1, 2. (a) Nguyiphi insayeya batali lababhekana nayo, futsi bangaphumelela njani? (b) Ngumaphi emaphuzu lamane lesitawucoca ngawo kulesihloko?

LENYE indvodza nemfati wayo eFrance batsi: “Siyakholwa kuJehova kodvwa loko akusho kutsi nebantfwabetfu batawukholwa.” Baphawula batsi: “Kukholwa akusiyo intfo lotalwa nayo. Bantfwabetfu kufanele bakwakhe kancane kancane.” Umzalwane wase-Australia wabhala watsi: “Kusita umntfwanakho kutsi atakhele kukholwa enhlitiyweni yakhe kuyinsayeya lenkhulu kunato tonkhe longase uhlangabetane nato. Kufanele usebentise tonkhe tindlela letikhona. Ungase ucabange kutsi uwuphendvule kahle umbuto wemntfwana wakho, kodvwa ngekuhamba kwesikhatsi aphindze akubute wona lowo mbuto. Timphendvulo letenetisa umntfwanakho lamuhla kungenteka tingamenetisi kusasa. Kungase kudzingeke niphindze nikhulume ngetintfo lenake nakhuluma ngato.”

² Nawungumtali, kuke kwenteke yini uve shengatsi angeke ukhone kufundzisa bantfwabakho nekubasita kutsi babe nekukholwa ngisho sebabadzala? Empeleni kute umuntfu longaphumelela ngekuhlakanipha kwakhe. (Jer. 10:23) Kodvwa singaphumelela nasifuna sicondziso saNkulunkulu. Asesicoce ngetintfo letine longatisebentisa ekusiteni bantfwabakho kutsi batakhele kukholwa: (1) Kubati kahle. (2) Bafundzise ngalokusuka enhlitiyweni yakho. (3) Kusebentisa imifanekiso lekahle. (4) Kubabeketelela futsi uthantaze njalo.

3. Batali bangamlingisa njani Jesu nabafundzisa?

³ Jesu abengesabi kubuta balandzeli bakhe kutsi yini labayikholelwako. (Mat. 16:13-15) Nawe mlingise. Kukahle kakhulu kucela bantfwabakho kutsi bakutfululele sifuba sabo naniticocela nikhululekile. Loku kungase kufake ekhatsi kukhuluma ngetintfo labangaciniseki ngato nobe labatingabatako. Lomunye umzalwane wase-Australia loneminyaka lengu-15 budzala wabhala watsi: “Babe uvame kukhuluma nami ngalengikukholelwako futsi uyangisita kutsi ngicabangisise ngako. Uye angibute atsi: ‘Litsini liBhayibheli?’ ‘Uyakukholelwa yini lelikushoko?’ ‘Kungani ukukholelwa?’ Usuke afuna ngiphendvule ngemavi ami, ngingamane nje ngiphindzaphindze loko lokushiwo nguye nome ngumake. Nangikhula, kwakudzingeka nekutsi ngikuchaze kuvakale loko lengikushoko.”

4. Kubaluleke ngani kutsi ungayitsatseli phansi imibuto yemntfwanakho? Niketa sibonelo.

⁴ Nakwenteka bantfwana bakho batsatsa sikhatsi kuciniseka ngentfo letsite lefundziswa liBhayibheli, babeketelele. Basite batitfolele bona timphendvulo temibuto labanayo. Lomunye babe watsi: “Ungayitsatseli phansi imibuto yemntfwanakho. Ungasheshi uyibekele eceleni ucabange kutsi ayisimcoka futsi ungayibalekeli ngobe nje utiva ungakhululeki kucoca ngayo.” Ecinisweni, kuyasita kutsi utsatse imibuto yemntfwanakho njengebufakazi bekutsi uyanaka nekutsi uyafuna kuticondza tintfo. Jesu wabuta imibuto lejulile ngisho nangesikhatsi aneminyaka lengu-12 budzala. (Fundza Lukha 2:46.) Lomunye waseDenmark loneminyaka lengu-15 utsi: “Ngesikhatsi ngitsi kubatali bami ngiyatibuta kutsi sisenkholweni yeliciniso yini, bangiphendvula kahle ngisho nome kungenteka kutsi bebakhatsatekile ngami. Baphendvula yonkhe imibuto yami basebentisa liBhayibheli.”

