1. Yini bafundisi beTinkholo Letitsi TebuKhristu labayenta ngesikhatsi semphi?

KUYINTSANDVO yaNkulunkulu yini kutsi emaKhristu eliciniso aye emphini futsi abulale bantfu balesinye sive? Eminyakeni lelikhulu leyendlulile, lena yintfo lebeyivamise kwentiwa ngulabo labatibita ngekutsi bangemaKhristu. Bafundisi bemaKatolika labasekela imphi bebabusisa emabutfo netikhali tawo nakayokulwa nemaKatolika alesinye sive. Bafundisi bemaPhrothestani nabo bente lokufanako. IMphi Yelive Yesibili isibonelo lesihamba embili sekufa kwebantfu lokube ngumphumela waloko.

2, 3. Yini BoFakazi BaJehova labayenta ngesikhatsi seMphi Yelive Yesibili nangemuva kwayo, futsi kungani benta njalo?

² Yini BoFakazi BaJehova labayenta ngalesikhatsi semphi? Umlandvo uveta kutsi bachubeka bangatsatsi luhlangotsi njengobe bangemaKhristu. Kungani benta njalo? Ngalokuyinhloko, bebalandzela sibonelo saJesu netimfundziso takhe. Jesu watsi: “Nangabe nitsandzana, bonkhe batawukwati kutsi nibafundzi bami.” (Joh. 13:35) Baphindze bacabangisisa ngenchazelo lenabile yaloko lokwashiwo ngumphostoli Pawula ngesikhatsi abhalela emaKhristu aseKhorinte.—Fundza 2 Khorinte 10:3, 4.

³ Ngako-ke, emaKhristu eliciniso lanabonembeza labaceceshwe ngeliBhayibheli, awayifundzi imphi futsi awahlanganyeli  kuyo. Ngesizatfu sekutsi BoFakazi bebachubeka bangatsatsi luhlangotsi, tinkhulungwane talabasha nalabadzala, labadvuna nalabasikati taphatfwa kabi. Labanyenti bebahlushwa etinkambu nasemajele. Ngesikhatsi sekubusa kwemaNazi eJalimane, labanye babulawa. Ngisho nobe bebaphatfwa kabuhlungu eYurophu, BoFakazi abazange bawukhohlwe umsebenti wabo wekushumayela tindzaba letimnandzi teMbuso waJehova. Bashumayela ngekwetsembeka emajele, etinkambu tekuhlushwa ngisho nalapho bebatfunjelwe khona. * BoFakazi abazange batsatse luhlangotsi emphini yekubulala tive letitsite eRwanda nga-1994. Bachubeka bangatsatsi luhlangotsi emphini leyabulala bantfu labanyenti emaveni laseNingizimu Mphumalanga yeYurophu, labekalwa odvwa ngesikhatsi kwehlukana emave lebekakha iYugoslavia.

4. Kungatsatsi luhlangotsi kwaBoFakazi BaJehova kubatsintse njani labanye?

⁴ Kungatsatsi luhlangotsi kwaBoFakazi BaJehova kwente tinkhulungwane tebantfu emhlabeni wonkhe taciniseka kutsi BoFakazi bamtsandza mbamba Nkulunkulu kanye nabomakhelwane babo. Ngalamanye emavi, BoFakazi bangemaKhristu eliciniso. Nobe kunjalo, kunaletinye tincenye tekukhonta kwetfu Nkulunkulu letente labanyenti baciniseka kutsi nababona BoFakazi BaJehova babona emaKhristu eliciniso.

5. Nguluphi lushintjo balandzeli baKhristu bekucala labahlangabetana nalo?

⁵ Kusukela nakacala kushumayela, Jesu wagcizelela kubaluleka kwekumemetela tindzaba letimnandzi teMbuso waNkulunkulu. Wakhetsa bafundzi labangu-12 kutsi basebente naye ekubekeni sisekelo semsebenti wekushumayela lobewutawentiwa emhlabeni wonkhe; ngemuva kwaloko wacecesha bafundzi bakhe labangu-70. (Luk. 6:13; 10:1) Laba bebakulungele kutjela labanye tindzaba letimnandzi, bacale kumaJuda. Ngemuva kwaloko, kwenteka intfo lemangalisako! Bafundzi baJesu besekufanele bashumayele kubantfu betive labangakasoki. Asingabati kutsi lolo kwaba lushintjo lolukhulu kubafundzi labakhutsele labangemaJuda.—Imis. 1:8.

