Jehova UyiNkhosi Yetfu LenguMbusi!

“Simakadze, iNkhosi [lenguMbusi], ngimente siphephelo sami.”—HLA. 73:28.

1. Ngemavi akhe labhalwe ku-1 Khorinte 7:31, kubonakala shengatsi Pawula abekhuluma ngani?

 UMPHOSTOLI PAWULA watsi: “Simo salelive siyendlula.” (1 Khor. 7:31) Kubonakala shengatsi umphostoli Pawula abefananisa lelive nesiteji lesinebadlali labadlala tincenye tebantfu labalungile nobe labangakalungi kute kube ngulapho sesiphela sigaba se-drama letsite.

2, 3. (a) Singayifananisa nani insayeya lebekelwe bukhosi baJehova? (b) Ngumiphi imibuto lesitawucoca ngayo?

² Nalamuhla, kunesimo lesibalulekile lesifanana ne-drama—futsi nawe siyakutsintsa. Sihlobene nekulwelwa kwebukhosi baNkulunkulu Jehova. Le-drama ingafananiswa nesimo lesingenteka endzaweni letsite. Kulolunye luhlangotsi, kunahulumende lomisiwe locondzisa tintfo kute kube nekuhleleka. Ngakulokunye, kuphindze kube nenhlangano lengekho emtsetfweni lebusa ngekukhohlisa, ngebudlova, nangekubulala. Lenhlangano lengekho emtsetfweni ihlasela inkhosi lebusako futsi ivivinya bucotfo balabo labangaphansi kwayo.

³ Simo lesifanana nalesi sikhona emhlabeni wonkhe, futsi kunahulumende losemtsetfweni lomisiwe ‘weNkhosi LenguMbusi, Jehova.’ (Hla. 71:5) Lamuhla, bantfu bashushiswa yinhlangano lengekho emtsetfweni leholwa ‘ngulomubi.’ (1 Joh. 5:19) Lenhlangano ibekele hulumende waNkulunkulu lomisiwe insayeya futsi ivivinya bucotfo babo bonkhe bantfu labangephansi kwekubusa kwawo. Yini lebangele lesimo? Kungani Nkulunkulu asivumele? Yini lesingayenta njengebantfu ngabanye?

Tincenye Tale-Drama

4. Le-drama lechubekako letsintsa indzawo yonkhe ifaka ekhatsi tiphi timphikiswane letimbili letihlobene?

⁴ Le-drama lechubekako letsintsa indzawo yonkhe ifaka ekhatsi timphikiswane letimbili letihlobene: Bukhosi baJehova kanye nebucotfo bebantfu. EmiBhalweni, Jehova uvame kubitwa ngekutsi ‘yiNkhosi lenguMbusi.’ Ngekumetsemba ngalokuphelele, umhlabeli wahlabela: “Simakadze, iNkhosi [lenguMbusi], ngimente siphephelo sami.” (Hla. 73:28) “Bukhosi” busho kuba nemandla etulu kwako konkhe nobe kubusa. Nembusi uneligunya kuko konkhe lokukhona. Kunetizatfu letinhle tekutsatsa Nkulunkulu Jehova njengaLongetulu Kwako Konkhe.—Dan. 7:22.

5. Kungani kufanele sisekele bukhosi baJehova?

⁵ NjengeMdali, Nkulunkulu Jehova unguMbusi wemhlaba wonkhe kanye nendzawo yonkhe. (Fundza Sembulo 4:11.) Jehova unguMehluleli wetfu, Sishayamtsetfo setfu, kanye neNkhosi ngobe nguye lokhipha tehlulelo, imitsetfo kanye nekucondzisa hulumende wakhe losendzaweni yonkhe. (Isa. 33:22) Njengobe sikweleta Nkulunkulu ngekuphila kwetfu futsi setsembele kuye, kufanele simtsatse njengeNkhosi yetfu lenguMbusi. Nangabe sihlala sikhumbula kutsi “Simakadze wasimisa ezulwini sihlalo sakhe sebukhosi, konkhe lokukhona kungaphansi kwembuso wakhe,” sitawuba nenshisekelo yekusekela sikhundla sakhe lesiphakeme.—Hla. 103:19; Imis. 4:24.

