1. Ngumiphi imibuto dzadze longakashadi lokufanele atibute yona nakafuna kukhetsa umuntfu latawushada naye?

ONKHE emaKhristu angephansi kweligunya laJesu Khristu, longumholi lote sono. Kodvwa nangabe dzadze ashada, uba ngephansi kweligunya lendvodza yakhe lenesono. Loko ngeke kube melula ngaso sonkhe sikhatsi. Ngako nakacabanga kushada nemzalwane lotsite, kufanele atibute: ‘Yini lekhombisa kutsi lomzalwane utawuba yinhloko yemndeni lekahle? Kukhonta Jehova kuta kucala yini ekuphileni kwakhe? Nangabe kungeti kucala, yini lengenta ngicabange kutsi lomzalwane utasisita kutsi sibe nebuhlobo lobuhle naJehova nasesishadile?’ Kuliciniso kutsi nadzadze angatibuta: ‘Ngubuphi buntfu lenginabo lobutawuzuzisa umshado wetfu? Ngiyabeketela futsi ngiyephana yini? Nginebuhlobo lobucinile yini naJehova?’ (Shu. 4:9, 12) Nangabe dzadze enta tincumo letikahle ngaphambi kwekutsi ashade, loko kutawenta kutsi umshado wakhe uphumelele futsi ujabulise.

2. Sitawucoca ngani kulesihloko?

² Tigidzi tabodzadze labangemaKhristu labahlonipha emadvodza abo basibonelo lesihle. Kufanele babongwe! Sijabula kakhulu kukhonta Jehova sinalabodzadze labetsembekile! Kulesihloko, sitawucoca ngetimphendvulo temibuto lemitsatfu: (1) Ngutiphi tinkinga bafati labangase babhekane nato? (2) Kungani umfati akhetsa kulalela indvodza yakhe? (3) Yini lengafundvwa madvodza nebafati ngekulalela esibonelweni saJesu, Abigayili, naMariya lobekangumfati waJosefa namake waJesu?

3. Kungani imishado iba netinkinga?

³ Umshado usipho lesihle lesivela kuNkulunkulu, kodvwa bantfu banesono. (1 Joh. 1:8) Kungako liVi laNkulunkulu lecwayisa labo labashadile kutsi batawuba netinkinga letichazwe ngekutsi ‘lusizi enyameni.’ (1 Khor. 7:28) Sitawucoca ngetintfo letimbalwa letingaba yinkinga kumfati.

4. Kungani umfati angahle acabange kutsi kulihlazo kulalela indvodza yakhe?

⁴ Ngesizatfu sendlela lakhuliswe ngayo, umfati angahle acabange kutsi kulihlazo kulalela indvodza yakhe. Marisol lohlala eMelika utsi: “Endzaweni yakitsi, bafati bebahlale batjelwa kutsi bayalingana nemadvodza kuto tonkhe tintfo. Ngiyati kutsi Jehova unikete emadvodza ligunya futsi ufuna kutsi bafati bawalalele, kodvwa nebafati bayakudzinga kuhlonishwa. Kumatima kuhlale ngihlonipha ligunya lendvodza yami ngobe bantfu batsi kufanele ngingakwenti loko.”

5. Ngumiphi imibono lekabi lamanye emadvodza lanayo mayelana nebafati?

⁵ Kungenteka umfati ashade nendvodza lecabanga kutsi bafati abakabaluleki kunemadvodza. Dzadze lokutsiwa ngu-Ivon, lohlala eSouth America utsi: “Endzaweni lengihlala kuyo, emadvodza adla kucala, bese kulandzela bafati. Emantfombatane lamancane kulindzeleke kutsi apheke futsi ahlante indlu, kodvwa bafana baphakelwa kudla bomake wabo nabosisi wabo, futsi batjelwa kutsi ‘makhosana.’” Dzadze longu-Yingling, lohlala e-Asia utsi: “Ngelulwimi lwami kunesisho lesitsi bafati akudzingeki bahlakaniphe nobe babe nemakhono latsite. Kudzingeka bawente wonkhe umsebenti wasendlini, kodvwa abakavumeleki kutsi batjele emadvodza abo imibono yabo.” Indvodza lete lutsandvo futsi lengakwenti loko lokushiwo liBhayibheli yenta kuphila kwemfati wayo kube matima, iyehluleka kulingisa Jesu, futsi ivisa Jehova buhlungu.—Ef. 5:28, 29; 1 Phet. 3:7.

