Ngatalwa nga-1960 futsi make wami abeneminyaka lengu-17. Babe wami wasishiya ngisengakatalwa. Ngakhulela ekhabomake futsi mine namake besihlala nagogo namkhulu edolobheni lelincane lase-German Democratic Republic noma eMphumalanga yeJalimane lokutsiwa yiBurg. Bantfu labanyenti bebangakholelwa kutsi Nkulunkulu ukhona futsi nasekhaya besati loko. Besinganendzaba naNkulunkulu.

Nangisakhula, mkhulu wami bekanginakekela. Abengentisa tintfo letinyenti, letifaka ekhatsi kugibela etulu ngijube emagala etihlahla. Nangisemncane bengikutsandza kwenta lemisebenti lejabulisako. Imphilo yami beyimnandzi futsi bekute intfo lengihluphako.

Nangineminyaka lesikhombisa, kwenteka intfo lebuhlungu kakhulu ekuphileni kwami. Besengisebangeni lesibili esikolweni. Ngalelinye lilanga, nangisendleleni leya ekhaya, ngagibela epholini lagesi. Nasengikhuphuke ngemamitha langu-8, ngashaywa ngugesi lonemandla kakhulu ngingakanaki. Nangiphaphama esibhedlela ngeva ngatsi imikhono yami ayisebenti. Beyishe kakhulu futsi beyesabeka, ngako kwadzingeka kutsi ijutjwe kute loshevu wagesi ungasabalali nawo wonkhe umtimba. Ungacabanga ngebuhlungu lobaviwa ngumake, gogo namkhulu. Kepha njengobe bengisengumntfwana, bengingati kahle kutsi itawuba njani imphilo yami nasengingenamikhono.

Nasengiphumile esibhedlela, ngaphindze ngabuyela esikolweni. Njengobe bengingakhoni kutivikela, bantfwana besikolwa bebahlekisa ngami, bangifuca futsi bangijikijela ngetintfo. Bekungivisa buhlungu kungiphatsa kwabo ngelunya kanye nekusho kwabo tintfo letikhombisa kungibukela phansi. Ngagcina ngiye esikolweni lebesiseBirkenwerder lapho bekuhlala khona bantfwana labakhubatekile. Make, gogo namkhulu bebangakhoni kungivakashela ngobe lesikolwa besikhashane. Bengibabona kuphela nakuvalwe tikolwa. Kwaphela iminyaka lelishumi solo lesimo sichubeka, ngako ngakhula ngaphandle kwabo.

Ngafundza kwenta tintfo ngisebentisa tinyawo, lokuyintfo lebengingazange ngiyente. Asewucabange nje kutsi kunjani kudla ngesipunu noma ngemfologo uyibambe ngetintwane? Ngekuhamba kwesikhatsi ngagcina senginelikhono lekusebentisa tintwane. Ngafundza kucubha kanye nekukama tinwele tami ngisebentisa tinyawo. Nangikhuluma nebantfu besengikhona ngisho nekunyakata ngisebentisa tona tinyawo. Ecinisweni, tintfo lebengitenta ngetandla besengikhona kutenta ngetinyawo.

 Nasengiseminyakeni yabo 13 kuya ku-19, bengikutsandza kufundza tincwadzi tesayensi. Ngalesinye sikhatsi bengiticabanga nje ngiba nemikhono lesezingeni lelisetulu futsi ngitentela tonkhe tintfo. Nasengineminyaka lengu-14, ngacala kubhema. Nasengibhemile, bengitiva ngatsi nginjengabo bonkhe bantfu futsi bengitetsemba. Bekufana nekutsi ngitsi: ‘Ya, kute lokungangehlula. Akunendzaba kutsi nginayo yini imikhono noma cha kepha sengimdzala.’

