KUPHILA KWEMAKHRISTU
Jabula Ngekushumayela Tindzaba Letimnandzi
Uke wakutfola kumatima yini kushumayela? Labanye betfu bangavuma. Leni? Kungenteka sihle singanakwa nobe bayasizonda ensimini yetfu futsi siyesaba kukhuluma nebantfu lesingabati. Liciniso likutsi letintfo leti tingayinciphisa injabulo yetfu. Nanobe kunjalo, sikhonta Nkulunkulu lojabulako lofuna simkhonte sijabulile. (Hla 100:2; 1Tm 1:11) Ngutiphi tizatfu letintsatfu letingasenta sijabule emsebentini wekushumayela?
Sekucala, sishumayela umlayeto welitsemba. Nobe nje litsemba seliphela kulabanyenti lamuhla, singafinyelela tinhlitiyo tebantfu ‘ngetindzaba letimnandzi.’ (Isa 52:7) Letindzaba letimnandzi teMbuso waNkulunkulu tingasijabulisa. Ngaphambi kwekutsi uyoshumayela, zindla ngetibusiso uMbuso waNkulunkulu lotatiletsa emhlabeni.
Sesibili, letindzaba letimnandzi lesitishumayelako tiyabasita bantfu ekuphileni kwabo kwamalanga onkhe. Nasebafundzile bayayishiya imikhuba lemibi futsi baba nembono lomuhle ngelikusasa. (Isa 48:17, 18; Rom 1:16) Singaticabanga sisemsebentini wekufuna kanye newekukhulula bantfu. Nanobe bantfu labanyenti bangafuni kukhululwa siyachubeka sifuna labo labakufuna kukhululwa.
Sesitsatfu nalesibaluleke kakhulu kutsi kushumayela kwetfu kuletsa ludvumo kuJehova. Uwujabulela kakhulu umsebenti wetfu wekushumayela. (Isa 43:10; Heb 6:10) Ngetulu kwaloko, usiniketa umoya wakhe longcwele kute siwente kahle lomsebenti. Ngako-ke cela Jehova akuphe injabulo ngobe isitselo semoya longcwele. (Gal 5:22) Ngelusito lwakhe, singakhona kumelana nekukhatsateka futsi sishumayele ngesibindzi. (Imi 4:31) Ngisho nobe bangasilaleli ensimin, sitawutfola injabulo emsebentini wetfu wekushumayela.
Ngumuphi umbono lofuna kuba nawo nawushumayela? Ungayikhombisa njani injabulo?
BUKELANI I-VIDEO LETSI TFOLA INJABULO NGEKUFUNDZA LIBHAYIBHELI FUTSI UZINDLE, BESE NIPHENDVULA NAYI IMIBUTO LELANDZELAKO:
-
Kungani kutichubela sifundvo seliBhayibheli kufanele kute kucala, ngisho nobe sicitsa sikhatsi lesinyenti emsebentini wekushumayela inyanga ngayinye?
-
Singamlingisa njani Mary?
-
Usitfola nini sikhatsi sekuzindla ngeliVi laNkulunkulu?
-
Yini lekujabulisako nawushumayela tindzaba letimnandzi?