6. Yini leyenta Phetro wabona kutsi Jehova akakhetsi?

⁶ Umphostoli Phetro watfunywa ekhaya laKhoneliyuse, lobekangumuntfu wetive longakasoki. Phetro wabese uyabona kutsi Nkulunkulu akakhetsi. Khoneliyuse nemndeni wakhe babhajatiswa. BuKhristu besebandza ngobe bantfu batotonkhe tive bebatawuva liciniso futsi balemukele. (Imis. 10:9-48) Besekutawushunyayelwa emhlabeni wonkhe.

7, 8. Ngusiphi sinyatselo lesitsetfwe yinhlangano yaJehova? (Buka sitfombe lesisekucaleni kwalesihloko.)

⁷ Esikhatsini salamuhla, labo labaholako emkhatsini waBoFakazi BaJehova bebasolo bakhutsata kutsi kushunyayelwe ngetindzaba letimnandzi futsi kufundziswe emhlabeni wonkhe. Lamuhla, BoFakazi labakhutsele labangaba tigidzi letisiphohlongo benta konkhe lokusemandleni abo kute bashumayele umlayeto waKhristu ngetilwimi letingetulu kwa-600, futsi kusetawengeteka letinyenti! BoFakazi BaJehova batiwa ngekushumayela emtini ngemuti, nasemigwacweni, futsi ngaletinye tikhatsi basebentisa ematafula netincola tekukhangisa tincwadzi.

⁸ Bahumushi labangetulu kwa-2 900 batfole kuceceshwa lokukhetsekile kute bahumushe liBhayibheli netincwadzi letisekelwe kulo. Abagcini ngekuhumusha tilwimi letikhulunywa bantfu labanyenti kuphela. Baphindze bahumushele nasemakhulwini etilwimi letingatiwa kangako kodvwa letikhulunywa tigidzi tebantfu. Nasi  sibonelo: ESpain, tigidzi temaCatalan tisikhuluma malanga onkhe siCatalan, lokululwimi lwabo lwemdzabu. Etikhatsini tanyalo, siCatalan sesiphindze siyakhulunywa e-Andorra, e-Alicante, etichingini taseBalearic, naseValencia. Nyalo BoFakazi BaJehova bashicilela tincwadzi letisekelwe eBhayibhelini ngesiCatalan, futsi kubanjwa imihlangano yebuKhristu ngelulwimi lolutsintsa tinhlitiyo tebantfu labangemaCatalan.

9, 10. Yini leveta kutsi inhlangano yaNkulunkulu inendzaba nekufundzisa bonkhe bantfu ngaye?

⁹ Lomsebenti wekuhumusha nekufundzisa wentiwa emaveni lamanyenti. IMexico ilive lokukhulunywa kulo siPanishi kodvwa inemacembu lamanyenti emdzabu lakhuluma letinye tilwimi. EmaMaya angulelinye lalamacembu. Ligatja laseMexico labela licembu lelihumusha siMaya kutsi liyohlala endzaweni lebelingakhona kukhuluma kuyo lolulwimi futsi luluve malanga onkhe. Lesinye sibonelo lulwimi lwesiNepali, lokungulolunye lwetilwimi letikhulunywa eNepal, live lelinebantfu labangetulu kwetigidzi letingu-29. Kulelo live kukhulunywa tilwimi letingaba ngu-120, kodvwa bantfu labangetulu kwetigidzi letilishumi bakhuluma siNepali futsi labanye labanyenti bayasisebentisa nanobe singasilo lulwimi labalumunya. Tincwadzi tetfu letisekelwe eBhayibhelini setiyashicilelwa nangalolulwimi.

¹⁰ Inhlangano yaJehova iwutsatsa njengalobaluleke kakhulu umsebenti wekushumayela tindzaba letimnandzi teMbuso emhlabeni wonkhe, njengobe kuvetwa yindlela emacembu ekuhumusha lamanyenti lasekelwa ngayo. Kusakatwe tigidzigidzi temapheshana, tincwajana nabomagazini emikhankasweni leyentiwa emhlabeni wonkhe, futsi taniketwa bantfu mahhala. Tindleko tinakekelwa ngeminikelo yekutitsandzela leyentiwa BoFakazi BaJehova, labalalela sicondziso saJesu lesitsi: “Niphiwe mahhala, nani phanini mahhala.”—Mat. 10:8.

11, 12. Umsebenti wekushumayela lowentiwa BoFakazi BaJehova emhlabeni wonkhe ube namuphi umphumela lomuhle kulabanye?

