SIHLOKO LESIFUNDVWAKO 30
Ungatitsintsa Njani Tinhlitiyo Tebantfu Labangenandzaba Nenkholo?
“Ngibe ngiko konkhe kubantfu bato tonkhe tinhlobo, kuze kutsi nakungenteka ngisindzise labatsite.”—1 KHOR. 9:22.
INGOMA 82 “Kukhanya Kwenu Akubonakale”
LOKUTAWUCOCWA NGAKO KULESIHLOKO *
1. Nguluphi lushintjo lolube khona emaveni lamanyenti kulamashumi eminyaka leyengcile?
SEKUPHELE tinkhulungwane teminyaka bantfu labanyenti emhlabeni bangemalunga etinkholo letehlukahlukene. Kodvwa kulamashumi eminyaka kubonakala sekushintjile. Bantfu labanyenti abasiwo emalunga enkholo letsite. Kulamanye emave, bantfu labanyenti batsi abanendzaba nenkholo. *—Mat. 24:12.
2. Yini leyenta bantfu labanyenti bangabi nendzaba nenkholo?
2 Yini leyenta likhule linani lebantfu labangenandzaba nenkholo? * Kungenteka labanyenti batsandza kakhulu injabulo noma bakhatsatwa tinkinga tekuphila. (Luk. 8:14) Labanye abasakholelwa kutsi Nkulunkulu ukhona. Labanye bayakholelwa kuNkulunkulu, kodvwa bacabanga kutsi inkholo iphelelwe sikhatsi, ayikabaluleki, ayivumelani nesayensi kanye nendlela bantfu labacabanga ngayo. Labanye kungenteka beve bangani babo, bothishela, noma bantfu labadvumile bakhuluma ngekutsi kuphila kwaba khona ngenca yekutigucukela kwemvelo kodvwa abavami kuva ngetizatfu letinengcondvo tekukholelwa kuNkulunkulu. Labanye bayakhubeka ngenca yekutsi baholi benkholo bafuna imali lenyenti kanye netikhundla. Kulamanye emave, tiphatsimandla tibeke imitsetfo lelawula tintfo letiphatselene nenkholo.
3. Iyini injongo yalesihloko?
3 Jesu ufuna sente “bantfu bato tonkhe tive babe bafundzi.” (Mat. 28:19) Yini lesingayenta kute sisite bantfu labangenandzaba nenkholo bafundze kutsandza Nkulunkulu futsi babe bafundzi baJesu? Kufanele sati kutsi indlela umuntfu latasemukela ngayo nasishumayela itawuya ngekutsi ukhululele kuphi. Nasi sibonelo, indlela bantfu labakhulule e-Europe labasemukela ngayo kungenteka ingafani nendlela bantfu labavela e-Asia labangasemukela ngayo. Leni? Ngobe e-Europe bantfu labanyenti kukhona labakwatiko ngeliBhayibheli futsi bayati kutsi nguNkulunkulu lowadala tonkhe tintfo. Kodvwa e-Asia bantfu labanyenti kuncane labakwatiko nobe abati lutfo ngeliBhayibheli futsi kungenteka abakholelwa kuMdali. Lesihloko sitasisita sikhone kutsintsa tinhlitiyo tebantfu lesibatfola emsebentini wekushumayela nome ngabe bakhulele kuphi.
HLALE UNESIMO SENGCONDVO LESIHLE
4. Kungani kufanele sibe nesimo sengcondvo lesihle?
4 Bani nesimo sengcondvo lesihle. Njalo ngemnyaka, kunebantfu labebangenandzaba nenkholo kodvwa manje sebaBoFakazi BaJehova. Labanyenti bebavele banetimiso letiphakeme tekutiphatsa futsi beva buhlungu ngekutentisa lokukhona etinkholweni. Labanye bebangatiphatsi kahle futsi benta imikhuba lemibi lokwadzingeka bayiyekele. Ngekusitwa nguJehova siyaciniseka kutsi sitawubatfola bantfu ‘labatimisele kutfola kuphila lokuphakadze.’—Imis. 13:48; 1 Thim. 2:3, 4.
