SIHLOKO LESIFUNDVWAKO 45
Indlela Lesingasita Ngayo Labanye Kutsi Balalele Imiyalo YaKhristu
“Ngako-ke hambani nente . . . . bafundzi, . . . nibafundzise kugcina konkhe lenginitjele kona.”—MAT. 28:19, 20.
INGOMA 89 Lalela Ubusiswe
LOKUTAWUCOCWA NGAKO KULESIHLOKO *
1. Ngekusho kwaMatewu 28:18-20, ngumuphi umyalo Jesu lawunika bafundzi bakhe?
NGEMUVA kwekuvuswa kwaJesu, wabonakala kubafundzi bakhe lebebahlangene eGalile. Bekafuna kubatjela intfo letsite lebalulekile. Bekuyini? Emavi akhe atfolakala kuMatewu 28:18-20.—Fundza.
2. Ngumiphi imibuto lesitawucoca ngayo?
2 Umyalo waJesu wekwenta bafundzi usasebenta nasetikhontini taNkulunkulu lamuhla. Ngako-ke, asesicoce ngemibuto lemitsatfu lemayelana nalomsebenti Jesu lasinika wona. Wekucala, ngetulu kwekufundzisa bafundzi labasha loko lokufunwa nguNkulunkulu, yini lenye lokufanele siyente? Wesibili, yini lengentiwa bamemeteli ebandleni kuze basite labo labafundzelwa liBhayibheli kutsi batfutfuke ekukhonteni Nkulunkulu? Wesitsatfu, singabasita njani bazalwane nabodzadze lesebayekele kushumayela kutsi baphindze bawente lomsebenti wekwenta bafundzi?
BAFUNDZISE KULALELA IMIYALO YAKHRISTU
3. Nguyiphi intfo lebalulekile Jesu layisho kulomyalo wakhe?
3 Imiyalo yaJesu iyevakala. Kufanele sifundzise bantfu loko lakusho. Nobe kunjalo, kunentfo lebalulekile layisho lokungakafanele siyikhohlwe. Jesu akazange atsi: ‘Nibafundzise konkhe lenginitjele kona.’ Kunaloko, watsi: Nibafundzise “kugcina konkhe lenginitjele kona.” Kuze sikhombise kutsi siyawulalela umyalo waJesu, kufanele singagcini ngekufundzisa loyo lesifundza naye liBhayibheli loko lokufanele akwente kodvwa kufanele simkhombise kutsi angakwenta njani. (Imis. 8:31) Kungani kufanele sente kanjalo?
4. Niketa sibonelo lesikhombisa kutsi kusho kutsini kugcina umyalo?
4 “Kugcina” umyalo kusho kuwulalela. Nasi sibonelo lesingasisita sifundzise umuntfu kugcina nobe kulalela loko Khristu lakusho. Umuntfu lofundzisa labanye kushayela, ubafundzisa njani kugcina imitsetfo yemgwaco? Lomfundzisi ucala ngekufundzisa bafundzi bakhe lemitsetfo. Nobe kunjalo, kufanele ente lokutsite kuze asite labafundzi bakhe kutsi bayilalele lemitsetfo. Kufanele ahambe nalomfundzi futsi ameluleke njengobe lomfundzi ashayela futsi etama kusebentisa loko lakufundzile. Yini lesingayifundza kulesibonelo?
5. (a) Ngekusho kwaJohane 14:15 na-1 Johane 2:3, yini lokufanele siyifundzise labo lesifundza nabo liBhayibheli kutsi bayente? (b) Niketa tibonelo taloko lesingakwenta kuze sisite bafundzi basebentise loko labakufundzako ekuphileni kwabo.
