Tfola Kucabuleka Etintfweni Takamoya

“Bekani lijoka lami etikwenu . . . , khona niyawutfola kuphumula kwemiphefumulo yenu.”—MAT. 11:29.

1. Nguluphi luhlelo Nkulunkulu lalwenta eNtsabeni iSinayi, futsi walentelani?

 NGALESIKHATSI kubhalwa uMtsetfo wesivumelwane eNtsabeni iSinayi, kwabhalwa nangeliSabatha lebeligcinwa ngelilanga lesikhombisa evikini. Asebentisa Mosi, Jehova watjela sive sema-Israyeli: “Uyawusebenta emalanga lasitfupha, kodvwa ngelilanga lesikhombisa ungasebenti, kuze kutsi tifuyo takho, netigcili letitalelwe kakho, kanye nebetive labasebenta kakho batewuphumula.” (Eks. 23:12) Jehova loMtsetfo wawenta acabangela bantfu labebangephansi kwawo, afuna kutsi ngalelo langa batfole ‘kuphumula.’

2. Ema-Israyeli azuza njani ngekugcina liSabatha?

² LiSabatha bekulilanga lekuphumula kuphela yini? Cha, bekulilanga lelibalulekile ema-Israyeli labekhonta ngalo Jehova. Kugcina liSabatha bekusita tinhloko temindeni kutsi tibe nesikhatsi sekufundzisa imindeni yato ‘kugcina intsandvo yaSimakadze [Jehova] ngekwenta lokuhle nalokulungile.’ (Gen. 18:19) LiSabatha beliphindze linike imindeni sikhatsi sekuhlala ndzawonye nebangani, bacoce ngetintfo Jehova labekatentile kubo futsi babe nesikhatsi lesimnandzi. (Isa. 58:13, 14) Lokubaluleke kakhulu kutsi liSabatha belikhomba sikhatsi lapho sitawutfola khona kucabuleka lokungapheli ngalesikhatsi Jesu asabusa iMinyaka leyiNkhulungwane. (Rom. 8:21) Kutsiwani ngatsi lamuhla? EmaKhristu eliciniso latsandza umtsetfo waJehova, angakutfola kuphi kucabuleka futsi njani?

Tfola Kucabuleka Ngekutihlanganisa NemaKhristu

3. EmaKhristu elikhulu lekucala leminyaka abekhutsatana ngatiphi tindlela, futsi kwakuba namiphi imiphumela?

³ Umphostoli Pawula wafananisa libandla lebuKhristu ‘nensika yesisekelo seliciniso.’ (1 Thim. 3:15) EmaKhristu asendvulo abetfola kusekelwa nekukhutsatana futsi akhana  elutsandvweni. (Ef. 4:11, 12, 16) Ngalesikhatsi Pawula ase-Efesu, wakhutsatwa bazalwane basebandleni laseKhorinte. Nangu umphumela lowaba khona: “Ngiyatfokota ngekufika kwaStefanasi, naFothunatusi, na-Akhayikhusi . . .  ngobe bawuhlumelele umoya wami.” (1 Khor. 16:17, 18) Ngendlela lefananako, ngalesikhatsi Thithusi ayewufundzisa bazalwane base Khorinte, Pawula wabhalela lelo bandla, watsi: “Nonkhe namcinisa lidvolo.” (2 Khor. 7:13) Nalamuhla, boFakazi BaJehova batfola kucabuleka ngekwakhana nalamanye emaKhristu ngakamoya.

4. Imihlangano yelibandla isicabula njani?

⁴ Sonkhe siyati kutsi imihlangano yelibandla ingumtfombo wenjabulo longapheli. Kuyo ‘sisitakala kanye kanye, ngekukholwa kwalabanye.’ (Rom. 1:12) Bazalwane kanye nabodzadzewetfu labangemaKhristu abasibo bantfu lesingabati, nobe bantfu labangakabaluleki kangako kitsi lesihlangana nabo njalo kodvwa singabanaki. EmaKhristu eliciniso abangani betfu lesibatsandzako futsi lesibahloniphako. Sijabula kakhulu ngekuba nabo emihlanganweni ngobe siyadvudvuteka.—Flm. 7.