6. Yini bafati lokudzingeka bayente kuze bacinise buhlobo babo naJehova?

⁶ Njengobe sibonile esehlukweni lesendlulile, Jehova ulindzele kutsi emadvodza abe nendzaba nendlela imndeni yawo letiva ngayo futsi ayinakekele ngetintfo lotidzingako kuze uphile aphindze awusite kutsi ukhonte Nkulunkulu. (1 Thim. 5:8) Nobe kunjalo, bodzadze labashadile kudzingeka babe nesikhatsi sekufundza liVi laNkulunkulu onkhe malanga futsi bazindle ngalo, baphindze bathantaze kuJehova ngalokusuka enhlitiyweni. Loku kungaba matima. Bafati bahlale bamatasatasa, ngako bangeva shengatsi bete sikhatsi nobe emandla ekwenta tonkhe letintfo. Kodvwa kubalulekile kutsi batakhele sikhatsi. Leni? Kungobe Jehova ufuna kutsi sonkhe sicinise buhlobo lesinabo naye.—Imis. 17:27.

7. Yini lengenta kube melula ngemfati kutsi alalele futsi ahloniphe indvodza yakhe?

⁷ Kuliciniso kutsi umfati kungadzingeka asebente kamatima kuze alalele futsi ahloniphe indvodza yakhe lenesono. Nanobe kunjalo, umfati utawukhona kukwenta loku nangabe aticondza tizatfu letiseBhayibhelini tekutsi kungani kufanele alalele futsi ahloniphe indvodza yakhe.

8. Njengobe kuvetiwe Kubase-Efesu 5:22-24, kungani umfati longumKhristu akhetsa kutfobela indvodza yakhe?

⁸ Umfati longumKhristu ukhetsa kuyitfobela indvodza yakhe ngobe nguloko Jehova lakufunako kuye. (Fundza Kubase-Efesu 5:22-24.) Uyametsemba Babe wakhe losezulwini, uyati kutsi uyamtsandza  futsi uyati kutsi angeke amcele kutsi ente intfo letamlimata.—Dut. 6:24; 1 Joh. 5:3.

9. Yini leyentekako nangabe umfati ahlonipha ligunya lendvodza yakhe?

⁹ Lelive likhutsata bafati kutsi bangayilaleli imitsetfo yaJehova futsi batsatse kutfobeka njengentfo letabehlisela sitfunti. Kuliciniso kutsi labo labakhutsata imibono lenjalo, abamati Nkulunkulu wetfu lositsandzako. Jehova angeke anikete emadvodzakati akhe laligugu imiyalo letawuwehlisela sitfunti. Dzadze losebenta kamatima kuze alalele Jehova ngekutsi atfobele indvodza yakhe, usita umndeni wakhe kutsi ube nekuthula. (Hla. 119:165) Loko kuyamzuzisa lodzadze, kuzuzise nendvodza yakhe kanye nebantfwana bakhe.

10. Ngutiphi tifundvo lesingatifundza kuloko lokwashiwo nguCarol?

¹⁰ Umfati loyitfobelako indvodza yakhe ukhombisa kutsi uyamtsandza Jehova futsi uyamhlonipha, njengobe kunguye lowasungula bunhloko. Carol lohlala eSouth America utsi: “Ngiyati kutsi indvodza yami itawenta emaphutsa. Ngiyati nekutsi indlela lengiyiphatsa ngayo nayente lawo maphutsa ikhombisa kutsi ngibutsasa njengalobubaluleke kangakanani buhlobo bami naJehova. Ngako ngetama kuhlale ngiyitfobela ngobe ngifuna kujabulisa Babe wami losezulwini.”

11. Yini lesita dzadze Aneese kutsi abe ngumuntfu lotsetselelako, futsi yini lesingayifundza kuloko lakusho?

¹¹ Kungaba matima ngemfati kutsi ahloniphe indvodza yakhe futsi ayitfobele nangabe eva shengatsi ayinendzaba nendlela lativa ngayo nangaloko lokumkhatsatako. Kodvwa naka kutsi yini leyentiwa ngulomunye dzadze loshadile lokutsiwa ngu-Aneese nakwenteka loko. Utsi: “Ngetama kungatfukutseli. Ngiyakhumbula kutsi sonkhe siyawenta emaphutsa. Umgomo wami kutsetselela ngalokukhululekile, njengobe naJehova enta. Nangitsetselela ngiba nekuthula kwengcondvo.” (Hla. 86:5) Umfati lotsetselelako uvame kukutfola kumelula kutfobela indvodza yakhe.

12. Ngutiphi tibonelo letiseBhayibhelini?

¹² Labanye bantfu bacabanga kutsi umuntfu lohloniphako ute sibindzi. Kodwa lawo  ngemanga laluhlata. LiBhayibheli linetibonelo letinyenti tebantfu lebebahlonipha futsi banesibindzi. Cabanga ngaloko lesingakufundza kuJesu, Abigayili naMariya.

