1. Kunini lapho kungaba matima khona kukhonta Jehova?

UCABANGA kutsi kunini lapho kungaba matima khona kukhonta Jehova, kulapho unetinkinga letinyenti khona nobe kulapho ute tinkinga? Kuba melula kwetsembela kuJehova nasinetinkinga. Kodvwa senta njani nangabe site tinkinga? Kuyenteka yini ngaletinye tikhatsi sikhohlwe kutsi kufanele sikhonte Nkulunkulu? Jehova wacwayisa ema-Israyeli kutsi loko bekungenteka.—Dut. 6:10-12.

2. INkhosi Asa yasibekela siphi sibonelo?

² INkhosi Asa isibonelo lesihle kakhulu semuntfu lowetsembela ngalokuphelele kuJehova. Akazange akhonte Jehova ngetikhatsi letimatima kuphela kodvwa wamkhonta nangetikhatsi tekuthula. Kusukela ekucaleni, “inhlitiyo yakhe yayitinikele ngalokuphelele [kuJehova].” (1 Khos. 15:14) Lenye indlela Asa lakhombisa ngayo kutsi ukhonta Jehova ngenhlitiyo yakhe yonkhe, kwaba ngesikhatsi acedza kukhonta kwemanga kaJuda. LiBhayibheli litsi “wesusa onkhe emalati etive kanye netindzawo letiphakeme, wabhidlita nematje lababetsi angcwele, wagawula netinsika ta-Ashera.” (2 Khr. 14:3, 5) Wehlisa ngisho nagogo wakhe Makha esikhundleni sakhe sekuba yindlovukazi. Kungani? Kungenca yekutsi bekakhutsata bantfu kutsi bakhonte sithico.—1 Khos. 15:11-13.

3. Yini lesitawucoca ngayo kulesihloko?

³ Asa akazange agcine ngekususa letitfombe. Wasita bantfu bakaJuda kutsi baphindze bakhonte Jehova. Jehova  wabusisa Asa nebantfu bakaJuda ngesikhatsi sekuthula. * Ngesikhatsi kubusa Asa, kwaphela iminyaka lelishumi “live lisenekuthula.” (2 Khr. 14:1, 4, 6) Kulesihloko, sitawucoca ngekutsi Asa wasisebentisa njani lesikhatsi sekuthula. Sitawuphindze sicoce ngesibonelo semaKhristu ekucala, lalingisa Asa futsi lasisebentisa kahle sikhatsi sekuthula. Nangabe uhlala eveni lapho hulumende abavumela BoFakazi BaJehova kutsi bakhonte ngekukhululeka, utasisebentisa njani kahle leso sikhatsi sekuthula?

4. Ngekusho kwa-2 Tikhronike 14:2, 6, 7, Asa wasisebentisa njani sikhatsi sekuthula?

⁴ Fundza 2 Tikhronike 14:2, 6, 7. Asa watjela bantfu kutsi nguJehova ‘lobaphe kuthula yonkhe indzawo.’ Asa akazange acabange kutsi lesikhatsi sekuthula bekusikhatsi sekutsi aphumule. Kunaloko, wakha emadolobha, tibondza, imibhoshongo nemasango. Watsi kubantfu bakaJuda: “Lelive kusengeletfu.” Bekasho kutsini? Bekasho kutsi bebakhululekile kuya nobe ngukuphi labafuna khona futsi bakhe nobe ngukuphi ngobe kute titsa lebetitabavimba. Wakhutsata bantfu kutsi basisebentise kahle lesikhatsi sekuthula.

5. Kungani Asa acinisa libutfo lakhe?

⁵ Asa waphindze wasebentisa lesikhatsi sekuthula kuze acinise libutfo lakhe. (2 Khr. 14:8) Loku kusho kutsi bekangametsembi yini Jehova? Cha. Kunaloko, Asa bekati kutsi ngumsebenti wakhe njengenkhosi kusita bantfu kuze bakwati kubhekana netinkinga esikhatsini lesitako. Asa bekati kutsi lelive belingeke lihlale linekuthula futsi loku kwaba liciniso.

6. EmaKhristu ekucala asisebentisa njani sikhatsi sekuthula?

⁶ Ngisho nobe emaKhristu ekucala bekaphatfwa kabi, bekanato tikhatsi tekuthula. LamaKhristu asisebentisa njani leso sikhatsi? Lamadvodza nebafati labetsembekile bachubeka bashumayela tindzaba letimnandzi. Incwadzi yeMisebenti itsi ‘bahamba ngekwesaba Jehova.’ Bachubeka bashumayela tindzaba letimnandzi futsi umphumela waloko waba kutsi ‘bachubeka bandza.’ Kusebaleni kutsi Jehova wababusisa ngekushumayela ngemdlandla ngetikhatsi tekuthula.—Imis. 9:26-31.

7-8. Chaza kutsi yini Pawula nalabanye labayenta nabatfola litfuba?

⁷ EmaKhristu ekucala asebentisa onkhe ematfuba kuze ashumayele tindzaba letimnandzi. Nasi sibonelo, ngesikhatsi Pawula abona kutsi bekangashumayela bantfu labanyenti e-Efesu wahlala kulelo dolobha futsi washumayela khona.—1 Khor. 16:8, 9.

