Emavi Akho—‘LanguYebo Aba NguCha’ Yini?
Asewucabange nganasi simo: Umzalwane longulomdzala futsi lolilunga leKomidi Yekubonisana Netibhedlela abehlele kusebenta ensimini nalomunye umzalwane losemusha ngeLisontfo ekuseni. Ngalelo langa lolomdzala utfola lucingo loluphutfumako lolubuya kulomunye umzalwane lomtjela ngemfati wakhe losandza nje kutfola ingoti yemoto futsi lophutfunyiswe esibhedlela. Lomzalwane ucela lolomdzala kutsi amsite atfole dokotela lotawubambisana nabo endzabeni yengati. Ngako-ke, lomzalwane longulomdzala utsi ngeke asaphumelela kusebenta ensimini nalomzalwane losemusha ngesizatfu sekutsi ufuna kusekela lomndeni losewuvelelwe simo lesiphutfumako.
Cabanga nganasi lesinye simo: Make lokhulisa bantfwana lababili ayedvwa utfola simemo kulomunye umndeni losebandleni labo, kutsi ngalenye intsambama bete batewucitsa sikhatsi ndzawonye. Nakatjela bantfwana bakhe ngaloku, buso babo bugcwala injabulo. Bese babuka embili kuleso sikhatsi. Kodvwa ngelilanga lelendvulela lilanga lekuvakasha kwabo, lomndeni lobewubamemile utjela make walabantfwana kutsi kuvele simo lebebangakasilindzeli, ngako ngeke basaba khona. Ngekuhamba kwesikhatsi lomake wasitfola sizatfu lesenta lomndeni wangasaphumeleli kuba khona. Ngemuva kwekutsi ubamemile, lomndeni wabese umenywa ngulabanye bangani bawo kutsi uye ekhaya labo ngaleyo ntsambama, futsi wasemukela lesimemo.
Njengobe singemaKhristu, kufanele setsembeke emavini etfu. Akukafaneli sitikhandze sesitsi “‘yebo’ kube ‘kungu-cha.’” (2 Khor. 1:18) Nobe kunjalo, njengobe letibonelo letimbili setibonisile, ngeke kwenteke kutsi tonkhe timo tifane. Kungase kwenteke kutsi ngaletinye tikhatsi siphoceleleke kutsi singasasifezi setsembiso lebesisentile. Nemphostoli Pawula wake watikhandza asesimeni lesifananako.
PAWULA KWATSIWA UNGUMUNTFU LONGAKETSEMBEKI
Nga-55 C.E., ngalesikhatsi umphostoli Pawula ase-Efesu eluhambeni lwakhe lwesitsatfu lwetitfunywa telivangeli, bekahlose kwewela Lwandle i-Aegean aye eKhorinte, atsi nakesuka lapho alibangise eMasedoniya. Watsi nakasendleleni abuyela eJerusalema, wahlela kuvakashela libandla laseKhorinte kwesibili ngenjongo yekuyewulandza tipho letiya kubazalwane baseJerusalema. (1 Khor. 16:3) Loku kubekwe ngendlela lecacile ku-2 Khorinte 1:15, 16, lotsi: “Ngenca yalokuciniseka, bengike ngafuna kuta kini kuze niphindze nijabule, bese ngemuva kwekwendlula kuze nginibone nangiya eMasedoniya nanasengibuya khona, ningiphekeletele sigatjana nangiya eJudiya.”