6. Kusho kutsini kuba cotfo?

⁶ Kute sikwati kusekela bukhosi baJehova, kufanele sihlale sicotfo kuye. ‘Kuba cotfo’ kusho kutiphatsa ngendlela lefanele nalengenasici.  Umuntfu logcina bucotfo umsulwa futsi ulungile. NaJobe abenjalo.—Jobe 1:1.

Indlela Le-Drama Leyacala Ngayo

7, 8. Sathane wakubekela njani insayeya kufaneleka kwebukhosi baJehova?

⁷ Eminyakeni lengaba ngu-6 000 leyengcile, sidalwa semoya sakubekela insayeya kufaneleka kwebukhosi baJehova. Sifiso sebugovu sekufuna kukhontwa ngiso lesabangela lamavi kanye netento tekuhlubuka. Lesihlubuki sabangela bo-Adamu na-Eva kutsi bangabulaleli bukhosi baJehova futsi setama nekungcolisa libito laKhe ngekutsi sitsi ucale emanga. (Fundza Genesisi 3:1-5.) Lesihlubuki saba Sitsa lesikhulu, Sathane (Umphikisi), Develi (Umhlambalati), inyoka (umkhohlisi), kanye nanyokangwenya (umshwabudzeli).—Semb. 12:9.

⁸ Sathane watenta umbusi lobangisana naNkulunkulu. Njengobe besekubekwe lensayeya, abetawukwenta njani Jehova, loyiNkhosi lenguMbusi? Abetawuvele atibhubhise ngekushesha yini letihlubuki letintsatfu—lokunguSathane, Adamu, kanye na-Eva? Abenawo emandla ekwenta njalo, futsi loko bekungavele kukwente kucace kutsi Jehova unemandla lamakhulu. Bekungaphindze kufakazele kutsi Jehova abekhulume liciniso mayelana nemiphumela yekungalaleli umtsetfo wakhe. Kungani Nkulunkulu angazange akwente loko?

9. Yini Sathane layingabata?

⁹ Ngekucala emanga kanye nangekwenta kutsi bo-Adamu na-Eva bahlubuke kuNkulunkulu, Sathane wangabata lilungelo laJehova lekufuna kutsi bantfu bamlalele. Ngetulu kwaloko, ngekuhunga bo-Adamu na-Eva kutsi bangamlaleli Nkulunkulu, Sathane waphindze wangabata bucotfo bato tonkhe tidalwa letihlakaniphile. Njengobe kuvetwa endzabeni yaJobe, lowahlala acotfo ebukhosini baJehova, Sathane watsi yena angakwati kwenta bonkhe bantfu bahlubuke kuNkulunkulu.—Jobe 2:1-5.

10. Ngekutsi Nkulunkulu angasheshi kulwela bukhosi bakhe futsi abhubhise Sathane, yini layivumele kutsi yenteke?

¹⁰ Ngekutsi Jehova angasheshi kulwela bukhosi bakhe futsi abhubhise Sathane, umnikete sikhatsi sekutsi avete kutsi loko lakusho kuliciniso yini. Nkulunkulu unikete nebantfu litfuba lekuveta bucotfo babo ebukhosini bakhe. Kuye kwentekani njengobe sekwendlule emakhulu eminyaka? Sathane wakhe inhlangano lengekho emtsetfweni lenemandla lamakhulu. Ekugcineni, Jehova utawuyibhubhisa lenhlangano kanye naDeveli, futsi anikete bufakazi lobenele bekufaneleka kwebukhosi bakhe. Nkulunkulu Jehova abeciniseka ngekutsi bekutawuba nemphumela lomuhle, wate wawubiketela ngesikhatsi kuba nekuhlubuka e-Edeni.—Gen. 3:15.