¹¹ Njengobe babashumayeli nebafundzisi labakhutsele, BoFakazi BaJehova bayaciniseka kutsi balitfolile liciniso kangangekutsi bayatidzela kuze lomlayeto bawucocele bantfu baletinye tive netinhlanga. Labanyenti bente kuphila kwabo kwaba melula, bafundza lolunye lulwimi futsi bativumelanisa netimo takuletinye tindzawo kuze babe nencenye kulomsebenti lobalulekile webuKhristu. Lomsebenti wekushumayela nekufundzisa lowentiwa emhlabeni wonkhe ungulokunye lokwenta bantfu  labanyenti baciniseke kutsi BoFakazi BaJehova babalandzeli baKhristu Jesu beliciniso.

¹² BoFakazi benta konkhe loku ngobe bayaciniseka kutsi balitfolile liciniso. Kodvwa yini lenye leyente tigidzi tebantfu taciniseka kutsi BoFakazi BaJehova balitfolile liciniso?—Fundza Roma 14:17, 18.

13. BoFakazi bayigcine njani inhlangano ihlantekile?

¹³ Singazuza kuloko lokushiwo ngemaKhristu lakhutsele asesikhatsini setfu lacinisekako kutsi alitfolile liciniso. Lomunye lesekuphele iminyaka leminyenti asikhonti saJehova wachaza indlela lativa ngayo watsi: “Kwentiwa konkhe lokusemandleni kute inhlangano yaJehova ihlale ihlantekile ngekutiphatsa futsi ingangcoliswa, ngisho nobe lotsite kungadzingeka kutsi elulekwe nobe ayalwe.” Lilondvolotwa njani lelizinga leliphakeme lekutiphatsa? Ngekulandzela timiso letiseVini laNkulunkulu nesibonelo lesabekwa nguJesu nebafundzi bakhe. Ngako esikhatsini salamuhla, bambalwa kakhulu bantfu lokudzingeke kutsi bayekeliswe kuba BoFakazi BaJehova ngekungalaleli timiso taNkulunkulu. Bantfu labanyenti batiphatsa ngendlela lehlantekile nalesibonelo, lokufaka ekhatsi nalabanye lebebake baphila ngendlela lengemukeleki kuNkulunkulu kodvwa base bayashintja.—Fundza 1 Khorinte 6:9-11.

14. Yini leyentiwe bantfu labanyenti labebayekelisiwe kuba BoFakazi, futsi ube yini umphumela?

¹⁴ Kutsiwani ngalabo lokudzingeke kutsi bakhishwe ebandleni ngekuvumelana nesicondziso lesisemiBhalweni? Tinkhulungwane tabo tiphendvukile emikhubeni leshayisana neliBhayibheli, taphindze tamukelwa ebandleni. (Fundza 2 Khorinte 2:6-8.) Kunamatsela etimisweni letiphakeme tekutiphatsa letiseBhayibhelini kwente kutsi libandla lemaKhristu lihlanteke futsi emalunga alo aletsembe aphindze aciniseke ngalo. Ngalokwehlukile emasontfweni lamanyenti layekelelako, BoFakazi BaJehova babambelela etimisweni taNkulunkulu, futsi loko kwenta bantfu labanyenti baciniseke kutsi BoFakazi basenkholweni yeliciniso.

15. Yini leyente lomunye umzalwane waciniseka kutsi ulitfolile liciniso?

¹⁵ Kungani labanye BoFakazi labanalokuhlangenwe nako bakholelwa kutsi balitfolile liciniso? Lomunye umzalwane loseminyakeni yabo-50 budzala watsi: “Kusukela ngisemusha bengikholelwa kutsi tinkholelo tami tisekelwe etinsikeni letintsatfu letiyinhloko: (1) kutsi Nkulunkulu ukhona; (2) kutsi nguye lowaphefumulela liBhayibheli, nekutsi (3) lamuhla usebentisa libandla lebuKhristu futsi uyalibusisa. Njengobe bengisolo ngitadisha kuleminyaka leyendlulile, bengihlale ngitihlola letinsika futsi ngitibuta kutsi takhelwe esisekelweni lesicinile yini. Bufakazi bato bebucina kakhulu umnyaka nemnyaka, futsi loko kucinise kukholwa kwami kwaphindze kwangenta ngaciniseka kutsi vele sisenkholweni yeliciniso.”

