SIHLOKO LESIFUNDVWAKO 47
Tifundvo Lesingatifundza Encwadzini YaLevithikhusi
“Yonkhe imiBhalo iphefumulelwe nguNkulunkulu, ilusito.”—2 THIM. 3:16.
INGOMA 98 ImiBhalo—Iphefumulelwe nguNkulunkulu
LOKUTAWUCOCWA NGAKO KULESIHLOKO *
1-2. Kungani emaKhristu kufanele atimisele kufundza incwadzi yaLevithikhusi lamuhla?
UMPHOSTOLI Pawula wakhumbuta umngani wakhe losemncane Thimothi kutsi “yonkhe imiBhalo iphefumulelwe nguNkulunkulu, ilusito.” (2 Thim. 3:16) Lemibhalo ifaka ekhatsi incwadzi yaLevithikhusi. Ucabangani ngalencwadzi yaLevithikhusi? Labanye bacabanga kutsi iyincwadzi lenemitsetfo leminyenti lengasasebenti lamuhla, kodvwa emaKhristu akacabangi kanjalo.
2 Incwadzi yaLevithikhusi yabhalwa eminyakeni lengaba ngu-3 500 leyendlulile, futsi Jehova uyigcinile kuze ‘ifundzise tsine.’ (Rom. 15:4) Lencwadzi isisita sicondze indlela Jehova lacabanga ngayo nalativa ngayo ngetintfo letitsite, ngako kufanele sitimisele kuyifundza. Ecinisweni, tinyenti tifundvo lesingatifundza kulencwadzi. Asesicoce ngaletine tato.
LESINGAKWENTA KUZE SEMUKELWE NGUJEHOVA
3. Kungani bekwentiwa imihlatjelo njalo ngemnyaka ngeLilanga Lekubuyisana?
3 Sifundvo sekucala: Kufanele semukelwe nguJehova kuze neminikelo yetfu yemukeleke. Njalo ngemnyaka ngeLilanga Lekubuyisana, sive sema-Israyeli besihlangana futsi umphristi lophakeme bekenta umhlatjelo ngetilwane. Lemihlatjelo beyisita kuze ikhumbute ema-Israyeli kutsi bekadzinga kuhlanjululwa esonweni! Ngaphambi kwekutsi umphristi lophakeme aletse ingati yemhlatjelo eNgcwelengcwele ngalelolanga, bekufanele ente intfo lebeyibaluleke kakhulu kwendlula kutsetselelwa kwetono tesive.
(Buka sigaba 4) *
4. Njengobe kuvetiwe embhalweni wa-Levithikhusi 16:12, 13, yini lebeyentiwa ngumphristi lophakeme nakangena kwekucala eNgcwelengcwele ngeLilanga Lekubuyisana? (Buka sitfombe lesisekhasini lekucala.)
4 Fundza Levithikhusi 16:12, 13. Cabanga ngaloko lobekwenteka ngeLilanga Lekubuyisana: Umphristi lophakeme bekangena ethendeni lekukhontela. Ngalelolanga, bekufanele angene katsatfu eNgcwelengcwele. Esandleni sinye bekaphatsa sitja lebesigcwele imphepho lenuka kamnandzi, kulesinye sandla bekaphatsa sitja semlilo lesakhiwe ngeligolide lebesigcwele emalahle lavutsako. Bekafike eme embikwendvwangu lebeyisekungeneni eNgcwelengcwele. Ngenhlonipho lenkhulu, lomphristi bekangena eNgcwelengcwele bese uma embikwelibhokisi lesivumelwane. Ngalomunye umcondvo, lomphristi bekufana nekutsi ume embikwaJehova Nkulunkulu! Ngekucophelela, lomphristi bekabese utsela lemphepho lengcwele kulamalahle lavutsako, futsi lendzawo beyibese inukelela kamnandzi. * Ngemuva kwesikhatsi, bekaphindze abuye eNgcwelengcwele nengati yemhlatjelo wetilwane. Naka kutsi lomphristi bekashisa imphepho ngaphambi kwekutsi anikele ngengati yemhlatjelo wesono.
