EMINYAKENI lembalwa leyendlulile, Roald na-Elsebeth, bantfu labashadene labebaseminyakeni yabo-40 budzala ngaleso sikhatsi, bebaphila kahle eBergen, lokulidolobha lesibili lelikhulu eNorway. Bona nendvodzakati yabo Isabel nendvodzana yabo Fabian, bebenta imisebenti yelibandla ngekwetsembeka. Roald abengulomdzala welibandla, Elsebeth alihlahlandlela, kantsi bo-Isabel naFabian bebabamemeteli labakhutsele.

NgaSeptember 2009, lomndeni wancuma kwenta intfo leyehlukile—kushumayela kulenye indzawo lekhashane liviki linye. Ngako-ke, Roald na-Elsebeth nemntfwana wabo Fabian, ngaleso sikhatsi abeneminyaka lengu-18 budzala, baya eNordkyn, lokuyindzawo lencane lesesifundzeni saseFinnmark, lengenhla kwe-Arctic Circle. Lapho, bashumayela endzaweni lokutsiwa yiKjøllefjord, bakanye nebazalwane nabodzadze nabo labebete kulendzawo kute bente umsebenti wekushumayela. Roald uyakhumbula: “Ekucaleni kwalelo viki, bengijabule kakhulu ngekutsi ngikhonile kuhlela timo tami kute ngente lomsebenti lokhetsekile liviki lonkhe.” Kodvwa njengobe liviki lichubeka, Roald wacala kukhatsateka. Kwentekani?

Roald utsi: “Ngingakalindzeli, Mario, lolihlahlandlela laseFinnmark, wasibuta kutsi singatsandza yini kutfutsela edolobheni lelibitwa ngekutsi yiLakselv, kute sisite lelibandla lelinebamemeteli labangu-23.” Roald wamangala kakhulu nakeva lombuto labengakawulindzeli. Uyachaza: “Mine na-Elsebeth sake sacabanga ngekutfutsela endzaweni lebeyinesidzingo lesikhulu sebamemeteli—kodvwa loko besitakwenta esikhatsini lesitako lapho bantfwana betfu sebahambile ekhaya.” Nobe kunjalo, njengobe Roald abeshumayela kulendzawo lekhashane emalanga lambalwa, wabona kutsi bantfu bebafuna kufundza ngaJehova. Bebadzinga lusito nyalo, hhayi esikhatsini lesitako. Roald uyakhumbula: “Lombuto wahlupha nembeza wami futsi ngehluleka nekulala emalanga lambalwa.” Ngako-ke, Mario wahamba naRoald nemndeni wakhe baya eLakselv, lekhashane ngemakhilomitha langu-240 eningizimu yeKjøllefjord. Abefuna batibonele lelibandla lelincane lakuleyo ndzawo.

Njengobe bebaseLakselv, Andreas, longulomunye walabadzala lababili bakulelo bandla, wakhombisa letivakashi lendzawo kanye neliHholwa leMbuso. Bantfu bakulelo bandla babemukela ngenjabulo futsi batjela Roald naElsebeth kutsi bangajabula nangabe umndeni wabo ungatfutsela kulendzawo yabo, kute babasite ngemsebenti weMbuso. Amoyitela, Andreas watsi sewuvele ubatfolele umsebenti boRoald naFabian. Betitawenta njani letivakashi?

