1-2. Ngutiphi timo bantfu baJehova labahlangabetana nato, futsi tibatsintsa njani?

CABANGA nganati tibonelo letintsatfu; umzalwane losemusha watjelwa ngudokotela wakhe kutsi bekanesifo lesibi lebesitawumenta aphelelwe ngemandla kancane kancane. Umzalwane lobekakhutsele emsebentini wekutiphilisa lobekaneminyaka lengetulu kwalengu-50 walahlekelwa ngumsebenti wakhe, futsi ngetulu kwemetamo yekutfola lomunye umsebenti, akazange awutfole. Dzadze lowetsembekile futsi losakhulile akasakhoni kwenta lokunyenti emsebentini waJehova njengobe bekakhona esikhatsini lesendlulile.

² Nangabe ubhekene netimo letifana naleti lesisandza kutichaza, ungativa shengatsi awukabaluleki. Letimo leti tingakwenta ungasajabuli, tikwente utive ungakabaluleki, futsi tingabutsintsa buhlobo lonabo nalabanye bantfu.

3. Sathane kanye nalabo labamlingiselako bakutsatsa njani kuphila kwemuntfu?

³ Lelive liyiveta kahle indlela Sathane lakutsatsa ngayo kuphila kwebantfu. Kusukela kadzeni, Sathane bekatsatsa bantfu njengalabo labangakabaluleki. Watjela Eva kutsi bekatawukhululeka nangabe angamlaleli Nkulunkulu ngisho nobe bekati kutsi bekatawufa. Sathane solo uyachubeka acondzisa tekutsengiselana, tepolitiki kanye netinkholo temanga emhlabeni. Ngako akumangalisi kutsi bosomabhizinisi labanyenti, bosopolitiki kanye nebaholi benkholo abakhombisi kutsi bayakuhlonipha kuphila futsi abanandzaba nendlela bantfu labativa ngayo.

4. Yini lesitawucoca ngayo kulesihloko?

 ⁴ Ngalokwehlukile, Jehova ufuna sitive sibalulekile futsi uyasisekela nangabe sibhekene netimo letisenta sitive singakabaluleki. (Hla. 136:23; Rom. 12:3) Kulesihloko, sitawucoca ngekutsi Jehova usisita njani nasibhekene nanati timo letilandzelako: (1) Nasibhekene nekugula, (2) nasibhekene netinkinga temnotfo nalapho (3) kukhula ngemnyaka kungasenta sitive shengatsi kute lokunganani lesingakwenta emsebentini waJehova. Kwekucala, sitawufundza ngekutsi kungani kufanele siciniseke kutsi ngamunye wetfu uligugu kuJehova.

5. Yini lefakazela kutsi siligugu kuJehova?

⁵ Ngisho nobe sentiwe ngelutfuli lwemhlabatsi, siligugu kakhulu. (Gen. 2:7) Cabanga ngetizatfu letisenta sati kutsi siligugu kuJehova. Wadala bantfu baba nelikhono lekulingisa buntfu bakhe. (Gen. 1:27) Ngekwenta njalo, wenta bantfu baba ncono kakhulu kunato tonkhe tintfo latidala emhlabeni.—Hla. 8:4-8.

6. Ngubuphi lobunye bufakazi lesinabo bekutsi siligugu kuJehova?

⁶ Ngisho nangemuva kwekutsi Adamu one, bantfu bachubeka baligugu kuJehova. Siligugu kakhulu kuye kangangekutsi waze wanikela ngendvodzana yakhe layitsandzako lenguJesu, kutsi ibe ngumhlatjelo wetono tetfu. (1 Joh. 4:9, 10) Umhlatjelo waJesu utasizuzisa kakhulu ngobe Jehova utawuvusa bonkhe labafa ngenca yesono sa-Adamu lokufaka ekhatsi ‘labalungile nalabangakalungi.’ (Imis. 24:15) LiVi lakhe liyakhombisa kutsi siligugu kuye ngisho nobe sigula, siphuyile nobe sesikhulile ngemnyaka.—Imis. 10:34, 35.