5 Nasifundza nebantfu liBhayibheli, sibafundzisa loko Nkulunkulu lakufunako kitsi. Kodvwa kufanele sente lokungetulu kwaloko. Kufanele sifundzise labo lesifundza nabo liBhayibheli kutsi bakusebentise loko labakufundzako ekuphileni kwabo. (Fundza Johane 14:15; 1 Johane 2:3.) Ngaloko lesikwentako, singakhombisa labo lesifundza nabo liBhayibheli kutsi bangakusebentisa njani loko labakufundza eBhayibhelini nangabe basesikolweni, emsebentini nobe batijabulisa. Singabacocela ngalokwenteke ekuphileni kwetfu kuze sibakhombise kutsi kusebentisa sicondziso lesiseBhayibhelini kusivikele njani, nobe kusisite njani kutsi sente sincumo lesihlakaniphile. Nangabe sinalabo lesifundza nabo liBhayibheli, singathantaza kuJehova simcele abacondzise ngemoya wakhe longcwele.—Joh. 16:13.
6. Kufaka ekhatsi ini kufundzisa bantfu kugcina imiyalo yaJesu?
6 Kufaka ekhatsi ini kufundzisa bantfu imiyalo yaJesu? Kufanele sisite labo lesifundza nabo liBhayibheli kutsi babe nesifiso sekwenta bafundzi. Labanye bafundzi kungenteka besabe kushumayela. Kufanele sibeketele njengobe sibasita kutsi bawacondze kahle emaciniso eliBhayibheli kuze batawuba nekukholwa lokucinile. Ngemuva kwaloko, tinhlitiyo tabo titawutsintseka futsi batawufuna kushumayela. Yini lesingayenta kuze sisite bafundzi kutsi babe nesifiso sekushumayela tindzaba letimnandzi?
7. Yini lesingayenta kuze sisite umfundzi abe nesifiso sekutjela labanye tindzaba letimnandzi?
7 Singase sibute labo lesifundza nabo liBhayibheli imibuto lenjengalena: “Kusebentisa loko lokufundzako eBhayibhelini kukushintje njani kuphila kwakho? Ucabanga kutsi kufanele yini labanye bawuve lomlayeto loseBhayibhelini? Yini longayenta kuze ubasite?” (Taga 3:27; Mat. 9:37, 38) Khombisa umfundzi emapheshana Lasemathulusini Etfu Ekufundzisa, umkhetsise lawo lacabanga kutsi tihlobo takhe, bangani nobe lasebenta nabo bangatsandza kuwafundza. Niketa lomfundzi lamapheshana. Mkhombise kutsi yini langayisho nakaniketa lomunye lelipheshana. Kodvwa ngemuva kwekutsi umfundzi sekangummemeteli longakabhajatiswa, kufanele ushumayele naye kuze umsite.—Shu. 4:9, 10; Luk. 6:40.
INDLELA LIBANDLA LELINGABASITA NGAYO LABO LABAFUNDZELWA LIBHAYIBHELI KUTSI BATFUTFUKE
8. Kubaluleke ngani kutsi labo lesifundza nabo liBhayibheli bamtsandze kakhulu Nkulunkulu namakhelwane? (Buka nelibhokisi lelitsi “ Indlela Lesingasita Ngayo Labo Lesifundza Nabo LiBhayibheli Kutsi Bamtsandze Kakhulu Nkulunkulu.”)
8 Kufanele sihlale sikhumbula kutsi Jesu wasiyala kutsi sifundzise labanye ‘kugcina konkhe lasitjele kona.’ Loko kufaka ekhatsi imiyalo lemibili lemikhulu, kutsandza Nkulunkulu nekutsandza makhelwane, futsi yomibili lemiyalo iyahambisana nekushumayela kanye nemsebenti wekwenta bafundzi. (Mat. 22:37-39) Ihambisana njani? Intfo leyinhloko lesenta sishumayele lutsandvo, lutsandvo ngaNkulunkulu nelutsandvo ngabomakhelwane. Kuliciniso kutsi labanye lesibafundzela liBhayibheli kungenteka besabe kushumayela. Kodvwa singabacinisekisa kutsi kancane kancane Jehova utawubasita kutsi bagcine bangasesabi. (Hla. 18:1-3; Taga 29:25) Libhokisi lelikulesihloko lichaza loko lesingakwenta kuze sisite umfundzi amtsandze kakhulu Nkulunkulu. Ngetulu kwaloko, yini lengentiwa libandla kuze lisite bafundzi labasha kutsi babe nelutsandvo?