Nakeva loko, Fabian watsi: “Ngite sifiso sekutfutsela kulendzawo.” Akuzange kumjabulise kucabanga ngekutsi kufanele ashiye bangani bakhe lakhule nabo ebandleni lakubo bese utfutsela kulelidolobha lelincane. Abengakacedzi nekuceceshelwa kwenta imisebenti yabogezi. Nobe kunjalo, ngesikhatsi Isabel (ngaleso sikhatsi abeneminyaka lengu-21 budzala) abutwa kutsi ucabangani ngekutfutsela kulendzawo, watsi: “Nguloko vele lebengisolo ngifuna kukwenta!” Kodvwa Isabel waphindze watsi: “Nangichubeka ngicabangisisa kahle ngalendzaba, ngatibuta kutsi, ‘Ngumbono lomuhle mbamba yini loyo? Ngitawubakhumbula yini bangani bami? Ngihlale yini kulelibandla lakitsi lapho kumelula khona kutfola tintfo nekutati?’” Wativa njani Elsebeth ngalesimemo? Utsi: “Ngabona kutsi Jehova unike umndeni wetfu umsebenti, kodvwa ngacabanga ngendlu yetfu lesisandza kuyilungisa nangato tonkhe tintfo lesibe nato kuleminyaka lengu-25.”

Ngalesikhatsi leliviki lelikhetsekile seliphelile, Roald nemndeni wakhe babuyela eBergen, kodvwa bebasolo bacabanga ngebazalwane nabodzadze labangemaKhristu labaseLakselv, lokuyindzawo lekhashane ngemakhilomitha langaba ngu-2 100 nalapho bahlala khona. Elsebeth utsi: “Ngathantaza tikhatsi letinyenti kuJehova, futsi bengichubeka ngichumana nebangani lesabatfola lapho ngekutsi sitfumelelane titfombe futsi sicocelana nangetintfo lesihlangabetana nato.” Roald utsi: “Bengidzinga sikhatsi sekutsi ngiyemukele lendzaba yekutfutsa. Bekudzingeka ngicabange nangekutsi singatinakekela njani kuleya ndzawo. Besitawutiphilisa ngani? Ngathantaza kanyenti kuJehova, ngakhuluma nemndeni wami nebazalwane labanalokuhlangenwe nako.” Fabian uyakhumbula: “Nangichubeka ngicabanga ngalendzaba, ngabona kutsi ngite tizatfu tekutsi ngingavumi kutfutsa. Bengithantaza njalo kuJehova, futsi nesifiso sami sekutfutsa sachubeka sikhula.” Isabel yena wativa njani? Kute akulungele kutfutsa, wacala kuba lihlahlandlela endzaweni yakubo. Ngemuva kwetinyanga letisitfupha alihlahlandlela futsi acitsa sikhatsi lesinyenti atichubela sifundvo seliBhayibheli, watibona akulungele kutsatsa lesinyatselo lesikhulu sekutfutsa.

Njengobe sifiso sabo sekutfutsela lapho kunesidzingo lesikhulu sebamemeteli sikhula, lomndeni watsatsa tinyatselo tekufinyelela umgomo wawo. Roald abenemsebenti lomholela kahle futsi abewujabulela, kodvwa wacela kungasebenti umnyaka munye. Nobe kunjalo, umcashi wakhe wamcela kutsi achubeke asebenta lamanye emalanga lambalwa—asebente emaviki lamabili, bese angasebenti emaviki lasitfupha. Roald utsi: “Umholo wami wancishiswa kakhulu, kodvwa sachubeka siphila.”

Elsebeth uyachaza: “Indvodza yami yangicela kutsi ngifune indlu eLakselv lebesitawuhlala kuyo bese sicashisa yetfu leseBergen. Loko kwatsatsa sikhatsi nemetamo, kodvwa saphumelela.” Uchubeka atsi: “Ngemuva kwesikhatsi, bantfwana betfu batfola imisebenti labebasebenta kuyo emalanga lambalwa, futsi bebasisita ngemali yekutsenga kudla neyekugibela.”

Isabel utsi: “Njengobe lelidolobha lesitfutsele kulo lilincane, inkinga lebenginayo beyikutsi ngitawutfola yini umsebenti kute ngitinakekele njengobe ngilihlahlandlela.  Ngaletinye tikhatsi, bekubonakala lingekho litsemba.” Nobe kunjalo, ngekuchubeka asebenta emalanga lambalwa emisebentini leyehlukene leyimfica emnyakeni wekucala, Isabel wakhona kunakekela tidzingo takhe. Timo betimhambela njani Fabian? “Kute ngicedzele kufundzela kwami imisebenti yabogezi, bekudzingeka ngitfole umsebenti lotangiceceshela loko lebengikufundzela. Ngakwenta loko nangifika eLakselv. Ngekuhamba kwesikhatsi, ngaphumelela eluhloweni lwami lwesikolwa futsi ngatfola nemsebenti wabogezi lebengisebenta kuwo emalanga lambalwa.”