⁸ Pawula kanye nalamanye emaKhristu bavulekelwa ngulelinye litfuba nga-49 C.E., ngesikhatsi baphostoli kanye nemadvodza lamadzala eJerusalema bakhipha sincumo ngendzaba yekusoka. (Imis. 15:23-29) Ngemuva kwekutsi libandla selitjelwe lesincumo, lamaKhristu asebenta kamatima ashumayela “tindzaba letimnandzi letimayelana nelivi laJehova.” (Imis. 15:30-35) Waba yini umphumela? LiBhayibheli litsi “kukholwa kwemabandla kwakuchubeka kuciniswa, futsi bekandza malanga onkhe.”—Imis. 16:4, 5.

9. Sinjani simo emaveni lamanyenti lamuhla, futsi yini lokufanele sitibute yona?

⁹ Emaveni lamanyenti lamuhla sishumayela ngekukhululeka. Uhlala kulelinye yini lalawo mave? Nangabe kunjalo, tibute: ‘Ngiyisebentisa njani lenkhululeko?’ Leti tikhatsi letijabulisako kubantfu baJehova ngobe bamatasa benta umsebenti wekushumayela nekufundzisa ngelizinga lelikhulu. (Mak. 13:10) Kunyenti lesingakwenta kulomsebenti.

10. UmBhalo wa-2 Thimothi 4:2, usikhutsata kutsi senteni?

¹⁰ Ungasisebentisa njani kahle sikhatsi sekuthula? (Fundza 2 Thimothi 4:2.) Buka timo takho nobe telilunga lemndeni wakho ubone kutsi tiyakuvumela yini kutsi wente lokwengetiwe emsebentini wekushumayela, mhlawumbe uze ube lihlahlandlela. Nyalo akusiso sikhatsi sekufuna kunjinga ngobe loko lesinako ngeke sendlule nako ngesikhatsi sekuhlupheka lokukhulu.—Taga 11:4; Mat. 6:31-33; 1 Joh. 2:15-17.

11. Yini labanye labayentile kuze basite bantfu labanyenti kutsi beve tindzaba letimnandzi?

¹¹ Bamemeteli labanyenti bafundze lulwimi lolusha kuze basite labanye kutsi bafundze ngaJehova. Inhlangano yaJehova inemathulusi lamanyenti lasisita kutsi sishumayele ngetilwimi letinyenti. Sibonelo saloko kutsi nga-2010, tincwadzi tetfu betitfolakala ngetilwimi leticishe tibe ngu-500. Lamuhla, letincwadzi titfolakala ngetilwimi letingetulu kwa-1 000!

12. Niketa sibonelo sekutsi bantfu bazuza njani ngekuva umlayeto weMbuso ngelulwimi lwabo.

¹² Bantfu bativa njani nabafundza ngaJehova ngelulwimi lwabo? Cabanga ngesibonelo salomunye dzadze lowazuza  emhlanganweni wesifundza lobewuseMemphis, e-Tennessee, eMelika. Lomhlangano bewungesi-Kinyarwanda, lulwimi lolukhulunywa e-Rwanda, e-Congo (Kinshasa), nase-Uganda. Ngemuva kwalomhlangano, lodzadze lokhuluma si-Kinyarwanda watsi: “Bekukwekucala ngca kutsi ngizuze emhlanganweni solo ngefika lapha eMelika eminyakeni lengu-17 leyendlulile.” Kuyacaca kutsi lodzadze watsintseka kakhulu nakeva imihlangano ngelulwimi lwakhe. Nangabe timo takho tikuvumela, ungalufundza yini lolunye lulwimi kuze usite labanye ensimini yakini? Loko ngeke kujabulise kakhulu yini nangabe ensimini yelibandla lakini kunebantfu labalukhuluma kahle lolunye lulwimi? Utawujabula kakhulu nawungetama.

13. Bazalwane base-Russia basisebentisa njani sikhatsi sekuthula?

¹³ Akusibo bonkhe bazalwane betfu labashumayela ngekukhululeka. Kulamanye emave, bazalwane betfu abakhoni kushumayela ngekukhululeka ngobe bohulumende bawuvalile umsebenti wekushumayela. Cabanga ngaloko lokwenteka kubazalwane base-Russia. Kwaphela iminyaka leminyenti baphatfwa kabi, kodvwa nga-March 1991, hulumende wabanika inkhululeko yekukhonta. Ngaleso sikhatsi bekunebamemeteli labacishe babe ngu-16 000 eRussia. Kodvwa ngemuva kweminyaka lengu-20, bamemeteli besebangetulu kwa-160 000! Kuyacaca kutsi bazalwane betfu balisebentisa kahle litfuba lekushumayela ngekukhululeka. Leso sikhatsi sekuthula saba sesikhashana. Nanobe tintfo setishintjile eveni labo kodvwa solo banemdlandla ekukhonteni Jehova. Benta konkhe lokusemandleni abo kuze bachubeke bamkhonta.