5. Yini lesingayenta kute sicabule labanye emihlanganweni yesigodzi, yesifundza kanye nalekhetsekile?

⁵ Kucabuleka siphindze sikutfole nasemihlanganweni yaminyaka yonkhe, lefaka ekhatsi yesigodzi, yesifundza kanye nalekhetsekile. Lemihlangano isinika emanti ekuphila laliciniso lavela eVini laNkulunkulu liBhayibheli, iphindze isinike litfuba ‘lekuvula tinhlitiyo’ nasicoca nalabanye. (2 Khor. 6:12, 13) Kodvwa kutsiwani nangabe sinemahloni futsi kulukhuni kucoca nalabanye? Lokungasisita kutsi setame kutenta sitfolakalele imisebenti leyehlukahlukene emihlanganweni. Naku lokwashiwo ngulomunye dzadze ngemuva kwekuba lusito emhlanganweni wetive, watsi: “Ngaphandle kwemndeni wami nebangani, bengingabati bantfu labanyenti lapho kodvwa ngekusita ekuhlanteni indzawo yemhlangano, ngahlangana nabodzadze kanye nebazalwane labanyenti, futsi ngakujabulela kuba nobo.”

6. Nguyiphi lenye indlela lesingatfola ngayo kucabuleka nasiseholidini?

⁶ Ema-Israyeli abevame kuvakasha eJerusalema umnyaka nemnyaka kute ayewuhlanganyela emikhosini lemitsatfu. (Eks. 34:23) Loku bekusho kutsi bekufanele ashiye emasimu netitolo tawo ahambe emalanga lamanyenti emigwacweni lebhunya tintfuli. Nobe kunjalo, kuya ethemphelini bekuphumela ‘enjabulweni lenkhulu’ ngobe bonkhe labakhona ‘bebanikela umhlatjelo kuJehova.’ (2 Khr. 30:21) Nalamuhla tikhonti taJehova tijabula kakhulu ngekuhamba nemindeni yato tivakashele eBethel. Kungani wena nemndeni wakho ningenti lokufananako?

7. (a) Ngutiphi tinzuzo temibutsano yekutijabulisa? (b) Yini lesingayenta kute imibutsano yekutijabulisa singayikhohlwa futsi isakhe?

⁷ Kuhlangana ndzawonye kwemndeni nebangani nako kungasikhutsata. INkhosi lehlakaniphile Solomoni yatsi: “Kute lokuncono umuntfu langakwenta ngaphandle kwekutsi adle anatse eneliseke ngemsebenti wakhe.” (Shu. 2:24) Kuhlangana ndzawonye ngenjongo yekutijabulisa, akucabuli imiphefumulo yetfu nje kuphela, kodvwa kuphindze kucinise lutsandvo lesinalo ngalamanye emaKhristu njengobe siya siwati kancono. Kute imibutsano lesibanayo singayikhohlwa futsi isakhe, kufanele singamemi bantfu labanyenti, kufanele kube nalotsite lotawubhasobha kutsi tjwala busentjetiswa kahle yini.

Umsebenti Wekushumayela Uyacabula

8, 9. (a) Veta umehluko lokhona emlayetweni lobewuphetfwe nguJesu nalobewuphetfwe baFarisi. (b) Singazuza njani ngekushiyelana lugwayi nalabanye ngemlayeto wemaciniso eliBhayibheli?

