“ . . . tiyawushunyayelwa emhlabeni wonkhe.”​—MATEWU 24:14.

TINDZABA LETINHLE tishunyayelwa boFakazi BaJehova emhlabeni wonkhe. Loku bakwenta ngetindlela letehlukehlukene. Lenye indlela labakwenta ngayo loku . . .

Ngemavi Abo. NjengaJesu nebafundzi bakhe, boFakazi BaJehova baya kubantfu kute babatjele ngetindzaba letinhle. (Lukha 8:1; 10:1) Abalindzeli kutsi bantfu bete kubo. Kufakaza kubantfu ngeMbuso waNkulunkulu ngumsebenti lowentiwa ngibo bonkhe boFakazi labangetulu kwetigidzi letisikhombisa. Bashumayela emtini ngemuti, emgwacweni, ngelucingo, kanye nangaletinye tindlela. Emnyakeni lowengcile, boFakazi bacitse ema-awa langetulu kwesigidzigidzi nencenye kulomsebenti.

Abagcini ngekufundzisa bantfu ngeMbuso waNkulunkulu, kodvwa baphindze babafundzise ‘konkhe [Jesu] labayale ngako.’ (Matewu 28:20) Bachuba tifundvo teliBhayibheli tamahhala letingetulu kwetigidzi letisiphohlongo.

BoFakazi bashumayela emhlabeni wonkhe, emaveni langu-236. Bashumayela kubantfu labavela etiveni letehlukehlukene. Baphindze bashumayele emakhaya nasemadolobheni, emahlatsini ase-Amazon newase-Siberia, etingwadvule tase-Afrika, kanye nasetiNtsabeni tase-Himalaya. Ababhadalwa ngekwenta lomsebenti; kunaloko bawenta basebentisa imali yabo kanye nesikhatsi sabo, futsi loko bakwenta ngesizatfu selutsandvo labanalo ngaNkulunkulu nangabomakhelwane. Baphindze bamemetele letindzaba letinhle ngekusebentisa . . .

Tincwadzi Letishicilelwe. Magazini lotsi Sicongosekulindza Simemetela UMbuso WaJehova, sewushicilelwa ngetilwimi letingu-185, futsi ngamunye usakatwa ngelinani lelingetulu kwetigidzi letingu-42. Kantsi magazini lohambisana nawo i-“Phaphama!” lokhuluma ngeMbuso, ushicilelwa ngetilwimi letingu-83 futsi usakatwa ngelinani lelicishe libe tigidzi letingu-40.

Tincwadzi, tincwajana, emapheshana, ema-CD nobe ema-MP3, kanye nema-DVD lachaza timfundziso teliBhayibheli, atfolakala ngetilwimi letingu-540. BoFakazi bashicilele baphindze basakata lamathulusi langetulu kwetigidzigidzi letingu-20 kuleminyaka lelishumi nje kuphela leyengcile, futsi loku kusho kutsi umuntfu loyedvwana emhlabeni wonkhe abetfola emakhophi lamatsatfu aletintfo.

BoFakazi BaJehova baphindze bashicilela futsi bahlela kutsi kushicilelwe emahumusho lehlukehlukene eliBhayibheli. “INguqulo Yezwe Elisha YemiBhalo Engcwele”​—lehunyushwe, yashicilelwa, futsi yasakatwa boFakazi—​iphelele nobe iyincenye, seyitfolakala ngetilwimi letingu-96. Kusakatwe emakhophi ayo langetulu kwetigidzi letingu-166. BoFakazi baphindze batihlanganyele ndzawonye tindzaba letinhle teMbuso . . .

Emihlanganweni YebuKhristu. Imihlangano  yeliviki ngalinye leba semaHholweni eMbuso ayisito tinkonzo tenkholo, kodvwa yentelwe kufundzisa. Kwetfulwa tinkhulumo letisekelwe eBhayibhelini, futsi kufundvwe neliBhayibheli ngelusito lwamagazini Sicongosekulindza kanye naletinye tincwadzi. Kulemihlangano, boFakazi bafundza nekuba bamemeteli betindzaba letinhle labaphumelelako.

Bonkhe boFakazi bafundza tintfo letifananako emabandleni langetulu kwa-107 000 lasemhlabeni wonkhe, futsi loko kubenta babe nebunye. Wonkhe umuntfu wemukelekile kulemihlangano. Akutsatfwa nkhongotelo. Konkhe loku bekutawuba lite kube boFakazi bebehluleka kwenta loko labakufundzisako. Ngako-ke, boFakazi betama kutfutfukisa tindzaba letinhle . . .

Ngesibonelo Sabo. Balwela kuba sibonelo endleleni labatiphatsa ngayo njengemaKhristu, futsi benta konkhe lokusemandleni abo kute baphatse labanye ngendlela nabo labangatsandza kuphatfwa ngayo. (Matewu 7:12) Nanobe banesono futsi ngaletinye tikhatsi benta emaphutsa, baphatsa labanye bantfu ngelutsandvo hhayi ngekucoca nabo ngetindzaba letinhle kuphela kodvwa nangekubasita ngetindlela letehlukehlukene.

BoFakazi BaJehova abetami kushintja lelive ngaloko labakufundzisako. Kunaloko, kutawutsi lapho lomsebenti sewentiwe ngendlela lejabulisa Jehova, kuphela kufike, njengobe Jesu abiketela. Loko kutawusho kutsini ngalomhlaba kanye nangebantfu labahlala kuwo?

[Sitfombe ekhasini 7]

BoFakazi BaJehova bashumayela tindzaba letinhle emhlabeni wonkhe