Incwadzi Yekucala YemaKhosi 6:1-38
6 Ngemnyaka wesi-480 ema-Israyeli* aphumile eveni laseGibhithe,+ emnyakeni wesine wekubusa kwaSolomoni ka-Israyeli, ngenyanga yaZivu*+ (inyanga yesibili), Solomoni wacala kwakha indlu yaJehova.*+
2 Lendlu iNkhosi Solomoni leyayakhela Jehova, beyingemamitha langaba ngu-27* budze, langaba ngu-9* bubanti nalangaba ngu-13* kuphakama.+
3 Livulandi+ lelingembili kwelithempeli* belingemamitha langaba ngu-9* budze, lilingana nebubanti balendlu.* Belingemamitha langetulu kwalamane kuya phansi, nawuchamuka ngembili kwayo.
4 Wakha emafasitelo alendlu lebekamancane nawungephandle kantsi nawungekhatsi amakhulu.+
5 Ngetulu kwaloko, wakha sakhiwo emaceleni alendlu; besitungeleta lubondza lwelithempeli* nelwelikamelo lelingekhatsi,+ futsi wakha emakamelo kulesakhiwo lesisemaceleni, kuto tonkhe tinhlangotsi talendlu.+
6 Emakamelo langephansi alesakhiwo lesisemaceleni bekangemamitha langaba mabili* bubanti, bese kutsi emakamelo langetulu kwawo acishe abe ngemamitha lamatsatfu* bubanti kantsi langetulu kwalawo wona angemamitha langetulu kwalamatsatfu* bubanti. Wakha tinsika emaceleni ayo yonkhe lendlu kute kubete lokutsintsa lubondza lwayo.+
7 Lendlu beyakhiwe ngematje labesavele alungiswe kahle+ kuze kungabi khona umsindvo wemahhamela nobe wemazembe nobe walamanye emathulusi ensimbi kulendlu nayisakhiwa.
8 Umnyango wemakamelo langephansi bewuseluhlangotsini loluseningizimu* yalendlu,+ bekuphindze kube netitebhisi lebetikhuphukela emakamelweni lasemkhatsini tize tiyofika emakamelweni langetulu kwawo.
9 Wachubeka nekwakha lendlu futsi wayicedza+ wabese uyifulela ngetingodvo temsedari nangemapulango awo.+
10 Wakha nemakamelo latungeleta lendlu,+ ngalinye lawo belingetulu kwemamitha lamabili* kuphakama futsi lamakamelo bekahlanganiswe nalendlu ngetingodvo temsedari.
11 Kwabese kufika livi laJehova kuSolomoni latsi:
12 “Mayelana nalendlu loyakhako, nangabe utawuhamba ngetimiso tami uphindze ukhiphe tehlulelo tami, ugcine nayo yonkhe imiyalo yami ngekutsi uhambe ngayo,+ ngitasigcina setsembiso lengasenta kuDavide babe wakho,+
13 futsi ngitawuhlala emkhatsini wema-Israyeli,+ angeke ngibalahle bantfu bami ema-Israyeli.”+
14 Solomoni wachubeka nekwakha lendlu anemgomo wekuyicedza.
15 Wakha lubondza lolungekhatsi ngemapulango emsedari. Wafaka tingodvo kusukela esiyilweni kuya eluphahleni futsi wafaka nemapulango emjunipha+ esiyilweni.
16 Waphindze wakha incenye lengemamitha langu-9* endzaweni lengemuva kwalendlu ngemapulango emsedari kusukela esiyilweni kuze kuyofika emakabheni, khona lapho* wakha likamelo lelingekhatsi,+ iNgcwelengcwele.+
17 Kulelithempeli,*+ incenye yalendlu lengembili kweNgcwelengcwele—beyingemamitha langaba ngu-18.*
18 Kulomsedari lobewufakwe ngekhatsi kulendlu, bekudvwetjwe titselo letincane letiyindingilizi+ kanye netimbali.+ Kuyo yonkhe lendlu bekunemsedari; kute litje lebelibonakala.
19 Wabese ulungisa lelikamelo lelingekhatsi+ kulendlu kute abeke kulo libhokisi lesivumelwane saJehova.+
20 Lelikamelo lelingekhatsi belingemamitha langu-9* budze, nalangu-9* bubanti, nemamitha langu-9* kuphakama;+ walinameka ngeligolide lelicwengisisiwe; li-al’thare+ walifaka umsedari.
21 Solomoni wanameka ngekhatsi kulendlu ngeligolide lelicwengisisiwe wabese ulihlobisa ngetinketane teligolide ngembili+ kwalelikamelo lelingekhatsi+ lelalinamekwe ngeligolide.
22 Yonkhe lendlu wayinameka ngeligolide yaze yaphela; wanameka ngeligolide neli-al’thare+ lebeliseceleni kwelikamelo lelingekhatsi.
23 Ekamelweni lelingekhatsi wakha emakherubhi+ lamabili ngesigodvo sesipheshula,* ngalinye belingetulu kwemamitha lamane* budze.+
24 Luphiko lwelikherubhi belungetulu kwemamitha lamabili* budze, nalololunye lungetulu kwemamitha lamabili. Kusukela ekucaleni kweluphiko lunye kuyofika ekucaleni kwalolunye, bekungemamitha langetulu kwalamane* budze.