5. Yini lesingayifundza ekusetjentisweni kwemphepho ngeLilanga Lekubuyisana?
5 Yini lesingayifundza ekusetjentisweni kwemphepho ngeLilanga Lekubuyisana? LiBhayibheli liveta kutsi imithantazo leyemukelekako yetikhonti taJehova ifana nemphepho. (Hla. 141:2; Semb. 5:8) Khumbula kutsi ngenhlonipho lenkhulu, umphristi lomkhulu bekaletsa imphepho embikwaJehova. Ngendlela lefanako, nasithantaza kuJehova sithantaza ngenhlonipho lejulile. Sijabula kakhulu kutsi uMdali wendzawo yonkhe uyasivumela kutsi sisondzele kuye, njengemntfwana asosendzelana nababe wakhe. (Jak. 4:8) Jehova usemukela njengebangani bakhe! (Hla. 25:14) Silijabulela kakhulu lelilungelo kangangekutsi asifuni kwenta nobe yini lengamdvumata.
6. Yini lesiyifundzako ngekutsi umphristi lophakeme bekufanele ashise imphepho ngaphambi kwekutsi anikele ngemhlatjelo?
6 Khumbula kutsi umphristi lophakeme bekufanele ashise imphepho ngaphambi kwekutsi anikele ngemhlatjelo. Nakenta njalo, bekaciniseka kutsi Nkulunkulu utamemukela nakanikela ngalemihlatjelo. Yini lesiyifundzako kuloku? Ngesikhatsi Jesu alamhlabeni, bekufanele ente intfo lebeyibaluleke kakhulu kwendlula kusindzisa bantfu—ngaphambi kwekutsi anikele ngekuphila kwakhe njengemhlatjelo. Yini lebekufanele ayente? Bekufanele alalele Jehova ngekwetsembeka kuphila kwakhe konkhe ngesikhatsi alapha emhlabeni. Ngaleyondlela, Jesu bekatawube akhombisa kutsi kukahle kakhulu kwenta tintfo ngendlela yaJehova. Jesu bekatabungcwelisa futsi abumelele kahle bukhosi baBabe wakhe nobe indlela yakhe yekubusa.
7. Kungani indlela yaJesu yekuphila ngesikhatsi alapha emhlabeni yamjabulisa Babe wakhe?
7 Ngesikhatsi Jesu alamhlabeni, wachubeka amlalela Jehova. Ngisho nobe Jesu bekabhekana netilingo kanye nebumatima, futsi ati kutsi utawufa kabuhlungu, bekatimisele kukhombisa kutsi indlela yaBabe wakhe yekubusa ngiyo lekahle kakhulu. (Fil. 2:8) Ngesikhatsi Jesu abhekana netimo letimatima, bekathantaza “ngekukhala lokukhulu nangetinyembeti.” (Heb. 5:7) Imithantazo yakhe lejulile beyikhombisa kutsi wetsembekile kuJehova futsi yamenta watimisela kakhulu kuchubeka alalela Babe wakhe. Imithantazo yaJesu beyifana neliphunga lemphepho lelimnandzi kuJehova. Indlela yaJesu yekuphila ngesikhatsi alapha emhlabeni yamjabulisa kakhulu Babe wakhe futsi yangcwelisa bukhosi baKhe.
8. Singayilingisa njani indlela yaJesu yekuphila?
8 Singamlingisa Jesu ngekutsi sente konkhe lesingakwenta kuze silalele Jehova futsi setsembeke kuye. Nasibhekene netimo letimatima, sithantaza njalo sicele lusito lwaJehova ngobe sifuna kumjabulisa. Nasenta njalo, sisuke sikhombisa kutsi siyayisekela indlela yaJehova yekubusa. Siyati kutsi Jehova ngeke ayemukele imithantazo yetfu nangabe senta tintfo latenyanyako. Nobe kunjalo, nangabe senta tintfo Jehova latitsandzako, singaciniseka kutsi imithantazo yetfu lesuka enhlitiyweni itawufana neliphunga lelinukelela kamnandzi kuJehova. Singaciniseka kutsi kuyamjabulisa Jehova kubacotfo kwetfu nekumlalela ngekwetsembeka.—Taga 27:11.