⁸ Jesu abewukhutsalele umsebenti wekushumayela wate wacela bafundzi bakhe kutsi bayibhambe njalo. Kusebaleni loko emavini akhe latsi: “Ngako-ke ncusani eNkhosini yekuvuna kutsi itfumele tisebenti ekuvuneni kwayo!” (Mat. 9:37, 38) Umlayeto lobewuphetfwe nguJesu bewucabula sibili, futsi ‘utindzaba letinhle.’ (Mat. 4:23; 24:14, NW.) Wona  bewuyimphumalanga nenshonalanga nawucatsaniswa nemitsetfo lesindzako leyashaywa baFarisi.—Fundza Matewu 23:4, 23, 24.

⁹ Nasishumayela labanye lomlayeto weMbuso waNkulunkulu, sisuke sinika labo bantfu kucabuleka kwakamoya. Loko kwenta lamaciniso eliBhayibheli laligugu angane atsi nti! etinhlitiyweni nasetingcondvweni tetfu. Umhlabeli washo loku wakuphindzaphindza watsi: “Dvumisani Simakadze [Jehova]! Maye, kuhle kuhlabela kuNkulunkulu wetfu. Kumnandzi, futsi kufanele kutsi advunyiswe!” (Hla. 147:1) Ungayandzisa yini injabulo loyitfola ngekudvumisa Jehova kubomakhelwane bakho?

10. Imphumelelo yetfu emsebentini weMbuso isime endleleni bantfu labasabela ngayo yini? Chaza.

¹⁰ Kuliciniso kutsi etindzaweni lesishumayela kuto, bantfu bamihibahiba, labanye bayalalela futsi labanye babhonca tindlebe. (Fundza Imisebenti 18:1, 5-8.) Nawuphila endzaweni lapho bantfu bangawunambitsi kahle lomlayeto weMbuso, tama kucabanga ngalokuhle lokufezako kulomsebenti. Khumbula kutsi nawuchubeka ushumayela ngelibito laJehova usuke ungadlali. (1 Khor. 15:58) Ngetulu kwaloko, imphumelelo yetindzaba letinhle teliBhayibheli ayikalwa kutsi bangaki labasabele. Kufanele sihlale sinadvolo cina kutsi Jehova utawubadvonsa labanetinhlitiyo letilungile, utawubanika sikhatsi kute basabele kulomlayeto weMbuso.—Joh. 6:44.

Kukhonta Kwemndeni Kwakusihlwa Kuyacabula

11. Ngumuphi umsebenti losemahlombe ebatali futsi bangawutfwala njani?

¹¹ Batali labangemaKhristu banemsebenti losemahlombe abo wekufundzisa bantfwana babo ngaJehova netindlela takhe. (Dut. 11:18, 19) Nangabe ungumtali, usihlelembisile yini sikhatsi sakho sekufundzisa bantfwana bakho ngaBabe losezulwini lonelutsandvo? Kute akwewete kulomsebenti losemahlombe akho futsi unakekele tidzingo temndeni wakho, Jehova wente kwasindvwa ngebelitfole ngekulungisa kudla kwakamoya. Loko kufaka ekhatsi tincwadzi, bomagazini, ema-video, nalokutsetjuliwe lokulalelwako.

12, 13. (a) Imindeni ingatfola yiphi inzuzo ngekusebentisa Kukhonta kweMndeni kwakusihlwa? (b) Yini batali labangayenta kute Kukhonta kweMndeni kwakusihlwa kucabule?

¹² Ngetulu kwaloko, sisebenti lesitsembekile nalesihlakaniphile setfule luhlelo leKukhonta kweMndeni kwakusihlwa. Loluhlelo luchaza kubekelwa eceleni kwelilanga linye kusihlwa, lisetjentiselwe sifundvo seliBhayibheli semndeni. Labanyenti batfole kutsi loluhlelo lubenta basondzelane futsi batsandzane, luphindze lwente buhlobo babo naJehova bucine nko! Yini batali labangayenta kute loluhlelo lucabule wonkhe wonkhe ative asekhaya?

