Kungani Kufanele Sicondziswe Ngumoya WaNkulunkulu?
Kungani Kufanele Sicondziswe Ngumoya WaNkulunkulu?
‘Wena unguNkulunkulu wami. Umoya wakho lomuhle awungihole.’—HLA. 143:10.
1. Yini lesita imaginethi ikwati kubamba tintfo letiyinsimbi?
UKE wayibeka yini inyalitsi edvute nemaginethi? Imaginethi ivele iyidvonse ngekushesha inyalitsi. Kungani kwenteka loko? Kungobe imaginethi inemandla langabonakali lakwati kubamba tintfo letiyinsimbi. Sekuphele emakhulu eminyaka bantfu basebentisa imaginethi kute batfole tintfo letitsite letiyinsimbi.
2, 3. (a) Ngumaphi emandla lamakhulu Jehova lawasebentisa eminyakeni leminyenti leyendlulile? (b) Kungani kufanele silindzele emandla aNkulunkulu langabonakali kutsi acondzise kuphila kwetfu lamuhla?
2 Kunalamanye emandla langabonakali labaluleke kakhulu ekusicondziseni. Ayini lamandla? Achaziwe emavesini ekucala eliBhayibheli. Nawuchaza loko Jehova lakwenta eminyakeni leminyenti leyendlulile, Genesisi utsi: “Ekucaleni Nkulunkulu wadala lizulu nemhlaba.” Njengobe bekenta njalo, watfumela emandla lamakhulu, ngobe lendzaba lemayelana nekudalwa ichubeka itsi: ‘Umoya waNkulunkulu bewehla wenyuka uhambahamba.’ (Gen. 1:1, 2) Yini lena lebeyenta lomsebenti? Ngumoya longcwele—lokungemandla lamakhulu lasetjentiswa ekudaleni. Sikweleta Jehova ngekuphila kwetfu ngesizatfu sekutsi wasebentisa umoya wakhe kute adale tonkhe tintfo.—Jobe 33:4; Hla. 104:30.
3 Njengobe siphila, kufanele yini silindzele kutsi emandla aNkulunkulu achubeke atsintsa kuphila kwetfu? INdvodzana yaNkulunkulu beyati kutsi kufanele nakanjani asitsintse, ngobe yasho nankha emavi kubafundzi bayo: ‘Umoya . . . uyawuniholela kulo lonkhe liciniso.’ (Joh. 16:13) Singakucondza njani loko umoya longiko, kanye nekutsi kungani kufanele sicondziswe nguwo?
Loko Umoya Longcwele Longiko
4, 5. (a) Bantfu labakholelwa kuMtsatfu Amunye batsi uyini umoya longcwele? (b) Ungakuchaza njani loko umoya longcwele longiko sibili?
4 Bantfu lesicoca nabo ensimini bavame kukukholwa loko lokushiwo yi-King James Version kanye nalamanye emahumusho eliBhayibheli, latsi umoya longcwele ungumuntfu (Holy Ghost). Labo labakholelwa kuMtsatfu Amunye bacabanga kutsi ungumuntfu longumoya lolingana naNkulunkulu, longuBabe. (1 Khor. 8:6) Nanobe kunjalo, kuyaphawuleka kutsi kuyo yonkhe i-The Webster Bible, lokulihumusho lelalungisa i-King James Version futsi lelashicilelwa nga-1833, Noah Webster, longumbhali wetichazamagama waseMelika, wakhipha ligama lelitsi “Moya Longcwele” (Holy Ghost) wafaka lelitsi “Umoya Longcwele.” Webster wenta loku, ngesizatfu sekutsi bekati kutsi emiBhalweni, leligama belingachazi “umuntfu.” a
5 Uyini-ke mbambambamba umoya longcwele? Umbhalo longentansi waGenesisi 1:2, ku-“New World Translation of the Holy Scriptures—With References,” utsi: “Ngaphandle kwekuhunyushwa ngekutsi ‘ngumoya,’ ruʹach [ngesiHebheru], uphindze uhunyushwe ngekutsi ‘ngumoya lohhushako,’ lokusho emandla lamakhulu langabonakali.” (Catsanisa nemibhalo lengentansi lekuGenesisi 3:8; 8:1, NW.) Njengobe nemoya lohhushako ungabonakali kodvwa unemandla, nemoya longcwele longasiwo umuntfu awubonakali kodvwa uveta imiphumela lebonakalako. Lomoya ungemandla lavela kuNkulunkulu lasebenta kubantfu nobe etintfweni kute ufeze intsandvo yakhe. Kumatima yini kukholelwa kutsi lamandla lamakhulu kangaka avela eMtfonjeni longcwele, longuNkulunkulu Somandla? Cha, akusimatima!—Fundza Isaya 40:12, 13.