11. Yini bantfu labanyenti labayentile mayelana nebukhosi baJehova?

¹¹ Bantfu labanyenti baye baba nekukholwa futsi bagcina bucotfo babo mayelana nebukhosi baJehova kanye nekungcweliswa kwelibito lakhe. Loku kufaka ekhatsi bo-Abela, Enoki, Nowa, Abrahama, Sara, Mosi, Ruthe, Davide, Jesu, bafundzi bekucala baKhristu, kanye netigidzi tebantfu labagcina bucotfo lamuhla. Labo labasekela bukhosi baNkulunkulu banencenye ekufakazeleni kutsi Sathane ungumcambimanga, kanye nasekususeni sonkhe sihlamba lasibeka ebitweni laJehova ngekutsi atsi angenta bonkhe bantfu bahlubuke.—Taga 27:11.

Siyaciniseka Ngesiphetfo

12. Singaciniseka njani kutsi Nkulunkulu angeke abubeketelele phakadze bubi?

¹² Singaciniseka kutsi ngekushesha Jehova utawubulwela bukhosi bakhe, ngobe angeke abubeketelele phakadze bubi, futsi siyati nekutsi siphila emalangeni ekugcina. Jehova wababhubhisa bantfu lababi ngesikhatsi saZamcolo. Wayibhubhisa iSodoma neGomora kanye naFaro nemabutfo akhe. Sisera nelibutfo lakhe kanye naSenaheribi nemasotja akhe ase-Asiriya abazange bakwati kumelana naLosetikwako Konkhe. (Gen. 7:1, 23; 19:24, 25; Eks. 14:30, 31; Khu. 4:15, 16; 2 Khos. 19:35, 36) Ngako-ke, natsi singaciniseka kutsi Nkulunkulu Jehova angeke akubeketelele phakadze kwedzelelwa kwelibito  lakhe kanye nekuphatfwa kabi kwaboFakazi bakhe. Ngetulu kwaloko, sesiyabubona bufakazi besibonakaliso sekuba khona kwaJesu kanye nesekuphela kwalelive lelibi.—Mat. 24:3.

13. Singakubalekela njani kubhujiswa kanye netitsa taJehova?

¹³ Kute singabhujiswa kanye netitsa taNkulunkulu, kufanele sihlale sicotfo ebukhosini bakhe. Singakwenta njani loko? Ngekutsi singatihlanganisi nekubusa kwaSathane lokungekho emtsetfweni, futsi singavumi kwesatjiswa bantfu bakhe. (Isa. 52:11; Joh. 17:16; Imis. 5:29) Nangabe sitehlukanisa ekubuseni kwaSathane, sitawukwati kusekela Babe wetfu wasezulwini, sibe nelitsemba lekusindza lapho Jehova asusa sihlamba lesibekwe ebitweni lakhe futsi aveta kutsi yena unguMbusi Wendzawo Yonkhe.

14. Yini leyembulwako etincenyeni letehlukehlukene teliBhayibheli?

¹⁴ Yonkhe imininingwane lemayelana nebantfu kanye nebukhosi baJehova ichaziwe kulo lonkhe liBhayibheli. Tehluko tekucala letintsatfu teliBhayibheli tisitjela ngekudalwa kwetintfo kanye nekungena kwemuntfu esonweni, kantsi tehluko tekugcina letintsatfu tikhuluma ngekubuyiselwa kwebantfu esimeni sabo. Tehluko letisemkhatsini tisiniketa imininingwane lemayelana netinyatselo letatsatfwa nguJehova loyiNkhosi lenguMbusi kute afeze injongo yakhe ngebantfu, ngemhlaba, kanye nangendzawo yonkhe. Incwadzi yaGenesisi isitjela ngekutsi Sathane kanye nebubi kwaba khona njani. Incenye yekugcina yeSembulo yona iveta kutsi bubi butawucedvwa njani, Develi utawubhujiswa njani, kanye nekutsi intsandvo yaNkulunkulu itawukwentiwa njani emhlabeni njengobe yentiwa ezulwini. LiBhayibheli liveta imbangela yesono nekufa kanye nekutsi kutawucedvwa njani, bese kuba nenjabulo lenkhulu kanye nekuphila lokuphakadze kulabo labagcina bucotfo.

