‘Umoya Longcwele Uhlolisisa . . . Lokujulile KwaNkulunkulu’

‘Umoya longcwele uhlolisisa konkhe, ngisho nalokujulile kwaNkulunkulu.’—1 KHOR. 2:10.

1. Nguyiphi indzima yemoya longcwele levetwe ngumphostoli Pawula encwadzini ya-1 Khorinte 2:10, futsi loku kuphakamisa miphi imibuto?

 SIJABULA kakhulu ngekubona umoya longcwele waJehova usebenta. ImiBhalo itsi umoya longcwele unjengemsiti, usipho, unjengafakazi futsi uyasincusela. (Joh. 14:16; Imis. 2:38; Rom. 8:16, 26, 27) Umphostoli Pawula wakhombisa lenye indzima lebalulekile yemoya longcwele, nakatsi: ‘Umoya longcwele uhlolisisa konkhe, ngisho nalokujulile kwaNkulunkulu.’ (1 Khor. 2:10) Kuliciniso kutsi Jehova usebentisa umoya wakhe longcwele kute avete emaciniso akamoya lajulile. Ngaphandle kwelusito lwawo, besingakwati yini kuvisisisa tinhloso taJehova? (Fundza 1 Khorinte 2:9-12.) Kodvwa, kunemibuto lephakamako ngalendzaba lefaka ekhatsi nayi lelandzelako: ‘Umoya longcwele utihlolisisa njani tintfo letijulile taNkulunkulu’? Jehova waveta loko asebentisa bani ngelikhulu lekucala leminyaka C.E.? Umoya longcwele ukuhlolisisa njani lokujulile kwaNkulunkulu esikhatsini setfu futsi usebentisa bani?

2. Ngutiphi tindlela umoya longcwele losebenta ngato?

² Jesu wakhombisa tindlela letimbili umoya longcwele losebenta ngato. Ngekushesha nje ngembikwekufa kwakhe, naku lakutjela balandzeli bakhe: ‘Kepha uMeluleki, umoya longcwele, Babe latawutfumela egameni lami, utanifundzisa konkhe, anikhumbute konkhe lenginitjele kona.’ (Joh. 14:26) Umoya longcwele ungaphindze usebente njengemfundzisi nanjengemkhumbuti wetfu. Njengemfundzisi, ungasita emaKhristu kutsi avisise tintfo lebekungasimelula kutivisisa ekucaleni.  Njengemkhumbuti, ungasisita kutsi sikhumbule siphindze sisebentise konkhe losifundzise kona.

Ngelikhulu Lekucala Leminyaka

3. Ngumaphi emavi aJesu lakhombisa kutsi ‘tintfo letijulile taNkulunkulu’ tingembulwa ngalokuphumelelako?

³ Jesu wafundzisa bafundzi bakhe emaciniso lamanyenti labebacala ngca kuweva. Nobe kunjalo, bekukunyenti lobekusafanele bakufundze. Wake watsi kubaphostoli bakhe: ‘Ngisenalokunyenti lenginganitjela kona. Kodvwa kwanyalo ningeke nikwati kukwetfwala. Kodvwa umoya weliciniso nawufika, uyawuniholela kulo lonkhe liciniso. Angeke utikhulumele kwawo, kodvwa uyawukhuluma lakuvako, unitjele nangetintfo letisetakwenteka.’ (Joh. 16:12, 13) Ngalamavi, Jesu abesho kutsi ngemoya longcwele, tintfo letijulile tingembulwa ngalokuphumelelako.