Vumelana netimo nawucoca nebantfu labangalikholelwa liBhayibheli (Buka tigaba 5 na-6) *
5. Yini levame kwenta bantfu bawulalele umlayeto wetfu?
5 Bani Nemusa Kanye Nelikhono. Bantfu bavamise kusilalela, hhayi ngenca yaloko lesikushoko, kodvwa ngenca yendlela lesikusho ngayo. Bayajabula nangabe sinemusa, sibacabangela, futsi sibatsandza mbamba. Asibaphoceleli kutsi balalele loko lesikushoko. Kunaloko, setama kucondza tizatfu temibono labanayo ngenkholo. Nasi sibonelo, labanye abatsandzi kucoca ngenkholo nemuntfu labangamati. Labanye batsi kukungahloniphi kubuta umuntfu kutsi ucabangani ngaNkulunkulu. Labanye bakutfola kulihlazo kutsi babonakale bafundza liBhayibheli, ikakhulukati naBoFakazi BaJehova. Kunome ngusiphi sizatfu, kufanele setame kucondza indlela umuntfu lativa ngayo.—2 Thim. 2:24.
6. Umphostoli Pawula wakhombisa njani kutsi bekavumelana netimo, futsi singalimlingisa njani?
6 Yini lesingayenta nangabe umuntfu abonakala angajabuli nangabe sisebentisa emagama lafanana nalatsi, “liBhayibheli,” “indalo,” “Nkulunkulu,” noma “inkholo”? Singalingisa umphostoli Pawula ngekutsi sishintje indlela lesicoca ngayo nabo. Nakacoca nemaJuda, Pawula bekasebentisa imiBhalo. Nobe kunjalo, ngesikhatsi acoca netati temafilosofi lebetingemaGriki e-Ariyophagusi, akazange acaphune imiBhalo ngalokucondzile. (Imis. 17:2, 3, 22-31) Singamlingisa njani Pawula? Nangabe sicoca nemuntfu longakholelwa eBhayibhelini, kungaba kuhle kutsi singalisebentisi ngalokucondzile nasicoca naye. Nangabe ubona kutsi umuntfu akakhululeki kubonakala afundza liBhayibheli nawe, ungetama kumkhombisa imiBhalo ngendlela letawenta bantfu banganaki, mhlawumbe usebentise tintfo tebuchwepheshe.
7. Ngekusho kwa1 Khorinte 9:20-23, yini lokungadzingeka siyente kute silingise Pawula?
7 Bani Nekucondza Futsi Ubalalele. Kufanele setame kucondza tizatfu letenta bantfu lesicoca nabo bacabange ngendlela labacabanga ngayo. (Taga. 20:5) Asesiphindze sicoce ngesibonelo saPawula. Wakhula ahlala nemaJuda. Asingabati kutsi bekudzingeka ashintje indlela lakhuluma ngayo nebantfu betive ngoba bebanelwati loluncane kakhulu ngaJehova kanye nangemiBhalo. Kungahle kudzingeke sicwaninge nome sicoce nebamemeteli lasebavutsiwe ebandleni kute sicondze indlela bantfu labasensimini yetfu labacabanga ngayo futsi labativa ngayo.—Fundza 1 Khorinte 9:20-23.
8. Nguyiphi lenye indlela yekucoca nebantfu ngeliBhayibheli?
8 Umgomo wetfu kutfola bantfu “labafanelekako.” (Mat. 10:11) Kute sikhone kukwenta loko, kudzingeka sicele kuva umibono yebantfu lesicoca nabo futsi sibalalele ngesineke. Lomunye umzalwane wase-England uvame kucela kuva imibono yebantfu mayelana nendlela yekwenta umndeni ujabule, yekukhulisa bantfwana, noma yekubeketelela kuphatfwa kabi. Ngemuva kwekubalalela ubese utsi: “Ucabangani nganasi seluleko lesabhalwa eminyakeni lecishe ibe ngu-2000 leyengcile?” Esikhundleni sekutsi asebentise ligama lelitsi “liBhayibheli,” ubese usebentisa lucingo lwakhe kuze amfundzele imiBhalo layikhetse kahle.
UNGATITSINTSA NJANI TINHLITIYO TEBANTFU?
