LiBhayibheli Lingumtfombo Loliciniso Lesingawetsemba
Kuwo wonkhe umlandvo, bantfu labachamuka etindzaweni letihlukahlukene batsatsa liBhayibheli njengemtfombo loliciniso. Lamuhla, bantfu labanyenti bayakulalela loko lelikufundzisako. Kepha labanye balitsatsa njengencwadzi lengasebenti nome lenetinganekwane. Wena ucabangani? Ungalitfola yini liciniso eBhayibhelini?
KUNGANI UNGALETSEMBA LIBHAYIBHELI
Ungabona njani kutsi liBhayibheli liyakusekela loko lokwetsembako? Ase sibekise: Nangabe umngani wakho bekahlale akutjela liciniso eminyakeni leminyenti lendlulile, nakanjani utametsemba. LiBhayibheli liyafana yini nemngani lowetsembekile lohlale akhuluma liciniso? Naka nati tibonelo.
Babhali Labakhuluma Liciniso
Babhali beliBhayibheli bebatsembekile, futsi ngaletinye tikhatsi bebaveta emaphutsa abo. Cabanga ngesibonelo semphrofethi Jona lowabhala ngekungalaleli kwakhe. (Jona 1:1-3) Ecinisweni, waphetsa incwadzi yeliBhayibheli lebitwa ngelibito lakhe ngekutsi avete indlela Nkulunkulu lamjezisa ngayo. Kepha akazange ayivete indlela Nkulunkulu lalungisa ngayo simo sakhe (Jona 4:1, 4, 10, 11) Kwetsembeka kwabo bonkhe babhali beliBhayibheli kuveta kutsi bebanendzaba neliciniso.
Emaciniso Lesingawasebentisa Ekuphileni Kwetfu
LiBhayibheli lihlale lisinika yini imiyalo mayelana netindzaba letitsite? Yebo, liyasinika. Asesinake loko liBhayibheli lelikushoko mayelana nekuhlale sinebuhlobo lobuhle nalabanye: “Tonkhe tintfo lenifuna bantfu batente kini, nani tenteni kubo.” (Matewu 7:12) “Imphendvulo letfobekile icitsa intfukutselo; kodvwa leyedzelelako nalenelulaka iyatfukutselisa.” (Taga 15:1) Emaciniso laseBhayibhelini solo ayasebenta nalamuhla njengobe abesebenta ngesikhatsi libhalwa.
Umlandvo Loliciniso
Tintfo letinyenti letitfolwe bavubukuli eminyakeni leminyenti leyendlulile tifakazela kubakhona kwebantfu labehlukahlukene, tindzawo letitsite kanye netintfo letenteka mbamba letiseBhayibhelini. Ase ucabange ngebufakazi bemininingwane letsite. LiBhayibheli litsi ngesikhatsi saNehemiya, bantfu baseThire (bantfu baseFenisiya labasuka eThire) lebebahlala eJerusalema bebaletsa “tinhlanti nako konkhe lokutsengwa kutsengiswe.”—Nehemiya 13:16.
Bukhona yini bufakazi lobusekela lelivesi leliBhayibheli? Yebo, bukhona. Bavubukuli batfola tintfo taseFenisiya ka-Israyeli, lokufakazela kutsi bekunekutsengiselana lokukhona kuletive letimbili. Ngetulu kwaloko, eJerusalema kwatfolakala tinsalela tetinhlanti taseMedithera. Bavubukuli bakholelwa kutsi letinhlanti taletfwa batsengisi basuka nato elugwini lolukhashane. Ngemuva kwekuhlatiya lobufakazi, lesinye sati saphetsa ngekutsi sitsi: “Emavi lakuNeh[emiya] 13:16 latsi bantfu baseThire bebatsengisa tinhlanti eJerusalema abonakala aliciniso.”
Emaciniso Esayensi
LiBhayibheli liyincwadzi yenkholo neyemlandvo. Kodvwa nalikhuluma ngetindzaba tesayensi, loko lelikushoko kuyavumelana nesayensi. Naka nasi sibonelo.