4. Ngelilanga lePhentekhoste ngemnyaka wanga-33 C.E., umoya longcwele wasebenta njani njengemfundzisi nanjengemkhumbuti?

⁴ Ngelilanga lePhentekhoste ngemnyaka wanga-33 C.E., ‘umoya weliciniso’ watfululelwa kumaKhristu langu-120 labebutsene eJerusalema. Ngalesikhatsi kwehla umoya longcwele, kwabonakala lokutsite kwaphindze kwevakala lokutsite. (Imis. 1:4, 5, 15; 2:1-4) Labo bafundzi bacala kukhuluma ngaletinye tilwimi mayelana ‘nemisebenti lemikhulu yaNkulunkulu.’ (Imis. 2:5-11) Ngako-ke, lesi bekusikhatsi sekutsi kwembulwe lokutsite lokusha. Umphrofethi Joweli wakhuluma kusengakenteki kutsi bekutawutfululwa umoya longcwele. (Jow. 2:28-32) Bantfu labebabukele, bakubona kugcwaliseka kwalesiphrofetho ngendlela lebebangakalindzeli kutsi kutawenteka ngayo. Umphostoli Phetro wachaza kabanti ngekugcwaliseka kwalesiphrofetho. (Fundza Imisebenti 2:14-18.) Nakulendzaba, umoya longcwele wasebenta njengemfundzisi kuPhetro kute avisise kahle kugcwaliseka kwalesiphrofetho. Umoya longcwele waphindze wasebenta njengemkhumbuti, ngobe Phetro akazange akhumbule loko lokwakushiwo nguJoweli kuphela, kodvwa waphindze wakhuluma nangaloko lokwashiwo ngumhlabeli Davide. (Hla. 16:8-11; 110:1; Imis. 2:25-28, 34, 35) Loko lokwabonwa kwaphindze kweviwa ngulabo bebabukele, ecinisweni bekungulokujulile kwaNkulunkulu.

5, 6. (a) Ngemuva kweliPhentekhoste ngemnyaka wanga-33 C.E., ngumiphi imibuto leyabutwa mayelana nesivumelwane lesisha lokwadzingeka kutsi iphendvulwe? (b) Yavela ngabobani lendzaba, futsi sincumo satsatfwa njani?

⁵ Tinyenti tintfo lobekudzingeka ticaciselwe emaKhristu ngelikhulu lekucala leminyaka. Nasi sibonelo: Bekunemibuto lemayelana nesivumelwane lesentiwa ngelilanga lePhentekhoste. Lesivumelwane besisebenta kumaJuda nakulabo lababephendvukele enkholweni yemaJuda kuphela yini? Besitawusebenta yini nakulabo labangasiwo emaJuda futsi nabo bagcotjwe ngemoya longcwele? (Imis. 10:45) Emadvodza langasiwo emaJuda bekutawudzingeka kutsi asokwe yini aphindze emukele uMtsetfo waMosi? (Imis. 15:1, 5) Lena bekungimibuto lebaluleke kakhulu. Umoya waJehova bewudzingeka kute uhlolisise tintfo letijulile. Bewutawusebenta kubani?

⁶ Lemibuto yabutwa bazalwane labanemalungelo ebandleni labebadzinga timphendvulo. Phetro, Pawula kanye naBhanabasi bebakhona kulomhlangano wesigungu lesibusako futsi balandzisa ngekutsi Jehova abebanakekela njani labo labangasiwo emaJuda labangakasoki. (Imis. 15:7-12) Ngemuva kwekuba sesihlole bufakazi lobusemiBhalweni yesiHebheru futsi sisitwa ngumoya longcwele, sigungu lesibusako senta sincumo. Ngemuva kwaloko sabhalela emabandla ngalesincumo lebesitsetfwe.—Fundza Imisebenti 15:25-30; 16:4, 5; Ef. 3:5, 6.

7. Emaciniso lajulile embulwa njani?

⁷ Leminye imibuto leminyenti leyacaciswa itfolakala emibhalweni lephefumulelwe lefaka ekhatsi yaJohane, yaPhetro, yaJakobe kanye nasetincwadzini letabhalwa nguPawula. Kodvwa kwatsi nasekucedvwe kubhala imiBhalo yemaKhristu, tipho letinjengekuphrofetha kanye nekwembula lwati ngalokumangalisako taphela. (1 Khor. 13:8) Umoya bewutawuchubeka yini usebenta njengemfumndzisi nanjengemkhumbuti? Bewutawuchubeka yini usita emaKhristu kutsi ahlolisise titfo letijulile taNkulunkulu?  Tiphrofetho titsi bewutawuchubeka wenta njalo.