6. Ngusiphi sicelo lesibalulekile Davide lasenta kuJehova?
6 Jehova angachubeka yini asebentisa umoya wakhe kute asicondzise ekuphileni kwetfu? Naku lakutsembisa umhlabeli Davide: “Mine ngiyawukufundzisa ngikukhombise indlela lofanele kuhamba ngayo.” (Hla. 32:8) Davide abekufuna yini loko? Yebo bekakufuna, ngobe wacela Jehova, watsi: ‘Ngifundzise kwenta intsandvo yakho, ngobe wena unguNkulunkulu wami. Umoya wakho lomuhle awungihole.’ (Hla. 143:10) Natsi kufanele sibe nesifiso lesifananako sekufuna kucondziswa ngumoya waNkulunkulu. Kungani kufanele sibe naso? Ase sihlole tizatfu letine.
Asikadalelwa Kuticondzisa
7, 8. (a) Kungani singeke sikhone kuticondzisa ngaphandle kwaNkulunkulu? (b) Chaza kutsi kungani kungakafaneli setame kuticondzisa kulelive lelibi.
7 Kwekucala, kufanele sifune kucondziswa ngumoya waNkulunkulu ngobe site likhono lekuticondzisa. ‘Kucondzisa,’ kusho “kucondzisa intfo endleleni letsite nobe kukhomba indlela lokufanele ilandzelwe.” Nanobe kunjalo, Jehova akazange asidale sinelikhono lekuticondzisa, ikakhulukati njengobe sinesono. Umphrofethi wakhe Jeremiya wabhala: “Awu, Simakadze, ngiyati kutsi kute umuntfu lotiphatsele yena imphilo yakhe. Akusiko kwemuntfu kutsi aticondzisele yena tinyatselo takhe.” (Jer. 10:23) Kungani kunjalo? Jeremiya wativela yena tizatfu taNkulunkulu tekutsi kungani sehluleka kuticondzisa. Akhuluma ngaloko lesingiko, Jehova watsi: “Inhlitiyo iyayengana ngetulu kwato tonkhe tintfo, futsi yonakele ngalokwengcile. Ngubani nje longayicondza?”—Jer. 17:9; Mat. 15:19.
8 Angeke yini kube bulima ngemuntfu longayati kahle indlela kutsi ahambe ete libalave, kodvwa aye endzaweni lelihlane? Njengobe angati kutsi angaphila njani etimeni letimatima tasehlane futsi ete nelikhono lekutfola indlela lephephile leya embili, utawufaka kuphila kwakhe engotini. Ngendlela lefananako, umuntfu locabanga kutsi angakwati kuticondzisa kulelive lelibi ngaphandle kwekuvumela Nkulunkulu kutsi amkhombe indlela lefanele, ubeka kuphila kwakhe engotini lenkhulu. Indlela lokukuphela kwayo lesingaphumelela ngayo kulelive lelibi, kwenta umthandazo lofanana nalowo Davide lawenta kuJehova: “Tinyatselo tami tisemikhondvweni yakho, ngiko nje tinyawo tami tingasheleli.” (Hla. 17:5; 23:3) Singasitfola njani sicondziso lesifanana nalesi?