Bengihlale ngimatasa futsi bengitihlanganisa nebantfu. Ngaba lilunga lelicembu lebantfu labasha lokutsiwa yiFree German Youth, lelisekelwa nguhulumende. Kulelicembu bengingumabhalane, lokusikhundla lebesitsatfwa njengalesiphakeme. Ngaphindze ngajoyina licembu lebahlabeleli, ngisho tinkhodlo futsi bengidlala naleminye imidlalo yalabakhubatekile. Nasengicedzile kufundzela umsebenti ngabese ngicala kusebenta enkampanini lesedolobheni lakitsi. Nangisakhula, bengivame kusebentisa imikhono yekufakwa ngobe nami bengifuna kuba nato tonkhe titfo temtimba.

Ngalelinye lilanga ngisesiteshini sesitimela ngabona lenye indvodza ita kimi. Yangibuta kutsi ngiyati yini kutsi Nkulunkulu angayibuyisela yonkhe imikhono yami. Ngamangala. Ecinisweni vele bengifisa kutsi ngiphindze ngibe nemikhono kodvwa loko bengikutsatsa njengeliphupho lelingayuze lifezeke kimi! Njengobe ngike ngasho, bengingakholelwa mbamba kutsi Nkulunkulu ukhona. Ngako kusukela lapho, besengiyibalekela leya ndvodza.

Ngekuhamba kwesikhatsi, lomunye lengisebenta naye wangicela kutsi ngimvakashele ekhaya lakhe. Nasisanatsa litiya, batali bakhe bacala kukhuluma ngaNkulunkulu loneligama lelitsi Jehova. Bekukwekucala ngca ngiva kutsi Nkulunkulu uneligama. (Tihlabelelo 83:18, NW) Noma kunjalo, bengingakukholelwa loko, bengititjela kutsi: ‘Ayikho lentfo yekutsi ukhona Nkulunkulu, noma bangatsi unalo ligama. Ngifuna kubakhombisa kutsi ayikho lentfo yabo’. Bengikwetsemba kuloko lengikukholelwako, ngako ngavuma kutsi sicoce ngeliBhayibheli. Kodvwa ngamangala nasengehluleka kusho tizatfu tekutsi Nkulunkulu akekho.

Nasichubeka sifundza ngetiphrofetho letiseBhayibhelini, ngacala kushintja umcondvo mayelana nembono wami wekutsi Nkulunkulu akekho. Tinyenti tiphrofetho teliBhayibheli lesetigcwalisekile, ngisho noma tabhalwa kusesele emakhulu eminyaka, letinye bekusesele tinkhulungwane tayo. Ngalelinye lilanga nasicoca ngeliBhayibheli sacatsanisa tintfo letenteka emhlabeni namuhla kanye netiphrofetho letikuMatewu sehluko 24, Lukha sehluko 21, kanye naku 2 Thimothi sehluko 3. Letiphrofetho tifanana netimphawu letisita dokotela abone kutsi umuntfu logulako uphetfwe yini. Nami tangisita ngabona kutsi manje sesiphila etikhatsini liBhayibheli lelitibita ngekutsi ‘ngemalanga ekugcina.’ * Loku kwangimangalisa kakhulu. Bengitibonela kutsi letiphrofetho tiyagcwaliseka.

Besengiciniseka kutsi loko lengikufundzako kuliciniso. Ngathantaza kuJehova futsi ngayekela kubhema—ngisho noma besekuphele iminyaka lengetulu kwalelishumi ngibhema. Ngachubeka nekutadadisha liBhayibheli  cishe sikhatsi lesingangemnyaka. Nga-April 27, 1986, ngabhajatiselwa ebhavini ngobe ngaleso sikhatsi BoFakazi BaJehova bebavinjelwe eMpumalanga yeJalimane.

Ngesizatfu sekutsi BoFakazi baJehova bebangafuneki, besihlangana ngemacembu lamancane emakhaya ebazalwane, ngako bebabancane bazalwane lebengibati. Ngingakalindzeli, tiphatsimandla tangivumela kutsi ngiye eNshonalanga yeJalimane lapho boFakazi bebangakavinjelwa khona. Bekukwekucala ngca ekuphileni kwami kuya emhlanganweni lomkhulu lakukhulunywa khona ngeliBhayibheli. Ngajabula kakhulu nekubona tinkhulungwane tebazalwane nabodzadzewetfu.

