SIYAJABULA kunatisa kutsi kusukela ku-Sicongosekulindza lesifundvwako salenyanga sesitawuba ne-Sicongosekulindza sesiNgisi lesentiwe saba melula. Sitawuphuma njalo ngenyanga, futsi sitawuba khona umnyaka lowodvwa kute kubonakale kutsi siyasebentiseka yini. Sitawuba netihloko letifundvwako, futsi nangabe kusenesikhala lesisele, kutawufakwa naletinye tihloko. Siyetsemba kutsi lomagazini utawukwenetisa sidzingo sakamoya saboFakazi BaJehova labanyenti. Kungani sisho njalo?

SiNgisi lulwimi loluvamile lolukhulunywa bazalwane betfu emaveni lanjengeFiji, Ghana, Kenya, Liberia, Nigeria, Papua New Guinea, kanye neSolomon Islands. Nanobe bazalwane betfu kulamave bakhona kukhuluma tilwimi tendzawo, nobe temdzabu, esikhatsini lesinyenti basebentisa siNgisi emihlanganweni yelibandla kanye nasemsebentini wekushumayela. LesiNgisi labasikhulumako simelula kunaleso lesisisebentisako etincwadzini tetfu. Kuphindze kube nalabanye bantfu baJehova labatfutsela emaveni lapho bafike baphoceleleke khona kutsi bakhulume siNgisi ngisho nobe bangasati kahle. Ngetulu kwaloko, labo bazalwane abakhoni kuya emihlanganweni yetilwimi tabo.

Tihloko lesitifundza maviki onkhe esifundvweni se-Sicongosekulindza tiyindlela lehamba embili lesitfola ngayo kudla kwakamoya lokufika ngesikhatsi. Ngako-ke, kute kusitwe labo lababa khona kulesifundvo kutsi bazuze ngalokugcwele, lomagazini wesiNgisi lesimelula unemagama kanye nemisho lokumelula kuyicondza. Lomagazini utawuba nesimbonyo lesehlukile. Tihlokwana, tigaba, imibuto yekubuketa, kanye netitfombe talomagazini titawufanana netaloyo lovamile. Ngako-ke, esifundvweni se-Sicongosekulindza, wonkhe umuntfu angafundza kumagazini wakhe futsi ahlanganyele kulesifundvo. Kute ubone umehluko elulwimini lolusetjentiswe kulabomagazini, buka lesibonelo lesingentansi lesitsetfwe esigabeni 2 sesihloko lesifundvwako sekucala kulomagazini.

Siyetsemba kutsi loku kutawuphendvula imithandazo yebantfu labanyenti labatsi kuJehova: “Ngiphe ingcondvo yekufundza imiyalo yakho.” (Hla. 119:73) Siyaciniseka ngekutsi labo labangasati kahle siNgisi, kuhlanganise nalabanye bebantfwana labasikhulumako, batawusilungiselela kancono sifundvo se-Sicongosekulindza liviki ngalinye. Simbonga kakhulu Jehova ngekutsi ‘ngekutsandza bazalwane,’ usebentisa ‘sisebenti lesetsembekile nalesihlakaniphile’ kute kudla kwakamoya kuhlale kukhona.​—1 Phet. 2:17; Mat. 24:45.

Sigungu Lesibusako SaboFakazi BaJehova