Ngesikhatsi Sekuphela

8, 9. Bobani ‘labatawucwebetela’ ngekuhlakanipha kwakamoya kulesikhatsi sekuphela?

⁸ Ikhuluma ngesikhatsi sekuphela, ingilosi yatsi: ‘Labo labahlakaniphile bayawucwebetela njengekumanyatela kwemazulu, nalabo labaholele labanye ekulungeni, bakhanye njengetinkhanyeti kuze kube nguphakadze naphakadze. . . . Kwati kuyawuba kunyenti.’ (Dan. 12:3, 4) Bobani labayawuba nekuhlakanipha futsi bacwebetele? Jesu wayiveta lendzaba emfanekisweni wakhe wemabele nelukhula. Akhuluma ‘ngesiphetfo saletikhatsi,’ watsi: “Lapho bantfu baNkulunkulu bayawukhanya njengelilanga embusweni weYise.” (Mat. 13:39, 43) Jesu wachaza “bantfu baNkulunkulu” ngekutsi “bantfwana bembuso,” emaKhristu lagcotjwe ngemoya.

⁹ Onkhe emaKhristu lagcotjiwe ngemoya ‘atawucwebetela’ yini? Singasho kutsi kunjalo, ngobe onkhe emaKhristu atawuba nesandla emsebentini wekushumayela, wekwenta bantfu kutsi babe bafundzi kanye nasekwakheni labanye emihlanganweni. Labagcotjwe ngemoya bahamba embili ekwenteni loko. (Zak. 8:23) Ngetulu kwaloko, tintfo letijulile betitawembulwa ngesikhatsi  semalanga ekugcina. Ngisho nesiphrofetho lesabhalwa nguDanyela ‘savalwa’ kwadzimate kwaba nguleso sikhatsi. (Dan. 12:9) Umoya longcwele utawutihlolisisa njani futsi ngabani tintfo letijulile?

10. (a) Kulesikhatsi sekuphela, umoya longcwele usebentisa bobani kute bembule emaciniso lajulile? (b) Chaza indlela emaciniso lamayelana nelithempeli lelikhulu laJehova lacaciswe ngayo.

¹⁰ Nangabe kufika sikhatsi sekutsi kucaciswe emaciniso latsite akamoya, umoya longcwele usita emalunga ‘esisebenti lesetsembekile nalesihlakaniphile’ endlunkhulu yaso kute embule emaciniso latsite labekangavakali kahle ekucaleni. (Mat. 24:45; 1 Khor. 2:13) Sigungu Lesibusako sisonkhe sicabangela tinchazelo taloko lokulungiswako. (Imis. 15:6) Loko labakufundzako, babese bayakusakata kute sonkhe sizuze. (Mat. 10:27) Njengobe sikhatsi sichubeka, lamaciniso kudzingeka akhanyiswe kabantana futsi lokukhanyiswa kwawo kwentiwa ngekwetsembeka.—Fundza libhokisi lelitsi  “Indlela Umoya Longcwele Lowembula Ngayo Inchazelo YeliThempeli Lelingabonakali Ngemehlo.”