15. Yini lokufanele siyente kute sizuze ngalesikhatsi imphikiswane letsintsa bukhosi seyifika ekupheleni?

¹⁵ Madvutane, simo salelive sitawushintja ngalokuphelele. Lemphikiswane letsintsa bukhosi itawufika ekupheleni. Sathane utawuyekela kubusa, abhujiswe ngekushesha, futsi intsandvo yaNkulunkulu ngiyo letawuncoba. Kodvwa kute sizuze kuloku, futsi sijabulele tibusiso letinyenti letabiketelwa eVini laNkulunkulu, kufanele sisekele bukhosi baKhe nyalo. Angeke sikwati kuvele sibe semkhatsini nendzawo. Kute sikwati kutsi sitsi: “Simakadze ungakimi,” kufanele sitigcine eluhlangotsini lwakhe.—Hla. 118:6, 7.

Singabulondvolota Bucotfo Betfu!

16. Singaciniseka njani kutsi bantfu bangakwati kulondvolota bucotfo babo kuNkulunkulu?

¹⁶ Singakwati kusekela bukhosi baJehova futsi silondvolote bucotfo betfu, ngobe umphostoli Pawula wabhala: “Anikefikelwa kulingwa lokwehlukile kunekwalabanye bantfu. Kepha Nkulunkulu wetsembekile, yena angeke avume kutsi nilingwe ngalokungetulu kwemandla enu. Ngesikhatsi sekulingwa utaninika emandla ekuma, anentele nendlela yekuphepha.” (1 Khor. 10:13) Tivelaphi tilingo Pawula lakhuluma ngato, futsi Nkulunkulu usentela njani indlela yekuphepha?

17-19. (a) Ngutiphi tilingo ema-Israyeli lahluleka kumelana nato ngesikhatsi asehlane? (b) Kungani singakhona kulondvolota bucotfo betfu kuJehova?

¹⁷ Njengobe kuvetiwe esibonelweni sema-Israyeli ngesikhatsi asehlane, ‘lokulingwa’ kuvela etimeni letingasenta sephule umtsetfo waNkulunkulu. (Fundza 1 Khorinte 10:6-10.) Ema-Israyeli abengakhona kumelana nekulingwa, kodvwa ‘abefisa lokubi’ ngesikhatsi Jehova awaletsela tigwaca inyanga yonkhe. Nanobe labantfu bahlala sikhatsi bangayidli inyama, Nkulunkulu abeloku abaniketa imana kute badle. Kodvwa bona behluleka kumelana nesilingo sekuba nebugovu lobukhulu ngalesikhatsi bagola letigwaca.—Num. 11:19, 20, 31-35.

¹⁸ Ngesikhatsi Mosi ayolandza uMtsetfo eNtsabeni yaseSinayi, ema-Israyeli acala kukhonta titfombe, ngekutsi ahlanganyele ekukhonteni litfole kanye nasekutijabuliseni lokungcolile. Ngesizatfu sekutsi besekangekho  umholi wawo labekakwati kumbona, angena esilingweni. (Eks. 32:1, 6) Ngembikwekutsi angene eVeni Lesetsembiso, ema-Israyeli latinkhulungwane ayengwa besifazane bakaMowabi, latiphatsa kabi nabo ngekwelicasi. Ngesizatfu saloko, afa ngesono sawo. (Num. 25:1, 9) Ngaletinye tikhatsi, bantfu baka-Israyeli babanjwa silingo sekukhonona ngendlela lekhombisa kuhlubuka, bate bakhuluma ngalokumelene naMosi kanye naNkulunkulu. (Num. 21:5) Bantfu baka-Israyeli bakhonona ngisho nangalesikhatsi kubhujiswa Khora lobekangakalungi, Dathani, Abiramu, kanye nebangani babo, bebacabanga kutsi sehlulelo saletihlubuki besingakafaneli. Ngesizatfu saloko, ema-Israyeli langu-14 700 abulawa sifo lesasitfunyelwe nguNkulunkulu.—Num. 16:41, 49.

