Lelivesi litsi: “Nawubona lophuyile acindzetelwe endzaweni letsite, asemukwe emalungelo akhe nekwehlulelwa ngebucotfo, kungakumangalisi loko. Lowo nalowo lophetse unemuntfu longetulu kwakhe, kantsi nalowo longetulu kwakhe unemuntfu longetulu kwabo bonkhe.”—Shu. 5:8.

Nangabe singakalinaki lelivesi, lingevakala ngatsi likhuluma ngebantfu labasemagunyeni kuhulumende. Kodvwa nasicabangisisa ngalo liveta liciniso ngaJehova, lelisidvudvutako nalelisicinisekisako.

Umshumayeli 5:8 ukhuluma ngembusi locindzetela labaphuyile futsi longabaphatsi ngekulunga. Lombusi kufanele ngabe uyakhumbula kutsi kunemuntfu losesigabeni lesisetulu lombukile nobe lonesikhundla lesiphakeme kunesakhe. Ecinisweni, kungenteka kunalabanye labasetikhundleni letisetulu kakhulu kunesakhe. Lokubuhlungu kutsi kubohulumende bebantfu, cishe bonkhe babusi bakhohlakele futsi bantfu bayahlupheka ngenca yekutsi ababuswa ngekulunga.

Ngisho nobe tintfo tingabonakala shengatsi ngeke tilunge, singadvudvuteka ngekwati kutsi Jehova ‘ubabuke bonkhe labaphetse’ kubohulumende bebantfu. Singacela Nkulunkulu kutsi asisite futsi singalahlela yonkhe imitfwalo yetfu kuye. (Hla. 55:22; Fil. 4:6, 7) Siyati kutsi “emehlo aSimakadze abuka emhlabeni wonkhe kucinisa labo labatinhlitiyo tabo titinikele kuye ngalokuphelele.”—2 Khr. 16:9.

Ngako Umshumayeli 5:8 usikhumbuta ngesimo salelive lesiphila kulo; kutsi kuhlale kunemuntfu losesigabeni lesisetulu kunalomunye. Ngetulu kwaloko, lelivesi lisikhumbuta kutsi Jehova uneligunya leliphakeme kakhulu kunawo onkhe. Nyalo umelelwe yiNdvodzana yakhe Jesu Khristu, iNkhosi yeMbuso. Somandla, lobuke tonkhe tintfo wenta tintfo ngekulunga, futsi neNdvodzana yakhe ilingisa yena.