16. Yini leyente lomunye dzadze walijabulela kakhulu liciniso?

¹⁶ Lomunye dzadze loshadile lokhonta  endlunkhulu yemhlaba wonkhe leseNew York wakhuluma ngenhlangano yaJehova watsi: “Ngiyo kuphela lengashintjashintji ekumemeteleni libito laJehova. Loko kunengcondvo, ikakhulukati nasikhumbula kutsi libito laNkulunkulu livela tikhatsi letingaba ngu-7 000 eBhayibhelini! Ngiyasitsandza sikhutsato lesiku-2 Tikhronike 16:9 lesitsi: ‘Emehlo aJehova abuka emhlabeni wonkhe kucinisa labo labatinhlitiyo tabo titinikele kuye ngalokuphelele.’” Uchubeka atsi: “Liciniso lingente ngabona kutsi ngingaba nayo njani inhlitiyo letinikele ngalokuphelele kuze Jehova akhone kungicinisa ngalokukhululekile. Buhlobo bami naJehova buligugu kakhulu kimi. Ngiyabonga nangendzima Jesu lanayo ekungilungiseleleni lwati lolubanti ngaNkulunkulu lolungipha emandla.”

17. Yini lomunye lobekake wangakholelwa kuNkulunkulu laciniseka ngayo, futsi leni?

¹⁷ Lomunye lobekake wangakholelwa kuNkulunkulu wavuma watsi: “Indalo ingenta ngiciniseke kutsi Nkulunkulu ufuna bantfu bakujabulele kuphila futsi ngesizatfu saloko ngeke akuvumele kuhlupheka kutsi kuchubeke kukhona phakadze. Ngetulu kwaloko, njengobe lelive liya lingamhloniphi kakhulu Nkulunkulu, bantfu baJehova bayatfutfuka ekukholweni, ekukhutsaleni naselutsandvweni. Ngumoya waJehova kuphela lobewungenta lesimangaliso lesisibona lamuhla.”—Fundza 1 Phetro 4:1-4.

18. Utiva njani ngaloko lokwashiwo ngulabanye bazalwane lababili?

¹⁸ Lomunye lonesikhatsi lesidze anguFakazi washo tizatfu letimenta alikholelwe liciniso lesilishumayelako, watsi: “Loko lebengikufundza kuyo yonkhe leminyaka kungente ngaciniseka kutsi BoFakazi bente konkhe lokusemandleni abo kuze balandzele sibonelo semaKhristu angelikhulu lekucala. Njengobe bengivakashela emave lamanyenti, ngitibonele ngewami kutsi BoFakazi BaJehova banebunye emhlabeni wonkhe. Liciniso leliseBhayibhelini lingente ngenetiseka futsi ngatfola injabulo.” Ngesikhatsi lomunye umzalwane losandlulile eminyakeni lengu-60 budzala abutwa kutsi kungani aciniseka kutsi ulitfolile liciniso, wakhuluma ngaJesu Khristu watsi: “Siyitadishe ngekucophelela indlela Jesu labephila ngayo kanye nemsebenti wakhe futsi siyasijabulela sibonelo sakhe. Sente lushintjo ekuphileni kwetfu kuze sisondzelane naNkulunkulu ngaKhristu Jesu. Umhlatjelo waKhristu loyinhlawulo siwutsatsa njengesisekelo sekusindziswa kwetfu. Siyati nekutsi Jesu wavuswa ekufeni futsi sinebufakazi lesingabetsemba bebantfu labambona ngesikhatsi asavusiwe.”—Fundza 1 Khorinte 15:3-8.

19, 20. (a) Yini Pawula layigcizelela ebandleni laseRoma? (b) Njengobe singemaKhristu latinikele, nguliphi lilungelo lesinalo?

¹⁹ Njengobe singemaKhristu labatsandzako bomakhelwane, asifuni kuligodla lolwati lweliciniso leliligugu. Pawula wabonisana nebazalwane bakhe ebandleni laseRoma watsi: “Nawulimemetela kubantfu ‘lelivi lelisemlonyeni wakho,’ lekutsi Jesu uyiNkhosi, futsi ukholwa enhlitiyweni kutsi Nkulunkulu wamvusa ekufeni, utawusindziswa. Ngobe ngenhlitiyo umuntfu ubonisa kukholwa bese kutsiwa ulungile, kodvwa ngemlomo umuntfu uvuma embikwebantfu bese uyasindziswa.”—Roma 10:9, 10.

²⁰ Njengobe siBoFakazi BaJehova labatinikele, siyaciniseka kutsi silitfolile liciniso futsi siyati nekutsi sinelilungelo lekufundzisa labanye ngetindzaba letimnandzi tekubusa kweMbuso waNkulunkulu. Njengobe sichubeka nemsebenti wetfu wekushumayela, shengatsi labanye bangete bagcina nje ngekutsintfwa nguloko lesibafundzisa kona lokuvela eBhayibhelini kodvwa babone nekuciniseka kwetfu.