¹⁹ Kute nasinye kuletilingo lesisandza kukhuluma ngato ema-Israyeli labengeke akwati kusincoba. Ancotjwa nguletilingo ngobe alahlekelwa kukholwa kwawo futsi amkhohlwa Jehova, kuwanakekela kwakhe ngelutsandvo, kanye netindlela takhe letilungile. Njengasendzabeni yema-Israyeli, tilingo lesihlangabetana nato nguletivamile kubantfu. Nangabe senta yonkhe imetamo kute simelane nato futsi setsembele kuNkulunkulu kutsi asisite, singakwati kubulondvolota bucotfo betfu. Singaciniseka ngaloko ngobe “Nkulunkulu wetsembekile” futsi angeke avume kutsi ‘silingwe ngalokungetulu kwemandla etfu.’ Jehova angeke asishiye futsi asivumele sibe sesimeni lokumatima kutsi sente intsandvo yakhe kuso.—Hla. 94:14.

20, 21. Nasilingwa, Nkulunkulu usentela njani ‘indlela yekuphepha’?

²⁰ Jehova usentela ‘indlela yekuphepha’ ngekutsi asicinise kute sikwati kumelana netilingo. Nasi sibonelo: Labo labasishushisako bangase basihlukumete emtimbeni betama kusenta kutsi siphike kukholwa kwetfu. Kuphatfwa lokunjalo kungase kusente silahle kukholwa kwetfu, ngobe sifuna kubalekela kushaywa lokuchubekako, kuhlushwa, nobe kufa imbala. Kodvwa ngekuya kwesicinisekiso saPawula lesiphefumulelwe lesisencwadzini ya-1 Khorinte 10:13, siyati kutsi simo lesilingako sesikhashana. Jehova angeke asivumele kutsi sichubeke sikuleso simo kute kube ngulapho singasakwati kuhlala setsembekile kuye. Nkulunkulu angakucinisa kukholwa kwetfu futsi asinikete emandla akamoya lesiwadzingako kute silondvolote bucotfo betfu.

²¹ Jehova uyasicinisa asebentisa umoya wakhe longcwele. Lowo moya uphindze usikhumbute imiBhalo lengasisita simelane nesilingo. (Joh. 14:26) Ngesizatfu saloko, asiyengelwa ekulandzeleni indlela lengakalungi. Sibonelo saloko kutsi siyaticondza timphikiswane letihlobene nebukhosi baJehova, kanye nekubaluleka kwekugcina bucotfo betfu. Ngesizatfu salolo lwati, bantfu labanyenti baye basitwa nguNkulunkulu kutsi bahlale batsembekile kute kube sekufeni. Kodvwa akusiko kufa lokubentele indlela yekuphepha; lusito loluvela kuNkulunkulu ngilo lolubente bakwati kubeketela kwate kwaba sekugcineni, bangancotjwa silingo. Angenta lokufananako nakitsi. Ecinisweni, usebentisa tingilosi takhe letetsembekile kute tisisite, lokutinceku ‘letitfunyelwe kutawusita labo labatawudla lifa lensindziso.’ (Heb. 1:14) Njengobe sihloko lesilandzelako siveta, bagcini bebucotfo kuphela labangaba nelitsemba lekujabulela kusekela bukhosi baNkulunkulu kute kube phakadze. Natsi singaba semkhatsini wabo nangabe sinamatsela kuJehova njengeNkhosi yetfu lenguMbusi.

Ungaphendvula Njani?

• Kungani kufanele sicaphele Jehova njengeNkhosi yetfu lenguMbusi?

• Yini leshiwo kulondvolota bucotfo betfu kuNkulunkulu?

• Sati njani kutsi madvutane Jehova utawulwela bukhosi bakhe?

• Ngekuya kwencwadzi ya-1 Khorinte 10:13, kungani singakhona kulondvolota bucotfo betfu?

[Imibuto Yesihloko Lesifundvwako]