5. Batali bangakhombisa njani kutsi abakutsatsi kancane kukholwa kwebantfwababo?

⁵ Bati kahle bantfwana bakho​—kwati labakucabangako, indlela labativa ngayo netintfo letibakhatsatako. Ungacali ucabange kutsi banekukholwa lokucinile ngobe nje baba khona emihlanganweni yebuKhristu futsi baya nawe emsebentini wekushumayela. Cocani nangetintfo letiphatselene neliBhayibheli nanenta imisebenti yenu yamalanga onkhe. Thantaza nebantfwabakho uphindze ubathantazele uwedvwa. Yetama kwati tintfo letivivinya kukholwa kwabo uphindze ubasite bakhone kubhekana nato.

6. Nangabe batali bakhutsele ekufundzeni liBhayibheli, loko kutabasita njani kutsi bafundzise bantfwababo?

⁶ Njengobe Jesu bekangumfundzisi, bekafinyelela tinhlitiyo ngobe bekatsandza Jehova, liVi laNkulunkulu kanye nebantfu. (Luk. 24:32; Joh. 7:46) Lutsandvo lolufana nalolu lungasita batali bafinyelele tinhlitiyo tebantfwababo. (Fundza Dutheronomi 6:5-8; Lukha 6:45.) Ngako batali, kukhutsaleleni kufundza liBhayibheli kanye netincwadzi letisekelwe kulo. Tinikeni sikhatsi sekunaka indalo kanye netihloko letisetincwadzini tebuKhristu letimayelana nendalo. (Mat. 6:26, 28) Nanenta njalo, lwati lwenu lutawukhula, lutsandvo leninalo ngaJehova lujule futsi nikulungele kancono kufundzisa bantfwana benu.​—Luk. 6:40.

7, 8. Utawuba yini umphumela nangabe timfundziso teliBhayibheli tingene tajula enhlitiyweni yemtali? Shano sibonelo.

⁷ Nangabe timfundziso teliBhayibheli tingene tajula enhlitiyweni yakho, utaticocela umndeni wakho. Ungagcini nje ngekucoca ngato nanilungiselela imihlangano yebuKhristu nome naninekukhonta kwemndeni, kodvwa ungabacocela nome nini. Letingcoco kufanele titentakalele, tibe yincenye yetincociswano tamalanga onkhe. Lenye indvodza nemkayo eMelika bazindla ngaJehova nababuka indalo nome nabadla kudla lokutsite nebantfwababo. Batsi: “Sikhumbuta bantfwabetfu  ngelutsandvo Jehova lanalo kanye nekucabangisisa lakukhombisa nakenta tonkhe tintfo lasinikete tona.” Lenye indvodza nemkayo eNingizimu Afrika baye bakhulume nemadvodzakati abo lamabili nabasebenta nawo engadzeni. Basuke bakhuluma ngetintfo letimangalisako letifaka ekhatsi indlela inhlanyelo lemila ngayo igcine seyisitjalo. Batsi: “Siyetama kwenta emadvodzakati etfu akuhloniphe kakhulu kuphila, abone nekutsi kuyinkimbinkimbi futsi kuyamangalisa.”