SIKHONTA JEHOVA NGOBE SIMBONGA FUTSI SIMTSANDZA
(Buka sigaba 9) *
9. Kungani ema-Israyeli bekenta iminikelo yekuthula?
9 Sifundvo sesibili: Sikhonta Jehova ngobe simbonga. Lesifundvo sitasifundza njengobe sihlolisisa iminikelo yekuthula lebeyentiwa ngema-Israyeli. * Encwadzini yaLevithikhusi sifundza kutsi um-Israyeli bekenta umnikelo wekuthula ‘njengemnikelo wekubonga.’ (Lev. 7:11-13, 16-18) Bekangawenti lomnikelo ngobe bekufanele kutsi awente, kodvwa bekawenta ngobe bekafuna. Bekatimisela kuwenta ngobe bekatsandza Jehova Nkulunkulu wakhe. Lomuntfu lonikelako, umndeni wakhe kanye nebapristi bebayidla lenyama yesilwane lesinikelwe. Kodvwa letinye tincenye talesilwane bekunikelwa ngato kuJehova kuphela. Ngutiphi letincenye?
(Buka sigaba 10) *
10. Iminikelo yekuthula lechazwe kuLevithikhusi 3:6, 12, 14-16 isifundzisani ngendlela Jesu lebekamkhonta ngayo Babe wakhe?
10 Sifundvo sesitsatfu: Siniketa Jehova lokuncono kakhulu ngoba siyamtsandza. Jehova bekatsatsa silwane lesikhuluphele njengalesincono kakhulu. Watsi letinye tincenye talesilwane, lokufaka ekhatsi tinso, betibaluleke kakhulu. (Fundza Levithikhusi 3:6, 12, 14-16.) Ngako Jehova bekajabula nangabe um-Israyeli anikela ngekutitsandzela ngaleto tincenye tesilwane futsi anikela nangemanoni. Um-Israyeli lobekanikela ngesilwane lesinjalo bekakhombisa kutsi uyafuna kuniketa Jehova lokuncono kakhulu. Ngendlela lefanako, Jesu bekamtsandza Jehova futsi wamniketa lokuncono kakhulu ngekutsi ente konkhe lokusemandleni akhe kuze amkhonte. (Joh. 14:31) Kwenta intsandvo yaNkulunkulu bekubaluleke kakhulu kuJesu futsi bekawutsandza mbamba umtsetfo waKhe. (Hla. 40:8) Jehova bekajabula kakhulu nakabona Jesu amkhonta ngekutitsandzela!
Kutsandza Jehova kusenta simnikete lokuncono kakhulu (Buka tigaba 9-12) *
11. Umsebenti lesiwentela Jehova ufana kanjani nemnikelo wekuthula, futsi loko kusidvudvuta njani?
11 Umsebenti lesiwentela Jehova uyafana naleminikelo yekuthula ngobe uyindlela lesikhombisa ngayo kutsi siyamtsandza. Simniketa lokuncono kakhulu, futsi loko sikwenta ngobe simtsandza mbamba. Jehova ujabula kakhulu nakabona tigidzi tebantfu timkhonta ngekutitsandzela ngobe timtsandza futsi titsandza netindlela takhe! Singadvudvuteka nasikhumbula kutsi Jehova akagcini ngekukubona loko lesikwentako kodvwa uyabona nekutsi sikwentelani. Nasi sibonelo, nangabe sewukhulile futsi ungasakhoni kukhonta Jehova ngendlela lofuna ngayo, ungaciniseka kutsi Jehova uyasicondza simo sakho. Kungenteka uva shengatsi ngeke ukhone kumentela lokunyenti, kodvwa Jehova uyalubona lutsandvo lonalo kanye naloko lofisa kukwenta. Ukwemukela ngenjabulo loko lokuncono kakhulu lomniketa kona.
12. Jehova bekativa njani ngemnikelo wekuthula, futsi loko kusikhutsata njani?
12 Yini lesingayifundza ngemnikelo wekuthula? Njengobe tincenye letibaluleke kakhulu talesilwane betisha, liphunga laso belenyukela kuJehova futsi loko bekumjabulisa. Ngako ungaciniseka kutsi Jehova uyajabula nangabe wenta konkhe lokusemandleni akho kuze umkhonte ngekutitsandzela. (Khol. 3:23) Cabanga kutsi ujabula kanjani ngawe. Akunendzaba kutsi umentela lokunyenti nobe lokuncane Jehova, loko lomentela kona kubaluleke kakhulu kuye futsi ngeke akukhohlwe.—Mat. 6:20; Heb. 6:10.