9. Kulesibonelo semfundzi lofundzela kushayela, ngutiphi tindlela lomfundzi lafundza ngato tifundvo letibalulekile?
9 Ase uphindze ucabange ngalomfanekiso wemuntfu lofundzela kushayela. Njengobe asashayela futsi lomuntfu lomfundzisako aseceleni kwakhe, ngutiphi tindlela lomfundzi lafundza ngato? Ufundza ngekulalela lona lomfundzisako futsi abuke labanye nabashayela. Nasi sibonelo, lona lomfundzisako angamkhomba lomunye loshayelako lovumela lomunye kutsi angene embikwakhe. Nobe angase amkhombe umshayeli longadlobhi labanye bashayeli ngemalambu njengobe baphambana futsi amkhutsate kutsi naye ente intfo lefanako. Tibonelo letinjengaleti tingafundzisa umfundzi tifundvo letibalulekile langatisebentisa nakashayela.
10. Yini letawusita umuntfu lofundzelwa liBhayibheli kutsi atfutfuke endleleni lakhonta ngayo Nkulunkulu?
10 Ngendlela lefanako, umuntfu lofundzelwa liBhayibheli locala kukhonta Jehova akafundzi nje kuphela kumfundzisi wakhe, kodvwa uyafundza nasetibonelweni letinhle taletinye tikhonti taJehova. Ngako-ke, yini lengasita labafundzelwa liBhayibheli kutsi batfutfuke endleleni labamkhonta ngayo Jehova? Kuba khona emihlanganweni yelibandla. Kungani? Loko labatawukuva emihlanganweni kutawubasita kutsi bati lokunyenti ngeliBhayibheli, kucinise kukholwa kwabo futsi kubasite bamtsandze kakhulu Nkulunkulu. (Imis. 15:30-32) Ngetulu kwaloko, nakaya emihlanganweni lona lomfundzelako angementa etayelane nebazalwane nabodzadze lababhekene netimo letifana netakhe. Lomfundzi utawubona indlela bazalwane nabodzadze labatsandzana ngayo ebandleni. Cabanga nganati tibonelo letilandzelako.
11. Ngutiphi tibonelo umfundzi langatibona ebandleni futsi tingamtsintsa kanjani?
11 Umuntfu lofundzelwa liBhayibheli futsi lokhulisa bantfwana ayedvwa ubona lomunye dzadze losesimeni lesifana nesakhe. Lomfundzi utsintseka inhlitiyo nakabona imetamo leyentiwa ngulodzadze kuze ete esifundvweni nebantfwana bakhe labasebancane. Umuntfu lofundzelwa liBhayibheli longakhoni kuyekela kubhema usondzelana nemmemeteli lobekasesimeni lesifana nesakhe kodvwa lowagcine akhonile kuyekela kubhema. Lommemeteli utjela lomfundzi kutsi kutsandza Jehova kwamenta wafuna kulalela imiyalo yaKhe. (2 Khor. 7:1; Fil. 4:13) Ngemuva kwekulalela lendzaba yalommemeteli, lomfundzi waba nelitsemba ngesikhatsi lomzalwane amcinisekisa kutsi naye usengakhona kuyekela kubhema. Sisi lofundzelwa liBhayibheli ubona dzadze losemusha lokujabulelako kuba nguFakazi. Ngesikhatsi lomfundzi abona kutsi lodzadze ujabulile wafuna kwati kutsi yini lementa ajabule.
