Uyafuna yini kwati liciniso ngaNkulunkulu, kutsi ungubani, yini layitsandzako nalayenyanyako nekutsi iyini intsandvo yakhe? EVini lakhe liBhayibheli, Nkulunkulu Jehova usembulele lonkhe liciniso ngaye. Akusibo bonkhe bantfu labangafundza liBhayibheli futsi bakucondze labakufundzako. Kubangelwa yini loko? Kubangelwa kutsi emaciniso eliBhayibheli awacondvwa ngunome ngubani. Ase sichaze loko Jesu lakusho ngalendzaba.—Fundza Matewu 11:25.

Lelivesi licala ngemavi latsi: “Ngaleso sikhatsi Jesu wakhuluma watsi.” Lokwashiwo nguJesu ngemuva kwaloko bekuhambisana naloko bekusandza kwenteka. Jesu bekasandza kusola bantfu lebebangafuni kumlalela labebahlala emadolobheni lamatsatfu aseGalile, lapho bekente khona timangaliso. (Matewu 11:20-24) Ungase utibute kutsi ‘bekungenteka njani kutsi umuntfu lobone Jesu enta timangaliso angawakholelwa emaciniso lebekawafundzisa?’ Kungalaleli kwebantfu bekwentiwa kutsi bebanetinhlitiyo letilukhuni.—Matewu 13:10-15.

Jesu bekati kutsi kuze sicondze emaciniso ngaNkulunkulu latfolakala eBhayibhelini, sidzinga tintfo letimbili: Kusitwa nguNkulunkulu nekuba nesimo lesihle senhlitiyo. Jesu watsi: “Ngiyabonga, Babe, Nkhosi yelizulu nemhlaba, ngobe ukufihlile loku kulabahlakaniphile nalabanekucondza, wakwembula kulabo lababantfwana.” Uyakubona yini lokwenta kutsi emaciniso ngaNkulunkulu latfolakala eBhayibhelini angacondvwa ngibo bonkhe bantfu? Jehova, ‘iNkhosi yelizulu nemhlaba’ angase afihle nome embule emaciniso ngaye kuye ngekutsi utsandza kuwembulela bobani. Nome kunjalo, Nkulunkulu akakhetsi muntfu, kodvwa ubaniketa litfuba lekuwati bonkhe. Yini indzaba labanye abembulela kantsi labanye akabembuleli?

Jehova utsandza bantfu labatitfobako hhayi labatigcabhako. (Jakobe 4:6) Ubafihlele liciniso “labahlakaniphile netati” lokubantfu labatsatfwa ngekutsi batihlakaniphi netifundziswa emhlabeni labatishaya sifuba, labangatjelwa futsi labatibona bangaludzingi lusito lwaNkulunkulu. (1 Khorinte 1:19-21) Nkulunkulu ulembulela “lababantfwana” liciniso ngaye—bantfu labanetinhlitiyo leticotfo nalabatfobeke njengebantfwana. (Matewu 18:1-4; 1 Khorinte 1:26-28) Jesu, iNdvodzana yaNkulunkulu watibona letinhlobo tebantfu. Baholi benkholo labanyenti lebebatigcabha futsi batifundziswa abazange bawucondze umlayeto waJesu kodvwa wacondvwa badwebi betinhlanti lebebatfobekile. (Matewu 4:18-22; 23:1-5; Imisebenti 4:13) Ngisho nalabanye lebebatinjinga nalabebafundzile, batitfoba baba balandzeli baJesu.—Lukha 19:1, 2, 8; Imisebenti 22:1-3.

Ase sibuyele embutweni lesikhulume ngawo ekucaleni, lotsi: Uyafuna yini kwati liciniso ngaNkulunkulu? Nakunjalo, kungase kukudvudvute kwati kutsi Nkulunkulu akabatsandzi bantfu labatitsatsa shengatsi banekuhlakanipha kwalomhlaba. Ngalokwehlukile, uyabatsandza lababukelwa phansi tihlakaniphi. Nawufundza liVi laNkulunkulu unesimo sengcondvo nenhlitiyo lekahle, ungase ube ngulomunye webantfu Jehova labapha sipho lesiligugu, lesikucondza liciniso ngaye. Kulicondza lelo ciniso kutakwenta kuphila kwakho kujabulise nyalo futsi kungakuholela ‘ekuphileni lokunguko sibili,’ lokukuphila lokungapheli eveni laNkulunkulu lelisha lasetsembisa lona lelinekulunga lelitawufika ngekushesha. a—1 Thimothi 6:12, 19; 2 Phetro 3:13.