⁸ Ngesikhatsi indvodzana yakhe ineminyaka lecishe ibe lishumi budzala, lomunye babe wase-Australia wavakasha nayo emsamo kuze ayisite icinise kukholwa kwayo futsi ibone bufakazi bekutsi Jehova unguMdali. Lobabe utsi: “Sabona imifanekiso yetilwane takadzeni taselwandle letinjengeminenkhe nabofecela (ema-ammonoid nema-trilobite). Kwasimangalisa kakhulu kubona kutsi letilwane letingasekho lamuhla betitinhle, tiyinkimbinkimbi futsi tingashodi ngalutfo njengobe nje sitibona lamuhla. Ngako nangabe tintfo taba khona ngekutigucukela kwemvelo kusukela entfweni lencane kuya kuleyinkimbinkimbi, kungani-ke letilwane takadzeni besetivele tiyinkimbinkimbi? Loko kwangifundzisa sifundvo lesangitsintsa kakhulu futsi ngasicocela indvodzana yami.”

9. Kungani imifanekiso ilusito ekufundziseni, futsi lomunye make wayisebentisa njani?

⁹ Jesu abevame kusebentisa imifanekiso leyenta bantfu bacabange, letsintsa inhlitiyo nalebasita kutsi bakukhumbule lakushito. (Mat. 13:34, 35) Kumelula ngebantfwana kutsi bayicondze intfo nawusebentisa imifanekiso. Ngako-ke batali, yetamani kusebentisa imifanekiso kanengana nanifundzisa. Lomunye make waseJapan wakwenta loko. Wafundzisa emadvodzana akhe lamabili ngemoya lesiwuphefumulako kanye nendlela Jehova lacophelela ngayo nakawudala. Lenye beyineminyaka lelishumi kantsi lenye ineminyaka lesiphohlongo. Kute awafundzise ngaloko, wawanika lubisi nashukela nelikhofi. Wase ucela ngamunye wawo kutsi amentele likhofi. Nakachaza utsi: “Balenta ngekucophelela lokukhulu. Nangibabuta kutsi bentiwe yini kutsi bacophelele kangaka, batsi bafuna kulenta ngendlela lengilitsandza ngayo. Ngabachazela kutsi naNkulunkulu watihlanganisa ngekucophelela tinhlobo letehlukahlukene temoya lesiwuphefumulako kute usilungele.” Lomfanekiso bewubalungela bantfwana labangangabo futsi kwabajabulisa kucoca ngawo. Akungabateki kutsi loko abakukhohlwanga.

10, 11. (a) Ngumuphi umfanekiso longawusebentisa kuze usite umntfwanakho akhe kukholwa kuNkulunkulu? (Buka sitfombe lesisekucaleni kwalesihloko.) (b) Ngumiphi imifanekiso loyikhandze iphumelela nawuyisebentisa kubantfwabakho?

¹⁰ Ungase usebentise neticondziso tekubhaka kute usite umntfwanakho atakhele kukholwa kuNkulunkulu. Ungakwenta kanjani loko? Ngemuva kwekubhaka likhekhe nome emabhanisi, mchazele bumcoka baleticondziso. Ungabese umnika sitselo lesitsite njengelihhabhula, bese uyambuta utsi: “Bewati yini kutsi lelihhabhula nalo lineticondziso tendlela lelakheke ngayo?” Ungabese uyalisika, futsi umnikete indumbu yalo. Ngemuva kwaloko, mchazele  kutsi kulendumbu kuneticondziso tendlela lelihhabhula lokufanele lakheke ngayo. Kodvwa tona tiyinkimbinkimbi naticatsaniswa naleti tekubhaka likhekhe. Ungambuta utsi: “Nangabe incwadzi yeticondziso tekubhaka likhekhe yabhalwa ngulotsite, ngubani-ke lowenta leticondziso letiyinkimbinkimbi tendlela lihhabhula lelakheke ngayo?” Nangabe lomntfwana sewukhulile, ungamchazela kutsi ticondziso tendlela lihhabhula lelakheka ngayo naso sonkhe sihlahla salo tiku-DNA. Ningase nibuke kanye kanye letinye tibonelo letisemakhasini 10 kuya ku-20 encwajana letsi “The Origin of Life​—Five Questions Worth Asking,” letfolakala ngesiNgisi.