9. Yini lesingayenta kute sisite bantfu labangatsandzi kukhuluma ngaNkulunkulu?
9 Singakhona kutsintsa tinhlitiyo tebantfu labangatsandzi kukhuluma ngaNkulunkulu ngekutsi sicoce ngentfo lebatsintsako. Nasi sibonelo, labanye bayayitsandza indalo. Ngako ungahle utsi: “Kungenteka uyati kutsi bososayensi bente tintfo letinyenti batisusela endalweni. Nasi sibonelo, bantfu labakha umbhobho bacabanga ngendlebe, kantsi labakha ikhamera bacabanga ngeliso. Ucabanga kutsi kusuke kukhulunywa ngani nakukhulunywa ngendalo? Ucabanga kutsi kusuke kukhulunywa ngemandla latsite, umuntfu nobe lenye intfo?” Lindzela imphendvulo, bese utsi: “Ngesikhatsi bonjiniyela babuka indlela tindlebe nemehlo lokwakheke ngayo, kungenteka sitibute kutsi loko labakubuka kwadalwa ngubani. Kunentfo leyangijabulisa leyabhalwa ngulomunye umhlabeleli: ‘Nguye lowadala indlebe, pho, angehluleka yini kuva? Nguye lowadala liso, pho, angehluleka yini kubona? . . . Nguye lofundzisa lwati kubo bonkhe bantfu.’ Bososayensi labanyenti bayavumelana nalokushiwo ngulomhlabeleli.” (Hla. 94:9, 10) Ungabese umkhombisa i-video letfolakala ku-jw.org® ngephasi kwencenye letsi “Interviews and Experiences” kuloluhla lolutsi “Viewpoints on the Origin of Life.” (Chafata PUBLICATIONS > VIDEOS.) Noma sibanike incwadzi letsi Kwaba Khona Njani Kuphila?
10. Singayicala njani incociswano nemuntfu longafuni kukhuluma ngaNkulunkulu?
10 Bantfu labanyenti balangatelela likusasa lelincono. Nanobe kunjalo, labanye besaba kutsi umhlaba utawubhujiswa nome ngeke bakhone kuhlala kuwo. Lomunye umbonisi wesigodzi waseNorway watsi bantfu labangafuni kukhuluma ngaNkulunkulu bavamise kutsandza kukhuluma ngetintfo letentekako emhlabeni. Ngemuva kwekubabingelela, utsi: “Ucabanga kutsi ngubani lesingametsemba kutsi utasiletsela likusasa lelincono? Ucabanga kutsi kungaba tepolitiki, bososayensi noma lomunye umuntfu?” Ngemuva kwekumlalelisisa, ubese ufundza nome acaphune umBhalo lokhuluma ngelikusasa lelihle. Bantfu labanyenti bayajabula nabafundza ngesetsembiso lesiseBhayibhelini lesitsi umhlaba ngeke ubhujiswe futsi bantfu labalungile batawuhlala kuwo kuze kube phakadze.—Hla. 37:29; Shu. 1:4.
11. Kungani kufanele setame kusebentisa tindlela letehlukahlukene tekucalisa tincociswano, futsi ngekusho kwemBhalo waRoma 1:14-16, singamlingisa njani Pawula?
11 Kufanele sisebentise tindlela letehlukahlukene tekucalisa incociswano nebantfu lesibatfolako. Leni? Ngobe bantfu abafani. Lomunye angatsandza kukhuluma ngendzaba letsite kantsi lomunye ngeke. Labanye bantfu bayakutsandza kukhuluma ngaNkulunkulu nobe liBhayibheli kantsi labanye batsandza kucale bakhulume ngaletinye tintfo. Kunobe ngukuphi, kufanele sicoce nabo bonkhe bantfu lesibatfolako. (Fundza Roma 1:14-16.) Kuliciniso kutsi kufanele sikhumbule kutsi nguJehova lokhulisa liciniso etinhlitiyweni tebantfu labatsandza kulunga.—1 Khor. 3:6, 7.