Kubonakala shengatsi encwadzini labekababhalele yona, Pawula abebatjelile bazalwane baseKhorinte ngaloko labekuhlosile. (1 Khor. 5:9) Ngemuva nje kwekutsi asayibhalile leyo ncwadzi, Pawula weva ngebendlu yaKlowe nangalabanye bazalwane kutsi besekunekuphikisana lokunyenti kulelibandla. (1 Khor. 1:10, 11) Pawula wabona kuncono kutsi ashintje luhlelo lwakhe, wabese ubhala lencwadzi lesiyati ngekutsi yiNcwadzi Yekucala kubaseKhorinte. Kulencwadzi, Pawula wabalungisa futsi wabaniketa neseluleko ngelutsandvo. Waphindze wabatjela nekutsi abesalushintjile luhlelo lwendlela labetawuhamba ngayo, washo nekutsi utawucale aye eMasedoniya bese uya eKhorinte.—1 Khor. 16:5, 6. *
Kungenteka kutsi ngalesikhatsi bazalwane baseKhorinte batfola lencwadzi yaPawula, labanye ‘baphostoli labebabonakala babahle’ kulelibandla bamsola ngekutsi aketsembeki futsi akatigcini tetsembiso takhe. Atikhulumela, Pawula wababuta watsi: “Ngesikhatsi ngifuna kwenta loku, angitsi angizange ngiyitsatsele phansi lendzaba? Nobe ngihlela tintfo ngekuvumelana nenyama yami yini, kuze ngitsi ‘Yebo kunjalo,’ bese ngiphindze ngitsi ‘Cha ngeke’?”—2 Khor. 1:17; 11:5.
Singase sitibute nangu umbuto: Kuletimo, vele umphostoli Pawula ‘abeyitsatsela phansi yini lendzaba’? Cha akusinjalo. Emavi lahunyushwe ngekutsi ‘kutsatsela phansi’ anemcondvo wekungetsembeki, njengekungatsi umuntfu akatigcini tetsembiso takhe. Umbuto waPawula lotsi “ngihlela tintfo ngekuvumelana nenyama yami yini?” bekufanele ngabe wakwenta kwacaca kumaKhristu aseKhorinte kutsi sincumo saPawula sekushintja luhlelo lwakhe besingentiwa kutsi akaketsembeki.
Pawula akazange avumelane naloko lebebakusho, ngako wabhala watsi: “Kodvwa singetsembela kuNkulunkulu kutsi loko lesikusho kini akubi ‘ngu-yebo kube kungu-cha.’” (2 Khor. 1:18) Ecinisweni kushintja kwaPawula luhlelo lwakhe bekukhombisa kutsi abebakhatsalela bazalwane bakhe nabodzadze baseKhorinte. Encwadzini ya-2 Khorinte sehluko 1:23, sifundza kutsi kushintja kwakhe luhlelo lwekuya eKhorinte ‘bekungenca yekubasindzisa.’ Nembala abebanikile litfuba lekutsi balungise tintfo ngaphambi kwekutsi yena lucobo lwakhe aye kubo. Njengobe abenalelo tsemba, watsi Pawula nakaseMasedoniya, weva ngaThithusi kutsi lencwadzi yakhe beyibatsintse tinhlitiyo futsi yabenta baphendvuka, loko kwamjabulisa kakhulu.—2 Khor. 6:11; 7:5-7.
KUTSIWA “AMEN” KUNKULUNKULU
Letinsolo tekutsi Pawula akaketsembeki betingenta kucatjangwe kutsi nangabe ehluleka kufeza tetsembiso takhe tamalanga onkhe, ngeke etsenjwe ngisho nasemsebentini wakhe wekushumayela. Nobe kunjalo, Pawula wakhumbuta baseKhorinte kutsi abeshumayele ngaJesu Khristu kubo. Watsi: “INdvodzana yaNkulunkulu lenguKhristu Jesu, lesashumayela ngayo kini, mine naSilvanosi kanye naThimothi, ayizange ibe ngu-yebo kantsi ingu-cha, kodvwa yebo ube ‘ngu-yebo’ ngayo.” (2 Khor. 1:19) Jesu Khristu losibonelo saPawula, abengaketsembeki yini? Cha! Ekuphileni kwakhe konkhe nasemsebentini wakhe, Jesu abehlale akhuluma liciniso. (Joh. 14:6; 18:37) Nangabe loko Jesu labeshumayela ngako bekuliciniso lelimsulwa futsi kwetsembekile kantsi naPawula abeshumayela umlayeto lofanako, kusho kutsi loko lomphostoli labeshumayela ngako bekwetsembekile.