¹¹ Batali labanyenti kuyabajabulisa kucoca nebantfwababo ngeluchungechunge lwetihloko letitsi “Ingabe Kwaklanywa?” letitfolakala ku-“Phaphama!” Labanye basebentisa letihloko kuze bafundzise bantfwababo labasebancane ngendlela lelula. Sibonelo saloku kutsi lenye indvodza nemfati wayo baseDenmark bafundzisa bantfwababo ngekucatsanisa tindiza netinyoni. Batsi: “Tindiza tifanana netinyoni. Kodvwa tindiza tingatilingisa yini tinyoni ngekutsi titalele futsi tichobosele letinye tindiza? Tinyoni tiyayidzinga yini imigwaco lekhetsekile njengaleyo lesetjentiswa tindiza natihlala phansi? Uyini umehluko wemsindvo wekudvuma kwetindiza newekuhlabela kwetinyoni? Ngubani-ke lohlakaniphe kakhulu emkhatsini wemakhi wetindiza neMdali wetinyoni?” Imifanekiso lenjalo lehambisana nemibuto lecatjangwe kahle ingasita umntfwana kutsi atfutfukise “likhono lekucabanga” futsi atakhele kukholwa kuNkulunkulu.​—Taga 2:10-12, NW.

12. Imifanekiso ingabasita njani bantfwana kutsi baletsembe liBhayibheli?

¹² Imifanekiso lekahle ingasita bantfwabakho baletsembe liBhayibheli. Asewucabange ngaJobe 24:7. (Fundza.) Ungamkhombisa njani umntfwanakho kutsi lombhalo waphefumulelwa nguNkulunkulu? Ungase uvele umtjele emaciniso njengobe anjalo. Kodvwa kungaba ncono kakhulu kumsita kutsi acabange. Mchazele kutsi Jobe waphila kadzeni kusete imishini yekubona khashane (telescopes) netindiza tekuya ngale kwesibhakabhaka (spaceships). Lomntfwana angakhombisa kutsi kungaba lukhuni kangakanani ngalomunye umuntfu kukholelwa kutsi intfo lenkhulu kakhulu njengemhlaba ingalenga eteni. Angase asebentise ibhola nome litje kute akhombise kutsi tonkhe tintfo tidzinga kuhlala entfweni letsite. Loko kungasita umntfwanakho abone kutsi esikhatsini lesidze lesengcile Jehova wasibhalela emaciniso labalulekile eBhayibhelini, ngisho nangaphambi kwekutsi bantfu batfole bufakazi bawo.​—Neh. 9:6.

13, 14. Batali bangagcizelela njani kubantfwababo kutsi timiso teliBhayibheli timcoka?

¹³ Kubaluleke kakhulu kugcizelela kubantfwabakho kutsi timiso teliBhayibheli timcoka. (Fundza Tihlabelelo 1:1-3.) Tinyenti tindlela longatisebentisa kuze wente loko. Nasi sibonelo: Ungase ucele umntfwanakho aticabange atfutsela esihlengeni lesikhashane futsi kudzingeke akhetse bantfu latawuhlala nabo lapho. Ungabese uyambuta: “Ungatsandza kutsi umuntfu ngamunye kulelicembu abe njani kuze nibe nekuthula futsi niphatsane kahle?” Ungaphindze ucoce naye ngeticondziso letilusito letitfolakala kuGalathiya 5:19-23.

¹⁴ Kwenta loku kungamfundzisa tifundvo letimbili letibalulekile. Sekucala, timiso taNkulunkulu tikhutsata kuthula nekuvana. Sesibili, Jehova usilungiselela kuphila eveni lelisha ngekutsi asifundzise nyalo. (Isa. 54:13; Joh. 17:3) Ungasita umntfwanakho akucondze loko ngekutsi usebentise tibonelo letisetincwadzini tebuKhristu. Ungase ukhetse sibonelo lesikuloluchungechunge lolutsi “LiBhayibheli Liyakugucula Kuphila” lolutfolakala ku-Sicongosekulindza. Nome-ke nangabe ebandleni lakini kukhona umuntfu lowente lushintjo lolukhulu kute akhonte Jehova, ungamcela kutsi anivakashele kuze atonicocela lokwenteka kuye. Tibonelo letinjalo tingamenta  abone kutsi timiso teliBhayibheli tiyasebenta.​—Heb. 4:12.