9. Njengobe kuvetiwe ekhasini 17, umoya waNkulunkulu ungaba njani sicondziso setfu lesingasetsemba?
9 Nangabe sitfobekile futsi sitimisele kwetsembela kuJehova, utawusipha umoya wakhe longcwele kute ucondzise tinyatselo tetfu. Angasisita njani lamandla lasebentako? Naku Jesu lakuchazela bafundzi bakhe: ‘Kepha umeluleki, umoya longcwele, Babe latawutfumela egameni lami, utanifundzisa konkhe, anikhumbute konkhe lenginitjele kona.’ (Joh. 14:26) Njengobe sichubeka sithandaza futsi sitadisha liVi laNkulunkulu, lokuhlanganisa nato tonkhe tintfo letashiwo nguKhristu, umoya longcwele utawutfutfukisa indlela lesikucondza ngayo kuhlakanipha lokujulile kwaJehova, kute sikwati kwenta intsandvo yakhe ngalokugcwele. (1 Khor. 2:10) Ngetulu kwaloko, ngisho nalapho sihlangabetana netimo lesingakatilindzeli, umoya utasikhombisa indlela lokufanele sihambe ngayo. Utasikhumbuta timiso teliBhayibheli lesesitati futsi usisite sibone indlela letingasicondzisa ngayo.
Jesu Wacondziswa Ngumoya WaNkulunkulu
10, 11. Yini iNdvodzana yaNkulunkulu letelwe yodvwa lebeyilindzele kutsi yentiwe ngumoya longcwele kuyo, futsi yahlangabetana nani?
10 Sizatfu sesibili lesisenta sifune kucondziswa ngumoya longcwele kutsi Nkulunkulu wacondzisa iNdvodzana yakhe ngawo. Ngembikwekutsi ite emhlabeni, iNdvodzana yaNkulunkulu letelwe yodvwa beyisati lesiphrofetho lesitsi: ‘Umoya waSimakadze uyawubasetikwakhe, umoya wekuhlakanipha newekucondza, umoya wekweluleka newemandla, umoya welwati newekwesaba Simakadze.’ (Isa. 11:2) Asewucabange kutsi Jesu bekakulangatelela kangakanani kutfola lusito lwemoya waNkulunkulu ngesikhatsi alapha emhlabeni.
11 Emavi aJehova agcwaliseka. LiVangeli lichaza loko lokwenteka ngekushesha ngemuva kwekubhajatiswa kwaJesu, litsi: ‘Jesu wabuya eJordane, asagcwele umoya longcwele. Umoya longcwele wamholela ehlane.’ (Luk. 4:1) Ngesikhatsi asehlane, Jesu wazila kudla, wathandaza waphindze wazindla, kufanele nekutsi Jehova wamcondzisa waphindze wamkhanyisela kuloko lobekutakwenteka kuye. Umoya longcwele waNkulunkulu bewusebenta engcondvweni yaJesu kanye nasenhlitiyweni yakhe, ucondzisa imicabango kanye netincumo takhe. Umphumela waloko waba kutsi kuto tonkhe timo, Jesu bekati kutsi kufanele enteni futsi wenta loko lobekufunwa nguBabe wakhe.
12. Kungani kubalulekile kucela umoya waNkulunkulu kutsi usicondzise?
12 Ngesizatfu sekutsi bekakwati loko lobekwentiwe ngumoya waNkulunkulu ekuphileni kwakhe, Jesu wachazela balandzeli bakhe kubaluleka kwekutsi bawucele futsi bacondziswe nguwo. (Fundza Lukha 11:9-13.) Kungani loko kubalulekile kitsi? Kungesizatfu sekutsi umoya ungashintja indlela lesicabanga ngayo ifanane nemcondvo waKhristu. (Rom. 12:2; 1 Khor. 2:16) Ngekuvumela umoya waNkulunkulu kutsi ucondzise kuphila kwetfu, singacabanga njengaKhristu siphindze silingise sibonelo sakhe.—1 Phet. 2:21.