Naseyiphelile imphi yaseBerlin, boFakazi baJehova bakhululeka kulokuvinjelwa. Sabese siyakhona kukhonta Nkulunkulu Jehova ngekukhululeka. Bengifuna kukhulisa sikhatsi lebengisisebentisela kushumayela. Noma kunjalo, bengesaba kuhlangana nebantfu. Bengitikhobosa ngekukhubateka kwami kanye nangekutsi ngakhulela ekhaya lalabakhubatekile. Kodvwa nga-1992, ngetama kushumayela ema-awa langu-60 ngenyanga. Ngaphumelela futsi ngajabula kakhulu. Ngabese ngincuma kuchubeka nekukwenta loko njalo ngenyanga kwaze kwaphela iminyaka lemitsatfu.

Ngihlale ngicabanga ngemavi laseBhayibhelini latsi: “Ngubani loba butsakatsaka mine ngingabi butsakatsaka?” (2 Khorinte 11:29) Ngisho noma ngikhubatekile, ngisenayo ingcondvo nelivi. Ngako-ke ngenta konkhe lokusemandleni ami kutsi ngisite labanye. Njengoba ngite imikhono, ngiyabavela nalabanye labakhubatekile. Ngibati kahle buhlungu bekufuna kwenta intfo letsite kodvwa ungakhoni kuyenta. Ngiyetama kubakhutsata labakuleso simo. Kupha nekusita labanye kungenta ngijabule.

Kuliciniso kutsi ngaletinye tikhatsi ngitiva ngicindzetelekile. Nami ngiyafisa kuba nato tonkhe titfo temtimba. Ngiyakhona kutentela tintfo, kepha kungitsatsa sikhatsi lesidze kutenta futsi ngidzinga emandla lamanyenti kwendlula lawo ladzingwa ngumuntfu lonetitfo letiphelele. Sicubulo sami samalanga onkhe sitsi: “Nginemandla kuto tonkhe tintfo ngenca yaloyo longipha emandla.” (Filiphi 4:13) Jehova ungipha emandla lengiwadzingako kute ngente imisebenti yamalanga onkhe. Ngibonile kutsi Jehova akangilahli. Kungako nami ngingafuni kuyekela kumkhonta.

Jehova ungibusise ngemndeni, lokuyintfo lengakhula ngaphandle kwayo. Nginemfati lomuhle, longitsandzako nalongivelako, ligama lakhe ngu-Elke. Ngetulu kwaloko, tigidzi taBoFakazi BaJehova lengikhonta nato tibe bomnaketfu kanye nabodzadzewetfu, ecinisweni singumndeni losemhlabeni wonkhe.

Lokunye lokungidvudvutako, setsembiso saNkulunkulu lesingumhlaba lolipharadisi lapho atawenta “tonkhe tintfo tibe tinsha,” lokufaka ekhatsi nayo imikhono yami. (Sembulo 21:5) Kucabangisisa ngaloko Jesu lakwenta nakasesemhlabeni kungenta ngisicondze kahle lesetsembiso. Ngesikhashana nje, waphilisa indvodza leyayinesandla lesikhubatekile waphindze wabuyisela nendlebe yalenye indvodza. (Matewu 12:13; Lukha 22:50, 51) Tetsembiso taJehova netimangaliso letentiwa nguJesu, tingenta ngiciniseke kutsi madvutane tonkhe titfo temtimba wami titawuphelela.

Kwati Jehova Nkulunkulu kube sibusiso lesikhulu kimi. Ube ngubabe wami, umngani, umdvudvuti kanye nemandla ami. Ngitiva ngendlela lefanako naleyo Davide lativa ngayo, ngesikhatsi atsi: “Simakadze ungemandla ami . . . Wangisita, ngako inhlitiyo yami igcunyagcunyiswa yinjabulo.” (Tihlabelelo 28:7) Kuko konkhe kuphila kwami, ngifuna kumbambelela kuleliciniso leliseBhayibheli. Ngalemukela ngisho nobe ngite imikhono.