13. Chaza kutsi kungani Jesu ahlonipha ligunya laJehova?

¹³ Jesu uyalihlonipha ligunya laJehova, hhayi ngobe angakahlakaniphi nobe ete emakhono latsite. Bekafundzisa ngendlela lemelula nalecacile futsi loko kuyakhombisa kutsi uhlakaniphile. (Joh. 7:45, 46) Jehova bekati kutsi Jesu unemakhono latsite, futsi wamvumela kutsi asebente naye ngesikhatsi adala tonkhe tintfo ezulwini nasemhlabeni. (Taga 8:30; Heb. 1:2-4) Ngemuva kwekutsi Jehova avuse Jesu, wamnika “lonkhe ligunya ezulwini nasemhlabeni.” (Mat. 28:18) Ngisho nobe Jesu anemakhono lamanyenti, uyachubeka acela sicondziso kuJehova. Leni? Kungobe uyamtsandza Babe wakhe.—Joh. 14:31.

14. Emadvodza angafundzani (a) endleleni Jehova labatsatsa ngayo bafati? (b) kuloko lokushiwo Taga sehluko 31?

¹⁴ Loko emadvodza langakufundza. Jehova akazange ente umfati kutsi ahloniphe indvodza yakhe ngesizatfu sekutsi utsatsa bafati njengalabangakabaluleki kunemadvodza. Loku sikusho ngobe Jehova wakhetsa bafati kanye nemadvodza kutsi babuse naJesu. (Gal. 3:26-29) Jehova wakhombisa kutsi uyayetsemba iNdvodzana yakhe ngekutsi ayinikete ligunya. Ngendlela lefanako, indvodza lehlakaniphile itawuniketa umfati wayo ligunya. LiBhayibheli likhuluma ngetintfo letingentiwa ngumfati lonelikhono. Sibonelo kutsi uwenta kahle umsebenti wakhe wasekhaya, utsenga umhlaba aphindze awutsengise, ente nelibhizinisi kuze atfole imali. (Fundza Taga 31:15, 16, 18.) Akasiso sigcili, sona lesite lilungelo lekusho umbono waso. Kunaloko, indvodza yakhe iyametsemba futsi iyayilalela imibono yakhe. (Fundza Taga 31:11, 26, 27.) Nangabe indvodza iphatsa umfati wayo ngenhlonipho, lomfati utakujabulela kuyilalela.

15. Bafati bangafundzani esibonelweni saJesu?

¹⁵ Loko lokungafundvwa bafati. Ngisho nobe Jesu afeza tintfo letinyenti, akacabangi kutsi kulalela Jehova kutamehlisela sitfunti. (1 Khor. 15:28; Fil. 2:5, 6) Ngendlela lefanako, umfati lohlakaniphile lolandzela sibonelo saJesu angeke ative ahlazeka nakalalela indvodza yakhe. Utayisekela indvodza yakhe, hhayi nje kuphela ngobe ayitsandza kodvwa ngobe atsandza Jehova futsi amhlonipha.

16. Ngekusho kwa-1 Samuweli 25:3, 23-28, ngutiphi tinkinga Abigayili labhekana nato? (Buka sitfombe lesisekhasini lekucala.)

¹⁶ Abigayili abenendvodza lokutsiwa nguNabali. Bekayindvodza leticabangela yona, letigcabhako futsi lengabongi. Nobe kunjalo, Abigayili akazange afune kuyishiya. Bekangathula futsi avumele Davide nelibutfo lakhe kutsi bayibulale lendvodza yakhe. Kunaloko, wenta umetamo kuze ayivikele kanye nemndeni wabo lomkhulu. Cabanga ngesibindzi Abigayili lokwadzingeka abe naso sekuya emadvodzeni langu-400 lahlomile futsi ngenhlonipho akhulume naDavide. Bekakulungele kucolisa ngaloko lobekwentiwe yindvodza yakhe. (Fundza 1 Samuweli 25:3, 23-28.) Davide wabona kutsi Jehova usebentise lomfati lonesibindzi kuze amnike seluleko lebesitamvimba ekwenteni liphutsa lelikhulu.

17. Yini emadvodza langayifundza endzabeni yaDavide na-Abigayili?

¹⁷ Loko emadvodza langakufundza. Abigayili bekangumfati lohlakaniphile. Davide wenta ngekuhlakanipha futsi wasilalela seluleko sakhe. Ngenca yaloko, akazange ababulale bantfu labete licala. Ngendlela lefanako, indvodza lehlakaniphile  itawucabangisisa ngemibono yemfati wayo ngaphambi kwekutsi yente tincumo letibalulekile. Kungenteka lombono wemfati wayo ungayisita kuze igweme kwenta sincumo lesingakahlakaniphi.