Kuzuza Kuloko Lokwentiwa Ngumoya Lamuhla

11. Onkhe emaKhristu azuza njani endzimeni yemoya longcwele ekuveteni tintfo letijulile taNkulunkulu?

¹¹ Onkhe emaKhristu latsembekile angazuza ngesizatfu sekutsi umoya longcwele uveta tintfo letijulile taNkulunkulu. NjengemaKhristu elikhulu lekucala leminyaka, natsi lamuhla siyafundza bese kutsi ngemuva kwesikhatsi siyakukhumbula loko lesikufundzile, sikusebentise ekuphileni kwetfu loko umoya longcwele losisite kutsi sikukhumbule. (Luk. 12:11, 12) Asidzingi kuba tifundziswa kute sati emaciniso lajulile eliBhayibheli lashicilelwe. (Imis. 4:13) Yini lengasisita kute sitfutfukise indlela lesiweva ngayo emaciniso lajulile aNkulunkulu? Ase ucabangele nati tindlela letimbalwa.

12. Kufanele siwuthandazele nini umoya longcwele?

¹² Thandazela umoya longcwele. Ngembikwekutsi sifundze tincwadzi letisekelwe eBhayibhelini, kufanele kwekucala sicele umoya longcwele kutsi usicondzise. Loko umuntfu angakwenta ngisho ayedvwa nobe anesikhatsi lesincane. Imithandazo yetfu lenjalo yekutitfoba, itawenta Babe wetfu wasezulwini ajabule. Njengobe Jesu asho, Jehova utawusinika umoya wakhe longcwele nangabe siwucela.—Luk. 11:13.

13, 14. Kulungiselela imihlangano kusisita njani kute sivisise tintfo letijulile taNkulunkulu?

¹³ Lungiselela imihlangano. Sitfola “kudla ngesikhatsi lesifanele” lokuvela esisebentini lesetsembekile. ‘Lesisebenti’ siyawenta umsebenti waso ngekusinika tincwadzi letisekelwe emiBhalweni nangekwenta luhlelo lwekufundza kanye nemihlangano. Kusuke kunetizatfu letivakalako tekucela kutsi “bonkhe bazalwane” bafakele tibuko indzaba letsite. (1 Phet. 2:17; Khol. 4:16; Juda 3) Sibambisana nemoya longcwele nangabe senta konkhe lokusemandleni etfu kute silandzele loko lokushoko.—Semb. 2:29.

¹⁴ Nasilungiselela imihlangano yebuKhristu, senta kahle ngekutsi siyifundze imiBhalo lekhonjiwe setame kutfola kutsi isebenta njani kulendzaba lokukhulunywa ngayo. Kwenta njalo, kutawusisita kutsi kancane kancane silivisise kahle liBhayibheli. (Imis. 17:11, 12) Kuyifundza lemiBhalo kwenta kutsi ibhaleke etingcondvweni bese umoya longcwele uyasisita kutsi sihlale siyikhumbula. Ngetulu kwaloko, nangabe silibona lelivesi eBhayibhelini, indzawo lelikuyo iyabhaleka engcondvweni loko bese kusisita kutsi  silitfole melula esikhatsini lesitako nasilidzinga.

15. Kungani kufanele utati tincwadzi tetfu letishicilelwe, futsi nguyiphi indlela wena loyisebentisako kute uphumelele kuloku?

¹⁵ Hlale ufundza loko lokucuketfwe tincwadzi tetfu. Letinye tincwadzi tetfu atifundvwa emihlanganweni, kodvwa tibhalwe ngesizatfu sekutsi sizuze kuto. Ngisho nabomagazini betfu labentelwe bantfu lesibashumayelako, babhalwa kucatjangwa ngatsi. Kulelive lelimatasa kuvamile kutsi sigadze lotsite nobe lokutsite. Nangabe siphetse incwadzi lesingakayifundzi nobe lesifane sayitsi caphucaphu, singasisebentisa leso sikhatsi kute siyifundze. Labanye kute bati loko lokucuketfwe nguletincwadzi, balalela tincwadzi letitsetjuliwe nabahamba endleleni nobe nabahamba ngemoto. Njengobe ticwaningwe kahle futsi tabhalwa ngendlela leyenta kutsi tijatjulelwe ngisho nabantfu labangakafundzi lokuyaphi, tonkhe letincwadzi tijulisa kujabulela kwetfu tintfo takamoya.—Hab. 2:2.

