Lamavi ashiwo ngulenye intfombatanyana lebeyineminyaka lengu-13 budzala leyaphiwa umdlwane. Lomunye wesifazane longusomabhizinisi, watsi i-computer layiphiwa nguyise nakenta libanga lemfundvo lephakeme esikolweni, yaba sipho lesashintja kuphila kwakhe. Lenye indvodza lebeyinemnyaka ishadile yatsi likhadi lekukhumbula lilanga lebeyishade ngalo lebelentiwe ngumkayo, laba sipho lesihle kakhulu kuleyake yatitfola.

Njalo ngemnyaka, bantfu labanyenti bacitsa sikhatsi nemandla abo bafuna sipho “lesikahle” labangasiniketa bangani nobe tihlobo tabo ngetikhatsi letitsite letibalulekile. Linyenti lalabo labapha labanye tipho lingakujabulela kuva emavi lafana nalawo lasekucaleni kwalesihloko. Kutsiwani ngawe? Ungatsandza yini kupha nobe kuphiwa tipho letijabulisako?

Leso sifiso singenteka, hhayi nje ngekunaka kuphela indlela loyo lophiwako langativa ngayo kodvwa nangekunaka indlela loyo lophako latawutiva ngayo. Ngetulu kwaloko liBhayibheli litsi: “Kunenjabulo lenyenti ekupheni kunasekwemukeleni.” (Imisebenti 20:35) Kuliciniso kutsi, injabulo loyitfolako ngekupha lomunye ingaba yinkhulu nangabe lesipho sibalulekile kuloyo lomphako.

Ngako, yini longayenta kute sipho sakho sijabulise wena kanye naloyo lomphako? Nangabe bewusolo ungakhoni kukhetsa sipho lesikahle longasipha labanye, yini longayenta kute sipho sakho sijabulise?