LONGAKUSHO NAWUCOCA NEBANTFU LABAVELA E-ASIA
Bamemeteli labanyenti bayabanaka bantfu lababuya emaveni lapho khona inkholo yebuKhristu ingatiwa futsi babacocela ngekuhlakanipha lokuseBhayibhelini (Buka tigaba 12 na-13)
12. Yini lesingayenta kute sikhone kucoca nebantfu labavela emaveni ase-Asia labangazange sebacabange ngaNkulunkulu?
12 Emhlabeni wonkhe, bamemeteli labanyenti batfola bantfu labavela emaveni ase-Asia, lokufaka ekhatsi bantfu lababuya etindzaweni lapho khona hulumende abeke imitsetfo lelawula imisebenti yenkholo. Bantfu bakulamave abazange sebake bacabangisise ngekutsi uMdali ukhona yini nobe cha. Labanye banesifiso sekufundza futsi bayavuma kudadisha natsi liBhayibheli kantsi labanye bacale bangafuni kufundziswa tintfo letinsha. Yini lesingayenta kute sibasite? Labanye bamemeteli labanelikhono bakutfole kuphumelela kutsi bacale bakhulume ngetintfo letivamile noma bakhombise kutsi bayabakhatsalela, futsi nangabe kufaneleka babatjele kutsi labanye kubasite njani kusebentisa timiso teliBhayibheli.
13. Yini lengenta bantfu babe nesifiso sekufundza liBhayibheli? (Buka sitfombe lesisekhasini lekucala.)
13 Bantfu labanyenti bacale batitsandze timiso letihlakaniphile letitfolakala eBhayibhelini. (Shu. 7:12) Lomunye dzadze waseNew York lokhuluma lulwimi lwesiMandarin utsi: “Ngetama kukhombisa bantfu kutsi ngiyabakhatsalela ngekutsi ngibalalele. Nangitfola umuntfu lobuya kulelinye live ngiyaye ngimbute kutsi: ‘Kunjani kuhlala kulendzawo? Sewuwutfolile yini umsebenti? Bakuphatsa njani bantfu bakulendzawo?’” Nangabe timo tivuma lodzadze uye atsi: “Ucabanga kutsi yini lebalulekile lokufanele uyente kute ube nebuhlobo lobuhle nalabanye?” Ngicela kukukhombisa nasi saga lesiseBhayibhelini. Sitsi: ‘Kususa incabano kufanana nekubhobosa imbobo emantini lavalelwe, ngako kufanele uhambe ngaphambi kwekutsi kucale incabano.’ Ucabanga kutsi kusebentisa leseluleko kungasisita yini sibe nebuhlobo lobuhle nalabanye? (Taga 17:14) Tincociswano letinjalo tingasisita kutsi sitfole bantfu labatawuvuma sibuyele kubo.
14. Lomunye umzalwane wakulelinye leliseMphumalanga ye-Asia ubasita njani bantfu labatsi abakholelwa kuNkulunkulu?
14 Yini lesingayisho nangabe bantfu basitjela kutsi abakholelwa kuNkulunkulu? Lomunye umzalwane wakulelinye live leliseMphumalanga ye-Asia losanesikhatsi lesidze ashumayela bantfu labangenandzaba nenkholo utsi: “Ngalokuvamile nangabe bantfu bendzawo batsi abakholelwa kuNkulunkulu basuke basho kutsi ababakhonti bonkulunkulu labakhontwa bantfu labanyenti. Nako ngivame kuvumelana nabo ngitsi bonkulunkulu labanyenti bentiwe bantfu. Ngibese ngibafundzela umBhalo waJeremiya 16:20 lotsi: ‘Umuntfu angatentela yini bonkulunkulu bakhe? Yebo, kodvwa abasibo bonkulunkulu.’ Ngemuva kwaloko ngimbuta umbuto lotsi: ‘Singawubona njani umehluko emkhatsini waNkulunkulu mbamba kanye nabonkulunkulu labentiwe bantfu?’ Ngibalalela ngesineke bese ngibafundzela Isaya 41:23 lotsi: ‘Sitjeleni ngetintfo letitakwenteka, nisitjele kutsi likusasa liphetseni, kuze sitekwati kutsi nibonkulunkulu.’ Ngemuva kwaloko ngibakhombisa loko Jehova latsi kutawukwenteka sikhatsini lesitako.”