16. Nguyiphi inzuzo lesiyitfola ngekunakisisa futsi silandzelele imibuto lesiba nayo nasitadisha?

¹⁶ Zindla. Nangabe ufundza liBhayibheli nobe letinye tincwadzi tebuKhristu, tinike sikhatsi sekuzindla ngaleto tintfo. Kungenteka ube nemibuto nangabe wetama kuvisisa tintfo letidzingidvwako kuloko lokufundzako. Imibuto lechamukako nawusafundza ungayibekela eceleni kwesikhashana. Kungumkhuba lomuhle kuyibekela eceleni imibuto loba nayo nawufundza, utinike sikhatsi ngayo kamuva. Kuyimvamisa kutsi nawunelilukuluku ngalokutsite futsi utinika sikhatsi ngako, ujula ngako, ugcina sewungumkanjubovu kuleyo ndzaba. Lwati lesilutfola ngekutimisela kufundza, lusenta sigcine sinemcebo lolwati lesingalusebentisa nobe nini.—Mat. 13:52.

17. Nguluphi luhlelo umndeni wakho nobe wena lonalo lekutadisha liBhayibheli?

¹⁷ Yakha luhlelo lekukhonta kwemndeni kwakusihlwa. Sigungu Lesibusako sisikhutsata njalo kutsi sibekele eceleni sikhatsi kanye ngeliviki, mhlawumbe kusihlwa kungaba ngumuntfu ngamunye nobe umndeni, kute sibe nekukhonta kwemndeni. Lushintjo lolwentiwa lwemihlangano yaboFakazi lusinika sikhatsi sekutsi sibe nekukhonta kwemndeni kwakusihlwa. Yini leniyentako ngesikhatsi seKukhonta kweMndeni kwakusihlwa? BoFakazi BaJehova labanyenti bafundza liBhayibheli, bacwaninge emavesi labanemibuto kuwo bese babhala inchazelo labayitfolile eceleni kwalawo mavesi. Leminye imindeni itinika sikhatsi sekucabangisisa kutsi emaphuzu lewalungiselelako ingawasebentisa njani ekuphileni. Letinye tinhloko temindeni tikhetsa kucoca ngendzaba leticabanga kutsi itawusita imindeni yato. Kulesinye sikhatsi bacoca ngemibuto lephakanyiswe ngemalunga emndeni. Akubutwa kutsi tinyenti tindzaba longacoca ngato ekukhonteni kwemndeni kwakusihlwa. a

18. Kungani kufanele singatitsambisi kutadisha emaciniso latiyile laseVini laNkulunkulu?

¹⁸ Jesu waveta kutsi umoya longcwele bewutawuba lusito lolukhulu. Kufanele singatitsambisi kutadisha emaciniso latiyile eliVi laNkulunkulu. Lawo maciniso laligugu ayincenye ‘yekwati Nkulunkulu,’ futsi sikhutsatwa kutsi sitihluphe ngekuwafundza. (Fundza Taga 2:1-5.) Embula lokunyenti ngaloko ‘Nkulunkulu lakulungiselele labamtsandzako.’ Kuchubeka sifundza liVi laJehova kusibeka etfubeni lekusitwa ngumoya longcwele, ngobe ‘umoya longcwele uhlolisisa konkhe, ngisho nalokujulile kwaNkulunkulu.’—1 Khor. 2:9, 10.

[Umbhalo longentasi]

Itsini Imphendvulo Yakho Kulemibuto?

• Kungatiphi tindlela letimbili umoya longcwele losisita ngato kutsi sati ‘tintfo letijulile taNkulunkulu’?

• Emaciniso etintfo taNkulunkulu letijulile embulwa ngabobani ekhulwini lekucala leminyaka?

• Umoya longcwele usebenta njani kute ucatulule imibuto lesinayo etindzabeni letitsite lamuhla?