18. Bafati bangafundzani esibonelweni sa-Abigayili?

¹⁸ Loko bafati labangakufundza. Umfati lotsandza Jehova futsi lomhloniphako angasita umndeni wakhe ngisho nobe indvodza yakhe ingamkhonti Jehova futsi ingaphili ngetimiso takhe. Ngeke afune tindlela tekucedza umshado wakhe. Kunaloko, ngenhlonipho nangekutfobeka, utawetama kusita indvodza yakhe kutsi ifundze ngaJehova. (1 Phet. 3:1, 2) Kodvwa ngisho nobe indvodza yakhe ikhetsa kungamkhonti Jehova, Jehova utawujabula nakabona lomfati ayilalela indvodza yakhe futsi etsembeka kuyo.

19. Kunini lapho khona umfati kungakafaneli alalele indvodza yakhe?

¹⁹ Umfati longumKhristu angeke ayilalele indvodza yakhe nayimtjela kutsi angalaleli imitsetfo netimiso letiseBhayibhelini. Nasi sibonelo, asesitsi dzadze unendvodza lengasuye Fakazi, futsi imtjela kutsi acambe emanga, ebe, nobe ente intfo letawuvisa Jehova buhlungu. Onkhe emaKhristu, lokufaka ekhatsi bodzadze labashadile, kufanele balalele Jehova Nkulunkulu kucala. Nangabe dzadze acelwa kutsi angalaleli timiso letiseBhayibhelini, kufanele angavumi futsi achaze ngemusa nangesibindzi kutsi kungani angeke akwente loko.—Imis. 5:29.

20. Sati ngani kutsi Mariya bekanebuhlobo lobuhle naJehova?

²⁰ Mariya bekanebuhlobo lobuhle naJehova. Bekayati kahle imiBhalo. Nakakhuluma na-Elizabethe, lokungumake waJohane uMbhabhatisi, Mariya wacaphuna imiBhalo yesiHebheru tikhatsi letingetulu kwa-20. (Luk. 1:46-55) Cabanga nganaku: Ngisho nobe Mariya beketsembisene umshado naJosefa, kodvwa ingilosi yaJehova ayizange icale ikhulume naJosefa. Lengilosi yacale yakhuluma naMariya, yamtjela kutsi utawubeleka iNdvodzana yaNkulunkulu. (Luk. 1:26-33) Jehova bekamati kahle Mariya, futsi bekaciniseka kutsi utayitsandza  futsi ayiphatse kahle iNdvodzana yakhe. Siyaciniseka kutsi Mariya wachubeka anebuhlobo lobuhle naJehova nangemuva kwekufa nekuvuswa kwaJesu wayophila ezulwini.—Imis. 1:14.

21. Emadvodza angafundzani kuloko liBhayibheli lelikushoko ngaMariya?

²¹ Loko emadvodza langakufundza. Indvodza lehlakaniphile iyajabula nangabe umfati wayo ayati kahle imiBhalo. Ayimtfukutseleli futsi icabange kutsi ufuna kuba yinhloko yemndeni. Iyati kutsi nangabe umfati wayo alati kahle liBhayibheli netimiso letikulo, angawusita umndeni wakhe. Ngisho nobe umfati afundze kakhulu kunendvodza, kungumsebenti wendvodza kuhola ekukhonteni kwemndeni nakuletinye tintfo letiphatselene naNkulunkulu.—Ef. 6:4.

22. Bafati bangafundzani kuMariya?

²² Loko lokungafundvwa bafati. Umfati kufanele ayilalele indvodza yakhe, kodvwa naye unemtfwalo wekucinisa buhlobo bakhe naJehova. (Gal. 6:5) Kufanele atibekele sikhatsi sekutsi atidadishele liBhayibheli futsi azindle ngalo. Loko kutamsita kutsi achubeke amtsandza Jehova futsi amhlonipha. Kutawuphindze kumsite akujabulele kulalela indvodza yakhe.

23. Bafati labalalelako bangatisita njani bona, imindeni yabo kanye nelibandla?

²³ Bafati labachubeka batfobela emadvodza abo ngesizatfu sekutsi batsandza Jehova, batawujabula kakhulu futsi benetiseke kwendlula labo labangafuni kutfobela lilungiselelo laJehova lebunhloko. Basibonelo lesihle kubazalwane nakubodzadze labasebasha. Benta kutsi kube nelutsandvo nekuthula emndenini nasebandleni. (Thit. 2:3-5) Tikhonti taJehova letinyenti letetsembekile lamuhla takhiwa bafati. (Hla. 68:11) Sonkhe singenta lokutsite kuze sente libandla lijabule. Esihlokweni lesilandzelako sitawucoca ngekutsi singakwenta njani loko.