Ngatalelwa eSanto Domingo, eDominican Republic. Ngingutfunjana kubantfwana labane. Batali bami bebatifundziswa futsi bebafisa kukhulisa bantfwana babo endzaweni lenebantfu labacotfo. Kusesele iminyaka lemine ngitalwe, batali bami bahlangana netitfunywa telivangeli telisontfo lema-Mormon. Kugcoka nekutilungisa kwaletitfunywa telivangeli lebetingemajaha lasemasha nekutiphatsa kahle kwato, kwabatsintsa batali bami futsi ngekushesha bancuma kutsi sonkhe ekhaya sibe bekucala kujoyina lelisontfo lelibitwa ngekutsi yi-Church of Jesus Christ of Latter-day Saints nome i-Mormon Church endzaweni yangakitsi lebeyisesihlengeni.

Nangisakhula, bengijabulela tikhatsi tekutijabulisa nelisontfo futsi bengikuhlonipha kakhulu kutsi ema-Mormon atsatsa imphilo yasekhaya nekutiphatsa lokuhle njengentfo lebalulekile. Bengitigcabha ngekuba ngum-Mormon futsi ngatibekela umgomo wekuba sitfunywa selivangeli.

Nangineminyaka lengu-18 budzala, umndeni wakitsi watfutsela eMelika ngemgomo wekungisita kutsi ngiye enyuvesi lenemfundvo lekahle. Ngemuva kwemnyaka, make lomncane nababe lomncane lababoFakazi BaJehova, basivakashela eFlorida. Basimema kutsi siye nabo emhlanganweni lomkhulu waboFakazi BaJehova. Kwangijabulisa kutsi wonkhe umuntfu lebekakhona bekavula imibhalo abhala lakuvako nakuchubeka lomhlangano. Nami, ngacela ipheni neliphepha ngabhala phansi lebengikuva.

Ngemuva kwalomhlangano make lomncane nababe lomncane batsi njengobe nginesifiso sekuba sitfunywa selivangeli bangatsandza kungisita ngifundze liBhayibheli. Ngakutsatsa njengembono lomuhle loko njengobe ngaleso sikhatsi besetitinyenti tintfo lengitifundzile eNcwadzini Yema-Mormon kunaseBhayibhelini.

Nasicoca ngelucingo ngeliBhayibheli, make lomncane nababe lomncane bebahlale bangikhutsata kutsi ngicatsanise tinkholelo tami nalokufundziswa ngilo. Bebafuna kutsi ngititfolele mine matfupha loko lokufundziswa liBhayibheli.

 Betitinyenti tintfo letiyincenye yetimfundziso tema-Mormon lengatemukela kodvwa bengingati kahle kutsi liBhayibheli liyahambisana yini nato. Make lomncane wangitfumelela i-“Phaphama!” ya-November 8, 1995, leshicilelwa boFakazi BaJehova, lebeyinetihloko letikhuluma ngenkholo yema-Mormon. Ngamangala kutfola kutsi bengingatati timfundziso letinyenti tema-Mormon. Loko kwangenta ngatihlolela mine ku-Web site yema-Mormon kuze ngitociniseka kutsi lebekubhalwe kule-“Phaphama!” bekuliciniso yini. Ngatfola kutsi kuliciniso futsi lawo maciniso aphindze angikhanyela kakhudlwana ngalesikhatsi ngivakashela imisamo yema-Mormon e-Utah.

Bengisolo ngikholelwa kutsi iNcwadzi YemaMormon neliBhayibheli kuyavumelana. Ngabona umehluko nangicala kufundza liBhayibheli ngekucophelela ngobe ngabona kushayisana lokukhona emkhatsini wetimfundziso tema-Mormon neteliBhayibheli. Sibonelo saloko kutsi, kuHezekeli 18:4 liBhayibheli litsi umphefumulo uyafa kodvwa iNcwadzi Yema-Mormon, ku-Alma 42:9, itsi: “Umphefumulo awuyuze ufe.”

Ngaphandle kwekungafanani kwetimfundziso teliBhayibheli netimfundziso tema-Mormon, ngaphindze ngakhatsatwa yimfundziso yema-Mormon yekushisekela buve. Sibonelo saloko kutsi ema-Mormon afundziswa kutsi insimu yase-Edeni beyise-Jackson County, eMissouri, eMelika. Baphrofethi balelisontfo batsi “ngesikhatsi uMbuso waNkulunkulu sewubusa, umjeka waseMelika utawube uphephetela uletse inkhululeko kanye nemalungelo lalinganako.”

Ngatibuta kutsi kutakwenteka yini loku eveni lengatalelwa kulo nakulamanye emave. Lendzaba ngayetfula encociswaneni lengaba nayo ngalelinye lilanga sekuhlwile ngesikhatsi ngitfola lucingo lolubuya kumu-Mormon losasemncane lobekaceceshelwa kuba sitfunywa selivangeli. Ngambuta ngangagegisi kutsi abengalwa yini nalamanye ema-Mormon nangabe live lakhe belingalwa nelawo. Nakangitjela kutsi angakwenta loko ngamangala. Loko kwanginika litfuba lekutsi ngicwaninge ngijule ngetimfundziso tenkholo yami ngaphindze ngacocisana nebaholi beliSontfo lema-Mormon. Bangiphendvula ngekutsi imibuto yami beyifaka ekhatsi tintfo letingacondzakali letiyocondzakala ngalelinye lilanga nabatfola kukhanya ngaleyo ndzaba.

Ngidvunyatwe yinchazelo yabo, ngase ngiyatihlolisisa ngaphindze ngahlolisisa sizatfu lebesenta ngifune kuba sitfunywa selivangeli sema-Mormon. Kwangikhanyela kutsi sifiso sami sekuba sitfunywa selivangeli besibangelwe kutsi ngifisa kuba lusito kulabanye bantfu. Lokunye lokwangenta ngafisa kuba sitfunywa selivangeli kutsi bantfu bebatangihlonipha. Liciniso belikutsi bekukuncane kakhulu lebengikwati ngaNkulunkulu. Nanobe bengihle ngilifundza liBhayibheli tikhatsi letinyenti esikhatsini lesendlulile, belingasiyo intfo lemcoka kimi. Bengingati lutfo ngaloko Nkulunkulu lakuhlosile ngemhlaba nobe ngebantfu.

Ngesikhatsi ngitadisha liBhayibheli naboFakazi BaJehova ngafundza tintfo letinyenti lokufaka ekhatsi kutsi lingubani ligama laNkulunkulu, yini leyentekako nasifa nekutsi iyini indzima yaJesu ekugcwaliseni injongo yaNkulunkulu. Ekugcineni ngatitfola sengijwayelana nalencwadzi lokumnandzi kuyifundza futsi ngakujabulela kucocela labanye loko bengikufundza. Bengisolo ngati kutsi ukhona Nkulunkulu kodvwa nyalo umehluko lokhona kutsi sengiyakhona kukhuluma naye ngemthantazo njengeMngani wami lomkhulu. Nga-July 12, 2004, ngabhajatiswa ngaba nguFakazi WaJehova futsi ngemuva kwetinyanga letisitfupha ngacala kusebentisa sikhatsi lesinyenti ngishumayela.

Ngasebenta iminyaka lesihlanu endlunkhulu yaboFakazi BaJehova eBrooklyn eMelika. Ngakujabulela kakhulu kuba lusito ekukhicitweni kwemaBhayibheli kanye netincwadzi letisekelwe kulo letisita tigidzi tebantfu emhlabeni futsi ngiyakujabulela kusita labanye kutsi bafundze ngaNkulunkulu.