Marelius nemfati wakhe, Kesia, nabo bebafuna kuyewushumayela lapho bekunesidzingo lesikhulu sebamemeteli. Marelius, nyalo loneminyaka lengu-29 budzala, utsi: “Tinkhulumo netincociswano temhlangano wesigodzi lebetimayelana nekuba ngemahlahlandlela, tangenta ngacabanga ngekwandzisa umsebenti wami wekushumayela.” Nobe kunjalo, Kesia, nyalo loneminyaka lengu-26 budzala, utsi kucabanga ngekutfutsa ashiye umndeni wakubo bekuyinsayeya kuye. Utsi: “Bekungetfusa kakhulu kucabanga kutsi ngitawushiya bantfu lengibatsandza kakhulu.” Ngetulu kwaloko, Marelius abesebenta ngaso sonkhe sikhatsi kute abhadale imali layiboleka ebhange yekutsenga indlu yabo. Utsi: “Ngelusito lwaJehova nangekuthantaza tikhatsi letinyenti simcela asisite sente lushintjo, sagcine sitfutsile.” Bacale basebentisa sikhatsi sabo lesinyenti badadisha liBhayibheli. Ngemuva kwaloko, batsengisa indlu yabo, bayekela imisebenti yabo, nga-August 2011 batfutsela edolobheni lase-Alta, enyakatfo yeNorway. Kute batinakekele kuleyo ndzawo njengobe bangemahlahlandlela, Marelius wenta umsebenti wekugcina emabhuku etimali bese kutsi Kesia usebenta esitolo.

Knut naLisbeth, bantfu labashadene nyalo labaseminyakeni yabo-30 budzala, batsintseka kakhulu nabafundza lokuhlangenwe nako eNcwadzini Yemnyaka mayelana nalabo labashumayela etindzaweni letinesidzingo lesikhulu sebamemeteli beMbuso. Lisbeth utsi: “Loku lokuhlangenwe nako kwasenta sacabanga ngekutfutsela kulelinye live, kodvwa bengingaciniseki ngicabanga kutsi umuntfu lofana nami angeke akhone kukwenta loko.” Nobe kunjalo, batsatsa tinyatselo letitabasita bafinyelele lomgomo wabo. Knut utsi: “Satsengisa indlu lebesihlala kuyo kute songe imali, sase sihlala namake wami. Ngekuhamba kwesikhatsi, satfutsela ebandleni lesiNgisi leliseBergen umnyaka munye kute setayele kusebentisa lolunye lulwimi, lapho safike sahlala namake waLisbeth.” Ngemuva kwesikhashana, boKnut naLisbeth babona kutsi sebakulungele kutfutsa, futsi indzawo lebeyinesidzingo lesikhulu ngaleso sikhatsi, bekuse-Uganda. Njalo ngemnyaka baya eNorway kute basebente tinyanga letimbili. Ngaleyo ndlela bayakhona kuba nemali yekutiphilisa futsi bachubeke bashumayela sikhatsi sonkhe e-Uganda umnyaka wonkhe.

Ube yini umphumela kuletisebenti tekutitsandzela? Roald utsi: “Sicitsa sikhatsi lesinyenti njengemndeni kulendzawo lekhashane lesikuyo kwendlula indlela  lebesenta ngayo eBergen. Sesisondzelene kakhulu njengemndeni. Kubona bantfwana betfu basondzelana kakhulu naNkulunkulu kube sibusiso.” Uchubeka atsi: “Nyalo, sesinembono wekulinganisela ngemcebo. Awukabaluleki kakhulu ngendlela lebesicabanga ngayo.”