JEHOVA UYAYIBUSISA INHLANGANO YAKHE
13. Ngekusho kwembhalo waLevithikhusi 9:23, 24, Jehova wakhombisa njani kutsi uyabemukela labaphristi?
13 Sifundvo sesine: Jehova uyayibusisa incenye yenhlangano yakhe lesemhlabeni. Cabanga ngaloko lokwenteka nga-1512 B.C.E. ngesikhatsi kumiswa lithende lekukhontela ngephansi kweNtsaba iSinayi. (Eks. 40:17) Mosi bekacondzisa lomkhosi ngesikhatsi Aroni nemadvodzana akhe babekwa kutsi babe baphristi. Sive sema-Israyeli sabutsana ndzawonye kuze sibukele ngesikhatsi baphristi benta umhlatjelo kwekucala ngetilwane. (Lev. 9:1-5) Jehova wakhombisa njani kutsi uyabemukela labaphristi lebebasandza kubekwa? Ngesikhatsi boMosi na-Aroni babusisa labantfu, kwachamuka umlilo usuka ezulwini futsi washisa lomnikelo lobewuse-al’thare.—Fundza Levithikhusi 9:23, 24.
14. Ibaluleke ngani kitsi lamuhla indlela Jehova labemukela ngayo buphristi ba-Aroni?
14 Umlilo lobewuvela ezulwini bewukhombisani? Jehova watfumela lomlilo kuze akhombise kutsi bekabemukela futsi abasekela bo-Aroni nemadvodzana akhe lebekabakhetse kutsi babe baphristi. Ngesikhatsi ema-Israyeli abona bufakazi lobucacako bekutsi Jehova uyabasekela labaphristi, abona kutsi nawo bekufanele abasekele. Loku kubalulekile yini kitsi? Yebo, ngobe lobuphristi bebumelela buphristi lobuncono futsi lobubaluleke kakhulu. Jesu unguMphristi Lophakeme, futsi utawubusa kanye nalabanye baphristi labangu-144 000 ezulwini.—Heb. 4:14; 8:3-5; 10:1.
Jehova uyayibusisa futsi uyayicondzisa inhlangano yakhe. Natsi siyisekela ngawo onkhe emandla etfu (Buka tigaba 15-17) *
15-16. Jehova ukhombise njani kutsi uyasemukela ‘sisebenti lesetsembekile nalesihlakaniphile’?
15 Nga-1919, Jesu wakhetsa licembu lelincane lebazalwane labagcotjiwe lelibitwa ngekutsi ‘sisebenti lesetsembekile nalesihlakaniphile.’ Lesisebenti sihamba embili ekwenteni umsebenti wekushumayela, futsi sinika balandzeli baKhristu “kudla ngesikhatsi lesifanele.” (Mat. 24:45) Siyabubona yini bufakazi lobucacako bekutsi Jehova uyasisekela sisebenti lesetsembekile nalesihlakaniphile?
16 Sathane nebalandzeli bakhe bente tintfo letinyenti kuze bawuvimbe umsebenti lowentiwa sisebenti lesetsembekile. Kube Jehova bekangasisiti lesisebenti, besingeke sikhone kuwenta lomsebenti. Ngisho nobe kwaba nemphi yelive yekucala neyesibili, kuhlushwa kamatima kanye nekuhhohloka kwemnotfo, kodvwa sisebenti lesetsembekile nalesihlakaniphile sichubekile siniketa bantfu baJehova labasemhlabeni kudla ngesikhatsi lesifanele. Cabanga ngetincwadzi letinyenti lesinato lamuhla, sititfola mahhala ngetilwimi letingetulu kwaletingu-900! Loku kubufakazi lobucacile bekutsi Nkulunkulu uyasisekela lesisebenti. Umsebenti wekushumayela ungulobunye bufakazi bekutsi Jehova uyasibusisa. Tindzaba letimnandzi tishunyayelwa “emhlabeni wonkhe.” (Mat. 24:14) Sibona ngalokucacile kutsi Jehova uyayicondzisa inhlangano yakhe lamuhla futsi uyayiphumelelisa.