Umoya Walelive Utasidukisa
13. Uyini umoya welive, futsi usibangela kutsi senteni?
13 Sizatfu sesitsatfu lesenta sifune kucondziswa ngumoya waNkulunkulu, kutsi ngaphandle kwawo singadukiswa ngumoya lomubi losebenta kubantfu labanyenti lamuhla. Lelive linemoya walo lonemandla futsi locindzetelako, losibangela kutsi sente lokwehluke kakhulu kuloko umoya longcwele losicondzisa kuko. Kunekutsi wente bantfu babe nemcondvo waKhristu, umoya walelive ubenta bacabange baphindze batiphatse njengembusi walelive, longuSathane. (Fundza Efesu 2:1-3; Thithusi 3:3.) Nangabe umuntfu avumela umoya walelive kutsi umcondzise futsi enta imisebenti yenyama, kuba nemiphumela lemibi, lengamvimbela kutsi azuze lifa leMbuso waNkulunkulu.—Gal. 5:19-21.
14, 15. Singaphumelela njani ekumelaneni nemoya walelive?
14 Jehova usihlomisile kute sikwati kumelana nemoya walelive. Umphostoli Pawula watsi: ‘Cinani eNkhosini nasemandleni ayo lamakhulu . . . khona nitewuba nemandla ekulwa ngelilanga lelibi.’ (Ef. 6:10, 13) Ngemoya wakhe, Jehova uyasicinisa kute sikwati kumelana nemetamo yaSathane yekusidukisa. (Semb. 12:9) Umoya walelive unemandla, futsi angeke sikwati kuwubalekela ngalokuphelele. Kodvwa loko akusho kutsi ungavele usingcolise. Sizatfu saloko kutsi umoya longcwele unemandla lamakhulu kunawo, futsi utasisita.
15 Nakakhuluma ngalabo labashiya inkholo yebuKhristu ekhulwini lekucala, umphostoli Phetro watsi: ‘Bashiye indlela lecondzile baduka.’ (2 Phet. 2:15) Sijabula kakhulu ngekutsi asizange sinikwe ‘umoya welive; kepha sanikwa umoya lovela kuNkulunkulu.’ (1 Khor. 2:12) Ngelusito lwekucondziswa ngulomoya kanye nekusebentisa onkhe emalungiselelo Jehova lasentele wona kute asigcine endleleni lefanele, singaphumelela ekumelaneni nemoya walelive lelibi laSathane.—Gal. 5:16.
Umoya Longcwele Uveta Titselo Letinhle
16. Ngutiphi titselo umoya longcwele longativeta kitsi?
16 Sizatfu sesine sekufuna kutsi umoya waNkulunkulu usebente kitsi, sikutsi, uveta titselo letinhle kulabo labacondziswa nguwo. (Fundza Galathiya 5:22, 23.) Bobani emkhatsini wetfu labangafuni kuba nelutsandvo lolukhulu, injabulo kanye nekuthula? Bobani labangeke batsandze kuba nekubeketela lokunyenti, umusa kanye nebuhle? Bobani kitsi labangeke bazuze ngekuba nekukholwa lokukhulu, kutfobeka kanye nekutibamba? Umoya waNkulunkulu usivetela timfanelo letinhle letizuzisa tsine, bantfu lesiphila nabo kanye nalabo lesikhonta nabo. Kwenta imetamo yekutfutfukisa letitselo temoya kungumsebenti longapheli.
17. Singasitfutfukisa njani sitselo semoya lesitsite ngelizinga lelikhulu?
17 Senta kahle ngekutihlola kute siciniseke kutsi emavi kanye netento tetfu kuniketa bufakazi bekutsi sicondziswa ngumoya longcwele futsi siveta titselo tawo. (2 Khor. 13:5a; Gal. 5:25) Nangabe sibona kutsi kudzingeka sitfutfukise letinye tincenye tetitselo temoya, singabambisana nemoya longcwele kute sivete leto timfanelo ngelizinga lelikhulu. Loko sikwenta ngekutsi sitadishe sitselo semoya ngasinye njengobe sivetwe eBhayibhelini kanye nasetincwadzini tebuKhristu. Kwenta kanjalo kutasenta sicondzisise indlela lesingativeta ngayo ekuphileni kwetfu kwamalanga onkhe, bese setama kutitfutfukisa ngelizinga lelikhulu. b Njengobe sibona imiphumela yekusebenta kwemoya waNkulunkulu ekuphileni kwetfu kanye nekwemaKhristu lesikanye nawo, sibona ngalokucacile kutsi kungani kufanele sicondziswe nguwo.