15. Kufanele ube yini umgomo wakho loyinhloko nawufundzisa bantfwabakho?

¹⁵ Naku lesikufundzako: Nawufundzisa bantfwabakho, ungasebentisi indlela yinye. Cabanga ngetintfo letingaba lusito kubo longatisebentisa nasewubafundzisa. Basite bacabange, ukhumbule nebudzala babo. Nawubafundzisa, bente bajabule uphindze ucinise kukholwa kwabo. Lomunye babe watsi: “Ungayekeli kwetama tindlela letinsha tekufundzisa indzaba lenike nacoca ngayo.”

16. Nawufundzisa bantfwana, kubaluleke ngani kubeketela? Niketa sibonelo.

¹⁶ Umoya waNkulunkulu uyadzingeka kuze ube nekukholwa lokucinile. (Gal. 5:22, 23) Njengesitselo lesivamile, kukholwa kutsatsa sikhatsi kukhula. Kungako kudzingeka ubeketele uphindze uphikelele nawufundzisa bantfwabakho. Lomunye babe lonebantfwana lababili eJapan watsi: “Mine nemkami besicitsa sikhatsi lesinyenti sinebantfwabetfu. Kusukela basebancane, bengifundza nabo imizuzu lengu-15 onkhe malanga, ngaphandle nangabe kulilanga lekuya esifundvweni. Imizuzu lengu-15 beyingasigongonyi tsine kanye nabo.” Umbonisi lojikeletako wabhala watsi: “Ngesikhatsi ngiseminyakeni yekutfomba, tinyenti tintfo lebengitibuta ngato futsi ngitingabata kodvwa lengingazange ngitisho. Ngekuhamba kwesikhatsi, letinyenti tato betiphendvuleka emihlanganweni yebuKhristu, ekukhonteni kwemndeni nome esifundvweni lengitichubela sona. Kungako kubalulekile kutsi batali bangayekeli kufundzisa bantfwababo.”

17. Kungani sibonelo lesihle semtali sibalulekile, futsi lenye indvodza nemfati wayo bawabekela njani emadvodzakati abo sibonelo lesihle?

¹⁷ Sibonelo sakho sekukholwa sibaluleke kakhulu. Bantfwabakho batakunaka lokwentako, futsi nakanjani kutabasita bente tintfo letinhle. Ngako batali, chubekani nakha kukholwa kwenu. Bantfwabenu ababone kutsi nimtsandza mbamba Jehova. Lenye indvodza nemfati wayo eBermuda, nabakhatsatwa ngulokutsite bathantaza nebantfwababo bacele Jehova abanike sicondziso futsi bakhutsata labantfwana kutsi nabo bathantaze nababodvwa. Batsi: “Siphindze sitjele indvodzakati yetfu lendzala kutsi: ‘Ayitsembele kuJehova, ihlale imatasa ngemisebenti yeMbuso futsi ingakhatsateki kakhulu.’ Nayibona imiphumela, kuyayicacela kutsi sisitwa nguJehova. Loko kukucinisile kukholwa kwakhe kuNkulunkulu naseBhayibhelini.”

18. Nguyiphi intfo lebalulekile batali lokufanele bayati?

¹⁸ Bantfwana kudzingeka bagcine batakhele bona kukholwa kwabo. Batali bangakhona kuhlanyela nekunisela, kodvwa nguNkulunkulu kuphela longakhulisa. (1 Khor. 3:6) Ngako thantaza ucele umoya waNkulunkulu futsi usebente kamatima, ufundzise bantfwana bakho labaligugu, ngobe nawenta njalo Jehova utakubusisa.​—Ef. 6:4.