Kuliciniso kutsi Jehova ‘unguNkulunkulu lowetsembekile.’ (Hla. 31:5) Loko sikubona emavini aPawula lalandzelako latsi: “Ngisho nobe tingakanani tetsembiso taNkulunkulu, setibe ‘ngu-yebo’ ngayo,” lokusho kutsi ngaKhristu. Kwetsembeka kwaJesu ngalokuphelele ngalesikhatsi alapha emhlabeni, kwacedza nome ngabe ngukuphi kungabata mayelana netetsembiso taJehova. Pawula wachubeka watsi: “Ngako-ke, ngayo [ngaJesu] sekutsiwa ‘Amen’ kuNkulunkulu, futsi loko kumenta akhatinyuliswe ngatsi.” (2 Khor. 1:20) Jesu usicinisekiso nome ‘ungu-Amen’ wekutsi tonkhe tetsembiso taJehova Nkulunkulu titawufezeka mbamba!
Njengobe Jehova naJesu bakhuluma liciniso ngaso sonkhe sikhatsi, ngako-ke naPawula abekhuluma liciniso. (2 Khor. 1:19) Abengasuye umuntfu longaketsembeki, lobekenta tetsembiso “ngekuvumelana nenyama.” (2 Khor. 1:17) Esikhundleni sekutsi ente njalo, ‘abehamba ngemoya.’ (Gal. 5:16) Indlela labephatsa ngayo labanye, yakhombisa kutsi abebakhatsalela. Yebo wakhe abenguYebo!
YEBO WAKHO UNGUYEBO YINI?
Kulamalanga lesiphila kuwo, kuyintfo leyetayelekile kubantfu labangaphili ngetimiso teliBhayibheli kutsi bente tetsembiso bese abasatifezi ngenca yekutsi sebabone lokunye lokubakhangako nobe kuvele inkinga nje lengasho lutfo. Etindzabeni temabhizinisi, “yebo” akabi “nguyebo” sibili ngisho nobe kusayinwe tivumelwane. Bantfu labanyenti abasawutsatsi umshado, losuke usivumelwane sebantfu lababili, njengesibopho sekuphila kwabo konkhe. Esikhundleni saloko indlela lizinga lekudivosa lelenyuka ngayo ikhombisa kutsi bantfu labanyenti bawutsatsa kalula umshado, njengentfo longamane uyishiye.—2 Thim. 3:1, 2.
Kutsiwani ngawe? Yebo wakho unguYebo mbamba yini? Njengobe sibonile ekucaleni kwalesihloko, kuliciniso kutsi kutawenteka ngalesinye sikhatsi ungaphumeleli ekufezeni setsembiso losentile, hhayi ngenca yekutsi awuketsembeki kodvwa ngenca yetimo letingetulu kwemandla akho. NjengemKhristu, nawenta setsembiso nobe wenta sifungo, kufanele wente konkhe lokusemandleni akho kutsi usigcine. (Hla. 15:4; Mat. 5:37) Nawenta njalo, utawatiwa njengemuntfu lowetsembekile, lowagcinako emavi akho, nalokhuluma liciniso njalo. (Ef. 4:15, 25; Jak. 5:12) Bantfu nababona kutsi wetsembekile kuto tonkhe tintfo, batakulalela nawubacocela liciniso leMbuso waNkulunkulu. Ngaleso sizatfu, shengatsi Yebo wetfu ungaba nguYebo sibili!
^ sig. 7 Ngemuva kwesikhashana asayibhalile iNcwadzi Yekucala KubaseKhorinte, nembala Pawula waya eMasedoniya wendlula ngaseThrowasi, lapho abhala khona iNcwadzi Yesibili KubaseKhorinte. (2 Khor. 2:12; 7:5) Ngekuhamba kwesikhatsi, wagcine afikile eKhorinte.