14-15. Jehova wawasebentisa njani emandla akhe kuze asite Asa?

¹⁴ Ngesikhatsi sa-Asa, sikhatsi sekuthula sagcine siphelile. Kwachamuka libutfo lelikhulu lemasotja lelingetulu kwesigidzi livela eveni laseTopiya. Umholi walelibutfo, lokunguZera bekaciniseka kutsi utalincoba live lakaJuda. Kodvwa iNkhosi Asa beyetsembele kuJehova. Asa wathantaza watsi: “Sisite, Simakadze Nkulunkulu wetfu, ngobe setsembele kuwe, futsi site kutekulwa nalemphi lenkhulu kangaka, ngobe setsembele ebitweni lakho.”—2 Khr. 14:11.

¹⁵ Nanobe linani lemasotja aseTopiya beliliphindza kabili linani lemasotja a-Asa, kodvwa Asa bekati kutsi Jehova unemandla futsi bekatabasita. Jehova wabasita bantfu bakhe, libutfo laseTopiya lancotjwa.—2 Khr. 14:8-13.

16. Sati njani kutsi sikhatsi sekuthula sitawuphela?

¹⁶ Nanobe singati kutsi kutawentekani kitsi esikhatsini lesitako, kodvwa siyati kutsi kuthula lesinako nyalo njengebantfu baNkulunkulu kutawuphela. Ecinisweni, Jesu washo kutsi emalangeni ekugcina bafundzi bakhe ‘bebatawutondvwa tive tonkhe.’ (Mat. 24:9) Nemphostoli Pawula watsi “bonkhe labafuna kuphila ngekutinikela kuNkulunkulu ebunyeni naKhristu Jesu, nabo batawuphatfwa kabi.” (2 Thim. 3:12) Sathane ‘utfukutsele kakhulu’ futsi sitawube siyatiyenga nasitsi sitawukhona kubalekela lolulaka lwakhe.—Semb. 12:12.

17. Kukholwa kwetfu kungavivinywa ngatiphi tindlela?

¹⁷ Ngekushesha nje kukholwa kwetfu sonkhe kutawuvivinywa. Kutawuba “nekuhlupheka lokukhulu lokungazange sekwenteke kusukela kwaba khona umhlaba.” (Mat. 24:21) Ngaleso sikhatsi, emalunga emindeni yetfu kungenteka asiphikise futsi nemsebenti wetfu uvinjelwe. (Mat. 10:35, 36) Sitawulingisa Asa yini ngekutsi natsi setsembele kuJehova kutsi asisite futsi asivikele?

18. Ngekusho kwaHebheru 10:38, 39, yini lengasisita kuze silungiselele sikhatsi sekuphela kwekuthula?

¹⁸ Jehova bekasolo asicecesha kuze kukholwa  kwetfu kuhlale kucinile. Usebentisa ‘sisebenti lesetsembekile nalesihlakaniphile’ kuze sisinike “kudla ngesikhatsi lesifanele” khona sitoba nako konkhe lesikudzingako kuze sihlale sicinile. (Mat. 24:45) Kodvwa sonkhe kufanele sente konkhe lokusemandleni etfu kuze sihlale sinekukholwa lokucinile kuJehova.—Fundza Hebheru 10:38, 39.

19-20. Ngekusho kwa-1 Tikhronike 28:9, ngumiphi imibuto lokufanele sitibute yona, futsi kungani?

¹⁹ NjengeNkhosi Asa, kufanele ‘sifunisise Jehova.’ (2 Khr. 14:4; 15:1, 2) Sisuke sicala kufuna Jehova nangabe sifundza ngaye futsi sibhajatiswa. Senta konkhe lokusemandleni etfu kuze sicinise indlela lesimtsandza ngayo Jehova. Mhlawumbe singatibuta nayi imibuto: ‘Ngiba khona njalo yini emihlanganweni yelibandla?’ Nasisemihlanganweni sitfola emandla ekuchubeka sikhonta Jehova futsi bazalwane nabodzadze bayasikhutsata. (Mat. 11:28) Singaphindze sitibute: ‘Ngilitadisha njalo yini liBhayibheli?’ Nangabe unemndeni, uba nako maviki onkhe yini kukhonta kwemndeni? Nangabe uhlala wedvwa, uba naso yini sikhatsi sekufundza ngaJehova? Wenta konkhe yini lokusemandleni akho kuze ushumayele futsi ufundzise labanye?

²⁰ Kungani kufanele sitibute lemibuto? LiBhayibheli lisitjela kutsi Jehova uhlolisisa imicabango yetfu naloko lokusetinhlitiyweni tetfu, ngako natsi kufanele sente lokufanako. (Fundza 1 Tikhronike 28:9.) Nangabe sibona kutsi kufanele sente lushintjo emigomeni yetfu nasendleleni lesicabanga ngayo, kufanele sicele Jehova asisite kutsi sente lolo shintjo. Nyalo sikhatsi sekutsi sitilungiselele kuvivinywa lokuseta. Asingavumeli lutfo lusiphazamise kutsi sisisebentise kahle sikhatsi sekuthula!