ndvodzana yami futsi shengatsi ungaphumelela bese uyayakha lendlu yaJehova Nkulunkulu wakho, njengobe akhulumile ngawe.+
12 Shengatsi Jehova angakunika kuhlakanipha nekucondza kahle tintfo+ nakakunika emandla ekubusa ka-Israyeli kute ugcine umtsetfo waJehova Nkulunkulu wakho.+
13 Utawuphumelela nangabe uyigcina ngekucophelela imitsetfo+ netehlulelo taJehova layala Mosi kutsi akutjele ema-Israyeli.+ Bani nesibindzi ucine. Ungesabi futsi ungetfuki.+
14 Sengente konkhe lokusemandleni ami kulungiselela kwakhiwa kwalendlu yaJehova. Ngilungiselele ligolide lelingemathalenta* langu-100 000, lisiliva lelingemathalenta langu-1 000 000, nelitfusi nensimbi lokunyenti+ lokungeke kukaleke kanye netingodvo nematje,+ wena sewutakwengeta.
15 Utawusitwa bantfu labanyenti kulomsebenti, lokufaka ekhatsi labajuba ematje baphindze bawalungise kahle, lababochwephesha ekusebenteni ngematje,+ labasebenta ngesigodvo kanye nalo lonkhe luhlobo lwebantfu labanelikhono emisebentini leyehlukahlukene.+
16 Ligolide, lisiliva, litfusi kanye nensimbi kunyenti kangangekutsi akukaleki.+ Sukuma ucale lomsebenti futsi shengatsi Jehova angakusita.”+
17 Davide wabese utjela tonkhe tindvuna taka-Israyeli kutsi tisite indvodzana yakhe Solomoni, watsi:
18 “Jehova Nkulunkulu wenu unani futsi uninike kuphumula kulo lonkhe lelive. Ngobe unikele bantfu balelive kimi futsi lelive selincotjiwe emehlweni aJehova nasemehlweni ebantfu bakhe.
19 Ncumani ngayo yonkhe inhlitiyo yenu nangemphefumulo* wenu kutsi nitawufuna Jehova Nkulunkulu wenu+ bese nicala kwakha lendlu lengcwele yaJehova Nkulunkulu weliciniso,+ kute niletse kuyo libhokisi lesivumelwane saJehova kanye netitja letingcwele taNkulunkulu weliciniso+ kulendlu letawakhiwa bese ibitwa ngelibito laJehova.”+
Imibhalo lengentansi
^ NgesiHebheru kutsi, “yekuphumula.”
^ Lisukela egameni lesiHebheru lelisho “Kuthula.”
^ Lithalenta belilingana nemakhilogremu langu-34.2. Fundza Sandzisanchazo B14.
^ Fundza Tinchazelo Temagama.