Eminyakeni lecishe ibe ngu-3 500 leyendlulile, liBhayibheli laveta kutsi ‘umhlaba ulenga eteni.’ (Jobe 26:7) Loku kwehluke kakhulu kuloko tinganekwane letikuchazako ngemhlaba, ngobe titsi undanda emantini nobe wetfwele lifudu lelikhulu. Eminyakeni lecishe ibe ngu-1 100 ngemuva kwekubhalwa kwencwadzi yaJobe, bantfu bebasolo bakholelwa kutsi umhlaba angeke ulenge eteni, kukhona lokuwusimisile. Kungemuva kweminyaka lengu-300, nga-1687, lapho Isaac Newton akhulula incwadzi yakhe lekhuluma ngemandla ladvonsela phansi futsi lapho achaza khona emandla langabonakali lenta umhlaba ukhone kuhamba emjikeletweni wawo. Lokwatiswa kwesayensi kwafakazela kutsi loko lokwashiwo liBhayibheli eminyakeni lengu-3 000 leyengcile kuliciniso!
Emaciniso Lasiphrofetho
Tiliciniso kangakanani tiphrofetho teliBhayibheli letinyenti? Asewucabange ngesiphrofetho sa-Isaya lesimayelana nekubhujiswa kweBhabhulona.
Siphrofetho: Ngelikhulu lesi-8 B.C.E., Isaya umbhali weliBhayibheli wamemetela kutsi iBhabhulona lebeyitawuba lidolobha lelikhulu lembuso lonemandla, beyitawuncotjwa futsi kungasahlali muntfu kuyo. (Isaya 13:17-20) Isaya waze washo neligama lemuntfu lotawenta loku, Khuresi. Waphindze wachaza nelisu Khuresi labetalisebentisa kuze ‘omise’ imifudlana. Wabiketela nekutsi emagede elidolobha atawushiywa avuliwe.—Isaya 44:27–45:1.
Kufezeka Kwalesiphrofetho: Eminyakeni lecishe ibe ngu-200 ngemuva kwesiphrofetho sa-Isaya, inkhosi yasePheresiya yahlasela iBhabhulona. Ligama lalenkhosi bekunguKhuresi. Ngenca yekutsi bekumatima kungena eBhabhulona, Khuresi wasebentisa uMfula iYufrathe, lebewugeleta kulelidolobha kuze angene. Emasotja akhe agubha umsele lebewutawuphambukisa emanti alomfula. Loku kwabohlisa lamanti alomfula kuze kube lula ngelibutfo laKhuresi kutsi liwele. Lokumangalisako kutsi bantfu baseBhabhulona bebashiye emagede labuke ngakulomfula avuliwe! Libutfo laKhuresi langena ngalamagede labevuliwe eBhabhulona futsi ayincoba.
Nanobe kunjalo, kukhona lokwasala: Kute yini vele lowaphindze wahlala eBhabhulona? Kwaphela iminyaka leminyenti bantfu solo bahlala khona. Kodvwa lamuhla, tindzala taseBhabhulona letisedvute neBaghdad, e-Iraq, tifakazela kutsi lesiphrofetho seliBhayibheli sagcwaliseka. LiBhayibheli singaletsemba ngisho nome likhuluma ngetintfo letitawukwenteka esikhatsini lesitako.
Lokunye Longatsandza Kukuhlola
TIMPHENDVULO TEMIBUTO LEMAYELANA NELIBHAYIBHELI
Isayensi Iyavumelana Yini NeliBhayibheli?
LiBhayibheli linawo yini emaphutsa nalikhuluma ngesayensi?
SICONGOSEKULINDZA
LiBhayibheli Lisiniketa Teluleko Lesingatisebentisa
Tfola kutsi kucabanga ngemavesi eliBhayibheli kungakusita njani kutsi utibekele imigomo longakhona kuyifinyelela kuze ukhone kulwisana nesifo sekucindzeteleka.
TIMFUNDZISO TELIBHAYIBHELI LETIBALULEKILE
Yini Lengasenta Sikholwe Kutsi LiBhayibheli Liliciniso?
Nangabe liBhayibheli labhalwa nguNkulunkulu, loko kusho kutsi kufanele lingafani naletinye tincwadzi.
MAYELANA NATSI
Cela Kuvakashelwa
Coca ngembuto lomayelana neliBhayibheli nobe ufundze lokunyenti ngaBoFakazi BaJehova.
