Rose utsi: “Nginekugula lengatalwa nako lokungibangela buhlungu lobukhulu nalobungapheli. Imphilo yami seyihhohlokile.” Lenye intfo lebeyimkhatsata kakhulu kutsi ngaletinye tikhatsi abengakwati kunaka kakhulu nakafundza liBhayibheli nobe letinye tintfo letiphatselene nekukhonta kwakhe Nkulunkulu. Kodvwa wasitwa kakhulu ngemavi aJesu laku-Matewu 19:26 latsi: “KuNkulunkulu tonkhe tintfo tingenteka.” Rose wafundza kutsi betikhona naletinye tindlela tekutadisha. Ngesizatfu sekutsi buhlungu bebenta kutsi ngaletinye tikhatsi kube matima kutsi afundze, wabese ulalela liBhayibheli lelitsetjuliwe kanye naletinye tintfo letitsetjuliwe. * Rose utsi, “Buhlobo bami naNkulunkulu bebungeke bucine kube angisebentisanga leto tindlela.”

Nakwenteka Rose eva buhlungu ngekutsi akasakhoni kwenta tintfo lebekavamise kutenta, udvudvutwa ngemavi laku-2 Khorinte 8:12, latsi: “Nangabe kutimisela kungiko lokukhona kucala, kutawemukelwa kakhulu ngekwaloko umuntfu lanako, hhayi ngekwaloko lete kona.” Lamavi akhumbuta Rose kutsi Nkulunkulu uyakujabulela loko lakwentako, ngobe ukwenta ngawo onkhe emandla akhe.

Delphine, lesikhulume ngaye ekucaleni, utsi: “Ngemuva kwekufelwa yindvodzakati yami lebeyineminyaka lengu-18 budzala, buhlungu lengabuva bebubukhulu kakhulu kangangekutsi bengicabanga kutsi ngitawufa. Tintfo betingeke tisafanana nasekucaleni.” Nanobe kunjalo, watfola indvundvuto lenkhulu emavini emhlabeleli laku-Tihlabelelo 94:19, lawasho kuNkulunkulu, latsi: “Ngesikhatsi inhlitiyo yami iphitsiteliswa ngimicabango, kudvudvuta kwakho kuyawutfokotisa umphefumulo wami.” Delphine utsi, “Ngathantaza kuJehova kutsi angisite ngitfole letinye tindlela letingangisita ngehlise lobuhlungu lebengibuva.”

Waba matasatasa ngekutsi ente umsebenti wekutitsandzela. Ngalesinye sikhatsi bekatifananisa ne-crayoni yemntfwana leyephukile​—ngisho nobe yephukile uyachubeka ayisebentisa. Ngendlela lefanako, ngisho nobe bekacindzetelekile, kodvwa wafundza kutsi bekangabasita labanye. Delphine utsi: “Ngekushesha ngatfola kutsi kusebentisa timiso letiseBhayibhelini kanye netibonelo letiseBhayibhelini tebantfu lababhekana nelusizi kute ngidvudvute labo lengifundza nabo liBhayibheli, bekuyindlela yaJehova yekwenta lesimo kutsi sibe ncono futsi ngidvudvuteke.” Wenta luhla lwebantfu lokukhulunywa ngabo eBhayibhelini labake baba selusizini lwekufelwa. Utsi, “Kute lokunye bebakwenta ngaphandle kwekuthantaza.” Waphindze watfola nekutsi, “ngeke sikhone kumelana nelusizi nangabe singalifundzi liBhayibheli.”

Kutadisha liBhayibheli kwasita Delphine kutsi anake likusasa, hhayi lokwendlulile. Waphindze wadvudvutwa nalitsemba lelisencwadzini ye-Imisebenti 24:15, lelitsi: “Kutawuba neluvuko lwalabalungile nalabangakalungi.” Yini leyamenta waciniseka kutsi Jehova bekatayivusa indvodzakati yakhe? Asivumele Delphine aphendvule nakatsi: “Sengivele ngiyayibona indvodzakati yami eveni lelisha. Selihleliwe ‘nelilanga’ lekuvuswa kwendvodzakati yami, Jehova sewuvele ulibekile lelolanga lekumvusa. Ngitibona sesindzawonye nendvodzakati yami engadzeni yetfu futsi ngimtsandza ngendlela lengamtsandza ngayo nakatalwa.”