12. Kungani sitsi labo labasebandleni bangenta lokutsite kuze basite labo labafundzelwa liBhayibheli?
12 Bafundzi nasebati bamemeteli labehlukene labatsembekile, bayabona kutsi kusho kutsini kugcina umyalo waKhristu wekutsandza Nkulunkulu namakhelwane. (Joh. 13:35; 1 Thim. 4:12) Ngetulu kwaloko, bantfu labafundzelwa liBhayibheli bangafundza kubamemeteli lebebanetinkinga letifana netabo. Lomfundzi uyabona kutsi angalwenta lushintjo loludzingekile kuze abe ngumfundzi waKhristu. (Dut. 30:11) Bonkhe ebandleni bangenta lokutsite kuze basite labo labafundzelwa liBhayibheli kutsi batfutfuke endleleni labakhonta ngayo Nkulunkulu. (Mat. 5:16) Yini loyentako kuze ukhutsate labo labafundzelwa liBhayibheli labeta emihlanganweni?
SITA LABO LESEBAYEKELE KUSHUMAYELA KUTSI BAPHINDZE BASHUMAYELE
13-14. Jesu wabaphatsa njani baphostoli bakhe lebebadvumatekile?
13 Sifuna kusita bazalwane nabodzadze lesebayekele kushumayela kutsi baphindze bashumayele futsi bente bafundzi. Indlela Jesu labaphatsa ngayo baphostoli bakhe lebebadvumatekile isifundzisa loko lesingakwenta natsi lamuhla.
14 Ngaphambi kwekutsi Jesu abulawe, baphostoli “bamshiya babaleka.” (Mak. 14:50; Joh. 16:32) Yini Jesu layenta ngesikhatsi baphostoli bakhe badvumatekile? Ngemuva nje kwekuvuswa kwakhe, Jesu watjela balandzeli bakhe watsi: “Ningesabi! Hambani niyewubikela bafundzi bami [kutsi ngivusiwe].” (Mat. 28:10a) Jesu akazange abalahle baphostoli bakhe. Ngisho nobe bebamshiyile, wachubeka ababita ngekutsi ‘bafundzi bakhe.’ NjengaJehova, Jesu bekanemusa futsi atsetselela.—2 Khos. 13:23.
15. Sitiva njani ngalabo lesebayekele kushumayela?
15 Ngendlela lefanako, sibakhatsalela kakhulu labo lesebayekele kushumayela. Babazalwane nabodzadzewetfu, futsi siyabatsandza! Sisakukhumbula kutikhandla kwalabazalwane nabodzadze, futsi labanye besebasebentele Jehova iminyaka leminyenti. (Heb. 6:10) Sibakhumbula kakhulu! (Luk. 15:4-7) Silingisa sibonelo saJesu, ngutiphi tindlela lesingabakhombisa ngato kutsi siyabakhatsalela?
16. Singakhombisa njani kutsi siyabakhatsalela bazalwane nabodzadze lesebayekele kushumayela?
16 Bamemele emihlanganweni yelibandla. Lenye indlela Jesu labakhutsata ngayo baphostoli bakhe lebebadvumatekile, kubamemela emihlanganweni. (Mat. 28:10b; 1 Khor. 15:6) Nalamuhla, singabakhutsata labo lesebayekele kushumayela kutsi bete emihlanganweni yelibandla. Siyati kutsi kungase kudzingeke sibameme tikhatsi letinyentana ngaphambi kwekutsi bete. Jesu wajabula kakhulu kutsi bafundzi bakhe basemukela simemo sakhe.—Catsanisa naMatewu 28:16; Lukha 15:6.
17. Yini lokufanele siyente nangabe lotsite losayekele kushumayela eta emihlanganweni yelibandla?
17 Bemukele ngalokusuka enhlitiyweni. Jesu wenta bafundzi bakhe bativa bemukelekile ngesikhatsi ahlangana nabo, akazange alindzele kutsi bete kuye kunaloko nguye lowaya kubo wakhuluma nabo. (Mat. 28:18) Sitawenta njani nangabe umuntfu losayekele kushumayela afika eHholweni LeMbuso? Kufanele kube ngitsi lesiya kuye futsi simemukele kahle. Singacale singati kutsi sitawutsini. Kodvwa kunekutsi simdlise emahloni, singase simtjele kutsi sijabula kanganani ngekumbona.
