NANGABE uke wafelwa sihlobo sakho, kungenteka wativa udzabukile, unesitunge futsi ulahliwe. Mhlawumbe waphindze wativa utfukutsele, unelicala futsi wesaba. Kungenteka waphindze watibuta kutsi usaphilelani nje?

Ungatisoli nawutiva ulusizi ucabange kutsi loko kuluphawu lwekuba butsakatsaka. Kunaloko, lusizi lukhombisa kutsi bewumtsandza kangakanani lomuntfu lofile. Noma kunjalo, usengadvudvuteka kulolusizi lokulo.

Ngisho nobe buhlungu lokubo bungabonakala bungeke buphele, loku lokulandzelako kungakusita:

TINIKE SIKHATSI SEKUKHALA

Indlela yekulila yebantfu ayifani futsi nesikhatsi sabo sekulila asilingani. Kukhala kungabunciphisa buhlungu. Vanessa, lesike sakhuluma ngaye utsi: “Bengivele ngikhale kuze ngehlise buhlungu.” Sofía lowafelwa ngudzadzewabo lomncane angakalindzeli utsi: “Kubuhlungu kakhulu kucabanga ngaloko kangangekutsi kufana nekuvula, ugeze silondza lesibhidlikako.  Lobo buhlungu abubeketeleleki, kodvwa kuyasisita lesilondza kutsi siphole.”

KHULUMA NGENDLELA LOTIVA NGAYO NANGALOKO LOKUCABANGAKO

Ngaletinye tikhatsi ungase ufune kuba nesikhatsi uwedvwa. Kodvwa buhlungu bekufelwa buyintfo lematima kutsi ungatitfwalela yona wedvwana. Jared, loneminyaka lengu-17, lowafelwa ngubabe wakhe utsi: “Ngangikhuluma ngendlela lengitiva ngayo nalabanye. Angicabangi kutsi bebacondza kutsi ngitsini kodvwa kwangisita kukhuluma.” Janice, lesikhulume ngaye esihlokweni sekucala ubala nalenye intfo lengaba lusito, nakatsi: “Kukhuluma nalabanye kwangidvudvuta kakhulu. Ngeva kutsi bayakucondza loko lengikushoko futsi bayangivela.”

YEMUKELA LUSITO

Dokotela wengcondvo utsi: “Nangabe labafelwe bavumela bangani netihlobo kutsi tibasite, bayakhona kubhekana nalolosizi.” Tjela bangani bakho ngalokucondzile loko lofuna bakusite ngako, ngobe kungenteka bayafuna kukusita kodvwa abati kutsi bangakusita njani.​—Taga 17:17.

SONDZELA KUNKULUNKULU

Tina utsi: “Ngesikhatsi ngishonelwa yindvodza yami ibulawa sifo semdlavuza, bekute bengingatfululela kuye sifuba, bengivele ngitjele Nkulunkulu. Njalo ekuseni bengithantaza, ngimcele kutsi angiphe emandla ekuchubeka nelusuku. Nkulunkulu wangisita ngetindlela letinyenti.” Tarsha, lobekaneminyaka lengu-22 ngesikhatsi kushona make wakhe, utsi: “Kufundza liBhayibheli malanga onkhe bekungidvudvuta. Bekungenta ngingacabangi ngalokufelwa.”

KUBONE NGELISO LENGCONDVO KUVUSWA KWALABAFILE

Tina uyachubeka atsi: “Ekucaleni, litsemba lekuvuka kwalabafile alizange lingidvudvute, ngobe mine bengimdzinga umyeni wami, kantsi nebantfwana bami bebamdzinga babe wabo. Sekuphele iminyaka lemine, solo ngibambelele kulelotsemba. Ngilo lelingenta ngichubeke ngiphila. Ngimbona ngeliso lengcondvo avuswa umyeni wami, futsi loko kungiletsela kuthula nenjabulo.”

Lusizi lwekufelwa alumane nje luphele ngekushesha. Lokwenteka ku-Vanessa kungasiniketa litsemba. Utsi: “Uyaye ucabange kutsi angeke kwendlule, kodvwa kutawuba ncono ngekuhamba kwemalanga.”

Khumbula kutsi nakuba lesikhala lesisenhlitiyweni singeke sivaleke, kodvwa kuphila kusebalulekile. Ngelusito loluvela kuNkulunkulu, ungachubeka uba nebangani labakahle kanye nemphilo lenenjongo. Ngekushesha Nkulunkulu utawuvusa bantfu labafile. Ufuna ukujabulele kuphila ukanye netihlobo takho. Ngaleso sikhatsi, buhlungu lobuvako nyalo buyawuphela bungaphindze bube khona.