7. Ngutiphi letinye tizatfu tikhonti taNkulunkulu letinato letitenta tikholwe kutsi tiligugu kuJehova?

⁷ Sinetizatfu letinyenti letisenta sikholwe kutsi siligugu kuJehova. Usisondzete kuye, futsi wayinaka indlela lesatemukela ngayo tindzaba letimnandzi. (Joh. 6:44) Njengobe sasondzela kuJehova, naye wasondzela kitsi. (Jak. 4:8) Jehova utinika sikhatsi kanye nemandla kuze asifundzise, lokukhombisa kona kutsi siligugu kuye. Uyati kutsi sibantfu labanjani nyalo, uyati nalapho singatfutfukisa khona futsi uyasiyala ngobe uyasitsandza. (Taga 3:11, 12) Loku kubufakazi bekutsi siligugu kuJehova!

8. Emavi lakuTihlabelelo 18:27-29, ayitsintsa njani indlela lesicabanga ngayo ngetinkinga tetfu?

⁸ Labanye bebatsatasa iNkhosi Davide njengaleyo lebeyingakabaluleki, kodvwa Davide bekati kutsi Jehova uyamtsandza futsi uyamsekela. Ngesizatfu sekutsi Davide bekakwati loku, kwamsita wakhona kubeketelela lesimo anembono lokahle. (2 Sam. 16:5-7) Nangabe sitiva sicindzetelekile nobe sibhekene netinkinga, Jehova angasisita sibone tintfo ngendlela leyehlukile futsi angasisita sikhone kulwisana naleto tinkinga. (Fundza Tihlabelelo 18:27-29.) Nangabe sisekelwa nguJehova, kute lokungasivimba kutsi simkhonte sijabulile. (Rom. 8:31) Nyalo sitawucoca ngaletintfo letintsatfu letiyinhloko lapho kufanele sikhumbule khona kutsi siligugu kuJehova nekutsi uyasitsandza.

9. Kugula kungayitsintsa njani indlela lesititsatsa ngayo?

⁹ Kugula kungayitsintsa indlela lesitiva ngayo futsi kungasenta sitive shengatsi asisilutfo kulabanye. Singativa sinemahloni nangabe sibona kutsi bantfu bayanaka kutsi kukhona lokungahambi kahle  ngatsi nobe nangabe kufanele setsembele kulabanye kuze basisite. Ngisho nobe labanye bangeke bati kutsi siyagula, singahle sitive sinemahloni ngenca yekutsi asisakhoni kwenta tintfo lebesikhona kutenta esikhatsini lesendlulile. Ngisho nobe sibhekene netimo letisicindzetela njengaleti, Jehova uyasikhutsata. Kanjani?

10. Ngekusho kweTaga 12:25, yini lengasisita nangabe sigula?

¹⁰ Nangabe sigula, livi lemusa lingasikhutsata. (Fundza Taga 12:25.) EBhayibhelini, Jehova ubhale emavi emusa lasikhumbuta kutsi siligugu kuye ngisho nobe sigula. (Hla. 31:19; 41:3) Nangabe silifundza njalo liVi leliphefumulelwe liBhayibheli, Jehova utasisita sikhone kubhekana nemiva lengakafanele lesiba nayo ngenca yekutsi siyagula.

