TINKHOLO letinyenti emhlabeni—letifaka ekhatsi emaRoma Katolika, emasontfo lehlukahlukene ebu-Orthodox, emaBhuda kanye naletinye tinkholo—tifuna baholi bato bangashadi. Kantsi bantfu labanyenti bakholelwa kutsi lomkhuba ngiwo lobangela lizinga leliphakeme lekutiphatsa kabi ngekwelicansi lokwentiwa baholi benkholo.

Ngenca yaloko, kunengcondvo kutibuta kutsi, liBhayibheli liyasho yini kutsi kufanele ungashadi kute ube sikhonti lesingumKhristu? Kute siphendvule lombuto, asesive umbono waNkulunkulu ngalomkhuba futsi sihlole kutsi wasukelaphi nekutsi wandlondlobala njani.

I-Encyclopædia Britannica itsi kungashadi ngenca yemasiko enkholo kusho “kungashadi kanye nekungayi ecansini ngesizatfu sekutsi ungumholi wenkholo noma utinikele kuyo.” Nga-2006, Papa Benedict XVI watjela emalunga e-Roman Curia kutsi kungashadi kuhlobana “nelisiko lelasukela endvulo cishe ngesikhatsi sebaphostoli.”

Noma kunjalo, kungashadi bekungasilo lisiko lenkholo lebeligcinwa ngemaKhristu angelikhulu lekucala leminyaka. Ecinisweni, umphostoli Pawula lobekaphila ngelikhulu lekucala leminyaka, wecwayisa emaKhristu ngebantfu labebatawukhuluma “tinkhulumo letiphefumulelwe letidukisako” futsi ‘bebatawalela bantfu kutsi bashade.’—1 Thimothi 4:1-3.

Ngelikhulu lesibili leminyaka lomkhuba wekungashadi wangena ngisho nasemasontfweni ebuKhristu aseYurophu. Ngekusho kwencwadzi letsi “Celibacy and Religious Traditions,” loku bekuvumelana nemkhuba wekungayi ecansini lowacala eMbusweni wemaRoma.

Emakhulwini eminyaka lalandzela, baholi benkholo  lababitwa ngekutsi baFundisi bawukhutsata lomkhuba wekungashadi kwebaholi bemasontfo. Bebacabanga kutsi kuya ecansini bekuwungcolisa umsebenti wabo njengebaholi benkholo futsi kungahambisani nawo. Noma kunjalo, i-Encyclopædia Britannica itsi: “Kwatsi ngelikhulu lesi-10 leminyaka, baphristi labanyenti kanye nebabhishobhi besebashadile.”

Emhlanganweni webaholi bemaRoma Katolika lebewuseRoma ngemnyaka wa-1123 na-1139, kwagcizelelwa kakhulu kungashadi kwebaholi benkholo. Kusukela ngaleso sikhatsi loku kwaba semtsetfweni eSontfweni lemaRoma Katolika, futsi kusenjalo nalamuhla. Ngalomtsetfo, lelisontfo belitama kubalekela kulahlekelwa ngemandla ekubusa kanye nemali lebekubangelwa kutsi baphristi labashadile batsatse tintfo telisontfo tibe lifa lebantfwana babo.

Umbono waNkulunkulu mayelana nekungashadi uvetwe ngalokucacile eVini lakhe liBhayibheli. Kulo sifike sitfole emavi Jesu lawasho mayelana nebantfu labakhetsa kungashadi, “ngenca yeMbuso welizulu” njengaye. (Matewu 19:12) Nemphostoli Pawula wakhuluma ngemaKhristu lakhetsa kungashadi “ngenca yetindzaba letimnandzi,” njengobe naye enta.—1 Khorinte 7:37, 38; 9:23.

Noma kunjalo Jesu kanye nemphostoli Pawula abazange babeke umtsetfo wekutsi tikhonti kufanele tingashadi. Jesu watsi akusibo bonkhe balandzeli bakhe lebebatawuba “nesipho” sekungashadi. Ngesikhatsi umphostoli Pawula akhuluma ngebantfu “labangazange sebashade,” watsi “ngite umyalo lovela eNkhosini, kodvwa ngininika umbono wami.”—Matewu 19:11; 1 Khorinte 7:25.

Ngetulu kwaloko, liBhayibheli liveta kutsi tikhonti letinyenti tangelikhulu lekucala lokufaka ekhatsi umphostoli Phetro betishadile. (Matewu 8:14; Makho 1:29-31; 1 Khorinte 9:5) Ecinisweni, ngenca yekwandza kwekutiphatsa kabi ngekwelicasi eRoma, Pawula watsi nangabe umbonisi longumKhristu ashadile, kufanele abe “nemfati munye” aphindze abe “nebantfwana labalalelako nalabatiphetse kahle.”—1 Thimothi 3:2, 4.

Loku akusho kutsi laba labashadile bebangayi ecasini, ngobe liBhayibheli likubeka ngalokucacile kutsi, “indvodza ayinike umkayo loko lokumfanele” kanye nekutsi bantfu labashadile kufanele ‘bangagodlelani’ kuya ecasini. (1 Khorinte 7:3-5) Kuyacaca kutsi Nkulunkulu akasho kutsi tikhonti letingemaKhristu kufanele tingashadi.

Nangabe kungashadi kungasiwo umtsetfo, kwentiwa yini-ke kutsi Jesu naPawula bakhulume kahle ngekungashadi? Kungenca yekutsi umuntfu longakashadi uba nematfuba lamanyenti ekucocela labanye tindzaba letimnandzi. Bantfu labangakashadi bayakhona kutinikela ngalokugcwele emsebentini wekushumayela ngoba bete tinkinga labashadile labanato.—1 Khorinte 7:32-35.

Cabanga ngesibonelo saDavid lowakhetsa kuyekela umsebemti lobewumholela imali lenyenti eMexico City, wase uya endzaweni lesemakhaya eCosta Rica, kute afundzise labanye liBhayibheli. Kwamsita yini David kungashadi kute akwente loku? Yebo, kwamsita. Utsi: “Bekumatima kutivumelanisa nemasiko lamasha kanye nendlela lensha yekuphila, kodvwa kwaba ncono ngenca yekutsi bekute lomunye lengimnakekelako.”

Claudia longumKhristu longakashadi lowatfutsela lapho kunesidzingo lesikhulu khona sebashumayeli beMbuso utsi: “Ngiyajabula ngemsebenti lengiwentela Nkulunkulu. Kukholwa kwami kanye nebuhlobo bami naNkulunkulu buyacina nangibona indlela langinakekela ngayo.”

Kungashadi akukafaneli kube ngumtfwalo. Claudia utsi: “Akunendzaba kutsi ushadile noma cha. Utawujabula nangabe wentela Jehova lokuncono kakhulu.”—Tihlabelelo 119:1, 2.