SIHLOKO LESINGUMGOGODLA
Babobani BoFakazi BaJehova?
“Sesidze sikhatsi ngimati Mike, unguFakazi waJehova. Kodvwa lenkholo yakhe bengingayicondzi kahle. Ngubani yena loJehova? Abawagubhi ngani emaholidi? Yinkholo lenjani yona le?”—Becky, California, U.S.A.
“Ngesikhatsi bomakhelwane bami bacala kufundza naBoFakazi BaJehova, bengitibuta kutsi sontfo lini lona leli? Bengicala kuva lisontfo lelibitwa kanje.”—Zenon, Ontario, Canada.
“Mine nemkami besitiva sinelicala ngenca yekutsi besesingasayi esontfweni futsi besicabanga kutsi ngiko lobekwenta BoFakazi BaJehova basivakashele. Besitibuta kutsi nangabe emasontfo lavamile angasenetisi, BoFakazi BaJehova bebangasenetisa njani.”—Kent, Washington, U.S.A.
“Bengingaticondzi timfundziso tabo nekutsi babobani.”—Cecilie, Esbjerg, Denmark.
Kungenteka uke wababona BoFakazi BaJehova bashumayela emakhaya ebantfu nasetindzaweni letinebantfu labanyenti. Kungenteka lomagazini lowufundzako uwuniketwe ngibo. Mhlawumbe solo uyatibuta kutsi babobani vele BoFakazi BaJehova? Umbono wakho kungenteka ufana newebantfu lesikhulume ngabo ekucaleni kwalesihloko.
Nangabe unemibuto mayelana naBoFakazi BaJehova, ungatitfola kuphi timphendvulo? Ungati njani kutsi bafundzisa ini nekutsi bayitsatsaphi imali yekwenta umsebenti wekushumayela kanye neyekwakha tindzawo tekukhonta Nkulunkulu? Ungati ngani kutsi yini lebenta bashumayele emakhaya ebantfu nasetindzaweni letiphitsitelako?
Cecilie lesikhulume ngaye ekucaleni watsi: “Tintfo letinyenti ngaBoFakazi BaJehova ngatifundza ku-Internet.” “Tinyenti tintfo letimbi lebengitiva tikhulunywa ngaBoFakazi. Ngaleso sizatfu ngacala kubenyanya. Kodvwa ngekuhamba kwesikhatsi ngacoca nalomunye waBoFakazi futsi waphendvula yonkhe imibuto lebenginayo ngabo.”
Uyafuna yini kwati liciniso ngaBoFakazi BaJehova? Kuze utfole liciniso ngaBoFakazi BaJehova kuncono kubuta bona, ngibo lababhale lomagazini. (Taga 14:15) Siyetsemba tihloko letikulomagazini titakuchazela kutsi sibobani, sifundzisa ini nekutsi siwenta njani umsebenti wekushumayela.