Elsebeth wasibona sidzingo sekufundza lolunye lulwimi. Yini leyabangela loko? Insimu yelibandla laseLakselv ifaka ekhatsi neKarasjok, leseSami, lenebantfu labanyenti labachamuka enyakatfo yeNorway, yeSweden, yeFinland, neRussia. Kute akhone kukhuluma nalabo bantfu, Elsebeth wafundza lulwimi lwesiSami. Nyalo, sewuyakhona kuba nencociswano lemelula nebantfu ngalolo lwimi. Uyakujabulela yini kuba kulendzawo? Ngekujabula utsi: “Ngichuba tifundvo teliBhayibheli letisitfupha. Kute lenye indzawo lencono kunalena lengikuyo nyalo.”

Fabian, nyalo lolihlahlandlela futsi loyinceku lesebentako, uyachaza kutsi yena na-Isabel basite bantfwana labatsatfu kulelibandla labo lelisha labebadzinga kukhutsatwa kute bente imisebenti yelibandla. Nyalo labantfwana labatsatfu bashumayela ngenkhutsalo. Ecinisweni, lababili babo babhajatisiwe futsi babe ngemahlahlandlela lasitako ngaMarch 2012. Lomunye kulabantfwana lobesacale kushiya liciniso wabonga Fabian na-Isabel ngekutsi bamsite aphindze atsandze liciniso. Fabian utsi: “Ngatsintseka kakhulu ngalamavi akhe. Kujabulisa kakhulu kusita lomunye umuntfu.” Isabel utsi: “Kulomsebenti ‘nginambitsile ngabona kutsi Jehova muhle.’” (Hla. 34:8) Uchubeka atsi: “Ngetulu kwaloko, kuba kulendzawo kujabulisa kakhulu.”

Marelius naKesia nyalo baphila imphilo lemelula futsi bativa bacebile. Libandla lase-Alta labatfutsela kulo, nyalo selinebamemeteli labangu-41. Marelius utsi: “Nangibuka emuva, ngikhutsateka kakhulu nangibona indlela lesashintja ngayo kuphila kwetfu. Sibonga Jehova ngekutsi sikhonile kukhonta kulendzawo njengemahlahlandlela. Kute lokuzuzisa kakhulu njengaloku.” Kesia uchubeka atsi: “Ngifundze kwetsembela kakhulu kuJehova, futsi usinakekele ngendlela lenhle. Ngifundze nekutsi kuhlala khashane netihlobo tami kungisitile ngakhona kusijabulela kakhulu sikhatsi lesisicitsa ndzawonye. Angitisoli ngetincumo lesatitsatsa.”

Kubahambela njani boKnut naLisbeth e-Uganda? Knut utsi: “Kwangitsatsa sikhatsi kwetayela lendzawo lensha nemasiko ayo. Nanobe bekuba netinkinga tekuphela kwemanti, kuhambe nagezi futsi siphatfwe sisu—sachubeka sichuba tifundvo teliBhayibheli letinyenti ngendlela lesitsandza ngayo.” Lisbeth utsi: “Dvutane nalapho sihlala khona kunendzawo lokungakaze kushunyayelwe kuyo tindzaba letimnandzi. Kodvwa nasifika lapho, sitfola bantfu bakhona bafundza liBhayibheli futsi basicela kutsi sibafundzise. Kufundzisa bantfu labatfobekile njengalaba umlayeto weliBhayibheli kujabulisa kakhulu.”

UMholi wetfu, Khristu Jesu ujabula kakhulu njengobe asezulwini kubona indlela lowentiwa ngayo lomsebenti wekushumayela lawucala emaveni onkhe lasemhlabeni. Bonkhe bantfu baNkulunkulu bajabula kakhulu ngekutinikela kutsi bente loko Jesu labatjela kona nakatsi “nente tive tonkhe tibe bafundzi.”—Mat. 28:19, 20.