Ngakhulela endzaweni yasePuerto Limón, edolobheni lelisemphumalanga yeCosta Rica. Ngangiwesikhombisa kubantfwana labasiphohlongo. Babe washona nangineminyaka lengu-8 budzala. Ngemuva kwaloko make wasikhulisa asayedvwana.

I-baseball beyiyincenye yekuphila kwami. Ngisemncane bengiwutsandza lomdlalo. Ngajoyina licembu le-baseball ngiselijaha. Nangisandza kwengca eminyakeni lengu-20 budzala futsi ngisadlalela lelo cembu, indvodza letsite lefuna badlali labanemakhono yangicela kutsi ngidlalele licembu lelikhulu laseNicaragua. Bengingafuni kuya eNicaragua ngoba make bekagula ngaleso sikhatsi futsi bengimnakekela. Ngako angizange ngisemukele leso sicelo. Ngemva kwesikhatsi, lenye indvodza lebeyifuna badlali yacela kutsi ngidlalele licembu lesive laseCosta Rica lebelinebadlali lababuya emacenjini lamancane. Ngasemukela lesicelo. Ngadlalela licembu lesive kusukela nga-1949 kuya ku-1952, futsi ngadlala imidlalo leminyenti eCuba, eMexico, naseNicaragua. Ngangingumdlali lonelikhono, ngaze ngadlala imidlalo lengu-17 futsi angizange ngente ngisho nalinye liphutsa. Ngangijabula nangiva tihlwele tingibongelela!

Lokubuhlungu kutsi bengingasatiphatsi kahle. Benginetintfombi letinyenti, futsi ngisidzakwa. Ngalelinye lilanga bengidzakwe kakhulu kangangekutsi nangivuka ngakusasa bengingakhumbuli kutsi ngifike njani ekhaya! Bengigembula emidlalweni yemadayisi futsi bengidlala i-lotto.

Nangisaphila leyo mphilo, make waba ngulomunye waBoFakazi BaJehova. Wetama kungifundzisa liciniso, kodvwa loko akuphumelelanga ngobe lomdlalo besengiwutsandza kakhulu. Nangijima ngesikhatsi sekudla, bengingayiva ngisho nendlala! Ingcondvo yami beyigcile kulomdlalo kuphela. Kute lebengikutsandza kakhulu kwendlula i-baseball!

Nangineminyaka lengu-29 budzala, ngalimala kakhulu nangetama kuncaga ibhola. Ngatsi nangelulama ngabese ngiyayekela kudlalela licembu lesive. Nome kunjalo, ngachubeka  ngicecesha badlali bemacembu lamancane lasendzaweni yakitsi.

Nga-1957, ngaya emhlanganweni waBoFakazi BaJehova lobewusenkhundleni yetemidlalo lapho bengike ngadlala khona i-baseball. Njengobe bengikulenkhundla nganaka kutsi BoFakazi BaJehova bebatiphetse kahle futsi bahlonipha kantsi tihlwele te-baseball betivame kuba nemsindvo neludlame. Lengakubona kulomhlangano kwangenta ngacala kudadisha liBhayibheli naBoFakazi ngaphindze ngaya emihlanganweni yelibandla.

Timfundziso teliBhayibheli letinyenti lengatifundza tangijabulisa. Sibonelo saloku kutsi Jesu watsi emalangeni ekugcina bafundzi bakhe bebatawushumayela tindzaba letimnandzi teMbuso waNkulunkulu emhlabeni wonkhe. (Matewu 24:14) Ngafundza nekutsi emaKhristu eliciniso awalindzeli kutsi abhadalwe ngemsebenti wawo wekushumayela. Jesu watsi: “Niphiwe mahhala, nani phanini mahhala.”​—Matewu 10:8.

Njengobe bengichubeka ngidadisha liBhayibheli, ngacatsanisa loko lelikushoko naloko lengakubona kuBoFakazi BaJehova. Ngayitsandza indlela labebatikhandla ngayo kuze bashumayele tindzaba letimnadzi teMbuso waNkulunkulu emhlabeni wonkhe. Ngabona kutsi banemoya wekupha, Jesu layala emaKhristu kutsi abe nawo. Nangifundza Makho 10:21 futsi ngibona simemo saJesu lesitsi ‘bani ngumlandzeli wami’ ngafuna kuba nguFakazi WaJehova.

Noma kunjalo, kwangitsatsa sikhatsi kukwenta loko. Nasi sibonelo, besekuphele iminyaka leminyenti nginenombolo lengiletsela “inhlanhla” njalo ngeliviki nangidlala i-lotto. Nome kunjalo, ngafundza eBhayibhelini kutsi Nkulunkulu uyabazonda bantfu labakhonta “nkulunkulu weNhlanhla” kanye nalababukhali. (Isaya 65:11, NW; Kholose 3:5) Ngako ngakhetsa kuyekela kugembula. NgeliSontfo lekucala ngiyekele kugembula, inombolo lebeyingiletsela “inhlanhla” yawina! Bantfu bahlekisa ngami ngekutsi angizange ngidlale kulelo viki futsi bangicindzetela kutsi ngibuyele ngidlale, kodvwa angikwentanga loko. Angiphindzanga ngabuyela ekugembuleni.

Ngelilanga lengabhajatiswa ngalo emhlanganweni waBoFakazi BaJehova, ngaphindze ngatfola lolunye luvivinyo ‘lwebuntfu bami lobusha.’ (Efesu 4:24) Ngalelolanga ntsambama nangibuyela ehhotela lebengilele kulo, ngatfola intfombatana lebeyisingani sami ingimele emnyango welikamelo lami. Yangincenga yatsi: “Buya sitijabulise Sammy.” Kepha ngamphendvula ngekushesha ngatsi, “Cha!” Ngamkhumbuta kutsi besengiphila imphilo lehambisana netimiso teliBhayibheli. (1 Khorinte 6:18) Waphahluka watsi: “Ini?” Wabese uhlekisa ngembono weliBhayibheli mayelana nekuya ecasini futsi wangicindzetela kutsi sichubeke sitsandzane. Noma kunjalo ngavele ngangena ekamelweni lami futsi ngakhiya umnyango. Lamuhla ngiyajabula kutsi kusukela ngaba nguFakazi WaJehova nga-1958, solo ngisebambelele ngalokucinile kuletingucuko lengatenta ekuphileni kwami.

Ngiva ngatsi ngingabhala incwadzi ngichaze indlela lengisitakele ngayo nangilandzela sicondziso seliBhayibheli! Letinye tibusiso lengititfolile kutsi nyalo senginebangani beliciniso, kuphila kwami sekunenjongo futsi ngijabula mbamba.

Solo ngisayitsandza i-baseball, kepha angisayitsatsi njengemsebenti wami. Ngesikhatsi ngisengumdlali we-baseball ngatfola ludvumo nemali, kodvwa kwahamba kwaphela. Noma kunjalo, buhlobo bami naNkulunkulu nemaKhristu lengikanye nawo buyohlala phakadze. LiBhayibheli litsi: “Live liyendlula kanye nesifiso salo, kodvwa loyo lowenta intsandvo yaNkulunkulu uhlala kuze kube phakadze.” (1 Johane 2:17) Nyalo sengitsandza Jehova Nkulunkulu kanye netikhonti takhe kwendlula noma yini lenye!