Ngatalelwa endzaweni lephuyile edolobheni laseMontreal. Nanginetinyanga letisitfupha, babe wami washona, lokwenta kutsi make asale nayo yonkhe imisebenti yasekhaya. Bengiwekugcina kubantfwana labasiphohlongo.

Njengobe ngikhula bengisebentisa tidzakamiva, ngigembula, nginebudlova, futsi bengakha bungani netigelekece. Nangineminyaka lelishumi, ngacala kusebentela tingwadla kanye nabomashonisa. Ngangivame kukhuluma emanga futsi ngikutsandza kudlala ngebantfu ngekwenta nobe yini lebuhumusha kubo. Loko besekufana nekusebentisa tidzakamiva kimi.

Nangineminyaka lengu-14, besenginguchwephesha ekuyengeni bantfu. Nasi sibonelo: Bengitsenga emawashi, kwekutihlobisa lokugacwa esandleni, kanye netindandatho letifakwe umbala weligolide, bese ngitibhala kutsi takhiwe ngeligolide lelinesisindvo lesisetulu, futsi ngititsengise esitaladini nalakupaka khona timoto etindzaweni letinetitolo. Bengikujabulela kwakha imali melula. Ngalelinye lilanga, ngatfola imali lecishe ibe ngu-$10000 (E100 000)!

Ngemuva kwekutsi ngicoshwe esikolweni lesicondzisa tigwegwe nangineminyaka lengu-15, ngaba bete indzawo yekuhlala. Bengilala etitaladini, emapaki, nobe emakhaya ebangani lebebangemukela.

Ngenca yalobuhumusha lebengibenta, emaphoyisa abehlale angiphenya ngemibuto. Kodvwa njengobe bengingatsengisi timphahla letebiwe, angizange ngiye ekhulukutfu. Nanobe kunjalo, bengibhadala timali letishisiwe, ngenca yekuba lihumusha, kukhuluma emanga, kanye nekutsengisa ngaphandle kwemvume. Njengobe bengingabesabi bantfu, bengihambela tikweleti tabomashonisa. Loko bekuyingoti kakhulu, futsi ngaletinye tikhatsi bengiphatsa sibhamu. Ngaletinye tikhatsi, bengisebenta nelicembu letigebengu letihlelekile.

Ngacala kuva ngeliBhayibheli nangineminyaka lengu-17. Bengihlala nentfombi yami nayicala kufundza liBhayibheli  naBoFakazi BaJehova. Kodvwa bengingakutsandzi lokushiwo liBhayibheli mayelana nekutiphatsa, ngako ngayishiya ngahamba ngayohlala nalenye intfombatana, nayo lebengijola nayo.

Imphilo yami yashintja lapho singani sami sesibili naso sicala kufundza liBhayibheli naBoFakazi! Wenta lushintjo endleleni labephila ngayo futsi ngajabula ngekutsi besekanemoya lophansi futsi abeketela. Ngasemukela simemo sekuya emhlanganweni loseHholweni LeMbuso laBoFakazi BaJehova. Ngemukelwa bantfu labahloniphekile nalabanemusa. Kwakunemehluko lomkhulu kuloko lebengikwati! Bengicabanga kutsi umndeni wakitsi awunendzaba nami; angilutfolanga lutsandvo nekunakekelwa kahle kusukela ngisesemncane. Lutsandvo lengalutfola kuBoFakazi BaJehova belunguloko lebengikufisa. BoFakazi nabacela kungifundzela liBhayibheli ngavele ngavuma ngekushesha.

Lebengikufundza eBhayibhelini kwasindzisa kuphila kwami. Besihlela kuyobamba inkunzi nalabanye lababili lebesinabo, kuze ngikhone kubhadala tikweleti lengaba nato ngenca yekugembula lebeticishe tibe ngetulu kwa-$50 000 (E500 000). Kodvwa ngiyajabula kutsi ngagcine ngingakakwenti loko! Laba lababili bachubeka naloko lebesikuhlelile. Munye wabo waboshwa, kwatsi lolomunye yena wabulawa.

Njengobe bengisafundza liBhayibheli, ngabona kutsi belungakanani lushintjo lobekufanele ngilwente ekuphileni kwami. Nasi sibonelo: Ngafundza loko lobekushiwo liBhayibheli ku-1 Khorinte 6:10 nalitsi: “Emasela, bantfu lababukhali, tidzakwa, labetfukako, nobe tigebengu ngeke balidle lifa leMbuso waNkulunkulu.” Ngatsi nangilifundza lelo vesi emehlo ami avele agcwala tinyembeti ngenca yemphilo lebengiyiphila. Ngasibona sidzingo sekutsi ngiyishintje ngalokuphelele indlela lengiphila ngayo. (Roma 12:2) Bengisidlova, nginelulaka lolubi futsi kukhuluma emanga besekuyindlela yami yekuphila.

Nanobe kunjalo, ngaphindze ngafundza eBhayibhelini kutsi Jehova unemusa futsi uyatsetselela. (Isaya 1:18) Ngathantaza ngalokujulile, ngincenga Jehova kutsi angisite ngiyiyekele ngalokuphelele indlela lebengiphila ngayo. Ngelusito lwakhe, kancane kancane ngakhona kushintja indlela yami yekuphila. Ngatsatsa sinyatselo lesihle sekushada nentfombi yami.

Besengineminyaka lengu-24 futsi ngishadile, nginebantfwana labatsatfu. Nyalo besekufanele ngitfole umsebenti lokahle. Kodvwa inkinga beyikutsi bengifundze kancane futsi kute bantfu lebebangakhuluma kahle ngami. Nalapho ngathantaza kuJehova ngemdlandla nangalokusuka enhlitiyweni. Ngase ngiyahamba ngiyofuna umsebenti. Bengitjela labo labebanganginika umsebenti kutsi ngifuna kushintja indlela lengiphila ngayo futsi ngente umsebenti ngekwetsembeka. Ngaletinye tikhatsi bengichaza kutsi ngifundza liBhayibheli nekutsi ngitimisele kuba sakhamuti lesikahle. Labanyenti balabo lebengikhuluma nabo bala kungicasha. Ekugcineni, ngemuva kwekutsi ngisho umlandvo wami lomubi kulomunye lobekangihlolela umsebenti, watsi: “Angati kutsi kungani, kodvwa kukhona lokungitjela kutsi angikucashe.” Ngakholwa kutsi Jehova wayiphendvula imithantazo yami. Ngekuhamba kwesikhatsi mine nemfati wami sabhajatiswa saba ngulabanye baBoFakazi BaJehova.

Lamuhla ngiyaphila ngobe ngasebentisa timiso teliBhayibheli futsi ngaphila ngendlela yebuKhristu. Senginemndeni wami lengiwutsandzako. Ngenca yekutsi ngiyati kutsi Jehova wangicolela, ngijabulela kuba nanembeza lohlantekile.

Kuleminyaka lengu-14 leyendlulile, bengishumayela ema-awa langu-70 ngenyanga ngisita labanye bafundze loko lokufundziswa liBhayibheli futsi muva nje nemkami sewenta ngendlela lefanako. Kuleminyaka lengu-30 leyendlulile, ngijabulele kusita bantfu lengisebenta nabo labangu-22 kutsi bakhonte Jehova. Solo ngisaya etitolo kodvwa hhayi ngobe ngilihumusha njengobe benginjalo. Nyalo sengifuna kubapha lokutsite: Litsemba lekuphila emhlabeni lomusha lotako lapho kutabe sekute khona bantfu labangemahumusha.​—Tihlabelelo 37:10, 11.