• Yini longayenta kute utfole inzuzo ngendzima yemoya longcwele?

[Imibuto Yesihloko Lesifundvwako]

[Libhokisi ekhasini 30]

 Indlela Umoya Longcwele Lowembula Ngayo Inchazelo YeliThempeli Lelingabonakali Ngemehlo

Lithende lekukhontela kanye nelithempeli, lisekhatsi ‘kwetintfo letijulile taNkulunkulu’ letachazwa ekhulwini lekucala leminyaka. Kodvwa lona kanye nelithempeli bekusitfunti selithempeli lelikhulu lebelingeke libonakale ngemehlo. Pawula walibita ngekutsi ‘lithende lekuhlangana, lelingilo sibili lelakhiwa yiNkhosi [Jehova] hhayi ngumuntfu.’ (Heb. 8:2) Lithempeli lelikhulu lelingabonakali ngemehlo, luluhlelo lwekuchumana naNkulunkulu usebentisa umhlatjelo kanye nemphristi longuJesu Khristu.

‘Lithende lekuhlangana’ lacala kusebenta ngemnyaka wanga-29 C.E., ngesikhatsi Jesu abhajatiswa. Ngaleso sikhatsi Jehova wamemukela ngato totimbili njengaloyo lokumfanele kuba ngumhlatjelo lote sono. (Heb. 10:5-10) Nakavuka ekufeni, Jesu wafika catsatsa eNgcwelengcwele yelithembeli lelingabonakali ngemehlo futsi watetfula njengemhlatjelo ‘embikwaNkulunkulu.’—Heb. 9:11, 12, 24.

Nakabhalela emaKhristu lagcotjwe ngemoya longcwele, umphostoli Pawula wawachaza ngekutsi ‘atawukhula adzimate abe lithempeli leligcwele leNkhosi [Jehova.]’ (Ef. 2:20-22) Lelithempeli lelingabonakali ngemehlo liyafanana yini ‘nelithende lekuhlangana’ lakhuluma ngalo encwadzini yemaHebheru? Tinceku taJehova beticabanga kanjalo iminyaka leminyenti. Bekucatjangwa kutsi emaKhristu lagcotjwe ngemoya alolongelwa kutsi abe “ngematje” elithempeli laJehova lasezulwini.—1 Phet. 2:5.

Ngemnyaka wanga-1971, lamanye emalunga esigaba sesisebenti lesihlakaniphile acala kubona kutsi lithempeli lakhululuma ngalo Pawula ebandleni lase-Efesu akusilo lithempeli laJehova lelingabonakali ngemehlo. Nangabe ‘lithende lekuhlangana’ lakhiwa ngemaKhristu lagcotjwe ngemoya lasavuka emathuneni, loko kusho kutsi belitawucala kusebenta ngemuva kwekuvuswa kwabo “ngelilanga lekubuya kweNkhosi.” (1 Thes. 4:15-17) Pawula walichaza nganayi indlela lelithende lekukhontela Nkulunkulu: “Loku ngumfanekiso waletikhatsi.”—Heb. 9:9.

Ngekufakela tibuko lemibhalo lesisandza kuyihlola kanye naleminye, kwakhanya kutsi lithempeli lelingabonakali ngemehlo, alakhiwa bantfu. Kwaphindze kwakhanya kutsi emaKhristu lagcotjwe ngumoya waNkulunkulu akasiwo “ematje” lalolongelwa kulakha latsatfwe emhlabeni. Ngalokuphambene naloko bekucatjangwa, liciniso litsi emaKhristu lagcotjiwe akhonta Nkulunkulu ngekhatsi esibuyeni selithempeli lelingabonakali ngemehlo malanga onkhe, futsi anikela kuNkulunkulu ngemnikelo ‘wekumdvumisa.’—Heb. 13:15.

[Sitfombe ekhasini 31]

Singalukhulisa njani lwati lwetfu ‘ngetintfo letijulile taNkulunkulu’?