¹³ Kukhonta kwakusihlwa kweMndeni akukafaneli kube dvuma nobe kushube. Kuliciniso kutsi sikhonta “Nkulunkulu lojabulako” lofuna kutsi sijabule nasimkhonta. (1 Thim. 1:11, NW; Fil. 4:4) Kubekela eceleni lilanga linye, kusihlwa kute nicoce ngemcebo wakamoya loseBhayibhelini, kungaba sibusiso. Batali kufanele basebentise tindlela letehlukahlukene tekufundzisa. Loku kungafaka ekhatsi kucabanga lokusetingcondvweni temalunga emndeni wakho kanye nekucamba tindlela letehlukahlukene letingasetjentiswa kuloluhlelo. Sibonelo saloku kutsi lomunye umndeni wabela umfanyana loneminyaka lengu-10, Brandon kutsi acwaninge bese wetfula indzaba lenesihloko lesitsi “Kungani Jehova Asebentisa Inyoka Kutsi Imele Sathane?” Loludzaba lwalumtsintsa Brandon ngobe uyatifela ngetinyoka, futsi bekumtfukutselisa kufananiswa kwenyoka naSathane. Leminye imindeni ivamise kusebentisa ema-drama eliBhayibheli, lapho lilunga ngalinye lemndeni lidlala indzima letsite, lifundze incenye letsite eBhayibhelini futsi lilingise sentakalo lesitsite. Lendlela ayingcini nje kuphela ngekuhlekisana kodvwa yenta bantfwana babe yincenye yalomdlalo,  kute timiso teliBhayibheli tifinyelele etinhlitiyweni tabo. a

Gwema Tintfo Letingakwenta Wehlise Emandla

14, 15. (a) Kulamalanga ekugcina, tinkinga kanye nekungaphephi kukhule ngelizinga lelingakanani? (b) Ngutiphi tinkinga letengetiwe lesibhekana nato?

¹⁴ Kulamalanga ekugcina lesiphila kuwo kucindzeteleka nekungaphephi, kwandze kakhulu. Kwesweleka kwemsebenti kanye naletinye tinkinga temnotfo, kutsikameta kuphila kwetigidzi tebantfu. Ngisho nalabo labasebentako, imali labayiholako yincane kakhulu futsi abakhoni kunakekela tonkhe tidzingo temindeni yabo ngayo. (Catsanisa naHagayi 1:4-6.) Bosopolitiki ngisho nalabanye baholi babonakala bete lusito njengobe buphekula naleminye imitfombo yebubi kubonakala kubafomisa kukucedza. Bantfu labanyenti badvunyatwa kutsi benta emaphutsa.—Hla. 38:4.

¹⁵ Letinkinga lesisandza kukhuluma ngato, nemaKhristu eliciniso ayabhekana nato lokufaka ekhatsi ngisho nekucindzetelwa lokuchamuka kulelive lelibuswa nguSathane. (1 Joh. 5:19) Ngaletinye tikhatsi bafundzi baKhristu bangabhekana netinkinga letinyenti njengobe betama kuhlala betsembekile kuJehova. Jesu watsi: “Nangabe mine bangihlupha, nani futsi bayawunihlupha.” (Joh. 15:20) Nobe kunjalo, “siyatingelwa, kodvwa Nkulunkulu akasilahli.” (2 Khor. 4:9) Kungani kunjalo?

16. Yini lengasisita kutsi sihlale sijabulile?

¹⁶ Jesu watsi: “Wotani kimi, nine nonkhe lenikhatsele nalenisindvwa yimitfwalo, ngitaniphumuta.” (Mat. 11:28) Kukholwa emhlatjelweni waKhristu wesihlengo kusibeka eluhlangotsini lwaJehova. Ngekwenta njalo sitfola ‘emandla lamakhulu.’ (2 Khor. 4:7) “Umeluleki,” umoya longcwele waNkulunkulu ngalokuyinhloko ucinisa kukholwa kwetfu kute singamani nje sibeketelele kuvivinywa kanye nelusizi lesibhekana nalo, kodvwa siphindze sijabule.—Joh. 14:26; Jak. 1:2-4.