25 Likherubhi lesibili nalo belingetulu kwemamitha lamane.* Bukhulu kanye nekuma kwalamakherubhi bekufanana.
26 Budze belikherubhi linye bebungetulu kwemamitha lamane,* futsi lamakherubhi bekalingana ngebudze.
27 Wabese ufaka lamakherubhi+ ekamelweni lelingekhatsi.* Timphiko talamakherubhi betivuleke kangangekutsi luphiko lunye belufika elubondzeni, bese kutsi luphiko lwalelelinye nalo lufika kulololunye lubondza. Leletinye timphiko betifika emkhatsini walendlu futsi betitsintsana.
28 Wase unameka lamakherubhi ngeligolide.
29 Kulo lonkhe lolubondza lwalendlu nemakamelo ayo langekhatsi nalangephandle, wadvweba emakherubhi,+ tihlahla telusundvu+ kanye netimbali.+
30 Emakamelweni langekhatsi nalangephandle, wafaka ligolide esiyilweni.
31 Emnyango walelikamelo lelingekhatsi, wafaka tivalo tesipheshula, tinsika tasemaceleni netinsika tesivalo njengencenye yesihlanu.*
32 Letivalo letimbili betakhiwe ngesipheshula futsi wadvweba kuto emakherubhi, netihlahla telusundvu kanye netimbali futsi watinameka ngeligolide waphindze wanameka ligolide kulamakherubhi nakuletihlahla telusundvu.
33 Nguleyo indlela lakha ngayo tinsika tetivalo tesipheshula lebetitencenye yesine* ekungeneni kwalelithempeli.*
34 Wenta netivalo letimbili ngesigodvo semjunipha. Sivalo sekucala besinemahhuka lamabili lasihlanganisa netinsika taso futsi nalelesinye sivalo besinemahhuka lamabili lasihlanganisa netinsika taso.+
35 Wadvweba emakherubhi, netihlahla telusundvu kanye netimbali kuto waphindze wakunameka ngeligolide.
36 Wasebentisa ematje lalungiswe kahle aba ngemalayini lamatsatfu kanye nelilayini letingodvo temsedari+ kuze akhe libala langekhatsi.+
37 Ngemnyaka wesine, ngenyanga yaZivu,* kwabekwa sisekelo sendlu yaJehova;+
38 ngemnyaka wesi-11, ngenyanga yaBhuli* (inyanga yesi-8), lendlu kanye nato tonkhe tintfo tayo kwacedvwa kwakhiwa, kulandzelwa ipulani yayo.+ Ngako Solomoni watsatsa iminyaka lengu-7 akha lendlu.
Imibhalo lengentansi
^ Fundza Sandzisanchazo B8.
^ Fundza Sandzisanchazo B15.
^ NgesiHebheru kutsi, “emadvodzana aka-Israyeli.”
^ NgesiHebheru kutsi, “beyingemakhyubhitha langu-60.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ NgesiHebheru kutsi, “emakhyubhitha langu-30.” Fundza Sandzisanchazo B14.
^ NgesiHebheru kutsi, “lithempeli lalendlu.”
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ Nobe “emamitha langu-9 nawusuka eluhlangotsini lwalendlu.”
^ Lapha kubhekiselwa eNgcwele.
^ NgesiHebheru kutsi, “emakhyubhitha lasihlanu.” Fundza Sandzisanchazo B14.
^ NgesiHebheru kutsi, “emakhyubhitha lasitfupha.” Fundza Sandzisanchazo B14.
^ NgesiHebheru kutsi, “emakhyubhitha langu-7.” Fundza Sandzisanchazo B14.
^ NgesiHebheru kutsi, “ngesekudla.”
^ NgesiHebheru kutsi, “kwemakhyubhitha lasihlanu.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ Lokusho, ekhatsi kulendlu.
^ Lokusho, iNgcwele, lebeyingembili kweNgcwelengcwele.
^ NgesiHebheru kutsi, “beyingemakhyubhitha langu-40.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ NgesiHebheru kutsi, “kwemakhyubhitha langu-10.” Fundza Sandzisanchazo B14.
^ NgesiHebheru kutsi, “sihlahla sa-oyili,” kungenteka sipheshula se-Aleppo.
^ NgesiHebheru kutsi, “emakhyubhitha lasihlanu.” Fundza Sandzisanchazo B14.
^ NgesiHebheru kutsi, “emakhyubhitha langu-10.” Fundza Sandzisanchazo B14.
^ NgesiHebheru kutsi, “emakhyubhitha langu-10.” Fundza Sandzisanchazo B14.
^ NgesiHebheru kutsi, “emakhyubhitha langu-10.” Fundza Sandzisanchazo B14.
^ Lokusho, iNgcwelengcwele.
^ Mhlawumbe kubhekiselwa ekwakhiweni kwaletinsika temnyango nobe bukhulu baletivalo.
^ Mhlawumbe kubhekiselwa ekwakhiweni kwaletinsika temnyango nobe bukhulu baletivalo.
^ Lapha kubhekiselwa eNgcwele.
^ Fundza Sandzisanchazo B15.
^ Fundza Sandzisanchazo B15.