Uyawuvumela Yini Umoya WaNkulunkulu?
18. Jesu usibonelo ngayiphi indlela endzabeni yekulalela umoya waNkulunkulu?
18 Njengobe ‘bekayingcweti’ yaNkulunkulu ekudaleni indzawo yonkhe lebonakalako, Jesu bekati konkhe ngemandla emhlaba atibutse, bantfu labawasebentisako kute bakwati kuhambahamba emhlabeni. (Taga 8:30; Joh. 1:3) Nanobe kunjalo, abukho bufakazi eBhayibhelini lobuveta kutsi Jesu wake wasebentisa lamandla kute aticondzise yena ngesikhatsi alapha emhlabeni. Kunaloko, liBhayibheli liyaveta kutsi ngesikhatsi angumuntfu, wakubona kuba nemandla kwemoya longcwele waNkulunkulu ekuphileni kwakhe. Wawemukela kutsi umcondzise, wawulalela futsi wenta ngekuvumelana nawo. (Mak. 1:12, 13; Luk. 4:14) Unjalo yini nawe?
19. Yini lokufanele siyente kute umoya longcwele usicondzise ekuphileni kwetfu?
19 Umoya waNkulunkulu longcwele usasebenta etingcondvweni kanye nasetinhlitiyweni talabo labafuna kucondziswa nguwo. Ungawuvumela njani kutsi usebente kuwe futsi ukucondzisele endleleni lefanele? Thandaza njalo kuJehova umcele akuphe umoya wakhe futsi akusite uvumele kucondziswa nguwo. (Fundza Efesu 3:14-16.) Yenta ngekuvumelana nemithandazo yakho ngekutsi uhlole seluleko lesitfolakala eVini laNkulunkulu liBhayibheli—lelingumkhicito wemoya longcwele. (2 Thim. 3:16, 17) Lalela ticondziso talo letihlakaniphile, bese ngemdlandla wenta ngekuvumelana nekuhola kwemoya longcwele. Bani nekukholwa ekhonweni laJehova lekukucondzisa kahle kuphila kwakho kulelive lelibi.
[Imibhalo lengentansi]
a Esetfulweni seliBhayibheli lakhe, Webster wabhala: “Nobe kunini lapho emagama acondzakala ngendlela leyehlukile kuleyo labewacondzakala ngayo ngesikhatsi etfulwa, futsi ehlukile etilwimini tekucala, loku kusho kutsi asuke angamtjeli umuntfu lofundzako loko lokushiwo liVi laNkulunkulu.”
b Kute ufundze kabanti ngesitselo ngasinye, hlola sihloko lesitsi “Fruitage of God’s Spirit” kanye nesihlokwana lesitsi “List by Aspect” letiku-“Watch Tower Publications Indexes,” ngesiNgisi. Fundza ne-w11 4/1 emakhasini 22-25.
Uwatfolile Yini Emaphuzu Labalulekile?
• Umoya longcwele ungakutsintsa njani kuphila kwetfu?
• Ngutiphi tizatfu letine letisenta sifune kucondziswa ngumoya waNkulunkulu?
• Singayifeza njani indzima yetfu kute sizuze ngalokugcwele ekucondziseni kwemoya longcwele?
[Imibuto Yesihloko Lesifundvwako]
[Sitfombe ekhasini 15]
Umoya waNkulunkulu bewungemandla lacondzisa kuphila kwaJesu
[Sitfombe ekhasini 17]
Umoya waNkulunkulu usebenta etingcondvweni kanye nasetinhlitiyweni kute utitsintse futsi uticondzise
