Nkulunkulu wetsembisa umphrofethi Abrahama kutsi munye esitukulwaneni sakhe bekatawuletsa tibusiso ‘etiveni tonkhe temhlaba.’ (Genesisi 22:18) Bekutawuba ngubani lesitukulwane?

Eminyakeni lecishe ibe ngu-2 000 leyendlulile, Nkulunkulu waniketa Jesu, lositukulwane sa-Abrahama, emandla ekwenta timangaliso letinkhulu. Letimangaliso betikhombisa kutsi setsembiso lesentiwa ku-Abrahama besitawugcwaliseka emhlabeni ngaJesu.—Galathiya 3:14.

Letimangaliso letentiwa nguJesu tamveta njengaloyo lokhetfwe nguNkunkulu kutsi abusise bantfu, taphindze tamveta njengaloyo Nkulunkulu latamsebentisa kuze abusise bantfu phakadze. Naka indlela letimangaliso letentiwa nguJesu letiveta ngayo lobunye bebuntfu bakhe lobuhle.

Umusa—Jesu welapha labagulako.

Ngalelinye lilanga, indvodza lebeyinebulephelo yancenga Jesu kutsi ayelaphe. Jesu watsintsa lendvodza wase utsi: “Ngiyatsandza!” Ngekushesha lobulephelo baphela.—Makho 1:40-42.

Kwephana—Jesu wondla labalambile.

Jesu bekangafuni kutsi bantfu balambe. Emahlandla lambalwa, wondla ngalokusimangaliso tinkhulungwane tebantfu ngekwandzisa tinkhwa letimbalwa netinhlanti letincane letimbalwa. (Matewu 14:17-21; 15:32-38) Ngemuva kwekutsi bonkhe sebadlile benela, kwasala kudla lokunyenti.

Luvelo—Jesu wavusa labafile.

‘Adzabukela’ umfelokati lotsite, Jesu wavusa ekufeni indvodzana lekuphela kwayo, yalomfelokati losebuhlungwini lobekete umuntfu labengamnakekela.—Lukha 7:12-15.