11. Lomunye umzalwane walutfola njani lusito lwaJehova?

¹¹ Cabanga ngaloko lokwenteka kuJorge. Nakasemncane, Jorge wacalwa sifo lesasheshe saba sibi kakhulu futsi samenta wativa angakabaluleki. Jorge utsi: “Bengingakayilungeli indlela lesifo lebesingenta ngitive ngayo, ngobe besingidvonsela emehlo ebantfu. Njengobe kugula kwami bekuba kubi kakhulu, ngacabanga ngendlela kuphila kwami lobekutawushintja ngayo. Ngeva buhlungu kakhulu futsi ngacela Jehova kutsi angisite.” Jehova wamsita njani Jorge? Utsi: “Ngenca yekutsi bengingakhoni kunaka lokwentekako, ngakhutsatwa kutsi ngifundze tigaba letimbalwa kuTihlabelelo lebetikhombisa kutsi Jehova uyatikhatsalela tikhonti takhe. LemiBhalo bengiyifundza njalo ngelilanga futsi beyingidvudvuta. Ngekuhamba kwesikhatsi, bantfu base bayabona kutsi sengihlala ngimoyitela, bebaze basho nekutsi  kuhlala kwami ngijabulile kuyabakhutsata. Ngabona kutsi Jehova bekayiphendvulile imithantazo yami, wangisita ngayishintja indlela lebengitiva ngayo. Ngacala kukunaka loko lobekushiwo liVi lakhe ngendlela langitsatsa ngayo ngisho nobe bengigula.”

12. Nangabe ugula, yini longayenta kuze usitwe nguJehova?

¹² Nangabe ugula, ciniseka kutsi Jehova uyakwati lobhekene nako. Mncenge kutsi akusite kuze ube nembono lokahle ngaloko lokwentekako kuwe. Fundza liBhayibheli kuze utfole umlayeto lodvudvutako Jehova lawubhale kulo. Naka kakhulu emavesi lakhombisa kutsi tinceku taJehova tiligugu kakhulu kuye. Nawenta njalo, utawubona kutsi Jehova unemusa kubo bonkhe labo labamkhonta ngekwetsembeka.—Hla. 84:11.

13. Inhloko yelikhaya ingativa njani nayilahlekelwa ngumsebenti wekutiphilisa?

¹³ Tonkhe tinhloko temindeni tinesifiso sekuniketa imindeni yato konkhe lekudzingako. Asesitsi umzalwane ulahlekelwa ngumsebenti wekutiphilisa ngisho nobe kute lokubi lakwentile futsi wetama kamatima kutfola lomunye umsebenti kodvwa akawutfoli. Nakabhekene nalesimo, angativa angakabaluleki. Kukhumbula tetsembiso taJehova kungamsita njani lomzalwane?

14. Kungani Jehova atifeza tetsembiso takhe?

¹⁴ Jehova uhlale atifeza tetsembiso takhe. (Josh. 21:45; 23:14) Loko ukwenta ngenca yetizatfu letinyenti. Sizatfu sekucala kutsi loko kuyalitsintsa libito lakhe lelihle kanye nelidvumela lakhe. Jehova uyetsembisa kutsi utatinakekela tikhonti  takhe letetsembekile, futsi loko kumenta akufanele kusifeza lesetsembiso. (Hla. 31:1-3) Ngetulu kwaloko, Jehova uyati kutsi besitawuva buhlungu futsi sidvumale nangabe angabakhatsaleli labo labayincenye yemndeni wakhe. Jehova wetsembisa kusiniketa konkhe lesikudzingako kuze siphile naloko lesikudzingako kuze sichubeke simkhonta ngekwetsembeka futsi kute lokutamvimba kutsi asifeze leso setsembiso!—Mat. 6:30-33; 24:45.

15. (a) Nguyiphi inkinga emaKhristu angelikhulu lekucala labhekana nayo? (b) Umbhalo weTihlabelelo 37:18, 19, usisita kutsi siciniseke ngani?

¹⁵ Nangabe sikhumbula kutsi kungani Jehova atifeza tetsembiso takhe, singaciniseka kutsi utawusisita nangabe sibhekene netinkinga temnotfo. Cabanga ngesibonelo semaKhristu angelikhulu lekucala. Ngesikhatsi libandla lebeliseJerusalema licala kushushiswa kamatima, ‘bonkhe basakateka, kwasala baphostoli.’ (Imis. 8:1) Cabanga nje kutsi loko bekungabe kusho kutsini. Bebatawulahlekelwa yimali lenyenti. EmaKhristu lamanyenti alahlekelwa ngemakhaya awo kanye nemabhizinisi awo. Nobe kunjalo, Jehova akazange awalahle futsi achubeka ajabula. (Imis. 8:4; Heb. 13:5, 6; Jak. 1:2, 3) Jehova wawasekela lamaKhristu letsembekile futsi natsi utasisekela.—Fundza Tihlabelelo 37:18, 19.