17, 18. (a) Ngumuphi umoya lokufanele siwubalekele? (b) Ungaba yini umphumela nangabe kutijabulisa kwetfu kweca esikalini?

¹⁷ EmaKhristu lamuhla kufanele atigadze kute angatikhandzi sekangenwe ngumoya walelive. (Fundza Efesu 2:2-5.) Nangabe singakanaki singatikhandza sesidvonswe ‘yinkhanuko yenyama, yinkhanuko yemehlo nekutigabisa lokulite ngetintfo takulomhlaba.’ (1 Joh. 2:16) Ngalesinye sikhatsi singatiyenga sitsi kuvumela tifiso tenyama kutasiletsela kucabuleka. (Rom. 8:6) Sibonelo saloku kutsi labanye bantfu sebangene batsi shi! ekusebentiseni tidzakamiva, ekubeni yimihuca yetjwala, ekubukeleni titfombe letikhombisa kungcola, ekubeni tigcili temidlalo kanye naleminye imikhuba lengakavumeleki emtsetfweni, ngenjongo nje yekutijabulisa. Sathane ‘ngebucili’ bakhe udukisa bantfu ngekubanika kucabuleka lokungakalungi.—Ef. 6:11.

¹⁸ Kuliciniso kutsi kute lokubi ngekudla, kunatsa, kanye nekutijabulisa kuphela nje nangabe kwentiwa ngesikali lesikahle. Nobe kunjalo, asifuni kutsi letotintfo tite kucala ekuphileni. Kubeka tintfo endzaweni lefanele kanye nekutibamba, kubalulekile ikakhulukati kulesikhatsi lesiphila kuso. Kulwela kutfola tintfo talelive kungasenta sehlise emandla kangangekutsi  site ‘sivilaphe futsi singatseli titselo ekuyatini ngalokugcwele iNkhosi yetfu Jesu Khristu.’—2 Phet. 1:8.

19, 20. Kutfolakala njani kucabuleka lokunguko sibili?

¹⁹ Nasicabanga ngekuvumelana netimiso taJehova, siyacaphela kutsi nobe nguyiphi injabulo lelive lelisiletsela yona imane nje yesikhashane. Mosi wakucaphela loko, natsi kufanele silingise yena. (Heb. 11:25) Liciniso likutsi injabulo lokungiyo sibili futsi leletsa kwenetiseka, siyitfola ngekwenta intsandvo yaBabe wetfu wasezulwini.—Mat. 5:6.

²⁰ Shengatsi singachubeka sitfola kucabuleka etintfweni takamoya. Nangabe senta njalo, ‘sitakudzela kungakholwa, futsi sitatilumula etinkhanukweni telive . . . ngesikhatsi sisabheke kugcwaliseka kwelitsemba lelibusisekile, kubonakala kwenkatimulo yebukhosi baNkulunkulu lomkhulu, neMsindzisi wetfu Khristu Jesu.’ (Thit. 2:12, 13) Ngako-ke, asitimisele kuhlala singephansi kwelijoka laJesu ngekutitfoba egunyeni lakhe kanye naseticondzisweni takhe. Ngekwenta njalo, sitawutfola injabulo nekucabuleka!

[Umbhalo longentasi]

Ungaphendvula Njani?

• Bantfu baJehova bakutfola njani kucabuleka lamuhla?

• Umsebenti wekushumayela usicabula njani tsine kanye nalabo lesibashumayelako?

• Tinhloko temindeni yini letingayenta kute tibone kutsi kukhonta kwemndeni kwakusihlwa kuletsa kucabuleka emndenini wonkhe?

• Ngutiphi tintfo letingasenta sehlise emandla ekukhonteni Nkulunkulu?

[Imibuto Yesihloko Lesifundvwako]