15. Yini lesingayifundza kulomunye umzalwane lohlala eMphumalanga ye-Asia?
15 Lomunye umzalwane lohlala eMphumalanga ye-Asia usebentisa lendlela lelandzelako nakabuyela kubantfu labekacoce nabo. Utsi: “Ngibakhombisa kuhlakanipha lokuseBhayibhelini, tiphrofetho letigcwalisekile kanye nemitsetfo lelawula indalo yonkhe. Ngibese ngiyabakhombisa kutsi konkhe loku kubufakazi bekutsi ukhona uMdali lohlakaniphile futsi lophilako. Nangabe umuntfu avuma kutsi Nkulunkulu ukhona ngibese ngimkhombisa loko lokushiwo liBhayibheli ngaJehova.”
16. Ngekusho kwemBhalo waHebheru 11:6, kungani bantfu lesifundza nabo liBhayibheli kufanele bakholelwe kuNkulunkulu kanye naseBhayibhelini, futsi singabasita njani kutsi babe nekukholwa?
16 Nangabe sidadisha liBhayibheli nebantfu lebebangenandzaba nenkholo kufanele sichubeke sicinisa kukholwa kwabo kutsi Nkulunkulu ukhona. (Fundza Hebheru 11:6.) Kufanele siphindze sibasite baletsembe liBhayibheli. Kuze sente loko kungahle kudzingeke sicoce ngalamanye emaphuzu tikhatsi letinyenti. Njalo nasifundza nabo kungahle kudzingeke sicoce ngebufakazi bekutsi liBhayibheli liliVi laNkulnkulu. Loko kungafaka ekhatsi kucoca kafishane ngetiphrofetho teliBhayibheli lesetifezekile, ngekuba liciniso kwalo nalikhuluma ngemlandvo nangesayensi kanye nangekuhlakanipha kwalo.
17. Utawuba yini umphumela nangabe sibatsandza bantfu?
17 Sisuke sisita bantfu kutsi babe bafundzi baKhristu nangabe sibatsandza ngisho nobe bangemalunga enkholo letsite (1 Khor. 13:1) Nasibafundzisa umgomo wetfu kubakhombisa kutsi Nkulunkulu uyasitsandza futsi ufuna natsi simtsandze. Njalo ngemnyaka tinkhulungwane tebantfu lebebangenandzaba nenkholo tiyabhajatiswa ngenca yekutsi tifundziswe kutsandza Nkulunkulu. Ngako bani nesimo sengcondvo lesihle, ubatsandze futsi ukhatsalele tonkhe tinhlobo tebantfu. Balalele futsi wetame kukucondza loko labakucabangako. Bafundzise ngesibonelo kutsi babe bafundzi baKhristu.
INGOMA 76 Utiva Kanjani?
^ sig. 5 Lamuhla kungenteka sitfole bantfu labanyenti labangakholelwa kuNkulunkulu kunasesikhatsini lesendlulile. Kulesihloko sitawufundza kutsi yini lesingayenta kute sicoce nabo ngemaciniso laseBhayibhelini nekutsi singabasita njani bakwetsembe lokushiwo liBhayibheli futsi babe nekukholwa kuJehova Nkulunkulu.
^ sig. 1 Lolunye lucwaningo lukhombisa kutsi emaveni lamanyenti kuhlala bantfu labangenadzaba nenkholo. Lamave afaka ekhatsi i-Albania, Australia, Austria, Azerbaijan, Canada, China, Czech Republic, Denmark, France, Germany, Hong Kong, Ireland, Israel, Japan, Netherlands, Norway, South Korea, Spain, Sweden, Switzerland, United Kingdom, kanye neVietnam.
^ sig. 2 KUCHAZWA KWEMAGAMA LATSITE: Kulesihloko, nakukhulunywa ngebantfu labangenandzaba nenkholo kushiwo bantfu labangesiwo emalunga enkholo nobe labangakholelwa kuNkulunkulu.
^ sig. 54 KUCHAZWA KWESITFOMBE: Umzalwane ushumayela lomunye lasebenta naye esibhedlela futsi uvula incenye letsi “Online Bible Study Lessons.”