16. Yini lengasenta sicabange kutsi kukhonta kwetfu Jehova ngeke kube ligugu kuye?

¹⁶ Njengobe sikhula ngeminyaka, singacala kutiva shengatsi sekuncane lesikwentela Jehova. Kungenteka nekutsi iNkhosi Davide yake yaba nemiva lefanako njengobe beyikhula ngeminyaka. (Hla. 71:9) Jehova angasisita njani?

17. Yini lesingayifundza kuloko lokwenteka kudzadze lokutsiwa nguJheri?

 ¹⁷ Cabanga ngaloko lokwenteka kudzadze lokutsiwa nguJheri. Wamenywa kutsi aye emhlanganweni lobewuwekucecesha ekunakekeleni kwemaHholwa eMbuso, kodvwa bekangafuni kuya. Utsi: “Besengimdzala, ngingumfelokati, futsi ngite ngisho nalinye likhono Jehova lebekangalisebentisa kimi.” Ngaphambi kwekutsi lokuceceshwa kucale, watfululela sifuba sakhe kuJehova ngemthantazo. Nakafika eHholweni leMbuso ngelilanga lelilandzelako, bekasolo atibuta kutsi kufanele yini vele abe khona. Nakusachubeka loluhlelo, lomunye umzalwane wagcizelela kutsi likhono lesinalo lelibalulekile kutsi sivume kufundziswa nguJehova. Jheri utsi: “Ngakhumbula kutsi ‘nginalo lelikhono!’ ngakhala njengobe bengibona kutsi Jehova uyawuphendvula umthantazo wami. Jehova bekangicinisekisa kutsi kimi kunalokutsite lokuligugu kakhulu nekutsi bekatimisele kungifundzisa. Ngangena kulomhlangano ngineluvalo, futsi ngidvumatekile, kodvwa ngatsi nangiphuma kuwo benginesibindzi, ngikhutsatekile futsi ngitiva kutsi ngiligugu!”

18. LiBhayibheli likhombisa njani kutsi sichubeka siligugu kuJehova ngisho nobe sikhula ngeminyaka?

¹⁸ Njengobe sikhula ngeminyaka, kufanele siciniseke kutsi kusenemsebenti lomnyenti Jehova lafuna siwente. (Hla. 92:12-15) Jesu wasifundzisa kutsi nobe ngabe sinemakhono lamancane kangakanani nobe ngabe sesiphelelwa ngemandla, Jehova uyakujabulela konkhe lesikhona kukwenta emsebentini wakhe. (Luk. 21:2-4) Ngako asinake loko lesingakhona kukwenta. Nasi sibonelo, ungakhuluma ngaJehova, uthantazele bazalwane nabodzadze, nobe ukhutsate labanye kutsi bahlale betsembekile. Jehova ukutsatsa njengesisebenti sakhe, hhayi ngenca yaloko lokhona kukwenta kodvwa ngenca yekutimisela kwakho kumlalela.—1 Khor. 3:5-9.

19. UmBhalo waRoma 8:38, 39, usicinisekisa ngani?

¹⁹ Sijabula kakhulu ngekukhonta Jehova, longuNkulunkulu lobatsatsa njengalabaligugu kakhulu labo labamkhontako! Wasidala kutsi sente intsandvo yakhe, futsi kukhonta kweliciniso lokusenta sijabule ekuphileni. (Semb. 4:11) Ngisho nobe kulelive sibonakala sibantfu labangesilutfo, Jehova akasitsatsi ngaleyondlela. (Heb. 11:16, 38) Nasitiva sidvumatekile ngenca yekugula, tinkinga tetemnotfo, nobe kukhula ngeminyaka, kufanele sikhumbule kutsi kute lokungasehlukanisa naBabe wetfu losezulwini lositsandzako.—Fundza Roma 8:38, 39.