17. Singakhombisa njani kutsi siyayisekela inhlangano yaJehova?
17 Senta kahle ngekutibuta kutsi, ‘Ngiyajabula yini ngekuba yincenye yenhlangano yaJehova?’ Ngesikhatsi kusaphila Mosi, Jehova watfumela umlilo lovela ezulwini kuze akhombise kutsi uyabemukela labo lebebakhetsiwe. Ngendlela lefanako, Jehova usinikete bufakazi lobucacile bekutsi usebentisa inhlangano yakhe lamuhla. Kunyenti kakhulu lesimbonga ngako Nkulunkulu. (1 Thes. 5:18, 19) Singayisekela njani inhlangano yaJehova? Ngekutsi sikusebentise loko lesikufundza eBhayibhelini, lesikufundza etincwadzini letisekelwe kulo kanye nalesikufundza emihlanganweni yelibandla, emihlanganweni lemincane kanye nalemikhulu. Ngetulu kwaloko, singakhombisa kutsi siyayisekela inhlangano yaNkulunkulu ngekutsi siwente ngekutimisela umsebenti wekushumayela newekufundzisa.—1 Khor. 15:58.
18. Yini lotimisele kuyenta?
18 Shengatsi singatimisela kutsi sitisebentise tifundvo lesitifundze encwadzini yaLevithikhusi. Sifuna kutsi Jehova ayemukele imihlatjelo yetfu. Sikhonta Jehova ngobe sikhombisa kubonga kuye. Shengatsi singachubeka siniketa Jehova lokuncono kakhulu ngobe simtsandza ngenhlitiyo yetfu yonkhe. Asenteni konkhe lesingakwenta kuze sisekele inhlangano yaJehova lamuhla. Nasenta njalo, sitawube sikhombisa Jehova kutsi siyalijabulela lilungelo lesinalo lekumkhonta njengobe siboFakazi bakhe!
INGOMA 96 Incwadzi YaNkulunkulu—Leligugu
^ sig. 5 Incwadzi yaLevithikhusi inemitsetfo Jehova lebekayinikete ema-Israyeli asendvulo. Njengobe singemaKhristu, asikho ngephansi kwaleyo mitsetfo, kodvwa sisengazuza kuyo. Kulesihloko, sitawucoca ngetifundvo letibalulekile lesingatifundza encwadzini yaLevithikhusi.
^ sig. 4 Imphepho lebeyishiswa ethendeni lekukhontela beyitsatfwa njengalengcwele, futsi ema-Israyeli asendvulo bekayisebentisa kuphela nakakhonta Jehova. (Eks. 30:34-38) Kute bufakazi lobukhombisa kutsi emaKhristu angelikhulu lekucala bakashisa imphepho kuze akhonte Nkulunkulu.
^ sig. 9 Kuze utfole imininingwane leminyenti ngeminikelo wekuthula fundza i-Insight on the Scriptures, Umculu 2, likhasi 526. Letfolakala ngesiNgisi.
^ sig. 54 KUCHAZWA KWETITFOMBE: NgeLilanga Lekubuyisana: Umphristi lophakeme waka-Israyeli bekangena eNgcwelengcwele nemphepho kanye nemalahle lavutsako, kuze agcwalise lendlu ngeliphunga lelimnandzi. Ngemuva kwesikhatsi, bekabese uyabuya eNgcwelengcwele nengati yemhlatjelo wesono.
^ sig. 56 KUCHAZWA KWETITFOMBE: Um-Israyeli uniketa umphristi imvu yemhlatjelo wekuthula kuze akhombise kutsi umndeni wakhe uyambonga Jehova.
^ sig. 58 KUCHAZWA KWETITFOMBE: Ngesikhatsi Jesu enta umsebenti wakhe lamhlabeni, wakhombisa kutsi umtsandza mbamba Jehova ngekutsi agcine imiyalo yakhe futsi asite nebalandzeli bakhe kutsi bayigcine.
^ sig. 60 KUCHAZWA KWETITFOMBE: Dzadze losakhulile futsi lonemphilo lebutsakatsaka wenta konkhe langakwenta kuze afakaze ngaJehova ngekutsi abhale tincwadzi.
^ sig. 62 KUCHAZWA KWETITFOMBE: Nga-February 2019, umzalwane Gerrit Lösch lolilunga Lesigungu Lesibusako wakhulula Lihumusho Lemhlaba Lomusha lelibuketiwe lesiGerman, embikwesicumbi lesikhulu sebantfu lebesibonga futsi sijabule kakhulu. Njengalabodzadze lababili, bamemeteli baseGermany basebentisa leliBhayibheli lelakhululwa nabasemsebentini wekushumayela.