18. Singabakhutsata njani bamemeteli lesebayekele kushumayela?
18 Bakhutsate. Kungenteka bafundzi baJesu bacabanga kutsi ngeke bakhone kushumayela emhlabeni wonkhe. Jesu wakhutsata balandzeli bakhe ngekutsi atsi: “Mine nginani onkhe emalanga.” (Mat. 28:20) Loko kwabasita yini bafundzi bakhe? Yebo. Ngemuva nje kwaloko, baba matasa ‘bafundzisa futsi bamemetela tindzaba letimnandzi.’ (Imis. 5:42) Nebamemeteli lesebayekele kushumayela bayakudzinga kukhutsatwa. Bangase besabe kuphindze bashumayele. Singabacinisekisa kutsi angeke bashumayele bodvwana. Nasebakulungele, singahamba nabo emsebentini wekushumayela. Batawujabula ngekutsi sibasitile baphindze bacala kushumayela tindzaba letimnandzi. Nasibakhombisa kutsi sibatsatsa njengebazalwane nabodzadzewetfu, batawuphindze bashumayele futsi loko kutalijabulisa kakhulu libandla.
SIFUNA KUWUCEDZA UMSEBENTI JESU LASINIKA WONA
19. Siyini sifiso setfu, futsi leni?
19 Sitawuchubeka sishumayela futsi senta bafundzi kuze kube kunini? Kuze kube sekupheleni kwalelive lelibi. (Mat. 28:20) Sitawukhona yini kushumayela futsi sente bafundzi kuze kube nguleso sikhatsi? Sitimisele kwenta kanjalo! Sisebentisa sikhatsi setfu, emandla etfu nemali yetfu kuze sifune labo ‘labatimisele kutfola kuphila lokuphakadze.’ (Imis. 13:48) Nasenta loko, sisuke silandzela sibonelo saJesu. Watsi: “Kudla kwami kwenta intsandvo yaloyo longitfumile nekutsi ngicedze umsebenti wakhe.” (Joh. 4:34; 17:4) Natsi nguloko lesikufisako. Sifuna kuwucedza umsebenti lesinikwe wona. (Joh. 20:21) Sifuna nalabanye lokufaka ekhatsi labo lesebayekele kushumayela kutsi babe natsi kulomsebenti.—Mat. 24:13.
20. Ngekusho kwaFiliphi 4:13, yini lesenta siciniseke kutsi sitawucedza umsebenti Jesu lasiyale kutsi siwente?
20 Akusiko melula kwenta loko Jesu lasiyale kutsi sikwente. Nobe kunjalo, asiwenti sodvwa lomsebenti. Jesu wetsembisa kutsi utawuba natsi. Nasenta bafundzi, “sitisebenti letikanye naNkulunkulu” futsi “sikanye naKhristu.” (1 Khor. 3:9; 2 Khor. 2:17) Ngako singakhona kuwucedza. Kusijabulisa kakhulu kwenta lomsebenti nekusita labanye kutsi bawente!—Fundza Filiphi 4:13.
INGOMA 79 Tifundzise Kuhlala Ticinile
^ sig. 5 Jesu wayala balandzeli bakhe kutsi bente bafundzi futsi bafundzise labanye kugcina konkhe loko lebekabayale ngako. Kulesihloko, sitawufundza ngekutsi singayilalela njani imiyalo yaJesu.
^ sig. 66 KUCHAZWA KWESITFOMBE: Dzadze lochuba sifundvo seliBhayibheli uchazela umfundzi tintfo lokufanele atente kuze amtsandze kakhulu Nkulunkulu. Ngekuhamba kwesikhatsi, lomfundzi uyatenta letintfo letintsatfu latitjelwe ngumfundzisi wakhe.
