LiBhayibheli alifundzisi kutsi umuntfu unengilosi yakhe lemgadzile. Kuliciniso kutsi Jesu wake watsi: “Caphelani kutsi ningedzeleli ngisho namunye kulaba labanjengebantfwana, ngobe ngicinisile ngitsi, tingilosi tihlale tisembikwaBabe losezulwini ngenca yabo.” (Matewu 18:10) Nobe kunjalo, Jesu bekangasho kutsi umuntfu ngamunye unengilosi yakhe lemgadzile, kunaloko bekatsi tingilosi tiyakunaka loko lokwentiwa bafundzi bakhe. Ngako, emaKhristu eliciniso akatenti tintfo letingakahlakaniphi nobe afake kuphila kwawo engotini etsembe kutsi tingilosi taNkulunkulu titawavikela.

Ngabe loko kusho kutsi tingilosi atibasiti yini bantfu? Cha. (Tihlabelelo 91:11) Labanye bakholelwa kutsi Nkulunkulu usebentisa tingelosi kute tibavikele tiphindze tibacondzise. Kenneth, lesikhulume ngaye ekucaleni, ungulomunye wabo. Nanobe singeke sikuphike loko, kungenteka ucinisile. BoFakazi BaJehova babubone kanyenti bufakazi bekusekelwa tingilosi nabashumayela. Nobe kunjalo, ngenca yekutsi tingilosi tinemtimba wemoya, singeke sisho kutsi Nkulunkulu utisebentisa ngelizinga lelinganani kute tisite bantfu etindzabeni letehlukahlukene. Ngetulu kwaloko, ngeke sihlale singambongi Nkulunkulu ngelusito lasiniketa lona nganobe ngabe nguyiphi indlela.​—Kholose 3:15; Jakobe 1:17, 18.